ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 24 ກຸມພານີ້, ທ່ານເດີມິຕຣີ ເປສໂກ, ໂຄສົກປະທານາທິບໍດີຣັດເຊຍກ່າວວ່າ: ຖ້າວ່າອູແກຣນກຽມພ້ອມແລ້ວ ໃນການເຈລະຈາກ່ຽວກັບຖານະເປັນກາງຂອງຕົນ ແລະບໍ່ຈັດວາງອາວຸດຢູ່ໃນປະເທດຕົນ, ຣັດເຊຍຈຶ່ງຈະຍິນດີເຈລະຈາກັບອູແກຣນ.
ທ່ານເປສໂກກ່າວວ່າ: ຣັດເຊຍຫວັງວ່າຈະສາມາດແກ້ໄຂ “ບັນຫາເສັ້ນອັນຕະລາຍ”ຕ່າງໆ ເຊັ່ນ: ຖານະເປັນກາງຂອງອູແກຣນ, ອູແກຣນຈະບໍ່ຈັດວາງອາວຸດຢູ່ໃນປະເທດຕົນ ແລະອື່ນໆ, ພ້ອມທັງຈະເຈລະຈາກັບອູແກຣນກ່ຽວກັບບັນຫາເຫຼົ່ານີ້, ສິ່ງທີ່ສຳຄັນທີ່ສຸດແມ່ນຜູ້ນຳອູແກຣນໄດ້ກຽມພ້ອມທີ່ຈະເຈລະຈາແລ້ວຫຼືບໍ.
ທ່ານເປສໂກກ່າວຕື່ມອີກວ່າ: ຈຸດປະສົງຂອງຣັດເຊຍໃນການປະຕິບັດການເຄື່ອນໄຫວທາງການທະຫານພິເສດຕໍ່ອູແກຣນນັ້ນ ແມ່ນເພື່ອເຮັດໃຫ້ອູແກຣນ “ຫັນເປັນປະເທດແບບບໍ່ແມ່ນການທະຫານ” ເພື່ອຮັບປະກັນຄວາມໝັ້ນຄົງຂອງຣັດເຊຍ.
ໃນມື້ດຽວກັນ, ທ່ານອີກໍ ໂກນາເຊັນໂກຟ, ໂຄສົກກະຊວງປ້ອງກັນປະເທດຣັດເຊຍກ່າວໃນກອງປະຊຸມຖະແຫຼງຂ່າວວ່າ: ກອງກຳລັງປະກອບອາວຸດຂອງຣັດເຊຍຈະບໍ່ຍິງປືນໃຫຍ່ ຫຼືໂຈມຕີທາງອາກາດໃສ່ຕົວເມືອງຂອງອູແກຣນ ເຊິ່ງຈະບໍ່ເປັນການທຳລາຍປະຊາຊົນອູແກຣນ. ພ້ອມດຽວກັນນີ້, ທ່ານເຊີເກ ຊອຍກູ, ລັດຖະມົນຕີກະຊວງປ້ອງກັນປະເທດຣັດເຊຍໄດ້ອອກຄຳສັ່ງ ໂດຍໄດ້ຮຽກຮ້ອງໃຫ້ສ້າງຊ່ອງທາງຄວາມປອດໄພສຳລັບທະຫານອູແກຣນທີ່ວາງອາວຸດ ເພື່ອໃຫ້ເຂົາເຈົ້າສາມາດຖອນຕົວອອກຈາກເຂດທີ່ເກີດມີການປະທະກັນ ແລະກັບບ້ານຢ່າງປອດໄພ.
ຄຳເຫັນ
0