ບົດງາຍງານວຽກງານລັດຖະບານ
ໂດຍ: ທ່ານເວິ່ນເຈ່າຍປາວ,ນາຍົກລັດຖະມົມນຕີຈີນຢູ່ທີ່ກອງປະຊຸມເທື່ອທຳອິດຂອງສະພາຜູ້ແທນປະຊາຊົນແຫ່ງຊາດຈີນສະໄໝທີ 12 ໃນວັນທີ 5 ມີນາ 2013
ຮຽນ: ບັນດາທ່ານຜູ້ແທນທີ່ນັບຖື,
ດຽວນີ້,ຂ້າພະເຈົ້າຂໍຕາງໜ້າລັດຖະບານລາຍງານວຽກງານຂອງລັດຖະບານໃນ 5 ປີທີ່ຜ່ານມາຕໍ່ກອງປະຊຸມ,ແລະສະເໜີຂໍ້ສະເໜີກ່ຽວກັບວຽກງານໃນປີນີ້,ຂໍໃຫ້ບັນດາຜູ້ແທນຄົ້ນຄວ້າພິຈາລະນາ ແລະ ຂໍໃຫ້ກຳມະການສະພາປຶກສາການເມືອງປະຊາຊົນທົ່ວປະເທດປະກອບຄຳຄິດຄຳເຫັນ.
Ⅰ ທົບທວນຄືນວຽກງານໃນ 5 ປີທີ່ຜ່ານມາ
ໃນ5ປີທີ່ຜ່ານມາຄືນັບແຕ່ກອງປະຊຸມເທື່ອທຳອິດຂອງສະພາປະຊາຊົນແຫ່ງຊາດຈີນສະໄໝທີ11ມານີ້ແມ່ນໄລຍະ5ປີທີ່ບໍ່ແມ່ນເລື່ອງງ່າຍພໍປານໃດໃນຂະບວນການພັດທະນາປະເທດຈີນພວກເຮົາ. ພວກເຮົາໄດ້ຮັບມືກັບຜົນກະທົບອັນໜັກໜ່ວງທີ່ມາຈາກວິກິດການການເງິນສາກົນ, ເຮັດໃຫ້ເສດຖະກິດໄດ້ຮັບການພັດທະນາຢ່າງໝັ້ນທ່ຽງແລະໄວສົມຄວນ, ລວມຍອດຜະລິດຕະພັນພາຍໃນ ຫຼື GDP ໄດ້ເພີ່ມຂຶ້ນຈາກ 2 ໝື່ນ 6600 ຕື້ຢວນຂຶ້ນຮອດ 5 ໝື່ນ 1900 ຕື້ຢວນ, ຊຶ່ງເປັນອັນດັບທີ 2 ຂອງໂລກ; ລາຍຮັບທາງດ້ານການເງິນສາທາລະນະໄດ້ເພີ່ມຂຶ້ນຈາກ 5100 ຕື້ຢວນຂຶ້ນຮອດ 1 ໝື່ນ 1700 ຕື້ຢວນ; ລວມທັງໝົດແລ້ວ,ຜູ້ປະກອບອາຊີບທີ່ເພີ່ມໃໝ່ໃນຕົວເມືອງໄດ້ມີເຖິງ 58 ລ້ານ 7 ແສນຄົນ, ລາຍໄດ້ສະເລ່ຍຕໍ່ຫົວຄົນທີ່ສາມາດຈັບຈ່າຍໄດ້ຂອງປະຊາຊົນໃນຕົວເມືອງໄດ້ເພີ່ມຂຶ້ນ 8,8% ຕໍ່ປີ, ລາຍໄດ້ສຸດທິຄິດສະເລ່ຍຕາມຫົວຄົນຂອງປະຊາຊົນເຂດຊົນນະບົດໄດ້ເພີ່ມຂຶ້ນ 9,9% ຕໍ່ປີ; ຜົນຜະລິດທັນຍາຫານໄດ້ເພີ່ມຂຶ້ນເປັນປີທີ 9 ຕິດຕໍ່ກັນ. ການປະຕິຮູບໃນຂົງເຂດສຳຄັນໄດ້ຮັບຄວາມຄືບໜ້າໃໝ່, ເສດຖະກິດແບບເປີດກວ້າງໄດ້ກ້າວຂຶ້ນສູ່ລະດັບໃໝ່, ການສ້າງປະເທດແບບຫົວຄິດປະດິດສ້າງໄດ້ຮັບຜົນສຳເລັດອັນໃໝ່, ວຽກງານການບິນອະວະກາດບັນທຸກມະນຸດ, ໂຄງການສຳຫຼວດດວງຈັນ, ເຮືອດຳນ້ຳເລິກບັນທຸກຄົນ, ລະບົບນຳທາງຜ່ານດາວທຽມເປີຍໂຕ, ຊຸບເປີຄອມພິວເຕີ, ທາງລົດໄຟທີ່ມີຄວາມໄວສູງແລະວຽກງານດ້ານອື່ນໆ ໄດ້ຮັບຄວາມຄືບໜ້າໃໝ່, ກຳປັ່ນບັນທຸກເຮືອບິນລຽວນິງ ຊຶ່ງເປັນກຳປັ່ນບັນທຸກເຮືອບິນລຳທຳອິດໄດ້ນຳໃຊ້ຢ່າງເປັນທາງການ. ຈັດງານກິລາໂອລິມປິກປັກກິ່ງ, ງານກິລາໂອລິມປິກຄົນພິການປັກກິ່ງແລະງານວາງສະແດງໂລກຊຽງໄຮຢ່າງສຳເລັດຜົນ, ໄດ້ຮັບໄຊຊະນະໃຫຍ່ໃນການຕ້ານໄພພິບັດທາງທຳມະຊາດທີ່ຮ້າຍແຮງຕ່າງໆ ພ້ອມດ້ວຍການພັດທະນາຄືນໃໝ່ຫຼັງໄພພິບັດ ເປັນຕົ້ນແມ່ນແຜ່ນດິນໄຫວຮ້າຍແຮງເວິ້ນສວນ, ແຜ່ນດິນໄຫວຮຸນແຮງຢູ້ຊູ້, ດິນພູເຈື່ອນຮ້າຍແຮງໂຈ່ວສີ່ແລະອື່ນໆ. ກຳລັງການຜະລິດໃນສັງຄົມແລະກຳລັງສັງລວມຂອງຊາດ ໄດ້ຍົກສູງຂຶ້ນຢ່າງຈະແຈ້ງ, ລະດັບຊີວິດການເປັນຢູ່ຂອງປະຊາຊົນແລະລະດັບການປະກັນສັງຄົມໄດ້ຍົກສູງຂຶ້ນຢ່າງຈະແຈ້ງ, ຖາລະບົດບາດໃນສາກົນໄດ້ຍົກສູງຂຶ້ນຢ່າງເດັ່ນຊັດ. ພວກເຮົາ ໄດ້ເຮັດຫຼ້ອນໜ້າທີ່ຕາມແຜນການພັດທະນາເສດຖະກິດສັງຄົມແຫ່ງຊາດ 5 ປີຄັ້ງທີ 11 ຢ່າງສຳເລັດຜົນ, ແລະປະຕິບັດແຜນການ 5 ປີຄັ້ງທີ 12 ໄປດ້ວຍດີ. ການກໍ່ສ້າງສັງຄົມນິຍົມດ້ານຕ່າງໆຄືເສດຖະກິດ,ການເມື່ອງ,ວັດທະນະທຳ,ສັງຄົມ,ອາລິຍະທຳດ້ານຊີວະພາບ ໄດ້ຮັບຄວາມຄືບໜ້າຢ່າງໃຫຍ່ຫຼວງ, ໄດ້ຂຽນໜ້າປະຫວັດສາດໃໝ່ແຫ່ງການສ້າງສາພາລະກິດສັງຄົມນິຍົມທີ່ມີສີສັນພິເສດຂອງຈີນ.
ວຽກງານຕົ້ນຕໍພ້ອມດ້ວຍຈຸດພິເສດໃນ5ປີທີ່ຜ່ານມາ
⑴ ຮັບມືກັບວິກິດການການເງິນສາກົນຢ່າງມີປະສິດທິຜົນ, ຊຸກຍູ້ໃຫ້ເສດຖະກິດໄດ້ຮັບການພັດທະນາຢ່າງໝັ້ນທ່ຽງແລະໄວສົມຄວນ. ໃນ 5 ປີທີ່ຜ່ານມາ, ພວກເຮົາໄດ້ຮັບມືກັບຜົນກະທົບອັນໜັກໜ່ວງຈາກວິກິດການການເງິນສາກົນຢ່າງຕໍ່ເນື່ອງ, ພວກເຮົາໄດ້ຮັບມືຢ່າງທຸ່ນທ່ຽງແລະປັບປຸງຈຸດສຸມແຫ່ງການດັດສົມຄວບຄຸມມະຫາພາກຢ່າງທັນການ, ວາງ 10 ມາດຕະການເພື່ອກະຕຸ້ນຄວາມຕ້ອງການພາຍໃນ, ຊຸກຍູ້ໃຫ້ເສດຖະກິດເຕີບໂຕຢ່າງໝັ້ນທ່ຽງແລະໄວສົມຄວນຕື່ມອີກ. ເພີ່ມການລົງທຶນ 4000 ຕື້ຢວນພາຍໃນເວລາສອງປີ, ໃນນັ້ນ, ງົບປະມານການເງິນສູນກາງມີ 1260 ຕື້ຢວນ, ຕົ້ນຕໍແມ່ນໃຊ້ເຂົ້າໃນການກໍ່ສ້າງໃນດ້ານຕ່າງໆ ເປັນຕົ້ນແມ່ນໂຄງການກໍ່ສ້າງເຮືອນຢູ່ນະໂຍບາຍ, ໂຄງການປັບປຸງຊີວິດການເປັນຢູ່ຂອງປະຊາຊົນໃນເຂດຊົນນະບົດ, ພື້ນຖານໂຄງລ່າງ, ວຽກງານຕ່າງໆໃນສັງຄົມ, ການອະນຸລັກສິ່ງແວດລ້ອມທຳມະຊາດ, ການປະດິດສ້າງຢ່າງເປັນເຈົ້າຕົນເອງແລະອື່ນໆພ້ອມດ້ວຍການພັດທະນາຄືນໃໝ່ຫຼັງໄພທຳມະຊາດ.
ພວກເຮົາເອົາໃຈໃສ່ມາໂດຍຕະຫຼອດ ຕໍ່ການແກ້ໄຂບັນຫາການພົວພັນລະຫວ່າງການເຮັດໃຫ້ເສດຖະກິດພັດທະນາຢ່າງໝັ້ນທ່ຽງ ແລະໄວສົມຄວນ, ປັບປຸງອົງປະກອບເສດຖະກິດກັບການຄຸ້ມຄອງໄພເງິນເຟີ້, ເຮັດໃຫ້ນະໂຍບາຍມະຫາພາກມີການເບິ່ງກວ້າງມອງໄກ, ມີວິທະຍາສາດແລະມີປະສິດທິຜົນຫຼາຍຂຶ້ນກວ່າເກົ່າ, ເອົາໃຈໃສ່ໃນການກຳທິດທາງ,ຄວາມເຂັ້ມງວດແລະຈຸດສຸມຂອງນະໂຍບາຍ. ໃນປີ 2012 ຜ່ານມາ,ພາຍໃຕ້ສະພາບທີ່ເສດຖະກິດຂອງບັນດາອົງກອນເສດຖະກິດໃຫຍ່ຂອງໂລກ ເຕີບໂຕຊ້າລົງໂດຍທົ່ວໄປແລະຄວາມສ່ຽງຕ່າງໆປະກົດອອກມາຢ່າງບໍ່ຢຸດຢັ້ງ, ພວກເຮົາໄດ້ບັນລຸເປົ້າໝາຍຕົ້ນຕໍທີ່ກຳນົດໄວ້ໃນຕົ້ນປີ, GDP ເພີ່ມຂຶ້ນ 7,8%, ຜູ້ປະກອບອາຊີບໃນຕົວເມືອງເພີ່ມຂຶ້ນ 12 ລ້ານ 6 ແສນ 6 ໝື່ນຄົນ, ຕົວເລກດັດຊະນີລາຄາຜູ້ຊົມໃຊ້ຫຼືCPIໄດ້ຫຼຸດລົງຄືນເຖິງ2,6%, ຊຶ່ງໄດ້ສ້າງພື້ນຖານທີ່ດີໃຫ້ແກ່ການພັດທະນາເສດຖະກິດປີນີ້.
ໃນ 5 ປີທີ່ຜ່ານມາ, ເວົ້າໃນດ້ານລວມແລ້ວ, ເສດຖະກິດມະຫາພາກຂອງຈີນໄດ້ຮັກສາທ່າອ່ຽງທີ່ດີຄືຈັງຫວະການເຕີບໂຕມີຄວາມໝັ້ນທ່ຽງແລະໄວສົມຄວນ,ລາຄາສິນຄ້າມີຄວາມໝັ້ນທ່ຽງໂດຍທຽບຖານ, ຜູ້ປະກອບອາຊີບໄດ້ເພີ່ມຂຶ້ນຢ່າງຕໍ່ເນື່ອງ, ລາຍຮັບລາຍຈ່າຍສາກົນຄ່ອຍໆມີຄວາມດຸນດ່ຽງຂຶ້ນ.ສະເລ່ຍແລ້ວ GDP ໄດ້ຮັບການເຕີບໂຕ9,3%ຕໍ່ປີ,ສູງກວ່າຈັງຫວະການເຕີບໂຕຂອງໂລກ ແລະອົງກອນເສດຖະກິດທີ່ຈະເລີນໃໝ່ໃນໄລຍະເວລາດຽວກັນຢ່າງຈະແຈ້ງ, ອັດຕາເງິນເຟີ້ຕ່ຳກວ່າອົງກອນເສດຖະກິດທີ່ຈະເລີນໃໝ່ອື່ນໆ. ເສດຖະກິດຂອງຈີນພວກເຮົາແມ່ນໄດ້ຮັບການພັດທະນາຢ່າງໝັ້ນທ່ຽງແລະເຕັມໄປດ້ວຍຄວາມມີຊີວິດຊີວາ.
⑵ ເລັ່ງລັດປັບປຸງອົງປະກອບເສດຖະກິດ,ຍົກສູງຄຸນນະພາບແລະປະສິດທິຜົນຂອງການພັດທະນາເສດຖະກິດ. ຍຶດໝັ້ນປະຕິບັດຍຸດທະສາດກະຕຸ້ນຄວາມຕ້ອງການພາຍໃນ, ຄວາມຕ້ອງການພາຍໃນໄດ້ກວມອັດຕາສ່ວນໃນການເຕີບໂຕທາງເສດຖະກິດນັ້ນໄດ້ເພີ່ມຂຶ້ນຢ່າງເດັ່ນຊັດ, ອັດຕາຂອງ ການໄດ້ປຽບດຸນການຄ້າຂອງລາຍການປົກກະຕິທີ່ກວມເອົາGDPນັ້ນ ໄດ້ຫຼຸດຈາກ10,1%ລົງຮອດ2,6%.
⑶ວຽກງານກ່ຽວກັບກະສິກຳ,ຊົນນະບົດແລະຊາວກະສິກອນໄດ້ຮັບການພັດທະນາເປັນຢ່າງດີແລະຕໍ່ເນື່ອງ, ປັບປຸງແລະເພີ່ມທະວີພື້ນຖານຂອງກະສິກຳໃຫ້ໝັ້ນຄົງຕື່ມອີກ.
ໃນຂະນະທີ່ລົງເລິກພັດທະນາການຫັນເປັນອຸດສາຫະກຳ, ຫັນເປັນເຕັກໂນໂລຊີຂໍ້ມູນຂ່າວສານແລະການຫັນເປັນຕົວເມືອງນັ້ນ ພວກເຮົາຍຶດໝັ້ນຊຸກຍູ້ການຫັນເປັນທັນສະໄໝຂອງກະສິກຳ, ສຸມກຳລັງເຮັດສຳເລັດໜ້າທີ່ວຽກງານຈຳນວນໜຶ່ງ ທີ່ກ່ຽວພັນເຖິງການພັດທະນາກະສິກຳແລະຊົນນະບົດໃນໄລຍະຍາວ, ຕິດພັນເຖິງຜົນປະໂຫຍດຕົວຈິງຂອງຊາວກະສິກອນ. ໄດ້ເພີ່ມງົບປະມານເຂົ້າໃນວຽກງານດ້ານກະສິກຳ, ຊົນນະບົດແລະຊາວກະສິກອນ, ລວມທັງໝົດແລ້ວ,ການເງິນສູນກາງໄດ້ໃຊ້ງົບປະມານ4470ຕື້ຢວນ, ຊຶ່ງສະເລ່ຍແລ້ວເພີ່ມຂຶ້ນ23,5%ຕໍ່ປີ.
⑷ ຍຶດໝັ້ນປະຕິບັດຍຸດທະສາດສ້າງປະເທດໃຫ້ຈະເລີນຮຸ່ງເຮືອງດ້ວຍວິທະຍາສາດເຕັກໂນໂລຊີແລະການສຶກສາ, ເພີ່ມຄວາມສາມາດໃຈກາງໃນການຄ້ຳຊູການພັດທະນາເສດຖະກິດສັງຄົມ.
ໃຫ້ບູລິມະສິດໃນການພັດທະນາວຽກງານການສຶກສາ. ໃນ5ປີທີ່ຜ່ານ, ລັດຖະບານໄດ້ໃຊ້ງົບປະມານດ້ານການສຶກສາທັງໝົດ7790ຕື້ຢວນ, ສະເລ່ຍແລ້ວ ເພີ່ມຂຶ້ນ 21,58% ຕໍ່ປີ. ປີ2102, ງົບປະມານດ້ານການສຶກສາໄດ້ກວມGDPເຖິງ4%. ລັດໄດ້ເພີ່ມເງິນທຶນ,ກຳລັງຄົນແລະວັດຖຸດ້ານການສຶກສາໄປໃຫ້ເຂດຊົນນະບົດ,ເຂດຫ່າງໄກສອກຫຼີກ,ເຂດຊົນເຜົ່າສ່ວນໜ້ອຍແລະເຂດທຸກຍາກໃຫ້ຫຼາຍຂຶ້ນ, ໄດ້ມີຄວາມກ້າວໜ້າຢ່າງຈະແຈ້ງໃນດ້ານຄວາມຍຸດຕິທຳດ້ານການສຶກສາ.
ອອກແຮງຊຸກຍູ້ການປະດິດສ້າງໃໝ່ຢ່າງເປັນເຈົ້າຕົນເອງ. ໃນ 5 ປີທີ່ຜ່ານມາ, ການເງິນສູນກາງໄດ້ໃຊ້ງົບປະມານທັງໝົດ 872 ຕື້ 900 ລ້ານຢວນ, ຊຶ່ງສະເລ່ຍແລ້ວເພີ່ມຂຶ້ນຫຼາຍກວ່າ18%ຕໍ່ປີ.
ລົງເລິກປະຕິບັດຍຸດທະສາດສ້າງປະເທດໃຫ້ເຂັ້ມແຂງດ້ວຍຖານະຜູ້ມີຄວາມຮູ້ຄວາມສາມາດ. ເພີ່ມທະວີການກໍ່ສ້າງຖັນແຖວຜູ້ມີຄວາມຮູ້ຄວາມສາມາດດ້ານຕ່າງໆ ໂດຍມີຈຸດສຸມຄືຜູ້ມີຄວາມຮູ້ຄວາມສາມາດລະດັບສູງແລະຜູ້ມີສີມືລະດັບສູງ, ຜູ້ມີຄວາມຮູ້ດ້ານວິຊາການໄດ້ເພີ່ມຂຶ້ນ8ລ້ານ6ແສນຄົນ,ຜູ້ມີສີມືລະດັບສູງໄດ້ເພີ່ມຂຶ້ນ8ລ້ານ8ແສນຄົນ, ຜູ້ທີ່ຮຽນຈົບຈາກຕ່າງປະເທດແລ້ວກັບຄືນປະເທດມີເຖິງ5ແສນ4ໝື່ນຄົນ.
ອອກແຮງເພີ່ມທະວີການກໍ່ສ້າງວຽກງານດ້ານວັດທະນະທຳ. ລະບົບເຄືອຂ່າຍສິ່ງກໍ່ສ້າງວັດທະນະທຳສາທາລະນະ ທີ່ປົກຄຸມຕົວເມືອງແລະຊົນນະບົດໄດ້ສ້າງສຳເລັດໃນເບື້ອງຕົ້ນ,ຫໍພິພິດທະພັນ,ຫໍສະໝຸດ,ຫໍວັດທະນະທຳຫຼືສູນວັດທະນະທຳໄດ້ເປີດການບໍລິການໂດຍບໍ່ຕ້ອງເສຍເງິນຢ່າງຮອບດ້ານ.
⑸ ຍຶດໝັ້ນຖືຜົນປະໂຫຍດຂອງປະຊາຊົນໄວ້ຢູ່ໃນຖານະອັນດັບໜຶ່ງ, ສຸມກຳລັງເຂົ້າໃນການຮັບປະກັນແລະປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນ.
ພວກເຮົາຖືການປະກອບອາຊີບເປັນວຽກງານສຳຄັນອັນດັບໜຶ່ງໃນການຮັບປະກັນແລະປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນ, ປະຕິບັດນະໂຍບາຍທີ່ຕັ້ງໜ້າເພື່ອຊຸກຍູ້ການປະກອບອາຊີບ, ເຮັດໃຫ້ສະພາບການປະກອບອາຊີບຮັກສາທ່າອ່ຽງຄວາມໝັ້ນທ່ຽງໂດຍລວມ. ຊຸກຍູ້ການກໍ່ສ້າງລະບົບປະກັນສັງຄົມຢ່າງຮອບດ້ານ, ສ້າງລະບຽບການວ່າດ້ວຍການປະກັນໄພດ້ານການລ້ຽງຊີບຍາມເຖົ້າແກ່ໃນເຂດຊົນນະບົດແບບໃໝ່ແລະລະບຽບການປະກັນໄພດ້ານການລ້ຽງຊີບໃນຍາມເຖົ້າແກ່ຂອງຕົວເມືອງ, ລະບຽບການປະກັນໄພ ດ້ານການລ້ຽງຊີບໃນຍາມເຖົ້າແກ່ຂັ້ນພື້ນຖານໃນຊົນນະບົດແລະຕົວເມືອງໄດ້ປົກຄຸມທົ່ວປະເທດ. ລົງເລິກການປະຕິຮູບໂຄງປະກອບສາທາລະນະສຸກ, ສ້າງລະບຽບການຮ່ວມມືປິ່ນປົວພະຍາດແບບໃໝ່ໃນຊົນນະບົດແລະລະບຽບການປະກັນໄພ ການປິ່ນປົວຂັ້ນພື້ນຖານຂອງປະຊາຊົນໃນຕົວເມືອງ, ລະບົບຮັບປະກັນການປິ່ນປົວຂັ້ນຖື້ນຖານຂອງປະຊາຊົນທົ່ວປະເທດ ໄດ້ສ້າງຕັ້ງຂຶ້ນໃນຂັ້ນພື້ນຖານ. ໄດ້ສ້າງແລະບູລະນະລະບຽບການເຮືອນຢູ່ນະໂຍບາຍໃນຕົວເມືອງໃຫ້ສົມບູນຂຶ້ນ, ເຊິ່ງລະບຽບການດັ່ງໄດ້ໄດ້ປົກຄຸມຂອບເຂດກວ້າງອອກເປັນກ້າວໆ,ຮອດທ້າຍປີ2012ໄດ້ບັນລຸເຖິງ12,5%.
⑹ ລົງເລິກການປະຕິຮູບໃນຂົງເຂດທີ່ສຳຄັນ, ເພີ່ມທະວີການພັດທະນາເສດຖະກິດສັງຄົມໃຫ້ມີຊີວິດຊີວາຫຼາຍຂຶ້ນ. ພວກເຮົາໄດ້ຮັບຄວາມຄືບໜ້າທີ່ສຳຄັນໃນຂົງເຂດສຳຄັນຈຳນວນໜຶ່ງ.
⑺ ເປີດກວ້າງການເປີດປະຕູສູ່ພາຍນອກຢ່າງເດັດດ່ຽວໜຽວແໜ້ນ,ຍົກລະດັບເສດຖະກິດແບບເປີດປະຕູໃຫ້ສູງຂຶ້ນຢ່າງຮອບດ້ານ.
ຄິດສະເລ່ຍແລ້ວ, ຍອດມູນຄ່າການຄ້າຂາເຂົ້າຂາອອກໄດ້ເພີ່ມຂຶ້ນ 12,2% ຕໍ່ປີ, ຊຶ່ງມີຖານະສູງຂຶ້ນຈາກອັນດັບທີ 3 ຂອງໂລກຂຶ້ນເປັນອັນດັບທີ 2, ໃນນັ້ນ,ມູນຄ່າການຄ້າຂາອອກໄດ້ກ້າວຂຶ້ນເປັນອັນດັບໜຶ່ງຂອງໂລກ.5ປີທີ່ຜ່ານມາໄດ້ນຳໃຊ້ທຶນຕ່າງປະເທດຕົວຈິງເຖິງ552ຕື້800ລ້ານໂດລາ,ອົງປະກອບແລະສະພາບການຈັດວາງໃນການນຳໃຊ້ທຶນຕ່າງປະເທດ ໄດ້ຮັບການປັບປຸງໃດ້ດີຂຶ້ນຢ່າງເດັ່ນຊັດ, ຄຸນນະພາບແລະລະດັບການນຳໃຊ້ທຶນຕ່າງປະເທດກໍ່ໄດ້ຍົກສູງຂຶ້ນຢ່າງຈະແຈ້ງ. ໄດ້ສົ່ງເສີມໃຫ້ວິສາຫະກິດປະເພດຕ່າງໆໄປລົງທຶນຢູ່ຕ່າງປະເທດແລະເຮັດທຸລະກິດຂ້າມຊາດ, ການລົງທຶນໂດຍກົງທີ່ບໍ່ແມ່ນປະເພດການເງິນຕໍ່ຕ່າງປະເທດໄດ້ເພີ່ມຂຶ້ນຈາກ 24 ຕື້ 800 ລ້ານໂດລາໃນປີ 2007 ຂຶ້ນຮອດ 77 ຕື້ 200 ລ້ານໂດລາໃນປີ 2012, ສະເລ່ຍແລ້ວ ເພີ່ມຂຶ້ນ 25,5% ຕໍ່ປີ, ຈີນໄດ້ເຂົ້າສູ່ຖັນແຖວປະເທດໃຫຍ່ດ້ານການລົງທຶນຕໍ່ຕ່າງປະເທດ. ການເປີດປະຕູສູ່ພາຍນອກໄດ້ເປັນກຳລັງອັນແຂງແຮງໃນການຊຸກຍູ້ການພັດທະນາເສດຖະກິດພ້ອມດ້ວຍການປັບປຸງອົງປະກອບເສດຖະກິດຂອງຈີນໃຫ້ດີຂຶ້ນ, ໄດ້ຮັບເອົາເຕັກນິກທີ່ກ້າວກ້າວແລະບົດຮຽນດ້ານການຄຸ້ມຄອງ, ສ້າງໂອກາດປະກອບອາຊີບໃຫ້ຫຼາຍຂຶ້ນແລະເຮັດໃຫ້ປະຊາຊົນມີລາຍໄດ້ເພີ່ມຂຶ້ນ, ແລະຍັງໄດ້ປະກອບສ່ວນອັນສຳຄັນເຂົ້າໃນການຊຸກຍູ້ໃຫ້ເສດຖະກິດໂລກຟື້ນຕົວດີຂຶ້ນ.
⑻ ເພີ່ມທະວີການກໍ່ສ້າງລັດຖະບານຢ່າງແທ້ຈິງ, ລົງເລິກການປະຕິຮູບໂຄງປະກອບການບໍລິຫານຕື່ມອີກ.
ຊຸກຍູ້ການປະຕິຮູບອົງການລັດຖະບານ, ສ້າງຕັ້ງຂອບໂຄງປະກອບກະຊວງໃຫຍ່ທີ່ມີພາລະບົດບາດເປັນເອກະພາບໃນເບື້ອງຕົ້ນ. ພວກເຮົາຍຶດຖື ຫຼັກມາດຖານພື້ນຖານ ໃນການປະຕິບັດວຽກງານລັດຖະບານມາໂດຍຕະ ຫຼອດຄື: ສ້າງນະໂຍບາຍຢ່າງມີວິທະຍາສາດແລະປະຊາທິປະໄຕ, ຍຶດໝັ້ນປະຕິບັດການບໍລິຫານຕາມກົດໝາຍ, ຊຸກຍູ້ການເປີດເຜີຍວຽກງານຂອງລັດ, ບູລະນະລະບຽບການຕິດຕາມກວດກາໃຫ້ສົມບູນຂຶ້ນ ແລະເພີ່ມທະວີການກໍ່ສ້າງການປົກຄອງບໍລິຫານຢ່າງປອດໃສຂາວສະອາດ. ໄດ້ໃຊ້ມາດຕະການໃໝ່ຕ່າງໆ ໃນດ້ານການເຮັດໃຫ້ການໃຊ້ສິດອຳນາດເປັນລະບຽບແບບແຜນ, ກໍ່ສ້າງລັດຖະບານແບບບໍລິການ,ລັດຖະບານີ່ມີຄວາມຮັບຜິດຊອບ, ລັດຖະບານທີ່ປົກຄອງຕາມກົດໝາຍ ແລະ ລັດຖະບານທີ່ປົກຄອງຢ່າງປອດໄສຂາວສະອາດ.
ບັນດາຜູ້ແທນທີ່ນັບຖື!
ໃນ5ປີທີ່ຜ່ານມາ, ພວກເຮົາໄດ້ປະຕິບັດຕາມກົດໝາຍວ່າດ້ວຍການປົກຄອງຕົນເອງຂອງເຂດຊົນເຜົ່າສ່ວນໜ້ອຍ, ປະຕິບັດນະໂຍບາຍກ່ຽວກັບເສລີພາບໃນການເຊື່ອຖືສາສະໜາຢ່າງຮອບດ້ານ. ຕັ້ງໜ້າຜັນຂະຫຍາຍນະໂຍບາຍກ່ຽວກັບວຽກງານຊາວຈີນຕ່າງດ້າວ. ໄດ້ສ້າງສະພາບໃໝ່ໃນການກໍ່ສ້າງການປ້ອງກັນປະເທດແລະກອງທັບ, ວຽກງານກ່ຽວກັບຮົງກົງ,ມາເກົ໋າແລະໄຕ້ຫວັນໄດ້ຮັບການເພີ່ມທະວີຂຶ້ນຕື່ມອີກ.
ວຽກງານການຕ່າງປະເທດຮອບດ້ານ ໄດ້ຮັບຄວາມຄືບໜ້າສຳຄັນໃໝ່. ພວກເຮົາໄດ້ຕັ້ງໜ້າຊຸກຍູ້ການພົວພັນກັບປະເທດໃຫຍ່ຕ່າງໆ, ເພີ່ມທະວີການພົວພັນຮ່ວມມືທີ່ຕ່າງຝ່າຍຕ່າງມີຜົນປະໂຫຍດກັບປະເທດອ້ອມຂ້າງ, ສ້າງເຂດການຄ້າເສລີຈີນ-ອາຊຽນຢ່າງສຳເລັດຜົນ, ຊຸກຍູ້ການພັດທະນາກົນໄກການຮ່ວມມືລະດັບພາກພື້ນຕ່າງໆ ເປັນຕົ້ນແມ່ນອົງການຮ່ວມມືຊຽງໄຮ, ລົງເລິກມິດຕະພາບອັນເປັນມູນເຊື້ອແລະການຮ່ວມມືກັບປະເທດ ທີ່ພວມພັດທະນາທັງຫຼາຍ, ຕັ້ງໜ້າເຂົ້າຮ່ວມການຮ່ວມມືສາກົນກ່ຽວກັບບັນຫາທົ່ວໂລກເປັນຕົ້ນແມ່ນຮັບມືກັບວິກິດການການເງິນສາກົນ,ການປ່ຽນແປງຂອງດິນຟ້າ ອາກາດແລະອື່ນໆ, ຊຸກຍູ້ການແກ້ໄຂບັນຫາຈຸດສຸມໃນສາກົນແລະພາກພື້ນ, ໄດ້ສ້າງສະພາບແວດລ້ອມສາກົນທີ່ມີຜົນດີຕໍ່ການປະຕິຮູບ, ການພັດທະນາແລະສະຖຽນລະພາບຂອງປະເທດພວກເຮົາ, ແລະໄດ້ປະກອບສ່ວນອັນສຳຄັນເຂົ້າໃນສັນຕິພາບ, ສະຖຽນລະພາບ,ການພັດທະນາແລະຄວາມຈະເລີນຮຸ່ງເຮືອງຂອງໂລກ.
ບັນດາຜູ້ແທນທີ່ນັບຖື!
ຜົນສຳເລັດໃນ 5 ປີຜ່ານມາແມ່ນໄດ້ມາດ້ວຍຄວາມຫຍັງຍາກລຳບາກນາໆປະເທດ. ນີ້ແມ່ນຜົນສຳເລັດ ພາຍໃຕ້ການກຳສະພາບລວມແລະການນຳພາອັນຖືກຕ້ອງຂອງສູນກາງພັກ, ແມ່ນຜົນສຳເລັດທີ່ໄດ້ຮັບຈາກຄວາມສາມັກຄີເປັນຈິດໜຶ່ງໃຈດຽວແລະບາກບັ່ນສູ້ຊົນຂອງປະຊາຊົນບັນດາເຜົ່າໃນທົ່ວປະເທດແລະທົ່ວພັກ. ຂ້າພະເຈົ້າຂໍຕາງໜ້າລັດຖະບານ ສະແດງຄວາມຂອບໃຈຢ່າງຈິງໃຈຕໍ່ປະຊາຊົນບັນດາເຜົ່າໃນທົ່ວປະເທດ, ຕໍ່ພັກຝ່າຍປະຊາທິປະໄຕຕ່າງໆ, ຕໍ່ອົງການຈັດຕັ້ງມະຫາຊົນຕ່າງໆແລະບຸກຄົນວົງການອື່ນໆ, ຕໍ່ລັດຖະບານບັນດາປະເທດ,ອົງການຈັດຕັ້ງສາກົນແລະເພື່ອນມິດປະເທດຕ່າງໆ.
ພວກເຮົາໄດ້ຮັບຮູ້ຢ່າງຈະແຈ້ງວ່າ, ໃນການພັດທະນາເສດຖະກິດສັງຄົມຍັງມີຄວາມຂັດແຍ່ງແລະມີບັນຫາບໍ່ໜ້ອຍ, ຕົ້ນຕໍແມ່ນ: ບັນຫາທີ່ການພັດທະນາບໍ່ດຸນດ່ຽງ,ບໍ່ກົມກຽວກັນແລະບໍ່ຍືນຍົງນັ້ນຍັງເປັນບັນຫາທີ່ພົ້ນເດັ່ນຢູ່; ຄວາມຂັດແຍ່ງລະຫວ່າງຄວາມກົດດັນທີ່ເສດຖະກິດເຕີບໂຕຊ້າລົງ ກັບ ຄວາມສາມາດການຜະລິດເຫຼືອເຟືອໂດຍຖຽບຖານນັ້ນໄດ້ຮຸນແຮງຂຶ້ນໜ້ອຍໜຶ່ງ; ບັນຫາທີ່ຕົ້ນທຶນການຜະລິດແລະທຸລະກິດຂອງວິສາຫະກິດເພີ່ມຂຶ້ນ ແລະການຂາດຄວາມສາມາດດ້ານການປະດິດສ້າງແມ່ນມີຢູ່ພ້ອມກັນ; ຄວາມຂັດແຍ່ງລະຫວ່າງລາຍຮັບດ້ານການເງິນທີ່ເພີ່ມຂຶ້ນຊ້າລົງ ກັບ ລາຍຈ່າຍອັນຈຳເປັນຂອງລັດທີ່ເພີ່ມຂຶ້ນນັ້ນໄດ້ພົ້ນເດັ່ນຂຶ້ນ; ຂົງເຂດການເງິນມີຄວາມສ່ຽງທີ່ແຝງຊ້ອນຢູ່; ອົງປະກອບອຸດສາຫະກຳບໍ່ສົມເຫດສົມຜົນ, ພື້ນຖານກະສິກຳຍັງອ່ອນແອຄືເກົ່າ, ຄວາມຂັດແຍ່ງລະຫວ່າງການພັດທະນາເສດຖະກິດກັບຊັບພະຍາກອນແລະສິ່ງແວດລ້ອມນັ້ນນັບມື້ນັບຮຸນແຮງຂຶ້ນ; ຄວາມຫຼຸດໂຕນກັນດ້ານການພັດທະນາລະຫວ່າງຕົວເມືອງກັບຊົນນະບົດ, ລະຫວ່າງເຂດແຄວ້ນແລະໃນດ້ານການແບ່ງປັນລາຍໄດ້ຂອງປະຊາຊົນຍັງເປັນບັນຫາທີ່ໜັກໜ່ວງ; ຄວາມຂັດແຍ່ງໃນສັງຄົມເພີ່ມຫຼາຍຂຶ້ນຢ່າງຈະແຈ້ງ, ຍັງມີບັນຫາບໍ່ໜ້ອຍທີ່ກ່ຽວພັນກັບຜົນປະໂຫຍດຕົວຈິງຂອງປະຊາຊົນເຊິ່ງຕ້ອງໄດ້ທຳການແກ້ໄຂ, ເປັນຕົ້ນແມ່ນ: ການສຶກສາ,ການປະອບອາຊີບ,ການປະກັນສັງຄົມ,ການປິ່ນປົວພະຍາດ,ເຮືອນຢູ່,ສິ່ງແວດລ້ອມທຳມະຊາດ,ຄວາມປອດໄພດ້ານອາຫານແລະຢຸກຢາ,ຄວາມປອດໄພດ້ານການຜະລິດ,ຄວາມສະຫງົບທາງສັງຄົມແລະອື່ນໆ, ຊີວິດການເປັນຢູ່ຂອງປະຊາຊົນຈຳນວນໜຶ່ງຍັງມີຄວາມຫຍຸ້ງຍາກ; ມີຫຼາຍອຸປະສັກດ້ານໂຄງປະກອບແລະກົນໄກທີ່ຜູກມັດການພັດທະນາຢ່າງມີວິທະຍາສາດ; ການຫັນປ່ຽນພາລະບົດບາດຂອງລັດຖະບານຍັງປະຕິບັດບໍ່ເຖິງຖອງ, ໃນບາງຂົງເຂດມັກເກີດມີສະພາບການສໍ້ບາດບັງຫຼວງເລື້ອຍໆ. ໃນບັນຫາເຫຼົ່ານີ້, ມີບາງບັນຫາແມ່ນໄດ້ສະສົມມາເປັນໄລຍະເວລາຍາວນານ, ມີບາງບັນຫາແມ່ນປະກົດອອກໃນການພັດທະນາເສດຖະກິດສັງຄົມ, ມີບາງບັນຫາແມ່ນເກີດຂຶ້ນຍ້ອນຂໍ້ຂາດຕົກບົກຜ່ອງໃນການປະຕິບັດງານຂອງລັດຖະບານ. ພວກເຮົາຕ້ອງມີນ້ຳໃຈທີ່ມີຄວາມຮັບຜິດຊອບສູງຕໍ່ປະເທດຊາດແລະປະຊາຊົນ,ຕ້ອງພະຍາຍາມຫຼາຍຂຶ້ນກວ່າເກົ່າເພື່ອປະຕິບັດດວຽກງານໃຫ້ດີ, ເລັ່ງລັດແກ້ໄຂບັນຫາເຫຼົ່ານີ້, ເດັດຂາດຈະບໍ່ເຮັດໃຫ້ປະຊາຊົນຜິດຫວັງ.
Ⅱ ຄວາມຮຽກຮ້ອງລວມ, ເປົ້າໝາຍຕົ້ນຕໍຂອງການພັດທະນາເສດຖະເກິດສັງຄົມແລະນະໂຍບາຍເສດຖະກິດມະຫາພາກໃນປີນີ້.
ການພັດທະນາຂອງປະເທດພວກເຮົາ ຍັງຢູ່ໃນໄລຍະທີ່ມີໂອກາດຍຸດທະສາດອັນສຳຄັນທີ່ສາມາດສ້າງຜົນງານອັນຍິ່ງໃຫຍ່, ໃນດ້ານການພັດທະນາເສດຖະກິດສັງຄົມ ໄດ້ມີເງື່ອນໄຂທີ່ດີແລະປັດໄຈອັນຕັ້ງຫນ້າຢ່າງຫລວງຫລາຍ, ແຕ່ກໍ່ປະເຊີນໜ້າກັບຄວາມສ່ຽງແລະສິ່ງທ້າທາຍບໍ່ຫນ້ອຍ. ວິກິດການການເງິນສາກົນ ໄດ້ສົ່ງຜົນກະທົບອັນເລິກເຊິ່ງອອກມາຢ່າງຕໍ່ເນື່ອງ,ເສດຖະກິດໂລກທີ່ຈະຟື້ນຕົວນັ້ນ ຍັງມີຄວາມບໍ່ແນ່ນອນແລະບໍ່ຫມັ້ນທ່ຽງຫລາຍຢ່າງ. ພວກເຮົາຄວນເບິ່ງໃນດ້ານທີ່ຕັ້ງຫນ້າຂອງສະຖານະການ, ມີຄວາມຫມັ້ນໃຈອັນເຕັມປ່ຽມ, ແຕ່ກໍ່ຄວນເບິ່ງຄວາມສັບສົນຂອງສະຖາ ນະການ,ເພີ່ມທະວີສະຕິເປັນຫ່ວງເປັນໃຍແລະມີຄວາມສະດຸ້ງໄວ, ພ້ອມ ທັງເຮັດວຽກຢ່າງເອົາຈິງເອົາຈັງໃຫ້ດີ.
ຄວາມຮຽກຮ້ອງໂດຍລວມຂອງວຽກງານໃນປີນີ້ແມ່ນ: ຖືການຍົກສູງຄຸນນະພາບແລະປະສິດທິຜົນຂອງການເຕີບໂຕທາງເສດຖະກິດເປັນໃຈກາງ, ລົງເລິກການປະຕິຮູບແລະເປີດປະຕູສູ່ພາຍນອກ, ປະຕິບັດຍຸດທະຍາດທີ່ຖືການປະດິດສ້າງໃໝ່ເປັນແມ່ແຮງ, ຊຸກຍູ້ການກໍ່ສ້າງເສດຖະກິດ, ການເມືອງ, ວັດທະນະທຳ, ສັງຄົມແລະອາລິຍະທຳຊີວະພາບສັງຄົມນິຍົມຢ່າງຮອບດ້ານ, ບັນລຸໃຫ້ເສດຖະກິດໄດ້ຮັບການພັດທະນາຢ່າງຕໍ່ເນື່ອງແລະປອດໄສ, ແລະເຮັດໃຫ້ສັງຄົມມີສະຖຽນລະພາບແລະກົມກຽວກັນ.
ເປົ້າໝາຍຕົ້ນຕໍໃນດ້ານການພັດທະນາເສດຖະກິດສັງຄົມປີນີ້ແມ່ນ: ເຮັດໃຫ້ລວມຍອດຜະລິດຕະພັນພາຍໃນຫຼືGDPເພີ່ມຂຶ້ນປະມານ7,5%, ການພັດທະນາມີຄວາມປະສານກົມກຽວກັນຫຼາຍຂຶ້ນຕື່ມ,ຕົວເລກດັດຊະນີລາຄາຜູ້ຊົມໃຊ້ເພີ່ມຂຶ້ນປະມານ 3,5%, ຜູ້ປະກອບອາຊີບໃນຕົວເມືອງເພີ່ມຂຶ້ນຫຼາຍກວ່າ 9 ລ້ານຄົນ, ເຮັດໃຫ້ອັດຕາຫວ່າງງານທີ່ຂຶ້ນທະບຽນໃນຕົວເມືອງຕ່ຳກວ່າ4,6%,ລາຍໄດ້ຕົວຈິງສະເລ່ຍຕໍ່ຫົວຄົນຂອງປະຊາຊົນໃນຕົວເມືອງແລະຊົນະນະບົດເພີ່ມຂຶ້ນໄປຕາມຈັງຫວະດຽວກັນຂອງການເຕີບໂຕທາງດ້ານເສດຖະກິດ, ລາຍໄດ້ຂອງຜູ້ອອກແຮງງານເພີ່ມຂຶ້ນໄປພ້ອມກັບການຍົກສູງຂຶ້ນຂອງປະສິດທິຜົນໃນການອອກແຣງງານ,ສະພາບລາຍຮັບລາຍຈ່າຍສາກົນ ໄດ້ຮັບການປັບປຸງໃຫ້ດີຂຶ້ນຕື່ມອີກ.
ກ່ຽວກັບເປົ້າຫມາຍຂອງການເຕີບໂຕດ້ານເສດຖະກິດ. ດ້ານຫນຶ່ງຕ້ອງ ສືບຕໍ່ກຳແຫນ້ນໂອກາດ, ຊຸກຍູ້ການພັດທະນາ. ອີກດ້ານຫນຶ່ງ, ຕ້ອງອີງຕາມຄວາມຮຽກຮ້ອງຕ້ອງການຂອງທັດສະນະພັດທະນາຕາມຫລັກວິທະຍາສາດ ຢ່າງແທ້ຈິງ, ນຳພາດ້ານຕ່າງໆວາງຈຸດສຸມດ້ານວຽກງານໄວ້ຢູ່ໃນການເລັ່ງລັດຫັນປ່ຽນຮູບການພັດທະນາເສດຖະກິດແລະປັບປຸງອົງປະກອບເສດຖະກິດ, ການຍົກຄຸນນະພາບແລະປະສິທິພາບຂອງການເຕີບໂຕດ້ານເສດຖະກິດໃຫ້ສູງຂຶ້ນ, ຊຸກຍູ້ໃຫ້ເສດຖະກິດໄດ້ຮັບການພັດທະນາຢ່າງປອດໃສ. ເມື່ອພິຈາລະນາຢ່າງຮອບຄອບແລ້ວ,ເຫັນວ່າ, ການກຳນົດເປົ້າຫມາຍເຕີບໂຕທາງເສດຖະກິດຂອງປີນີ້ໃຫ້ຢູ່ໃນລະຫວ່າງ 7,5% ແມ່ນຈຳເປັນແລະເຫມາະສົມ, ການບັນລຸເປົ້າຫມາຍນີ້ຮຽກຮ້ອງໃຫ້ມີການທຳຄວາມພະຍາຍາມຜ່ານຜ່າດ້ວຍຄວາມລຳບາກຫຍຸ້ງຍາກ.
ກ່ຽວກັບລະດັບລວມຂອງລາຄາສິນຄ້າ. ການຮັກສາໃຫ້ລະດັບລວມ ຂອງລາຄາສິນຄ້າໃຫ້ຫມັ້ນທ່ຽງໂດຍພື້ນຖານ ແມ່ນເປົ້າຫມາຍສຳຄັນຂອງການດັດສົມຄວບຄຸມມະຫາພາກມາໂດຍຕະຫລອດ. ການທີ່ຄວບຄຸມຕົວເລກດັດຊະນີລາຄາຜູ້ບໍລິໂພກໃຫ້ຢູ່ລະຫວ່າງ 3,5% ແມ່ນໄດ້ພິຈາລະນາຈາກປັດໄຈໃນດ້ານຕ່າງໆຢ່າງເຕັມສ່ວນ. ຕ້ອງຮັບປະກັນການສະຫນອງສິນຄ້າທີ່ສຳຄັນຢ່າງແທ້ຈິງ, ເຮັດໃຫ້ການຈໍລະຈອນສິນຄ້າມີຄວາມລົ່ງລ່ຽນ, ຫລຸດຕົ້ນທຶນຂອງການຈໍລະຈອນສິນຄ້າໃຫ້ຫນ້ອຍລົງ, ເພີ່ມທະວີການຕິດຕາມລາຄາໃນຕະຫລາດ, ຮັບປະກັນໃຫ້ລາຄາສິນຄ້າມີຄວາມຫມັ້ນທ່ຽວໂດຍລວມ.
ສືບຕໍ່ປະຕິບັດນະໂຍບາຍການເງິນທີ່ຕັ້ງຫນ້າ. ອັນທີ 1 ແມ່ນເພີ່ມຈຳນວນຂຸມການເງິນ ແລະ ຈຳນວນພັນທະບັດຂອງລັດໃຫ້ຫລາຍຂຶ້ນຢ່າງເຫມາະສົມ. ປີນີ້, ມີແຜນຈະໃຫ້ມີຂຸມການເງິນ 1200 ຕື້ຢວນ, ເພີ່ມຂຶ້ນຫລາຍກວ່າປີກາຍ 400 ຕື້ຢວນ,ໃນນັ້ນ, ຂຸມການເງິນສູນກາງແມ່ນ 850 ຕື້ຢວນ, ພິມຈຳຫນ່າຍພັນທະບັດແທນທ້ອງຖີ່ນໃນຈຳນວນ 350 ຕື້ຢວນ. ເມື່ອໄດ້ເພີ່ມຂຸມການເງິນປີນີ້ແລ້ວ, ອັດຕາຂຸມການເງິນມີປະມານ 2%, ໂດຍລວມແລ້ວແມ່ນຢູ່ໃນລະດັບປອດໄພ. ອັນທີ 2 ແມ່ນປັບປຸງນະໂຍບາຍຫລຸດພາສີອາກອນແບບອົງປະກອບໃຫ້ສົມບູນໂດຍສົມທົບກັບການປະຕິຮູບລະບຽບການສ່ວຍສາອາກອນ. ຈຸດສຸມແມ່ນເລັ່ງລັດຊຸກຍູ້ວຽກງານທົດລອງການປ່ຽນອາກອນທຸລະກິດໃຫ້ຫັນເປັນອາກອນມູນຄ່າເພີ່ມ. ອັນທີ 3 ແມ່ນອອກແຮງ ປັບປຸງອົງປະກອບລາຍຈ່າຍດ້ານການເງິນໃຫ້ດີຂຶ້ນ. ສືບຕໍ່ເພີ່ມທະວີລາຍຈ່າຍດ້ານການເງິນໃນຂົງເຂດທີ່ພົວພັນເຖິງຊີວິດການເປັນຢູ່ຂອງປະຊາຊົນແລະຂົງເຂດທີ່ອ່ອນແອຄື: ການສຶກສາ, ການປິ່ນປົວພະຍາດແລະສາທາ ລະນະສຸກ, ການປະກັນສັງຄົມແລະອື່ນໆ, ຄວບຄຸມລາຍຈ່າຍດ້ານບໍລິຫານແລະລາຍການປົກກະຕິອື່ນໆຢ່າງເຂັ້ມງວດ, ເຮັດວຽກຕ່າງໆຢ່າງປະຢັດ ມັດຖະຍັດ. ອັນທີ 4 ແມ່ນສືບຕໍ່ເພີ່ມທະວີການຄຸ້ມຄອງຕໍ່ຫນີ້ສິນຂອງອົງການປົກຄອງທ້ອງຖີ່ນ.
ສືບຕໍ່ປະຕິບັດນະໂຍບາຍເງິນຕາທີ່ຫມັ້ນທ່ຽງ. ອັນທີ 1 ແມ່ນສ້າງຂອບນະໂຍບາຍມະຫາພາກທີ່ລະອຽດຮອບຄອບໃຫ້ສູງຂຶ້ນ, ເສີມຂະຫຍາຍບົດບາດດັດສົມແບບຕ່າວປີ້ນໄລຍະຂອງນະໂບບາຍເງິນຕາ. ກຳນົດເປົ້າໝາຍເພີ່ມຂຶ້ນຂອງເງິນຕາໃນຄວາມໝາຍກວ້າງ(ຄືM2)ໃນລະຫວ່າງ 13%. ອັນທີ 2 ແມ່ນຊຸກຍູ້ການຈັດສັນຊັບພະຍາກອນດ້ານການເງິນແລະການທະນາຄານໃຫ້ດີຂຶ້ນຕື່ມ. ຊຸກຍູ້ໃຫ້ສະຖາບັນການເງິນເພີ່ມທະວີການສະຫນັບສະຫນູນການປັບປຸງອົງປະກອບເສດຖະກິດ ໂດຍສະເພາະແມ່ນກ່ຽວພັນເຖິງຊົນນະບົດ, ກະສິກຳແລະຊາວກະສິກອນ, ວິສາຫະກິດຂະຫນາດນ້ອຍ,ແລະຂະແຫນງການຈະເລີນໃຫມ່ທີ່ມີລັກສະນະຍຸດທະສາດ. ເປີດກວ້າງຊ່ອງທາງລະດົມເງິນທຶນຂອງເສດຖະກິດຕົວຈິງ, ຫລຸດຕົ້ນທຶນໃນການລະດົມທຶນຂອງເສດຖະກິດຕົວຈິງໃຫ້ຫນ້ອຍລົງ. ອັນທີ 3 ແມ່ນຮັບປະກັນບໍ່ໃຫ້ເກີດຄວາມສ່ຽງດ້ານການເງິນພາຍໃນລະບົບຫລືພາກພື້ນ.
Ⅲ ຂໍ້ສະເຫນີທີ່ມີຕໍ່ວຽກງານຂອງລັດຖະບານໃນປີນີ້
1, ເລັ່ງລັດຫັນປ່ຽນຮູບການພັດທະນາເສດຖະກິດໃຫ້ໄວຂຶ້ນ, ຊຸກຍູ້ເສດຖະກິດໃຫ້ໄດ້ຮັບການພັດທະນາຢ່າງປອດໃສແລະຕໍ່ເນື່ອງ. ຜົນງານທຸກຢ່າງທີ່ປະເທດພວກເຮົາໄດ້ຮັບ ໃນການສ້າງສາສັງຄົມນິຍົມທີ່ທັນສະໄຫມລ້ວນແຕ່ແມ່ນ ຢູ່ບົນພື້ນຖານທີ່ພັດທະນາເສດຖະກິດຢ່າງຕໍ່ເນື່ອງແລະປອດໃສ, ຖ້າເສດຖະກິດບໍ່ໄດ້ຮັບການພັດທະນາ, ວຽກງານທຸກຢ່າງກໍ່ຈະດຳເນີນໄປບໍ່ໄດ້. ສະພາບແຫ່ງຊາດອັນພື້ນຖານທີ່ປະເທດພວກເຮົາຍັງຢູ່ໃນໄລຍະຕົ້ນຂອງສັງຄົມນິຍົມເປັນເວລາດົນນານນັ້ນບໍ່ໄດ້ມີການປ່ຽນແປງ, ຄວາມຂັດແຍ່ງກັນລະຫວ່າງຄວາມຕ້ອງການດ້ານວັດຖຸແລະວັດທະນະທຳຂອງປະຊາຊົນທີ່ນັບມື້ນັບເພີ່ມຂຶ້ນກັບການຜະລິດຂອງສັງຄົມທີ່ຫລ້າຫລັງຍັງແມ່ນຄວາມຂັດແຍ່ງທີ່ສຳຄັນໃນສັງຄົມນັ້ນແມ່ນບໍ່ມີການປ່ຽນແປງ, ຖານະຂອງຈີນໃນສາກົນທີ່ເປັນປະເທດທີ່ພວມພັດທະນາທີ່ໃຫຍ່ທີ່ສຸດໃນໂລກນັ້ນກໍ່ບໍ່ມີການປ່ຽນແປງ, ການພັດທະນາຍັງແມ່ນຂໍກະແຈໃນການແກ້ໄຂບັນຫາທຸກຢ່າງຂອງປະເທດພວກເຮົາ. ຕ້ອງຍຶດຫມັ້ນຖືການພັດທະນາເສດຖະກິດເປັນໃຈກາງ, ສຸມຈິດສຸມໃຈເຂົ້າໃນການສ້າງສາ, ແລະສະແຫວງ ຫາການພັດທະນາດ້ວຍຄວາມສສາມັກຄີເປັນນນ້ຳໜຶ່ງໃຈດຽວ.
ຕ້ອງຍຶດຫມັ້ນຖືການເປີດກວ້າງຄວາມຕ້ອງການພາຍໃນ ເປັນທິດທາງຍຸດທະສາດຂອງການພັດທະນາເສດຖະກິດໃນໄລຍະຍາວນານ, ເສີມຂະຍາຍບົດບາດພື້ນຖານຂອງການບໍລິໂພກ ແລະ ບົດບາດສຳຄັນຂອງການລົງທຶນ, ຕ້ອງຜ່ອນຍານເງື່ອນໄຂທີ່ໃຫ້ເອກະຊົນໄປລົງທຶນເຂົ້າໃນຕະຫລາດ ຕື່ມອີກ, ກະຕຸກຊຸກຍູ້ຄວາມມີຊີວິດຊີວາຂອງການລົງທຶນຂອງເອກະຊົນ.
ຕ້ອງອອກແຮງຊຸກຍູ້ການຫັນປ່ຽນຮູບການພັດທະນາເສດຖະກິດ, ເລັ່ງ ລັດການປັບປຸງອົງປະກອບຂອງອຸດສາຫະກຳໃຫ້ໄວຂຶ້ນ. ຕ້ອງເລັ່ງປັບປຸງ ແລະຍົກລະດັບຂອງອຸດສາຫະກຳແບບເກົ່າດັ້ງເດີມ, ອອກແຮງພັດທະນາອຸດສາຫະກຳວິທະຍາສາດເຕັກນິກສູງແລະໃຫມ່, ຍົກຄຸນນະພາບແລະກຳລັງການແຂ່ງຂັນໃນຕະຫລາດຂອງຜະລິດຕະພັນໃຫ້ສູງຂຶ້ນ.
ຕ້ອງຕອບສະຫນອງຄວາມປາຖະຫນາຂອງປະຊາຊົນ ທີ່ມີຕໍ່ສິ່ງແວດລ້ອມດຳລົງຊີວິດອັນຈົບງາມ, ອອກແຮງເພີ່ມທະວີການກໍ່ສ້າງອາລິຍະທຳ ດ້ານຊີວະພາບແລະການອະນຸລັກສິ່ງແວດລ້ອມ. ສິ່ງແວດລ້ອມທຳມະຊາດ ກ່ຽວພັນເຖິງຄວາມຜາສຸກຂອງປະຊາຊົນ, ກ່ຽວພັນເຖິງລູກຫຼານແລະອະນາຄົດຂອງປະຊາຊາດຈີນ. ຕ້ອງຍຶດຫມັ້ນນະໂຍບາຍແຫ່ງຊາດທີ່ປະຢັດຊັບພະຍາ ກອນແລະອະນຸລັກສິ່ງແວດລ້ອມ, ອອກແຮງຊຸກຍູ້ການພັດທະນາແບບສີຂຽວ, ແບບຫມູນວຽນແລະແບບລະບາຍກາກບອນຕ່ຳ. ໃຊ້ມາດຕະການຕົວຈິງເພື່ອປ້ອງກັນແລະປົວແປງສິ່ງມົນລະພິດ, ຊຸກຍູ້ການຫັນປ່ຽນຮູບການຜະລິດແລະຮູບການດຳລົງຊີວິດ, ຕັດສິນໃຈແກ້ໄຂບັນຫາມົນລະພິດສິ່ງແວດລ້ອມທີ່ພົ້ນເດັ່ນເຊັ່ນ:ອາກາດ, ນ້ຳແລະດິນເປັນຕົ້ນ, ເຊິ່ງເປັນບັນຫາທີ່ຕິດພັນກັບຜົນປະໂຫຍດຕົວຈິງຂອງປະຊາຊົນ, ປັບປຸງຄຸນນະພາບຂອງສິ່ງແວດລ້ອມໃຫ້ດີ, ປົກປັກຮັກສາສຸຂະພາບຂອງປະຊາຊົນ, ໃຫ້ປະຊາຊົນໄດ້ເຫັນຄວາມຫວັງດ້ວຍພຶດຕິກຳຕົວຈິງ.
ຕ້ອງສືບຕໍ່ລົງເລິກຜັນຂະຫຍາຍຍຸດທະສາດລວມຂອງການພັດທະນາພາກພື້ນ, ຊຸກຍູ້ເສດຖະກິດພາກພື້ນໃຫ້ໄດ້ຮັບການພັດທະນາຢ່າງປະສານ ກົມກຽວກັນ.
2, ເສີມສ້າງພື້ນຖານຂອງການພັດທະນາກະສິກຳແລະຊົນນະບົດ, ຊຸກຍູ້ການພັດທະນາຂອງຕົວເມືອງກັບຊົນນະບົດໃຫ້ເປັນອັນຫນຶ່ງອັນດຽວກັນ.
ຫລາຍປີມໍ່ໆມານີ້ ແມ່ນໄລຍະທີ່ກະສິກຳຂອງປະເທດພວກເຮົາໄດ້ຮັບການ ພັດທະນາໄວທີ່ສຸດ, ພາບພົດຂອງຊົນນະບົດໄດ້ມີການປ່ຽນແປງໄວທີ່ສຸດແລະຊາວກະສິກອນໄດ້ຮັບຜົນປະໂຫຍດຫລາຍທີ່ສຸດ. ປັດຈຸບັນ, ຈຸດສຸມແລະຈຸດຫຍຸ້ງຍາກຂອງການສ້າງສັງຄົມທີ່ອີ່ມໜຳສຳລານໃຫ້ສຳເລັດນັ້ນ ຍັງແມ່ນຢູ່ຊົນນະບົດ. ຕ້ອງຍຶດຫມັ້ນຖືການແກ້ໄຂບັນຫາຊົນນະບົດ,ກະສິກຳແລະຊາວກະສິກອນໃຫ້ດີ ເປັນຈຸດສຸມທີ່ສຳຄັນໃນວຽກງານທຸກດ້ານ,ນີ້ເປັນຂໍ້ສະຫລຸບບົດຮຽນປະຫວັດສາດຢ່າງມີຫລັກວິທະຍາສາດ, ແມ່ນແນວຄິດຊີ້ນຳໃນໄລຍະຍາວນານ. ລະບຽບການທີ່ດິນຂອງຊົນນະບົດກ່ຽວພັນເຖິງສະຖຽນລະພາບຂອງຊົນນະບົດ, ແລະກໍ່ກ່ຽວພັນເຖິງການພັດທະນາໃນໄລຍະຍາວນານຂອງຈີນ,ເຊິ່ງຈຸດໃຈກາງແມ່ນຕ້ອງຮັບປະກັນສິດແລະຜົນປະໂຫຍດ ດ້ານຊັບສິນຂອງຊາວກະສິກອນ, ພື້ນຖານຕ່ຳສຸດແມ່ນຕ້ອງຮັບປະກັນທີ່ດິນປູກຝັງທີ່ມີເນື້ອທີ່ກວ້າງ 1200 ລ້ານເຮັກຕາບໍ່ໃຫ້ຫຼຸດລົງ. ຕ້ອງສືບຕໍ່ ເພີ່ມງົບປະມານໃນດ້ານການພັດທະນາຊົນນະບົດ, ກະສິກຳແລະຊາວກະສິ ກອນ, ເພີ່ມທະວີການກໍ່ສ້າງພື້ນຖານໂຄງລ່າງແລະການກໍ່ສ້າງລະບົບບໍລິ ການສາທາລະນະພື້ນຖານຂອງຊົນນະບົດ, ຊຸກຍູ້ການພັດທະນາຕົວເມືອງກັບຊົນນະບົດໃຫ້ເປັນອັນຫນຶ່ງອັນດຽວກັນ. ສ້າງຖັນແຖວການຜະລິດແລະທຸລະກິດດ້ານກະສິກຳໃຫ້ຫມັ້ນທ່ຽງ, ຕັ້ງຫນ້າອົບຮົມຊາວກະສິກອນແບບໃຫມ່.
ການຫັນຊົນນະບົດເປັນຕົວເມືອງແມ່ນໄປຄຽງຄູ່ກັບການສ້າງສາກະສິກຳຢ່າງທັນສະໄຫມ. ຕ້ອງເຄົາລົບກົດເກນນອກຕົວຂອງການຫັນເປັນຕົວເມືອງ, ຕັ້ງຫນ້າຊຸກຍູ້ການຫັນເປັນຕົວເມືອງຢ່າງປອດໃສແລະຫມັ້ນທ່ຽງ.
3, ຖືການຮັບປະກັນແລະປັບປຸງຊີວິດການເປັນຢູ່ຂອງປະຊາຊົນໃຫ້ດີ ຂຶ້ນເປັນຈຸດສຸມ, ຍົກລະດັບຊີວິດການເປັນຢູ່ດ້ານວັດຖຸແລະດ້ານວັດທະ ນະທຳຂອງປະຊາຊົນໃຫ້ສູງຂຶ້ນຢ່າງຮອບດ້ານ.
ເມື່ອໄດ້ທຳຄວາມພະຍາ ຍາມຢ່າງບໍ່ລົດລະ, ການພັດທະນາເສດຖະກິດສັງຄົມຂອງຈີນ ໄດ້ມີລັກສະນະປະສານກົມກຽວກັນເພີ່ມຂຶ້ນຢ່າງຈະແຈ້ງ. ປັດຈຸບັນ, ອົງປະກອບທາງສັງຄົມ, ຮູບການຈັດຕັ້ງຂອງສັງຄົມ, ແລະສະຖານະການຜົນປະໂຫຍດ ທາງສັງຄົມພວມເກີດມີການປ່ຽນແປງຢ່າງເລິກເຊິ່ງ, ຄວາມຂັດແຍ່ງກັນໃນສັງຄົມເພີ່ມຂຶ້ນຢ່າງຈະແຈ້ງ. ພວກເຮົາຕ້ອງຖືການຮັບປະກັນແລະປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນ ເປັນຈຸດເລີ່ມຕົ້ນແລະຈຸດຫມາຍປາຍທາງຂອງວຽກງານທຸກດ້ານຂອງລັດຖະບານ, ກຳນົດວຽກງານນີ້ໄວ້ຢູ່ໃນຖານະທີ່ພົ້ນເດັ່ນກວ່າເກົ່າ, ແລະອອກແຮງເພີ່ມທະວີການສ້າງສາສັງຄົມ.
ຊອກຫາທຸກວິທີໃຫ້ເພີ່ມການປະກອບອາຊີບ.
ບູລະນະລະບຽບການປະກັນສັງຄົມໃຫ້ສົມບູນ.
ລົງເລິກການປະຕິຮູບແລະພັດທະນາວຽກງານປິ່ນປົວພະຍາດ ແລະສາ ທາລະນະລສຸກ.
ປຸບປຸງນະໂຍບາຍປະຊາກອນ ໃຫ້ຄົບຖ້ວນບໍລິບູນຂຶ້ນຕື່ມເປັນກ້າວໆ. ຍຶດຫມັ້ນນະໂຍບາຍວາງແຜນຄອບຄົວ ເຊິ່ງເປັນນະໂຍບາຍພື້ນຖານແຫ່ງຊາດ, ເພື່ອສອດຄ່ອງກັບທ່າອ່ຽງການປ່ຽນແປງຂອງຈຳນວນແລະອົງປະ ກອບດ້ານປະຊາກອນຂອງຈີນ, ຕ້ອງແກ້ໄຂບັນຫາທາງດ້ານຈຳນວນ, ຄຸນນະພາບ, ອົງປະກອບແລະການແຈກຢາຍຂອງປະຊາກອນໃຫ້ດີ, ຊຸກຍູ້ການພັດທະນາຂອງປະຊາກອນຢ່າງກ້ຳເກິ່ງກັນໃນໄລຍະເວລາຍາວນານ.
ເພີ່ມທະວີແລະປະດິດສ້າງການຄຸ້ມຄອງບໍລິຫານທາງສັງຄົມ. ປັບປຸງຮູບການໃຫ້ການບໍລິການສາທາລະນະຂອງລັດຖະບານ, ເພີ່ມທະວີການຄຸ້ມຄອງທາງສັງຄົມແລະການກໍ່ສ້າງລະບົບການບໍລິການຂອງຮາກຖານ, ສ້າງລະບຽບການປົກຄອງຕົນເອງຂອງຊາວບ້ານໃນຊົນນະບົດແລະລະບຽບການປົກຄອງຕົນເອງຂອງປະຊາຊົນໃນຕົວເມືອງ, ຮັບປະກັນໃຫ້ປະຊາຊົນສາມາດນຳໃຊ້ສິດປະຊາທິປະໄຕໂດຍກົງຕາມກົດຫມາຍ ເພື່ອຄຸ້ມຄອງວຽກງານສາທາລະນະແລະວຽກງານສາທາລະນະປະໂຫຍດຂັ້ນຮາກຖານ.ຄວາມປອດໄພດ້ານອາຫານແລະຢາ ແມ່ນບັນຫາພົ້ນເດັ່ນທີ່ປະຊາຊົນໃຫ້ຄວາມສົນໃຈສູງ, ຕ້ອງປະຕິຮູບແລະບູລະນະໂຄງປະກອບການຕິດຕາມຄຸ້ມຄອງຄວາມປອດໄພຂອງອາຫານແລະຢາ, ຜັນຂະຫຍາຍຫນ້າທີ່ຄວາມຮັບຜິດຊອບຕົ້ນຕໍຂອງວິສາຫະກິດ, ຕ້ອງມີຄວາມເຂັ້ມງວດໃນການຕິດຕາມກວດກາທົ່ວຂັ້ນຕອນໂດຍເລີ່ມຈາກການຜະລິດເຊິ່ງເປັນແຫຼ່ງກຳເນີດ ຕະຫລອດຮອດການບໍລິໂພກ, ເລັ່ງລັດສ້າງລະບົບຄວາມປອດໄພດ້ານອາຫານແລະຢາທີ່ສອດຄ່ອງກັບສະພາບແຫ່ງຊາດ, ຕາມຫລັກວິທະຍາສາດແລະສົມເຫດສົມຜົນນັ້ນໃຫ້ໄວຂຶ້ນ, ຍົກລະດັບຮັບປະກັນຄວາມປອດໄພດ້ານອາຫານແລະຢາໃຫ້ສູງຂຶ້ນ. ເສີມສ້າງລະບົບຄວາມປອດໄພສາທາລະນະ ແລະ ພື້ນຖານການຜະລິດຢ່າງປອດໄພຂອງວິສາຫະກິດ, ປ້ອງກັນບໍ່ເກີດເຫດການດ້ານຄວາມປອດໄພຢ່າງຫນັກຫນ່ວງແລະຮ້າຍແຮງເປັນພິເສດ.
ເພີ່ມທະວີການດັດສົມຄວບຄຸມຕະຫລາດເຮືອນຢູ່ແລະທີ່ດິນ ແລະການກໍ່ສ້າງໂຄງການເຮືອນນະໂຍບາຍ. ໃຫ້ປະຊາຊົນມີເຮືອນຢູ່ທີ່ໄວ້ໃຈໄດ້ແລະເພິ່ງພໍໃຈ. ປີນີ້, ເຮືອນຢູ່ນະໂຍບາຍທີ່ຈະສ້າງສຳເລັດຢູ່ຕົວເມືອງແລະຊົນນະບົດມີ 4 ລ້ານ 7 ແສນຊຸດ, ເລີ່ມສ້າງໃຫມ່ 6 ລ້ານ 3 ແສນຊຸດ.
ການສຶກສາແລະວິທະຍາສາດເຕັກນິກ ມີບົດບາດລັກສະນະພື້ນຖານ, ລັກສະນະນຳພາແລະລັກສະນະກວມລວມ ໃນການສ້າງສາທັນສະໄຫມ, ວັດທະນະທຳແມ່ນເສັ້ນເລືອດຂອງຊາດແລະເຮືອນຈິດໃຈຂອງປະຊາຊົນ, ສະນັ້ນ ຕ້ອງວາງໄວ້ຢູ່ໃນຖານະຍຸດທະສາດທີ່ສຳຄັນກວ່າເກົ່າ.
ຕ້ອງອອກແຮງເພີ່ມທະວີການສຶກສາ ໃນດ້ານຄຸນສົມບັດສາທາລະນະ ທາງສັງຄົມ, ຈັນຍາບັນດ້ານອາຊີບ, ຄຸນສົມບັດໃນຄອບຄົວແລະຄຸນສົມບັດ ຂອງສ່ວນບຸກຄົນ. ຊຸກຍູ້ການສ້າງລະບົບຊື່ສັດສຸຈະລິດ, ຊຸກຍູ້ເອົາຄວາມຊື່ສັດສຸຈະລິດດ້ານການວຽກງານການປົກຄອງ ໄປນຳພາຄວາມຊື່ສັດສຸຈະລິດ ດ້ານການຄ້າແລະດ້ານສັງຄົມ, ເພື່ອຈໍ່ຕົວເປັນແບບແຜນທາງສັງຄົມທີ່ດີງາມ.
4, ຊຸກຍູ້ການປະຕິຮູບແລະໄຂປະຕູສູ່ພາຍນອກ ໄປສູ່ລວງເລິກດ້ວຍຄວາມກ້າຫານແລະຄວາມສະຫລາດດ້ານການເມືອງທີ່ໃຫຍ້ກວ່າເກົ່າ.
ການປະຕິຮູບແລະໄຂປະຕູສູ່ພາຍນອກ ແມ່ນກຳລັງແຮງພື້ນຖານທີ່ສຸດໃນການຊຸກຍູ້ໃຫ້ປະເທດໄດ້ຮັບການພັດທະນາໃຫ້ກ້າວໄປຂ້າງຫນ້າ. ການປະຕິຮູບຂອງປະເທດພວກເຮົາໄດ້ເຂົ້າສູ່ໄລຍະທີ່ຕ້ອງແກ້ໄຂບັນຫາຫຍຸ້ງຍາກຕ່າງໆ,ຕ້ອງປົດປ່ອຍແນວຄິດຕື່ມອີກ, ຊຸກຍູ້ການປະຕິຮູບໃນຂົງເຂດເສດຖະກິດ, ການເມືອງ, ວັດທະນະທຳແລະສັງຄົມຢ່າງຮອບດ້ານ, ເພື່ອໃຫ້ການປະຕິຮູບລົງສູ່ລວງເລິກຢ່າງບໍ່ຢຸດຢັ້ງ.
ຕ້ອງປັບປຸງໂຄງປະກອບເສດຖະກິດຕະຫລາດສັງຄົມນິຍົມໃຫ້ສົມບູນຂຶ້ນຕື່ມ. ປັບປຸງແລະພັດທະນາເສດຖະກິດລະບອບກຳມະສິດສ່ວນລວມຢ່າງເດັດດ່ຽວໜຽວແໜ້ນ, ສົ່ງເສີມ, ສະຫນັບສະຫນູນແລະຊຸກຍູ້ການພັດທະນາຂອງເສດຖະກິດທີ່ບໍ່ແມ່ນລະບອບກຳມະສິດສ່ວນລວມ ຢ່າງເດັດດ່ຽວບໍ່ໜຽວແໜ້ນ, ເພື່ອກາຍເປັນສະພາບແວດລ້ອມດ້ານໂຄງປະກອບທີ່ໃຫ້ເສດຖະກິດພາກສ່ວນຕ່າງໆນຳໃຊ້ປັດໄຈການຜະລິດຢ່າງສະເຫມີພາບກັນຕາມກົດຫມາຍ, ເຂົ້າຮ່ວມການແຂ່ງຂັນໃນຕະຫລາດຢ່າງຍຸດຕິທຳ,ແລະໄດ້ຮັບການປົກປ້ອງຈາກກົດຫມາຍຢ່າງສະເຫມີພາບກັນ. ເລັ່ງລັດການປະຕິຮູບໂຄງປະກອບດ້ານການເງິນແລະສ່ວຍສາອາກອນ, ແກ້ໄຂການພົວພັນລະຫວ່າງສູນກາງກັບທ້ອງຖີ່ນໃນດ້ານການເງິນແລະສິດຕ່າງໆຢ່າງເຫມາະສົມ, ຊຸກຍູ້ການສ້າງລະບຽບການສ່ວຍສາອາກອນທີ່ມີຜົນດີຕໍ່ການປັບປຸງອົງປະກອບແລະຄວາມຍຸດຕິທຳຂອງສັງຄົມ. ລົງເລິກການປະຕິຮູບໂຄງປະກອບດ້ານທະນາຄານ, ບູລະນະລະບົບການທະນາຄານໃຫ້ທັນສະໄຫມທີ່ຊຸກຍູ້ການພັດທະນາຂອງເສດຖະກິດຕົວຈິງໃຫ້ສົມບູນ, ເພື່ອຊຸກຍູ້ການປະຕິຮູບອັດຕາດອກເບ້ຍແລະອັດຕາແລກປ່ຽນເງິນຕາໃຫ້ເປັນແບບຕະຫລາດຢ່າງຫມັ້ນທ່ຽງ, ເປີດກວ້າງຂົງເຂດນຳໃຊ້ເງິນຢວນຈີນຢູ່ຕ່າງປະເທດ, ບັນລຸການແລກປ່ຽນເງິນຢວນຈີນໄດ້ໃນບັນຊີທຶນຮອນຢ່າງເປັນກ້າວໆ. ລົງເລິກການປະຕິຮູບໂຄງປະກອບການລົງທຶນແລະລະດົມທຶນ,ຊຸກຍູ້ການປະຕິຮູບລາຄາ, ບູລະນະກົນໄກແຫ່ງການກຳນົດລາຄາຂອງຜະລິດຕະພັນທີ່ເປັນຊັບພະຍາກອນໃຫ້ສົມບູນ. ລະບຽບການແບ່ງປັນລາຍຮັບ ແມ່ນລະບຽບການພື້ນຖານໃນການພັດທະນາເສດຖະກິດສັງຄົມ, ແມ່ນພື້ນຖານທີ່ສຳຄັນຂອງໂຄງປະກອບເສດຖະກິດຕະຫລາດສັງຄົມນິຍົມ. ພວກເຮົາໄດ້ວາງຄວາມເຫັນບາງຢ່າງກ່ຽວກັບການລົງເລິກການປະຕິຮູບລະບຽບການແບ່ງປັນລາຍໄດ້, ຕ້ອງເລັ່ງລັດຄົ້ນຄວ້າແລະຈັດວາງນະໂຍບາຍລະອຽດໃຫ້ໄວຂຶ້ນ, ເພື່ອແກ້ໄຂບັນຫາທີ່ມີຢູ່ໃນຂົງເຂດແບ່ງປັນລາຍໄດ້ຢ່າງບັງເກີດຜົນ, ຫລຸດຄວາມຫຼຸດໂຕນກັນດ້ານການແບ່ງປັນລາຍໄດ້ໃຫ້ໜ້ອຍລົງ, ເຮັດໃຫ້ຫມາກຜົນຂອງການພັດທະນາສາມາດສ້າງຜົນປະໂຫຍດ ໃຫ້ແກ່ປະຊາຊົນທຸກຖ້ວນຫນ້າໃຫ້ຫລາຍກວ່າເກົ່າແລະຍຸດຕິທຳກວ່າເກົ່າ.
ຕ້ອງຊຸກຍູ້ການກໍ່ສ້າງລະບົບປະຊາທິປະໄຕແລະການປົກຄອງຕາມກົດຫມາຍສັງຄົມນິຍົມ. ຕ້ອງພັດທະນາປະຊາທິປະໄຕປະຊາຊົນທີ່ກວ້າງຂວາງກວ່າເກົ່າ, ເຕັມສ່ວນກວ່າເກົ່າແລະສົມບູນກວ່າເກົ່າ, ຮັບປະກັນໃຫ້ປະຊາຊົນມີສິດແລະເສລີພາບຢ່າງກວ້າງຂວາງໂດຍອີງຕາມລະບຽບ ກົດຫມາຍ, ຊຸກຍູ້ການພັດທະ ນາຂອງຄົນຢ່າງຮອບດ້ານ. ຕ້ອງຍຶດຫມັ້ນການປົກຄອງປະເທດຕາມກົດຫມາຍ, ເຄົາລົບອິດທິພົນຂອງລັດຖະທຳມະນູນແລະກົດຫມາຍຢ່າງເຕັມສ່ວນ, ຮັບປະກັນໃຫ້ອົງການບໍລິຫານຂອງລັດສາມາດນຳໃຊ້ສິດອຳນາດຂອງຕຕົນຕາມຂອບເຂດສິດອຳນາດແລະຂັ້ນຕອນທີ່ໄດ້ກຳນົດໄວ້ຢູ່ໃນກົດໝາຍ. ຍຶດຫມັ້ນຫັນປ່ຽນບົດບາດຂອງລັດຖະບານ, ສ້າງລັດຖະບານແບບບໍລິການທີ່ມີບົດບາດຕາມຫລັກວິທະຍາສາດ, ມີອົງປະກອບທີ່ດີ, ມີປະສິທິພາບສູງໃນການເຮັດວຽກງານແລະມີຄວາມປອດໄສຂາວສະອາດ, ແລະປະຊາຊົນເພິ່ງພໍໃຈ. ຄັດຄ້າການສິ້ນເປືອງຟຸມເຟືອຍ,ເອົາຊະນະລັດທິຮູບການແລະລັດທິອາດຍາສິດ. ໃຫ້ປະຊາຊົນສາມາດຕິດຕາມກວດ ກາສິດອຳນາດ, ປະຕິບັດສິດອຳນາດຢ່າງເປີດເຜີຍ. ຍຶດຫມັ້ນຄັດຄ້ານການສໍ້ລາດບັງຫຼວງ, ເພີ່ມທະວີການກໍ່ສ້າງການປົກຄອງແບບປອດໃສຂາວສະອາດ, ຫັນປ່ຽນສະພາບການ ທີ່ສິດອຳນາດໂຮມສູນເກີນໄປລະເລີຍດ້ານລະບຽບຫຼັກການ, ເຮັດເຖິງຂັ້ນທີ່ເຈົ້າໜ້າທີ່ມີຄວາມຊື່ສັດສຸຈະລິດ, ລັດຖະ ບານມີຄວາມບໍລິສຸດຂາວສະອາດ,ແລະການເມືອງມີຄວາມປອດໃສ.
ຕ້ອງຍຶດຫມັ້ນການປະຕິຮູບແລະໄຂປະຕູສູ່ພາຍນອກທີ່ເປັນນະໂຍ ບາຍພື້ນຖານແຫ່ງຊາດ, ປະຕິບັດຍຸດທະສາດໄຂປະຕູສູ່ພາຍນອກທີ່ມີຄວາມຕັ້ງຫນ້າເປັນເຈົ້າການກວ່າເກົ່າ. ຍຶດຫມັ້ນເອົາການຄ້າຂາອອກໃຫ້ຫມັ້ນທ່ຽງກັບການເປີດກວ້າງການຄ້າຂາເຂົ້າປະສົມປະສານກັນ, ຊຸກຍູ້ການຄ້າຕໍ່ຕ່າງປະເທດຫັນຈາກການເພີ່ມຂຶ້ນດ້ານປະລິມານໄປສູ່ການມີຄຸນນະພາບແລະປະສິທິຜົນສູງຂຶ້ນ, ຈາກທ່າແຮງໃນດ້ານຕົ້ນທຶນແລະລາຄາຫັນໄປສູ່ທ່າແຮງໃນດ້ານການແຂ່ງຂັນໂດຍລວມ, ຊຸກຍູ້ໃຫ້ມີທ່າແຮງໃຫມ່ໃນການແຂ່ງຂັນການຄ້າຂາອອກທີ່ຖືເຕັກນິກ, ຍີ່ຫໍ້, ຄຸນນະພາບແລະການບໍລິການເປັນໃຈກາງ. ຍຶດຫມັ້ນເອົາການເປີດປະຕູສູ່ປະເທດທີ່ພັດທະນາແລ້ວກັບການໄຂປະຕູສູ່ປະເທດທີ່ພວມພັດທະນານັ້ນປະສົມປະສານກັນ, ເປີດກວ້າງແລະລົງເລິກຜົນປະໂຫຍດຮ່ວມກັນຂອງຝ່າຍຕ່າງໆ.
ບັນດາຜູ່ແທນ!
ພວກເຮົາຕ້ອງສືບຕໍ່ຍົກສູງຄັນທຸງແຫ່ງສັນຕິພາບ, ການພັດທະນາ, ການ ຮ່ວມມືແລະການໄດ້ຮັບຜົນປະໂຫຍດຮ່ວມກັນໃຫ້ສູງຂຶ້ນ, ເດີນຕາມເສັ້ນທາງແຫ່ງການພັດທະນາໂດຍສັນຕິຢ່າງສະເໝີຕົ້ນສະເໝີປາຍ, ຍຶດຫມັ້ນນະໂຍບາຍການຕ່າງປະເທດສັນຕິພາບທີ່ເປັນເອກະລາດ,ເປັນເຈົ້າຕົນເອງ, ຊຸກຍູ້ໃຫ້ໂລກມີສັນຕິພາບຢ່າງຖາວອນແລະມີຄວາມຈະເລີນຮຸ່ງເຮືອງຮ່ວມກັນ.
ບັນດາຜູ່ແທນ!
ເມື່ອຫວນຄືນອະດີດ, ພວກເຮົາໄດ້ສ້າງຜົນງານທີ່ເລີດລ້ຳບົນເສັ້ນທາງສັງຄົມນິຍົມທີ່ມີສີສັນພິເສດຂອງຈີນ. ຈ້ອງມອງເບິ່ງອະນາຄົດ, ປະເທດຊາດທີ່ຍິ່ງໃຫຍ່ແມ່ນມີອະນາຄົດທີ່ສະຫວ່າງສະໄຫວຢ່າງບໍ່ເຄີຍມີມາກ່ອນ. ພວກເຮົາ ຈົ່ງຢູ່ພາຍໃຕ້ການນຳນພາຂອງສູນກາງພັກ ທີ່ມີສະຫາຍສີຈິ້ນຜິງເປັນເລຂາ ທິການໃຫຍ່, ຮ່ວມຈິດຮ່ວມໃຈກກັນ, ກ້າວຫນ້າບືນຕົວ, ບາກບັ່ນສູ້ຊົນເພື່ອສ້າງສາສັງຄົມທີ່ອີ່ມຫນຳສຳລານຢ່າງຮອບດ້ານໃຫ້ສຳເລັດ ແລະ ບັນລຸການຟື້ນຟູຄວາມຈະເລີນຮຸ່ງເຮືອງອັນຍິ່ງໃຫຍ່ຄືນໃໝ່ຂອງປະຊາຊາດຈີນ!