ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຄວາມມຸ່ງຫວັງເບື້ອງຕົ້ນທີ່ອົບອຸ່ນທີ່ສຸດ ຄື ເຕັກນິກວິທະຍາສາດເພື່ອມວນມະນຸດ, ສ້າງຜົນປະໂຫຍດໃຫ້ກັບໂລກ
ວັນທີ 6 ກຸມພາຜ່ານມາ, ຢູ່ສູນຂ່າວປັກກິ່ງ 2022, ທ່ານ ໂທມັສ ບັກປະທານຄະນະກຳມະການໂອລິມປິກສາກົນ ແລະ ທ່ານ ຈ່າງໂຢງ ປະທານຄະນະບໍລິຫານງານ ທັງເປັນຫົວໜ້າເຈົ້າໜ້າທີ່ບໍລິຫານງານບໍລິສັດອາລີບາບາໄດ້ສຳເລັດການມອບທວນໄຟໂອລິມປິກລະດູໜາວ ຜ່ານໜ້າຈໍວິດີໂອດຽວກັນທາງອອນລາຍ ທັງໄດ້ພ້ອມກັນສົ່ງຄຳອວຍພອນບຸນກຸດຈີນໃຫ້ແກ່ປະຊາຊົນຈີນ.
ໃນຄາວນັ້ນ, ທ່ານ ໂທມັສ ບັກ ພວມຢູ່ໃນບ້ານໂອລິມປິກລະດູໜາວປັກກິ່ງແບບປິດ ເພື່ອຕ້ານ ແລະສະກັດກັ້ນການແຜ່ລະບາດຂອງພະຍາດໂຄວິດ-19. ທ່ານ ຈ່າງໂຢງ ຢູ່ນະຄອນຊຽງໄຮ້ທີ່ເປັນເມືອງໃຫຍ່ທາງພາກໃຕ້ຂອງຈີນ ທັງສອງຄົນຢູ່ຫ່າງກັນ 1.300 ກິໂລແມັດ. ຍ້ອນເຕັກນິກ Alibaba Cloud Me ເຮັດໃຫ້ພວກເພິ່ນສາມາດປະກົດໂຕຜ່ານທາງໜ້າຈໍດຽວໄດ້. ທ່ານໂທມັສ ບັກ ກ່າວວ່າ: “ບັດນີ້ພວກເຮົາພວມສຳຜັດກັບສະເໜ່ຂອງເຕັກນິກການຫັນເປັນແບບດີຈີຕອນ, ເຕັກນິກຂອງບໍລິສັດອາລີບາບາໄດ້ສ້າງມາດຕະຖານຄົບຊຸດໃໝ່ໃຫ້ແກ່ງານກິລາໂອລິມປິກ ພ້ອມທັງໄດ້ຍົກລະດັບໃໝ່ໃຫ້ສູງຂຶ້ນຢ່າງບໍ່ຢຸດຢັ້ງ.”
ມີຄົນເວົ້າວ່າ: ງານກິລາໂອລິມປິກລະດູໜາວປັກກິ່ງແມ່ນງານກິລາໂອລິມປິກລະດູໜາວຄັ້ງໜຶ່ງທີ່ມີວິທະຍາສາດເຕັກນິກທີ່ກ້າວໜ້າທີ່ສຸດໃນປະຫວັດສາດໂອລິມປິກ. ຄລາວຄອມພິວຕິງ(cloud computing), ປັນຍາປະດິດຫຼື AI, ເຕັກນິກ VR, ເຕັກນິກ 5G ແລະເຕັກນິກອື່ນໆ, ຄຳສັບດ້ານເຕັກນິກ-ວິທະຍາສາດເຫຼົ່ານີ້ທີ່ເບິ່ງຄືບໍ່ເຂົ້າໃຈ, ແຕ່ພັດໄດ້ສົ່ງລັດສະໝີໃຫ້ແກ່ງານກິລາໂອລິມປິກລະດູໜາວໄດ້ທຸກມູມ, ສ້າງຄວາມອົບອຸ່ນ ແລະຄວາມປະທັບໃຈໃຫ້ແກ່ຄົນທັງຫຼາຍຢ່າງຄາດຄິດບໍ່ເຖິງ ທັງໄດ້ສົ່ງທອດສະເໜ່ອັນດຶງດູດໃຈຂອງໂອລິມປິກໃຫ້ແກ່ຊາວໂລກ. “ເຕັກນິກວິທະຍາສາດເພື່ອມວນມະນຸດ, ສ້າງຜົນປະໂຫຍດໃຫ້ກັບໂລກ”, ງານກິລາໂອລິມປິກລະດູໜາວປັກກິ່ງໄດ້ສະແດງໃຫ້ເຫັນເຖິງຄວາມມຸ່ງຫວັງເບື້ອງຕົ້ນດ້ານການພັດທະນາເຕັກນິກວິທະຍາສາດຂອງມວນມະນຸດ, ຈະເປັນໂສມໜ້າໃໝ່ທີ່ທັນສະໄໝໃນປະຫວັດສາດໂອລິມປິກຢ່າງແນ່ນອນ.
ງານກິລາໂອລິມປິກລະດູໜາວ ໂດຍພາຍໃຕ້ການຂົ່ມຂູ່ຈາກພະຍາດໂຄວິດ-19, ການຕ້ານ ແລະສະກັດກັ້ນພະຍາດໂຄວິດ-19 ແມ່ນໜ້າທີ່ຕົ້ນຕໍທີ່ສຳຄັນ. ຫຸ່ນຍົນທີ່ຊື່ວ່າ “ເປີ້ນສຽວປາວ” ສາມາດເປັນເຈົ້າການ ໃນການກວ
ດຈັບ ແລະວັດແທກອຸນຫະພູມຮ່າງກາຍຂອງຄົນໄດ້ ແລະ ຫຸ່ນຍົນຂ້າເຊື້ອດ້ວຍການຜົ່ນຄວັນກໍໄດ້ປະຕິບັດໜ້າທີ່ຜົ່ນຄວັນ ແລະຂ້າເຊື້ອແບບອັດຕະໂນມັດ. ຫຸ່ນຍົນດັ່ງກ່າວໄດ້ກາຍເປັນອຸປະກອນທີ່ດີໃນການຕ້ານກັບພະຍາດໂຄວິດ-19. ຢູ່ລະຫວ່າງຄົນກັບຄົນຕ້ອງຮັກສາໄລຍະຫ່າງທາງສັງຄົມທີ່ປອດໄພ. ສະນັ້ນ, ພໍ່ຄົວ, ພະນັກງານເສີບ ແລະຜູ້ບໍລິການອື່ນໆທີ່ເປັນຫຸ່ນຍົນ ໄດ້ກາຍເປັນກຳລັງຕົ້ນຕໍໃນການບໍລິການໃນການຮັບປະທານອາຫານ.
ຫຸ່ນຍົນ “ເປີ້ນສຽວປາວ” ສາມາດ ເປັນເຈົ້າການໃນການກວດຈັບ ແລະວັດແທກອຸນຫະພູມ ແລ້ວລາຍງານຕໍ່ຄະນະຈັດງານ ແລະຍັງສາມາດເຕືອນໃຫ້ຄົນທີ່ບໍ່ໄດ້ໃສ່ຜ້າປິດປາກວ່າ: “ຂໍໃຫ່ໃສ່ຜ້າປິດປາກໃຫ້ດີ.”
ຫຸ່ນຍົນຂ້າເຊື້ອດ້ວຍການຜົ່ນຄວັນ, ແຕ່ລະມື້ພຽງແຕ່ຕ້ອງເພີ່ມຢາຂ້າເຊື້ອໃສ່ໃນຫຸ່ນຍົນລ່ວງໜ້າ ເມື່ອຮອດເວລາທີ່ກຳນົດໄວ້ ຫຸ່ນຍົນກໍສາມາດເລີ່ມເຮັດວຽກໄດ້ ແລະປະຕິບັດໜ້າທີ່ຜົ່ນຢາຂ້າເຊື້ອຢູ່ໃນສະຖານທີ່ຈັດງານກິລາໂອລິມປິກລະດູໜາວ.
ຕຽງສະມາດຢູ່ໃນບ້ານໂອລິມປິກລະດູໜາວ ມີທັງໂມງປຸກທັງສາມາດຫຼຸດຜ່ອນການນອນໂກນໄດ້, ຫ້ອງພັກຜ່ອນສະມາດສຳລັບພະນັກງານສື່ມວນຊົນ ໄດ້ສ້າງສະພາບແວດລ້ອມທີ່ສະບາຍ ແລະໃກ້ຊິດທີ່ສຸດ ເໝືອນດັ່ງຢູ່ໃນເຮືອນຂອງຕົນໃຫ້ແກ່ບັນດານັກກິລາ ແລະນັກຂ່າວທີ່ເຂົ້າຮ່ວມງານຄັ້ງນີ້. ອຸປະກອນເພີ່ມອຸນຫະພູມ Graphene ທີ່ກ້າວໜ້າທີ່ສຸດໄດ້ນຳເອົາຄວາມອົບອຸ່ນມາໃຫ້ແກ່ພະນັກງານທີ່ເຮັດວຽກຢູ່ໃນສະພາບອາກາດທີ່ມີລົມໜາວ ແລະຫິມະຕົກ. ຜະລິດຕະພັນ Graphene ໄດ້ຮັບໃຊ້ເຂົ້າໃນຫຼາຍຂົງເຂດ ເຊັ່ນ ເຄື່ອງນຸ່ງພິທິການ, ຜ້າພັນຄໍ, ຖົງມື ແລະຂົງເຂດອື່ນໆ.
ຕຽງສະມາດຢູ່ໃນບ້ານໂອລິມປິກເຮັດດ້ວຍດອກຝ້າຍທີ່ມີແຮງດີດ, ມີໂມງປຸກ. ຕຽງສາມາດຂຶ້ນລົງແບບອັດຕະໂນມັດຕາມການຕັ້ງຕ່າທີ່ກຳນົດໄວ້. ກໍລະນີທີ່ນັກກິລານອນໂກນແລ້ວ, ຕຽງຍັງສາມາດປັບຄວາມສູງຂອງຫົວຄົນໄດ້ ແລະຊ່ວຍຜ່ອນຄາຍສະພາບການນອນໂກນໄດ້ອີກ.
ໃນຫ້ອງນອນ, ຢູ່ສູນສື່ມວນຊົນຂອງງານກິລາໂອລິມປິກລະດູໜາວມີຕຽງສະມາດ, ສາມາດປັບຂຶ້ນ ແລະລົງ ທັງຫົວ ແລະຕີນຕາມໃຈໄດ້. ພ້ອມກັນນັ້ນຍັງມີສະມັດຕະພາບການນວດ, ໂມງປຸກແລະອື່ນໆອີກດ້ວຍ.
ການນຳໃຊ້ວິທະຍາສາດເຕັກນິກກ້າວໜ້າຊະນິດຕ່າງໆຢູ່ສະຖານທີ່ຈັດການແຂ່ງຂັນຍິ່ງໄດ້ສ້າງຄວາມປະທັບໃຈແກ່ໂລກ. ຫໍສະເກັດຄວາມໄວແຫ່ງຊາດໄດ້ນຳໃຊ້ເຕັກນິກການຜະລິດນ້ຳກ້ອນດ້ວຍກາກບອນດີອອກຊິດຂະໜາດໃຫຍ່, ໄດ້ຜະລິດ“ໜ້ານ້ຳກ້ອນທີ່ງາມ ແລະໄວທີ່ສຸດ”, ໄດ້ຊ່ວຍນັກກິລາໄດ້ຮັບຄະແນນທີ່ດີຫຼາຍ; ສາມາດເບິ່ງຄືນພາບເຫດການໃນການແຂ່ງຂັນຈາກກ້ອງຄົບວົງວິວ VR ໄດ້, ເຮັດໃຫ້ວຽກງານການຕັດສິນການແຂ່ງຂັນສະເກັດຄວາມໄວມີຄວາມແມ່ນຢຳ ແລະຍຸຕິທຳຫຼາຍກວ່າເກົ່າ. ຢູ່ສະຖານທີ່ຫຼິ້ນສະກີຢູ່ນອກສະໜາມ, ສະມັດຖະພາບດ້ານການກຳນົດຈຸດຖິ່ນຖານທີ່ແມ່ນຢຳຂອງລະບົບດາວທຽມນຳທາງເປີຍໂຕ ແລະການສົ່ງສັນຍານດ້ວຍ 5G ຢ່າງວ່ອງໄວຂອງຈີນ ໄດ້ກາຍເປັນເຄື່ອງມືທີ່ດີຂອງກໍາມະການ ແລະພະນັກງານ. ທັງຊ່ວຍໃຫ້ກໍາມະການຕັດສິນສາມາດຕັດສິນການແຂ່ງຂັນໄດ້ຢ່າງວ່ອງໄວ, ແມ່ນຢຳ ແລະຖືກຕ້ອງໄດ້. ທັງຮັບປະກັນຄວາມປອດໄພຂອງນັກກິລາອີກດ້ວຍ.
ການນຳໃຊ້ເຕັກນິກທີ່ກ້າວໜ້າ ບໍ່ພຽງແຕ່ໄດ້ເຮັດໃຫ້ສະຖານທີ່ການແຂ່ງຂັນຂອງງານກິລາໂອລິມປິກລະດູໜາວປັກກິ່ງ ມີຄວາມປະທັບໃຈ ແລະດີເດັ່ນທີ່ສຸດເທົ່ານັ້ນ ຫາກຍັງໄດ້ສ້າງໂອກາດສຳຜັດທາງດ້ານສາຍຕາ ແລະຈິດໃຈອັນມະຫາສານໃຫ້ແກ່ຜູ້ຊົມຢູ່ໃນໂລກອີກດ້ວຍ. ຢູ່ສະຖານທີ່ຈັດພິທີເປີດງານ, ນ້ຳໝຶກສີຟ້າຢອດໜຶ່ງໄດ້ຕົກລົງຈາກທ້ອງຟ້າ ແລ້ວກາຍເປັນນໍ້າແມ່ນ້ຳເຫຼືອງຢ່າງໜ້າງຶດງໍ້ ກໍເໝືອນດັ່ງຮູບແຕ້ມຈີນທີ່ໄດ້ແຕ້ມຈົນເຕັມໝົດສະໜາມ. ປຽບເໝືອນບົດກະວີຂອງທ່ານ ຫຼີປາຍ ນັກກະວີທີ່ມີຊື່ສຽງໃນສະໄໝລາຊະວົງຖັງຂອງຈີນໄດ້ຂຽນວ່າ “ນ້ຳແມ່ນ້ຳເຫຼືອງຕົກຈາກທ້ອງຟ້າ”. ວັດທະນະທຳໄດ້ເຮັດໃຫ້ເຕັກນິກວິທະຍາສາດມີຄວາມອົບອຸ່ນຄືແນວໃດ ເຕັກນິກວິທະຍາສາດກໍໄດ້ເຮັດໃຫ້ວັດທະນະທຳມີກຳລັງທີ່ເຂັ້ມແຂງຄືແນວນັ້ນ. ເມື່ອສິ່ງດີງາມເປັນເວລາພັນປີທີ່ແຝງໄວ້ຢູ່ໃນບົດກະວີ ແລະຄວາມຝັນນັ້ນໄດ້ປາກົດເປັນຈິງ ແລະປະກົດຕົວຢູ່ຕໍ່ໜ້າມວນມະນຸດແລ້ວ ຊາວໂລກລ້ວນແຕ່ຈະມີຄວາມໝັ້ນໃຈ ແລະຄວາມມຸ່ງຫວັງຕໍ່ອະນາຄົດຂອງໂລກ.
ຢູ່ໃນພິທີເປີດງານກິລາໂອລິມປິກລະດູໜາວປັກກິ່ງ, ການສະແດງ “ນ້ຳແມ່ນ້ຳເຫຼືອງຕົກຈາກທ້ອງຟ້າ” ຢ່າງໃຫຍ່ໂຕມະໂຫລານ ແມ່ນຍ້ອນມີລະບົບສາຍຮູບເງົາຈາກພາກໜ້າດິນແລະພາບຄວາມແຈ້ງສູງພິເສດ(UHD) 8K ທີ່ມີເນື້ອທີ່ທັງໝົດເຖິງ 10.393 ຕາແມັດ, ບໍ່ພຽງແຕ່ມີເນື້ອທີ່ກວ້າງໃຫຍ່ເທົ່ານັ້ນ, ເຕັກນິກກໍມີຄວາມກ້າວໜ້າໃນລະດັບສາກົນ.
ໃນພິທີເປີດງານກິລາໂອລິມປິກລະດູໜາວປັກກິ່ງ, ເດັກນ້ອຍທີ່ຖືນົກສັນຕິພາບແລ່ນຕາມຫິມະທີ່ປີວລົງມາໃນສະໜາມທີ່ມີເນື້ອທີ່ 1 ໝື່ນກວ່າຕາແມັດ ເຊິ່ງໄດ້ສ້າງໂລກທີ່ມີຄວາມມ່ວນຊື່ນ ແລະຄວາມອົບອຸ່ນໃຫ້ແກ່ຄົນທັງຫຼາຍ. ຫິມະທີ່ຢູ່ໃຕ້ຕີນຂອງເດັກນ້ອຍແຕ່ລະຄົນແມ່ນໄດ້ປະດິດສ້າງອອກມາດ້ວຍເຕັກນິກ Interaction Design. ໃນຂະນະດຽວກັນຍັງໄດ້ໃຊ້ເຕັກນິກຕິດຕາມ 600 ກວ່າຄົນ ນີ້ແມ່ນການໃຊ້ເຕັກນິກແບບນີ້ເປັນຄັ້ງທຳອິດໃນໂລກ.
ຄຳເຫັນ
0