ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ໃນກອງປະຊຸມຖະແຫຼງຂ່າວທີ່ຈັດຂຶ້ນໃນວັນທີ 8 ມີນານີ້, ມີນັກຂ່າວຖາມວ່າ: ຫວ່າງມໍ່ໆມານີ້, ຫ້ອງລົດລອງຊີວະພາບຂອງອາເມຣິກາຢູ່ອູແກຣນໄດ້ຮັບຄວາມສົນໃຈຢ່າງກວ້າງຂວາງຈາກຊາວໂລກ,ຕາມຂ່າວແຈ້ງວ່າ: ສະຖານທູດອາເມຣິກາປະຈຳອູແກຣນໄດ້ລຶບຂໍ້ມູນທີ່ກ່ຽວຂ້ອງກັບຫ້ອງທົດລອງຖິ້ມຢ່າງຮີບດ່ວນ. ທ່ານ ຈ້າວລີ້ຈ່ຽນ ໂຄສົກກະຊວງການຕ່າງປະເທດຈີນໄດ້ອ້າງຕາມການລາຍງານຂ່າວວ່າ: ຢູ່ໃນຫ້ອງທົດລອງເຫຼົ່ານີ້ໄດ້ເກັບຮັກສາເຊື້ອພະຍາດທີ່ອັນຕະລາຍຈຳນວນຫຼວງຫຼາຍ. ຣັດເຊຍຍັງໄດ້ພົບເຫັນໃນໄລຍະປະຕິບັດການເຄື່ອນໄຫວການທະຫານວ່າ: ອາເມຣິກາໄດ້ນຳໃຊ້ໂຄງລ່າງເຫຼົ່ານີ້ດຳເນີນແຜນການຊີວະພາບທາງການທະຫານ.
ທ່ານ ຈ້າວລີ້ຈ່ຽນ ກ່າວວ່າ: “ອີງຕາມຕົວເລກຂໍ້ມູນທີ່ອາເມຣິກາເປີດເຜີຍເອງ,ອາເມຣິກາໄດ້ສ້າງຫ້ອງທົດລອງຊີວະພາບ 26 ແຫ່ງຢູ່ອູແກຣນ. ໃນນັ້ນກະຊວງປ້ອງກັນປະເທດອາເມຣິກາມີສິດຄວບຄຸມແບບເດັດຂາດ,ເຊື້ອພະຍາດທີ່ອັນຕະລາຍທັງໝົດຢູ່ອູແກຣນຕ້ອງເກັບຮັກສາຢູ່ໃນຫ້ອງທົດລອງເຫຼົ່ານີ້,ແລະການເຄື່ອນໄຫວຄົ້ນຄວ້າທັງໝົດລ້ວນແຕ່ແມ່ນອາເມຣິກາເປັນແກນນຳ,ຖ້າບໍ່ໄດ້ຮັບການອະນຸຍາດຈາກອາເມຣິກາ,ຂໍ້ມູນໃດໆກໍ່ບໍ່ສາມາດເປີດເຜີຍຕໍ່ພາຍນອກໄດ້.” ທ່ານ ຈ້າວລີ້ຈ່ຽນ ຊີ້ໃຫ້ເຫັນວ່າ: ກະຊວງປ້ອງກັນປະເທດອາເມຣິກາໄດ້ຄວບຄຸມຫ້ອງທົດລອງຊີວະພາບ 336 ແຫ່ງຢູ່ 30 ປະເທດໃນໂລກດ້ວຍຂໍ້ອ້າງ “ການຮ່ວມມືເພື່ອຫຼຸດຜ່ອນຄວາມສ່ຽງດ້ານຄວາມປອດໄພຈາກຊີວະພາບ,ເພື່ອເພີ່ມທະວີການຮ່ວມມືດ້ານສາທາລະນະສຸກຂອງໂລກ”ແລະອື່ນໆ.
ທ່ານ ຈ້າວລີ້ຈ່ຽນ ກ່າວວ່າ: ຈຸດປະສົງທີ່ແທ້ຈິງຂອງອາເມຣິກາແມ່ນຫຍັງ?ເຂົາໄດ້ເຮັດຫຍັງເປັນພິເສດແດ່? ປະຊາຄົມໂລກມີຄວາມສົງໄສມາແຕ່ດົນແລ້ວ,ແຕ່ອາເມຣິກາບໍ່ເອົາຫົວຊານຳເລື່ອງນີ້ມາໂດຍຕະຫຼອດ, ຍິ່ງກວ່ານັ້ນຍັງໄດ້ເວົ້າວ່າຄຳລະແວງສົງໄສຈາກປະຊາຄົມໂລກເປັນ “ການປ່າວຂ່າວປອມ”. ນອກຈາກນີ້, ໃນ 20 ປີຜ່ານມາ, ອາເມຣິກາໄດ້ສະກັດກັ້ນການສ້າງກົນໄກກວດສອບຕາມສັນຍາວ່າດ້ວຍອາວຸດຊີວະພາບມາໂດຍຕະຫຼອດ,ປະຕິເສດການກວດສອບໂຄງລ່າງຊີວະພາບພາຍໃນແລະຕ່າງປະເທດຂອງປະເທດຕົນ ເຊິ່ງນີ້ໄດ້ເຮັດໃຫ້ປະຊາຄົມໂລກມີຄວາມກັງວົນຂຶ້ນຕື່ມ. ພວກຂ້າພະເຈົ້າຮຽກຮ້ອງອີກເທື່ອໜຶ່ງໃຫ້ອາເມຣິກາໃຫ້ຄວາມກະຈ່າງແຈ້ງຢ່າງຮອບດ້ານກ່ຽວກັບການເຄື່ອນໄຫວກ່ຽວກັບຊີວະພາບທາງການທະຫານຂອງອາເມຣິກາຢູ່ພາຍໃນແລະຕ່າງປະເທດ,ພ້ອມທັງອະນຸຍາດໃຫ້ຫຼາຍຝ່າຍເຂົ້າໄປກວດສອບ.
ຄຳເຫັນ
0