ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ໃນເວລາທີ່ປັກກິ່ງຮ້ອງຂໍເປັນເຈົ້າພາບຈັດງານກິລາໂອລິມປິກລະດູໜາວ, ຈີນໄດ້ໃຫ້ຄຳໝັ້ນສັນຍາຢ່າງສະຫງ່າຜ່າເຜີຍວ່າ “ຈະດຶງດູດມວນຊົນ ຈໍານວນ 300 ລ້ານຄົນເຂົ້າຮ່ວມກິລາຫິມະ ແລະນ້ຳກ້ອນ”. ໃນໄລຍະກະກຽມງານກິລາໂອລິມປິກລະດູໜາວ, ຈີນກໍໄດ້ເຮັດໃຫ້ຄຳໝັ້ນສັນຍາດັ່ງກ່າວປະກົດເປັນຈິງກ່ອນເວລາກຳນົດ. ມາຮອດເດືອນຕຸລາປີ 2021, ຈຳນວນຄົນທີ່ເຂົ້າຮ່ວມກິລາຫິມະ ແລະນ້ຳກ້ອນຢູ່ຈີນໄດ້ບັນລຸ 346 ລ້ານຄົນ. ທັງນີ້ໄດ້ກາຍເປັນມໍລະດົກໃຫຍ່ທີ່ສຸດຂອງງານກິລາໂອລິມປິກລະດູໜາວປັກກິ່ງ. ທ່ານໂທມັສ ບັກ ປະທານຄະນະກຳມະການໂອລິມປິກສາກົນກ່າວວ່າ: “ໃນຕໍ່ໜ້ານີ້, ເຖິງຈະມີແຕ່ຈໍານວນໜ້ອຍຂອງຄົນເຫຼົ່ານີ້ກາຍເປັນນັກກິລາຫິມະ ແລະນ້ຳກ້ອນມືອາຊີບກໍຕາມ ແຕ່ກໍຈະປ່ຽນສະພາບຂອງກິລາຫິມະ ແລະນ້ຳກ້ອນໃນໂລກໄດ້.”
ການເປີດກວ້າງກຸ່ມຄົນຫຼິ້ນກິລາຫິມະແລະນ້ຳກ້ອນ, ບໍ່ພຽງແຕ່ໄດ້ອຳນວຍເງື່ອນໄຂອັນດີງາມໃຫ້ແກ່ປະເທດຈີນໃນການອົບຮົມບົ່ມເພາະນັກກິລາຫິມະແລະນ້ຳກ້ອນຜູ້ດີເດັ່ນເທົ່ານັ້ນ, ຍັງໄດ້ສ້າງຕະຫຼາດກິລາຫິມະແລະນ້ຳກ້ອນທີ່ໃຫຍ່ທີ່ສຸດໃຫ້ກັບໂລກອີກດ້ວຍ. ຕາມການຄາດຄະເນຂອງຄະນະກຳມະການໂອລິມປິກສາກົນ: ເມື່ອຮອດປີ 2025, ມູນຄ່າຂອງຕະຫຼາດກິລາລະດູໜາວຂອງຈີນຈະບັນລຸ 150 ຕື້ໂດລາ, ຫິມະແລະນ້ຳກ້ອນທີ່ເຢັນໆໄດ້ກາຍເປັນເສດຖະກິດທີ່ຮ້ອນແຮງ. ຕາມຂໍ້ມູນສະແດງໃຫ້ເຫັນວ່າ: ໃນຜູ້ບໍລິໂພກດ້ານການທ່ອງທ່ຽວຫິມະແລະນ້ຳກ້ອນຂອງຈີນ ມີຈຳນວນຄົນທີ່ເກີດໃນຊຸມປີ 1980 ແລະຊຸມປີ 1990 ກວມ 86%, ກຸ່ມຄົນສະໄໝໃໝ່ທີ່ມັກຫຼິ້ນກິລາຫິມະ ແລະນ້ຳກ້ອນເພີ່ມຂຶ້ນຢ່າງຫຼວງຫຼາຍ ເຊິ່ງໄດ້ສ້າງກະແສນິຍົມທີ່ທັນສະໄໝ ແລະຄຶກຄື້ນ. ຊຸດສະກີ, ແປ້ນສະກີ, ແວ່ນຕາປ້ອງກັນໃຊ້ສຳລັບກິລາສະກີທີ່ງາມໆ ໄດ້ກາຍເປັນສິ່ງທີ່ຜູ້ເຂົ້າຮ່ວມກິລາສະກີຕ້ອງການໂດຍພື້ນຖານ; ເຄື່ອງປ້ອງກັນການກະທົບຊະນິດຕ່າງໆທີ່ໜ້າຮັກ ຍິ່ງຈະກາຍເປັນພາບທີ່ສວຍງາມໃນລານສະກີ.
ຜະລິດຕະພັນກິລາຫິມະ ແລະນ້ຳກ້ອນຍີ່ຫໍ້ຕ່າງໆທີ່ທັນສະໄໝ, ລຸ້ນໃໝ່ໆ ໄດ້ທະຍອຍກັນຜະລິດອອກມາຕາມກະແສນິຍົມ ເຊິ່ງໄດ້ເປີດສັກກະຫຼາດໃໝ່ໃຫ້ແກ່ກິລາຫິມະ ແລະນ້ຳກ້ອນຢູ່ຈີນ.
ກະແສນິຍົມທີ່ທັນສະໄໝບໍ່ພຽງແຕ່ຂຶ້ນຢູ່ກັບຊາວໜຸ່ມເທົ່ານັ້ນ. ເຖິງແມ່ນວ່າງານກິລາໂອລິມປິກລະດູໜາວປັກກິ່ງໄດ້ອັດລົງແລ້ວກໍຕາມ, ແຕ່ກະແສນິຍົມກິລາຫິມະ ແລະນ້ຳກ້ອນ ພັດໄດ້ຊຶມຊັບເຂົ້າໃນຊີວິດການເປັນຢູ່ຂອງຊາວຈີນຫຼາຍຮ້ອຍລ້ານຄົນ ແລະກຳລັງຂະຫຍາຍໄປສູ່ທົ່ວທຸກແຫ່ງຫົນ.
ຄຳເຫັນ
0