ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຕອນຄ່ຳວັນທີ 14 ກຸມພານີ້, ໃນການແຂ່ງຂັນສະກີລີລາກາງເວຫາເພດຍິງຮອບຊີງຊະນະເລີດຂອງລາຍການສະກີທ່າຟຣີສະຕາຍໃນງານໂອລິມປິກລະດູໜາວປັກກິ່ງ, ນາງສີເມີ້ງທາວ ທີ່ໄດ້ເຂົ້າຮ່ວມງານກິລາໂອລິມປິກລະດູໜາວມາແລ້ວ 4 ຄັ້ງນັ້ນໄດ້ຮັບຫຼຽນຄຳ, ຄົນທັງຫຼາຍໄດ້ໂຮ່ຮ້ອງຊົມເຊີຍໃຫ້ແກ່ “ນັກກິລາອາວຸໂສ”ທີ່ໄດ້ຍຶດໝັ້ນມາ 16 ປີ ແລ້ວເຮັດໃຫ້ຄວາມໃຝ່ຝັນບັນລຸຜົນເປັນຈິງໃນທີ່ສຸດ, ແລະກໍຮູ້ສຶກປະທັບໃຈຫຼາຍຕໍ່ການກະທຳຂອງນາງອັສເລ ຄາດເວ ນັກກິລາອາເມຣິກາຫຼັງຈາກການແຂ່ງຂັນ.
“ທາວທາວ ແຊ້ມປ້ຽນໂອລິມປິກ!” “ຂ້ອຍຮູ້ສຶກພາກພູມໃຈນຳເຈົ້າຫຼາຍ!”
ຫຼັງຈາກແນ່ໃຈວ່າ ນາງສີເມີ້ງທາວໄດ້ຮັບຫຼຽນຄຳແລ້ວ, ນາງອັສເລ ຄາດເວກໍແລ່ນໄປກອດກັບນາງສີເມີ້ງທາວທີ່ພວມຢູ່ໃນຄວາມຕື່ນເຕັ້ນໃຈຢ່າງສະໜິດແໜ້ນໃນທັນທີ, ເອີ້ນນາງສີເມີ້ງທາວວ່າ “ທາວທາວ” ຢ່າງສະໜິດສະໜົມກັນ, ພ້ອມທັງຊົມເຊີຍທີ່ນາງຍາດໄດ້ແຊ້ມປ້ຽນໂອລິມປິກຢູ່ບ້ານເກີດຂອງຕົນ.
ພາບນີ້ໄດ້ເຮັດໃຫ້ຫຼາຍຄົນຮູ້ສຶກອົບອຸ່ນ. ຜູ້ໃຊ້ອິນເຕີເນັດພາຍໃນປະເທດຈີນພາກັນກ່າວວ່າ, ການທີ່ເປັນຄູ່ແຂ່ງຂັນ ທັງເປັນເພື່ອນມິດກັນ, ນີ້ຄືຈິດໃຈໂອລິມປິກ, ນັກກິລາທຸກຄົນທີ່ບຸກບືນສູ້ຊົນເພື່ອບັນລຸຄວາມໃຝ່ຝັນຂອງຕົນລ້ວນແຕ່ເປັນໜ້າເຄົາລົບນັບຖືຫຼາຍ.
ຜູ້ໃຊ້ອິນເຕີເນັດຕ່າງປະເທດກໍໄດ້ຍ້ອງຍໍວ່າ, ພາບທີ່ນາງທັງສອງຄົນກອດກັນ ຈັ່ງແມ່ນເປັນພາບພິເສດ ແລະ“ດີງາມຫຼາຍ”, ເຊິ່ງສະແດງໃຫ້ເຫັນເຖິງຈິດໃຈກິລາຢ່າງແທ້ຈິງ. ມີຜູ້ໃຊ້ອິນເຕີເນັດການາດາຄົນໜຶ່ງເວົ້າວ່າ, ຕົນເອງຮູ້ສຶກຕື້ນຕັນໃຈຈົນນ້ຳຕາໄຫຼຕັ້ງແຕ່ເຊົ້າ.
ງານກິລາໂລອິມປິກບໍ່ພຽງແຕ່ແມ່ນງານມະໂຫລານແຫ່ງການແຂ່ງຂັນເທົ່ານັ້ນ, ແຕ່ຍັງເປັນເວທີທີ່ແລກປ່ຽນຈິດໃຈ, ກໍລະນີເກີດພາບປະທັບໃຈຈາກການສວມກອດກັນຂອງນາງສີເມີ້ງທາວ ກັບນາງອັສເລ ຄາດເວຍັງມີຢູ່ຢ່າງຫຼວງຫຼາຍ.
ວັນທີ 10 ກຸມພານີ້, ຫຼັງຈາກການແຂ່ງຂັນສະກີຊາຍດ່ຽວຂອງລາຍການສະເກັດລີລາໃນງານກິລາໂອລິມປິກລະດູໜາວປັກກິ່ງສິ້ນສຸດລົງ, ທ້າວຈິ່ນໂປຢາງ ນັກກິລາຈີນ ແລະ ທ້າວຮັນຢຸ ຢຸຊຸຣຸ ນັກກິລາຍີ່ປຸ່ນໄດ້ຮ່ວມກັນໃຊ້ມືເຮັດທ່າຮູບຫົວໃຈຢູ່ບ່ອນພັກຜ່ອນ. ໃນການແຂ່ງຂັນເທື່ອນີ້, ນັກກິລາສອງຄົນລ້ວນແຕ່ຢາກບຸກທະລຸຮອດຈຸດສູງສຸດຂອງຕົນ, ເຊິ່ງຄວາມເຄົາລົບກັນລະຫວ່າງສອງຄົນນີ້ ເຮັດໃຫ້ຄົນເຫັນແລ້ວຮູ້ສຶກປະທັບໃຈທີ່ສຸດ.
ວັນທີ 8 ກຸມພານີ້, ໃນການແຂ່ງຂັນສະກີທ່າຟຣີສະຕາຍກາງເວຫາເພດຍິງຮອບຊີງຊະນະເລີດ, ນາງກູໄອ້ຫຼິງ ນັກກິລາຈີນໄດ້ຮັບຫຼຽນຄຳ. ຫຼັງຈາກການແຂ່ງຂັນສິ້ນສຸດລົງແລ້ວ, ນາງກູໄອ້ຫຼິງບໍ່ໄດ້ອອກຈາກສະໜາມແຂ່ງຂັນໃນທັນທີ, ແຕ່ໄດ້ໄປປອບໃຈຄູ່ແຂ່ງຂັນທີ່ກຳລັງສະອື້ນໄຫ້.
ຮູ້ສຶກຕື່ນເຕັ້ນໃຈຍ້ອນການແຂ່ງຂັນ, ຂໍຊົມເຊີຍນັກກິລາຢູ່ບຸກທະລຸຮອດຈຸດສູງສຸດຂອງຕົນ,ພ້ອມທັງຕົບມືຊົມເຊີຍຄວາມສາມັກຄີ ແລະ ຄວາມຮັກແພງກັນ. ໂອລິມປິກບໍ່ແມ່ນມີແຕ່ຫຼຽນຄຳເທົ່ານັ້ນ, ໂອລິມປິກ, ສຸດຍອດເລີຍ!
ຄຳເຫັນ
0