ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຕອນຄ່ຳວັນທີ 20 ກຸມພານີ້, ງານກິລາໂອລິມປິກລະດູໜາວປັກກິ່ງໄດ້ສິ້ນສຸດລົງຢ່າງຈົບງາມ, ຝ່າຍຕ່າງໆລ້ວນແຕ່ໄດ້ສະແດງຄວາມຍ້ອງຍໍຊົມເຊີຍຜົນງານອັນໂດດເດັ່ນຂອງງານຄັ້ງນີ້. ແຕ່ວ່າ, ໃນເວລາທີ່ຄົນທົ່ວໂລກຍັງປະທັບໃຈກັບບັນຍາກາດຂອງງານກິລາໂອລິມປິກລະດູໜາວປັກກິ່ງຢູ່, ພັດມີບາງຄົນໄດ້ສົ່ງສຽງອອກມາຕ່າງຈາກຄົນອື່ນອີກແລ້ວ.
ກ່ອນທີ່ງານກິລາໂອລິມປິກລະດູໜາວປັກກິ່ງຈະສິ້ນສຸດລົງ, “ໜັງສືພິມວໍຊິງຕັນໂພສ” ຂອງອາເມຣິກາສະບັບວັນທີ 18 ກຸມພານີ້ໄດ້ພິມບົດຄວາມທີ່ພາດຫົວຂໍ້ວ່າ: “ການຈັດງານກິລາໂອລິມປິກລະດູໜາວປັກກິ່ງແບບປິດສາມາດສະກັດກັ້ນການແຜ່ລະບາດຂອງພະຍາດໂຄວິດ-19 ໄດ້ແທ້, ແຕ່ພ້ອມດຽວກັນນັ້ນໄດ້ຈຳກັດຄວາມມ່ວນຊື່ນໄປພ້ອມ. ເນື້ອໃນບົດຄວາມຍັງໄດ້ລະບຸວ່າ: ມາດຕະການຄວບຄຸມການແຜ່ລະບາດຂອງພະຍາດໂຄວິດ-19 ທີ່ເຂັ້ມງວດໃນງານກິລາໂອລິມປິກລະດູໜາວປັກກິ່ງ ໄດ້ສ້າງ “ຄວາມກົດດັນທາງຈິດໃຈ” ໃຫ້ກັບນັກກິລາ ແລະ ໄດ້ “ບັງຄັບ” ໃຫ້ອາສາສະໝັກຈີນທີ່ເຕັມໄປດ້ວຍຄວາມກະຕືລືລົ້ນຈຳນວນຫຼວງຫຼາຍຈຳເປັນຕ້ອງມາເຮັດວຽກຢ່າງລຳບາກໃນງານເປັນຫຼາຍອາທິດ. ນອກນີ້, ງົບປະມານໃນການຈັດງານກິລາໂອລິມປິກລະດູໜາວປັກກິ່ງຍັງໄດ້ເພີ່ມຂຶ້ນຢ່າງຫຼວງຫຼາຍ. ເວົ້າລວມແລ້ວ, ງານກິລາໂອລິມປິກລະດູໜາວປັກກິ່ງ “ໄດ້ເຕັມໄປດ້ວຍບັນຍາກາດທີ່ບໍ່ມ່ວນຊື່ນໂດຍທົ່ວໄປ”.
ນະໂອກາດນີ້, ພວກເຮົາກໍຢາກຖາມວ່າ: ຖ້າບໍ່ມີຄວາມປອດໄພ, ຈະສ້າງຄວາມມ່ວນຊື່ນໄດ້ແນວໃດ? ອີກດ້ານໜຶ່ງ, ງານກິລາໂອລິມປິກລະດູໜາວປັກກິ່ງຈະມີຄວາມມ່ວນຊື່ນຫຼືບໍ່, ບໍ່ແມ່ນສື່ມວນຊົນຕາເວັນຕົກມັກເວົ້າໂລເລເປັນຜູ້ຕັດສິນ, ຫາກແມ່ນນັກກິລາແລະຜູ້ເຂົ້າຮ່ວມງານຕົວຈິງ ຈິ່ງມີສິດປະກອບຄຳເຫັນຕໍ່ເລື່ອງນີ້.
ນັບແຕ່ເກີດມີການແຜ່ລະບາດຂອງພະຍາດໂຄວິດ-19 ເປັນຕົ້ນມາ, ງານກິລາລາຍການໃຫຍ່ຕ່າງໆລ້ວນແຕ່ຕ້ອງປະເຊີນໜ້າການທົດສອບດ້ານ “ຄວາມປອດໄພ” ທີ່ຂ້ຽວຂາດ. ໃນໄລຍະຜ່ານມາ, ປະເທດຈີນໄດ້ຜະເຊີນໜ້າກັບສິ່ງທ້າທາຍ ແລະ ໄດ້ຜ່ານຜ່າຄວາມຫຍຸ້ງຍາກຕ່າງໆນາໆ, ຈິ່ງໄດ້ຈັດງານແຂ່ງຂັນກິລາແບບວົງປິດ ເພື່ອຄວາມປອດໄພຂອງນັກກິລາທີ່ເຂົ້າຮ່ວມການແຂ່ງຂັນ ໂດຍຜ່ານຈາກກົນໄກປ້ອງກັນພະຍາດທີ່ມີປະສິດທິພາບສູງ. ປັດຈຸບັນ, ງານກິລາໂອລິມປິກລະດູໜາວປັກກິ່ງໄດ້ສິ້ນສຸດລົງຢ່າງຈົບງາມແລ້ວ, ການແຂ່ງຂັນແບວົງປິດໃນງານກິລາໂອລິມປິກລະດູໜາວປັກກິ່ງບໍ່ໄດ້ເກີດມີການແຜ່ລະບາດຂອງພະຍາດແບບເປັນກຸ່ມ, ນັກກິລາຕ່າງປະເທດແລະເຈົ້າໜ້າທີ່ສາກົນລ້ວນແຕ່ໄດ້ສະແດງຄວາມຍ້ອງຍໍຊົມເຊີຍມາດຕະການປ້ອງກັນພະຍາດທີ່ມີປະສິດທິພາບສູງຂອງງານກິລາໂອລິມປິກລະດູໜາວປັກກິ່ງ.
ພວກເຮົາຍັງຈື່ໄດ້ດີວ່າ: ໃນໄລຍະຫາກໍ່ເປີດງານກິລາໂອລິມປິກລະດູໜາວປັກກິ່ງ, ນັກກິລາຫຼາຍຄົນໄດ້ສະແດງຄວາມຮູ້ສຶກດີໃຈວ່າ, ຕົນໄດ້ມາເຖິງ “ສະຖານທີ່ທີ່ປອດໄພທີ່ສຸດໃນໂລກ”, ທ້າວເລອອນ ໂວເກນສເປີເກີ ນັກກິລາສະກີແປ້ນດ່ຽວຈາກເຢຍລະມັນໄດ້ພິມບົດຄວາມລົງສື່ສັງຄົມອອນລາຍ ໂດຍໄດ້ສະແດງຄວາມຍ້ອງຍໍຊົມເຊີຍວຽກງານປ້ອງກັນພະຍາດທີ່ລະອຽດຖີ່ຖ້ວນ, ອາສາສະໝັກທີ່ເຕັມໄປດ້ວຍຄວາມກະຕືລືລົ້ນ, ການບໍລິການແບບຄົບວົງຈອນໃນບ້ານພັກນັກກິລາ ແລະ ສິ່ງກໍ່ສ້າງແລະສະໜາມແຂ່ງຂັນທີ່ມີຄຸນນະພາບສູງ; ໃນກອງປະຊຸມຖະແຫຼງຂ່າວ, ທ້າວແອຣອນ ບລັງ ນັກກິລາສະກີຂອງອາເມຣິກາຍັງໄດ້ກ່າວຕອບໂຕ້ຂ່າວປອມກ່ຽວກັບງານກິລາໂອລິມປິກລະດູໜາວປັກກິ່ງຂອງສື່ອາເມຣິກາ ແລະ ເຫັນວ່າ: “ນີ້ແມ່ນງານມະໂຫລານທີ່ຫາສິ່ງອື່ນໃດມາປຽບທຽບບໍ່ໄດ້”.
ສ່ວນຖ້ອຍຄຳອັນເຫຼວໄຫຼຂອງສື່ມວນຊົນອາເມຣິກາ, ໄດ້ເຮັດໃຫ້ຊາວເນັດອາເມຣິກາຫຼາຍຄົນຫົວຂວັນ. ມີຊາວເນັດຫຼາຍຄົນໄດ້ປະກອບຄຳຄິດເຫັນຢູ່ຕາມສື່ອອນລາຍຂອງ “ໜັງສືພິມວໍຊິງຕັນໂພສ” ວ່າ: “ໃນຫ້ອງມໍລະສຸມຂອງໂຮງໝໍຢູ່ທ້ອງຖິ່ນຕ່າງໆຂອງອາເມຣິກາ ໃນແຕ່ລະມື້ມີປະຊາຊົນ 2.000 ກວ່າຄົນໄດ້ເສຍຊີວິດ ຍ້ອນພະຍາດໂຄວິດ-19 ນັ້ນ, ມີຄວາມມ່ວນຊື່ນຊັ້ນຫວາ?” “ຕະຫຼອດໄລຍະເກີດມີການແຜ່ລະບາດຂອງພະຍາດໂຄວິດ-19, ເພື່ອເຮັດໃຫ້ຄົນທັງຫຼາຍໄດ້ເບີກບານມ່ວນຊື່ນ, ອາເມຣິກາໄດ້ເຮັດ “ຄວາມຍິ່ງໃຫຍ່” ອັນໜຶ່ງ, ນັ້ນກໍຄື: ພະຍາດໂຄວິດ-19 ໄດ້ເຮັດໃຫ້ຊາວອາເມຣິກາປະມານ 1 ລ້ານຄົນເສຍຊີວິດ.” ນີ້ຫວາແມ່ນ “ຄວາມມ່ວນຊື່ນ” ສຳລັບສື່ມວນຊົນອາເມຣິກາ?
ງານກິລາໂອລິມປິກລະດູໜາວປັກກິ່ງທີ່ປອດໄພແລະໜ້າເບິ່ງໜ້າຊົມ ເຮັດໃຫ້ຄົນທັງຫຼາຍໄດ້ແບ່ງປັນຄວາມມ່ວນຊື່ນໃຫ້ກັບມວນມະນຸດຈາກການຖ່າຍທອດສົດການແຂ່ງຂັນກິລາ ແລະ ໄດ້ສົ່ງສຽງແຫ່ງຄວາມສາມັກຄີ ແລະ ເຄົາລົບເຊິ່ງກັນແລະກັນອອກມາ. ປັດຈຸບັນ, ໂດຍຜ່ານຈາກການທີ່ນັກກິລາທັງຫຼາຍໄດ້ສຳຜັດຕົວຈິງ ແລະ ການເປັນສັກຂີພິຍານຂອງຜູ້ຊົມທົ່ວໂລກ, ການເສກສັນປັ້ນແຕ່ງທີ່ຄ້າຍຄືກັນກັບການລາຍງານຂ່າວຂອງໜັງສືພິມ “ວໍຊິງຕັນໂພສ” ຂອງອາເມຣິກາ ກໍຈະສູນຫາຍໄປແບບອັດຕະໂນມັດ ທັງໄດ້ເຮັດໃຫ້ຊາວໂລກຮັບຮູ້ເຖິງທາດແທ້ຂອງສື່ມວນຊົນຕາເວັນຕົກທີ່ຊ່າງກະຈາຍຂ່າວ “ປົນເປກັບສຽງວົນແຊວທາງການເມືອງ” ແລະ ມັກເຮັດ “ສອງມາດຕະຖານ” ເລື້ອຍໆ.
ຄຳເຫັນ
0