ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ກອງປະຊຸມ “ສອງສະພາ” ປີ 2022 ໄດ້ໄຂຂຶ້ນໃນວັນທີ 4 ມີນານີ້, ການເປີດກອງປະຊຸມ “ສອງສະພາ” ເປັນເຫດການສຳຄັນດ້ານການເມືອງຂອງຈີນ. ກອງປະຊຸມດັ່ງກ່າວຈະສ້າງ ຫຼືດັດແກ້ກົດໝາຍທີ່ສຳຄັນບາງສະບັບ, ທວນຄືນວຽກງານຂອງລັດຖະບານໃນໜຶ່ງປີທີ່ຜ່ານມາ, ພ້ອມທັງລາຍງານນະໂຍບາຍສຳຄັນໃນໜຶ່ງປີຂ້າງໜ້າໃຫ້ກັບປະຊາຊົນ. ກອງປະຊຸມດັ່ງກ່າວຍັງເປັນເວທີການເມືອງທີ່ສຳຄັນໃນການເຕົ້າໂຮມສະຕິປັນຍາຂອງປະຊາຊົນ, ສ່ອງແສງເຖິງຄວາມຄິດເຫັນຂອງປະຊາຊົນ ແລະສົ່ງຜົນສະທ້ອນຕໍ່ຊີວິດການເປັນຢູ່ຂອງປະຊາຊົນ.
ສາມາດເວົ້າໄດ້ວ່າ: ກອງປະຊຸມ “ສອງສະພາ” ເປັນປ່ອງຢ້ຽມສຳຄັນໃຫ້ກັບປະຊາຊົນທົ່ວປະເທດຈີນ ກໍຄືທົ່ວໂລກ ເພື່ອສັງເກດຊີວິດການເມືອງຂອງຈີນ, ເມື່ອ ເຊື່ອມຊຶມເນື້ອໃນຈິດໃຈຂອງກອງປະຊຸມດັ່ງກ່າວແລ້ວ ກໍສາມາດເຂົ້າໃຈປະເທດຈີນໄດ້ເປັນຢ່າງດີກວ່າເກົ່າ. ສະນັ້ນ, ກອງປະຊຸມ “ສອງສະພາ” ໃນແຕ່ລະປີ ກໍກາຍເປັນເຫດການສຳຄັນທີ່ປະຊາຊົນ ແລະ ສື່ມວນຊົນພາຍໃນ ແລະຕ່າງປະເທດໃຫ້ຄວາມສົນໃຈ.
ຕໍ່ໄປ, ຈະແນະນຳຂໍ້ມູນກ່ຽວກັບກອງປະຊຸມ “ສອງສະພາ” ໃຫ້ກັບບັນດາທ່ານ, ເພື່ອໃຫ້ບັນດາທ່ານໄດ້ເຂົ້າໃຈຄວາມໝາຍຄວາມສຳຄັນຂອງກອງປະຊຸມ “ສອງສະພາ” ທີ່ມີຕໍ່ປະຊາຊົນ ແລະປະເທດຈີນ.
1. ກອງປະຊຸມ “ສອງສະພາ” ແມ່ນຫຍັງ?
ກອງປະຊຸມ “ສອງສະພາ” ແມ່ນຫຍໍ້ມາຈາກ ກອງປະຊຸມສະພາປະຊາຊົນແຫ່ງຊາດຈີນ ແລະ ກອງປະຊຸມສະພາປຶກສາການເມືອງປະຊາຊົນແຫ່ງຊາດຈີນ. ເນື່ອງຈາກວ່າ 2 ກອງປະຊຸມດັ່ງກ່າວ ແມ່ນໄດ້ຈັດຂຶ້ນໃນໄລຍະເວລາດຽວກັນ ແລະມີຄວາມສໍາຄັນທີ່ສຸດຕໍ່ປະເທດຈີນ, ສະນັ້ນ ຈຶ່ງເອີ້ນຫຍໍ້ວ່າ ກອງປະຊຸມ “ສອງສະພາ”.ສະພາປະຊາຊົນແຫ່ງຊາດຈີນເປັນອົງການອໍານາດສູງສຸດແຫ່ງຊາດຈີນ. ສ່ວນສະພາປຶກສາການເມືອງປະຊາຊົນແຫ່ງຊາດຈີນເປັນອົງການແນວໂຮມເອກະພາບຮັກຊາດຂອງປະເທດຈີນ.
2. ກອງປະຊຸມ “ສອງສະພາ” ເຮັດໜ້າທີ່ຫຍັງແດ່?
ລັດຖະທຳມະນູນຂອງຈີນໄດ້ລະບຸໄວ້ວ່າ: ຈຸດປະສົງຂອງການຈັດກອງປະຊຸມ “ສອງສະພາ” ແມ່ນເພື່ອເກັບກໍາ ແລະຮຽບຮຽງຂໍ້ມູນຂ່າວສານ ກໍຄືຄວາມຮຽກ ຮ້ອງຕ້ອງການຂອງປະຊາຊົນ ໂດຍຜ່ານຜູ້ແທນຂອງສະພາປະຊາຊົນ ແລະ ກຳມະການຂອງສະພາປຶກສາການເມືອງ ເພື່ອລາຍງານໃຫ້ສູນກາງພັກ. ຜູ້ແທນ ແລະ ກຳມະການຂອງສອງສະພາດັ່ງກ່າວ ແມ່ນຕາງໜ້າຜົນປະໂຫຍດຂອງປະຊາຊົນ ເຊິ່ງຈະຕາງໜ້າປະຊາຊົນສະເໜີຄວາມຄິດເຫັນ ແລະຄວາມຮຽກຮ້ອງ ຕ້ອງການຕໍ່ພາກສ່ວນທີ່ກ່ຽວຂ້ອງຂອງລັດຖະບານ.
3. ກອງປະຊຸມ “ສອງສະພາ” ຈັດຂຶ້ນໃນເວລາໃດ?
ປົກກະຕິແລ້ວ ກອງປະຊຸມ “ສອງສະພາ” ຈະໄດ້ຈັດຂຶ້ນໃນເດືອນມີນາຂອງ ທຸກໆປີ. ເນື່ອງຈາກວ່າ ກອງປະຊຸມສະພາປະຊາຊົນແຫ່ງຊາດຈີນ ຕ້ອງກວດກາ ແລະ ອະນຸມັດບົດລາຍງານວຽກງານລັດ ຖະບານ ແລະແຜນງົບປະມານແຫ່ງຊາດ, ລາຍຈ່າຍຂອງງົບປະມານໃນໄຕມາດທຳອິດທຸກປີແມ່ນມີຫຼາຍສົມຄວນ, ໂດຍກວມ 1 ສ່ວນ 3 ຂອງລາຍຈ່າຍໝົດປີ, ສະນັ້ນ, ກອງປະຊຸມສະພາປະຊາຊົນແຫ່ງຊາດຈີນ ຈະອະນຸມັດແຜນງົບປະມານຢ່າງຊັກຊ້າບໍ່ໄດ້. ອີກດ້ານໜຶ່ງ, ສົກປີການເງິນຂອງຈີນແມ່ນເລີ່ມແຕ່ວັນທີ 1 ມັງກອນຮອດວັນທີ 31 ທັນວາຂອງທຸກປີ, ຖ້າວ່າກອງປະຊຸມສະພາປະຊາຊົນແຫ່ງຊາດຈັດຂຶ້ນໄວເກີນໄປ, ກໍຈະເຮັດໃຫ້ການສະຫຼຸບຂໍ້ມູນຂ່າວສານໃນໜຶ່ງປີທີ່ຜ່ານມານັ້ນບໍ່ທັນ. ສະນັ້ນ, ກອງປະຊຸມ “ສອງສະພາ” ຈັດຂຶ້ນໃນເດືອນມີນາ, ຈະສາມາດເຮັດໃຫ້ວຽກງານການສະຫຼຸບຂໍ້ມູນໃນປີທີ່ຜ່ານມາ ແລະວາງແຜນໃນປີຕໍ່ໄປ ມີເວລາທີ່ພຽງພໍ. ບວກກັບ ບຸນກຸດຈີນ ສ່ວນຫຼາຍແມ່ນຢູ່ລະຫວ່າງເດືອນມັງກອນຫາເດືອນກຸມພາ, ສະນັ້ນ, ການຈັດກອງປະຊຸມ “ສອງສະພາ” ໃນເດືອນມີນາ ຈະເປັນເວລາທີ່ເໝາະສົມ.
4. ພາລະໜ້າທີ່ ແລະ ສິດອຳນາດຂອງສະພາປະຊາຊົນແຫ່ງຊາດຈີນມີຫຍັງແດ່?
① ດັດແກ້ ແລະຕິດຕາມກວດກາການຈັດຕັ້ງປະຕິບັດລັດຖະທໍາມະນູນ.
② ສ້າງ ແລະດັດແກ້ກົດໝາຍພື້ນຖານລະດັບຊາດ ເຊັ່ນ ກົດໝາຍອາຍາ, ກົດໝາຍແພ່ງ, ກົດໝາຍກ່ຽວກັບອົງການຈັດຕັ້ງ ແລະກົດໝາຍພື້ນຖານອື່ນໆ.
③ ເລືອກຕັ້ງ, ແຕ່ງຕັ້ງ ແລະປົດຕຳແໜ່ງຂອງພະນັກງານອົງການຈັດຕັ້ງລະດັບຊາດ.
④ ຕົກລົງວຽກງານສຳຄັນແຫ່ງຊາດ ລວມທັງກວດກາ ແລະອະນຸມັດແຜນ ພັດທະນາເສດຖະກິດ-ສັງຄົມແຫ່ງຊາດ ພ້ອມທັງບົດລາຍງານກ່ຽວກັບສະພາບການຈັດຕັ້ງປະຕິບັດແຜນດັ່ງກ່າວ. ກວດກາ ແລະອະນຸມັດແຜນງົບປະ ມານແຫ່ງຊາດ ພ້ອມທັງສະພາບການປະຕິບັດແຜນງົບປະມານດັ່ງກ່າວ. ອະ ນຸມັດການສ້າງຕັ້ງແຂວງ, ເຂດປົກຄອງຕົນເອງ, ກຳແພງນະຄອນ ແລະ ເຂດ ບໍລິຫານພິເສດ ພ້ອມດ້ວຍລະບຽບການ. ຕົກລົງບັນຫາສົງຄາມ ແລະ ສັນຕິ ພາບ ແລະບັນຫາອື່ນໆ.
⑤ ຕິດຕາມກວດກາວຽກງານຂອງອົງການຈັດຕັ້ງລະດັບຊາດ.
5. ບົດບາດຕົ້ນຕໍຂອງສະພາປຶກສາການເມືອງປະຊາຊົນແຫ່ງຊາດຈີນມີຫຍັງແດ່?
ບົດບາດຕົ້ນຕໍຂອງສະພາປຶກສາການເມືອງປະຊາຊົນແຫ່ງຊາດຈີນແມ່ນດໍາເນີນການປຶກສາການເມືອງ ແລະການຕິດຕາມກວດກາແບບປະຊາທິປະໄຕ, ຈັດຕັ້ງພັກຝ່າຍ, ອົງການຈັດຕັ້ງ, ຊົນເຜົ່າ ແລະບຸກຄົນໃນວົງການຕ່າງໆເຂົ້າຮ່ວມ ແລະ ຫາລື ວຽກງານການເມືອງ.
6. ເປັນຫຍັງຈຶ່ງຕ້ອງຈັດກອງປະຊຸມສະພາປຶກສາການເມືອງປະຊາຊົນແຫ່ງຊາດຈີນກ່ອນ?
ກ່ອນສະພາປະຊາຊົນແຫ່ງຊາດຈະຕົກລົງນະໂຍບາຍຕ່າງໆ, ຈະຕ້ອງໄດ້ ສົ່ງໃຫ້ຜູ້ແທນປະຊາຊົນ ແລະວົງການຕ່າງໆ ເພື່ອປະກອບຄໍາເຫັນ, ປຶກສາຫາລື ແລະຄົ້ນຄວ້າພິຈາລະນາ ໃນກອງປະຊຸມສະພາປຶກສາການເມືອງປະຊາຊົນແຫ່ງຊາດຈີນຢ່າງລະອຽດຖີ່ຖ້ວນ. ສະນັ້ນ ຈຶ່ງກໍານົດໃຫ້ຈັດກອງປະຊຸມສະພາປຶກສາການເມືອງປະຊາຊົນແຫ່ງຊາດຈີນກ່ອນ.
ຄຳເຫັນ
0