ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ກ່ອນໄຂງານກິລາໂອລິມປິກລະດູໜາວປັກກິ່ງ 2022, ຂ່າວກ່ຽວກັບກະເປົາເປ້ໄດ້ເຜີຍແຜ່ຢູ່ຕາມໜ້າອິນເຕີເນັດຢ່າງກວ້າງຂວາງ: ມີນັກຂ່າວຫຼາຍຄົນທີ່ເຄີຍມາລາຍງານຂ່າວກ່ຽວກັບງານກິລາໂອລິມປິກປັກກິ່ງປີ 2008, ໄດ້ເປ້ກະເປົາທີ່ໃຊ້ມາແຕ່ປີ 2008 ໄດ້ເດີນທາງມານະຄອນຫຼວງປັກກິ່ງອີກຄັ້ງໜຶ່ງ ແລະ ໄດ້ຕີລາຄາວ່າ: “ຄຸນນະພາບກະເປົາຈີນດີຫຼາຍ”, “ທົນທານ, ໃຊ້ໄດ້ດີ”. ກະເປົາເປ້ທີ່ຈີນຜະລິດໃຊ້ໄດ້ຍາວນານຮອດ 14 ປີ, ຈົນເຮັດໃຫ້ນັກຂ່າວຕ່າງປະເທດຫຼາຍຄົນຍ້ອງຍໍຕໍ່ກະເປົາເປ້ຂອງງານກິລາໂອລິມປິກປີ 2008.
ຖ້າເວົ້າວ່າ: ກະເປົາເປ້ປີ 2008 ກໍແມ່ນການສ່ອງແສງໃຫ້ເຫັນເຖິງການຜະລິດຂອງຈີນທີ່ເຂັ້ມແຂງ, ແຕ່ສຳລັບໃນງານກິລາໂອລິມປິກລະດູໜາວປັກກິ່ງປີ 2022 ແລ້ວໄດ້ເກີດມີການປ່ຽນແປງທີ່ພົ້ນເດັ່ນຢ່າງໜຶ່ງກໍຄື: ຍີ່ຫໍ້ຈີນໄດ້ພັດທະນາກ້າວຂຶ້ນອີກ ເຊິ່ງຖືວ່າໄດ້ບັນລຸການພັດທະນາແບບກ້າວກະໂດດຂັ້ນ.
ຍີ່ຫໍ້ ANTA ເປັນໜຶ່ງໃນຄູ່ຮ່ວມມືລະຫວ່າງທາງການຂອງງານກິລາໂອລິມປິກລະດູໜາວປັກກິ່ງ ແລະ ງານກິລາໂອລິມປິກຄົນພິການລະດູໜາວປັກກິ່ງ, “ຊຸດແຊັມປຽນທີ່ມີຮູບມັງກອນ” ຂອງ ANTA ບໍ່ພຽງແຕ່ໄດ້ອອກແບບທີ່ປະກອບດ້ວຍຫຼາຍປັດໄຈແບບຈີນເທົ່ານັ້ນ, ຍັງໄດ້ໃຊ້ “ເຕັກນິກສ້າງຄວາມອົບອຸ່ນ” ທີ່ຈີນຄົ້ນຄວ້າຜະລິດເອງ ເຊິ່ງສາມາດເຮັດໃຫ້ຊຸດກິລາທີ່ເບົາບາງສາມາດຮັກສາຄວາມອຸ່ນໄດ້ເປັນຢ່າງດີ ພາຍໃຕ້ສະພາບການທີ່ມີອຸນຫະພູມລົບ 20 ອົງສາ.
ໃນງານກິລາໂອລິມປິກລະດູໜາວປັກກິ່ງປີນີ້, ລາຍການແຂ່ງຂັນສະເກເລຕອນກໍສາມາດຍາດໄດ້ຫຼຽນລາງວັນເປັນຄັ້ງທຳອິດ. ຢູ່ເບື້ອງຫຼັງຫຼຽນດັ່ງກ່າວ, ກໍມີການປະກອບສ່ວນຂອງບໍລິສັດ ANTA ເຊັ່ນກັນ. ຍ້ອນວ່າເກີບທີ່ໃຊ້ໃນການແຂ່ງຂັນຂອງທີມສະເກເລຕອນຂອງຈີນເທື່ອນີ້, ແມ່ນບໍລິສັດ ANTA ເປັນຜູ້ຜະລິດ ໂດຍໃຊ້ເວລາອອກແບບແລະຜະລິດເຖິງ 4 ເດືອນ, ໄດ້ມີສິດທິບັດ 12 ລາຍການ ແລະ ໄດ້ໃຊ້ວິທະຍາສາດເຕັກນິກປະດິດສ້າງໃໝ່ 3 ລາຍການ, ຈິ່ງໄດ້ເຮັດເກີບສະເພາະກິລາປະເພດນີ້ອອກມາ.
ນອກນີ້, ຍັງມີບໍລິສັດ PEAK ທີ່ໄດ້ຜະລິດເຄື່ອງກິລາສຳລັບງານກິລາໂອລິມປິກລະດູໜາວປັກກິ່ງ 2022, ນັບແຕ່ງານກິລາໂອລິມປິກປັກກິ່ງປີ 2008 ເປັນຕົ້ນມາ, ບໍລິສັດ PEAK ເລີ່ມໄດ້ຮັບສິດເປັນຜູ້ຜະລິດເຄື່ອງກິລາໃຫ້ກັບຄະນະນັກກິລາ 20 ກວ່າຄະນະທີ່ເຂົ້າຮ່ວມງານກິລາຂະໜາດໃຫຍ່ທັງລະດູຮ້ອນແລະລະດູໜາວຕາມໆກັນ, ໃນນັ້ນ, ປີ 2016 ໄດ້ຮັບສິດເປັນຜູ້ຜະລິດເຄື່ອງກິລາໃຫ້ກັບຄະນະນັກກິລາ 12 ຄະນະ ພ້ອມທັງໄດ້ມີຜະລິດຕະພັນຈຳໜ່າຍຢູ່ 100 ກວ່າປະເທດແລະເຂດແຄວ້ນໃນຂອບເຂດທົ່ວໂລກ. ໃນງານກິລາໂອລິມປິກລະດູໜາວປັກກິ່ງປີ 2022 ຄັ້ງນີ້, ບໍລິສັດ PEAK ໄດ້ຮັບສິດເປັນຜູ້ຜະລິດເຄື່ອງກິລາໃຫ້ກັບຄະນະນັກກິລາ 7 ຄະນະ ທີ່ເຂົ້າຮ່ວມງານກິລາໂອລິມປິກລະດູໜາວ ເຊັ່ນ: ເຄື່ອງກິລາຂອງນັກກິລາປະເທດບຣາຊິນ, ອູແກຣນ ແລະ ອື່ນໆ.
ໃນລາຍການແຂ່ງຂັນກິລາລະດູໜາວທີ່ມີຄວາມຮຽກຮ້ອງຕ້ອງການອຸປະກອນກິລາແບບມືອາຊີບຍິ່ງຫຼາຍນັ້ນ, ແຕ່ກ່ອນ, ນັກກິລາສ່ວນຫຼາຍຈະເລືອກໃຊ້ອຸປະກອນຍີ່ຫໍ້ຂອງປະເທດຕາເວັນຕົກ. ແຕ່ເທື່ອນີ້, ເຂົາເຈົ້າໄດ້ເລືອກໃຊ້ອຸປະກອນຍີ່ຫໍ້ PEAK, ສະນັ້ນ, ຈິ່ງບໍ່ຕ້ອງສົງໄສເລີຍວ່າ, ເປັນຫຍັງຫຼາຍຊາດຈິ່ງຍອມຮັບຄຸນນະພາບຂອງຍີ່ຫໍ້ຈີນ. ນາງມາເຣຍ ລົວນາ ຄອນສະຕັນຕິນ ນັກກິລາປະເທດລູມານີກ່າວຫຼັງພິທີໄຂງານກິລາໂອລິມປິກລະດູໜາວປັກກິ່ງວ່າ: ໄດ້ເຫັນ “ບັນຍາກາດວັດທະນະທຳຈີນທີ່ເຂັ້ມຂຸ້ນ ແລະ ໄດ້ເຫັນຍີ່ຫໍ້ຈີນເລື້ອຍໆ ເຊິ່ງສະແດງໃຫ້ເຫັນເຖິງຄວາມໝັ້ນໃຈຕົນເອງ ແລະ ກຳລັງຕົວຈິງຂອງຈີນ ທີ່ເປັນປະເທດໃຫຍ່ຂອງໂລກ.”
ງານກິລາໂອລິມປິກປັກກິ່ງປີ 2008 ແມ່ນປີທີ່ຍີ່ຫໍ້ເຄື່ອງກິລາຈີນໄດ້ບັນລຸເປົ້າໝາຍການພັດທະນາແບບກ້າວກະໂດດຂັ້ນ. ໃນປີນັ້ນ, ທົ່ວອຸດສາຫະກຳການກິລາໄດ້ບັນລຸການເຕີບໂຕ 20% ຫາ 30%; ຫຼັງຈາກນັ້ນ 14 ປີ, ໃນງານກິລາໂອລິມປິກລະດູໜາວປັກກິ່ງ, ຄົນທັງຫຼາຍຈາກທົ່ວໂລກກໍຍອມຮັບແລະນິຍົມຍີ່ຫໍ້ຈີນເພີ່ມຂຶ້ນ. ຈາກປີ 2008 ຫາປີ 2022, ພວກເຮົາໄດ້ເຫັນແລະເຂົ້າໃຈການພັດທະນາແບບກ້າວກະໂດດຂັ້ນຂອງຈີນໃນການຜະລິດເຄື່ອງກິລາ ຄື: ຈາກການພັດທະນາແລະການຮັບປະກັນດ້ານຄຸນນະພາບສູ່ການສ້າງຍີ່ຫໍ້ທີ່ມີຊື່ສຽງລະດັບໂລກ. ຢູ່ເບື້ອງຫຼັງຂະບວນການດັ່ງກ່າວ, ແມ່ນກຳລັງສັງລວມຂອງຈີນໄດ້ພັດທະນາເປັນກ້າວໆ, ລະດັບວິທະຍາສາດເຕັກນິກຂອງຈີນໄດ້ຮັບການຍົກສູງຂຶ້ນເລື້ອຍໆ ແລະ ຈີນເອງກໍມີຄວາມໝັ້ນໃຈຕໍ່ວັດທະນະທຳຂອງຕົນເອງນັບມື້ນັບຫຼາຍຂຶ້ນ.
ຄຳເຫັນ
0