ບົດລາຍງານວຽກງາານລັດຖະບານ
ທ່ານ ຫຼີເຄີ້ສຽງ ນາຍົກລັດຖະມົນຕີ ກ່າວໃນກອງປະຊຸມເທື່ອທີ 5 ຂອງສະພາປະຊາຊົນແຫ່ງຊາດຈີນຊຸດທີ 12 ໃນວັນທີ 5 ມີນາ 2017
ບັນດາຜູ້ແທນທີ່ເຄົາລົບນັບຖື:
ຂະນະນີ້ ຂ້າພະເຈົ້າຂໍຕາງໜ້າລັດຖະບານ ລາຍງານວຽກງານລັດຖະບານຕໍ່ກອງປະຊຸມເພື່ອນຳໄປຄົ້ນຄວ້າພິຈາລະນາແລະຂໍຄວາມເຫັນຈາກບັນດາສະມາຊິກສະພາປຶກສາການເມືອງປະຊາຊົນແຫ່ງຊາດ.
1. ທົບທວນຄືນວຽກງານໃນປີ 2016 ຜ່ານມາ
ໃນປີຜ່ານມາ,ການພັດທະນາຂອງຈີນຜະເຊີນກັບສິ່ງທ້າທາຍຂ້ຽວຂາດແລະສັບສົນໂດຍມີຄວາມຂັດແຍ້ງທັງພາຍໃນແລະຕ່າງປະເທດຕ່າງໆນາໆແລະມີຄວາມສ່ຽງຫຼາຍຢ່າງ. ກອງປະຊຸມຄົບຄະນະຄັ້ງທີ 6 ຂອງສູນກາງພັກກອມມູນິດຈີນຊຸດທີ 18 ໄດ້ກຳນົດຖານະໃຈກາງຂອງທ່ານເລຂາທິການໃຫຍ່ສີຈິ້ນຜິງຢ່າງເປັນທາງການ ເຊິ່ງໄດ້ສ່ອງແສງໃຫ້ເຫັນຜົນປະໂຫຍດພື້ນຖານຂອງພັກແລະປະຊາຊົນ ທັງມີຄວາມໝາຍສຳຄັນແລະເລິກເຊິ່ງຍາວໄກຕໍ່ການຮັກສາຄວາມຈະເລີນຮຸ່ງເຮືອງແລະຄວາມສະຫງົບຍາວນານຂອງພັກແລະປະເທດຊາດ. ເປົ້າໝາຍຕົ້ນຕໍໃນການພັດທະນາເສດຖະກິດສັງຄົມປີຜ່ານມາ ໄດ້ສຳເລັດຢ່າງຈົບງານມ ເຊິ່ງສ້າງການເລີ່ມຕົ້ນທີ່ດີຂອງການປະຕິບັດແຜນການ 5 ປີຄັ້ງທີ 13.
ເສດຖະກິດພັດທະນາຊ້າລົງ ແຕ່ມີຄວາມໝັ້ນທ່ຽງແລະມີທ່າອ່ຽງຂະຫຍາຍຕົວດີຂຶ້ນ. ລວດຍອດຜະລິດຕະພັນພາຍໃນຫຼື GDP ບັນລຸເຖິງ 74.400 ຕື້ຢວນ, ເພີ່ມຂຶ້ນ 6,7% ຢູ່ໃນແຖວໜ້າຂອງໂລກ ແລະປະກອບສ່ວນເຂົ້າໃນການເຕີບໂຕຂອງເສດຖະກິດໂລກຫຼາຍກວ່າ 30%. ລາຄາຜູ້ບໍລິໂພກຖີບສູງຂຶ້ນ 2%, ຜົນກຳໄລຂອງວິສາຫະກິດອຸດສາຫະກຳ ຈາກການຫຼຸດລົງ 2,3% ຫັນມາເປັນການເຕີບໂຕ 8,5%, ພະລັງງານທີ່ນຳໃຊ້ຕໍ່ຫົວໜ່ວຍ GDP ສະເລ່ຍແລ້ວຫຼຸດລົງ 5%, ຄຸນນະພາບແລະປະສິດທິຜົນຂອງການຂະຫຂຍາຍຕົວທາງເສດຖະກິດ ໄດ້ຍົກສູງຂຶ້ນຢ່າງເດັ່ນຊັດ.
ການປະກອບອາຊີບລື່ນຄາດໝາຍ. ແຮງງານປະກອບອາຊີບເພີ່ມໃໝ່ໃນຕົວເມືອງທົ່ວປະເທດໃນປີ 2016 ບັນລຸ 13 ລ້ານ 1ແສນ 4 ໝື່ນຄົນ. ຍອດຜູ້ປະກອບອາຊີບແລະ ດຳເນີນທຸລະກິດຂອງນັກສຶກສາທີ່ຈົບມະຫາວິທະຍາໄລ ສ້າງສະຖິຕິສູງໃໝ່. ອັດຕາຫວ່າງງານທີ່ລົງທະບຽນໃນຕົວເມືອງ ມາເຖິງທ້າຍປີຜ່ານມາ ແມ່ນ 4,02% ເຊິ່ງເປັນສະຖິຕິຕ່ຳສຸດໃນຫຼາຍປີຜ່ານມາ. ຕະຫຼາດແຮງງານພັດທະນາອ່າວແຂງແຮງສຳລັບຈີນໃນຖານະເປັນປະເທດໃຫຍ່ພວມພັດທະນາທີ່ມີປະຊາກອນເຖິງ 1 ຕື້ 300 ລ້ານກວ່າຄົນ, ມັນແມ່ນເລື່ອງທີ່ໄດ້ມາບໍ່ງ່າຍ.
ການປະຕິຮູບແລະໄຂປະຕູສູ່ພາຍນອກ ໄດ້ຂະຫຍາຍຕົວກ້າວສູ່ລວງເລິກ. ການປະຕິຮູບໃນຂົງເຂດສຳຄັນແລະຂອດສຳຄັນ ໄດ້ຮັບຄວາມຄືບໜ້າທີ່ມີລັກສະນະບຸກທະລຸ, ການປະຕິຮູບໂຄງປະກອບພາກການສະໜອງໄດ້ຮັບຜົນສຳເລັດໃນເບື້ອງຕົ້ນ.
ໂຄງປະກອບເສດຖະກິດໄດ້ຮັບການເລັ່ງລັດປັບປຸງດີຂຶ້ນ. ການອຸປະໂພກບໍລິໂພກ ໄດ້ເສີມຂະຫຍາຍບົດບາດຊຸກຍູ້ການເຕີບໂຕຂອງເສດຖະກິດ. ມູນຄ່າເພີ່ມຂອງຂະແໜງການບໍລິການກວມອັດຕາສ່ວນ GDP ໄດ້ເພີ່ມຂຶ້ນເຖິງ 51,6%. ອຸດສາຫະກຳເຕັກນິກສູງຫຼືໄຮເຕັກ, ຂະແໜງການຜະລິດອຸປະກອນ ໄດ້ຂະຫຍາຍຕົວໄວສົມຄວນ. ກະສິກຳໄດ້ຮັບການພັດທະນາຢ່າງໜັກແໜ້ນ ທັງໄດ້ຮັບການປັບປຸງດີຂຶ້ນ ໂດຍສະບຽງອາຫານໄດ້ຮັບຜົນເກັບກ່ຽວຢ່າງຫຼວງຫຼາຍ.
ກຳລັງແຮງໃໝ່ໃນການຊຸກຍູ້ການພັດທະນາໄດ້ເພີ່ມທະວີຂຶ້ນຢ່າງບໍ່ຢຸດຢັ້ງ. ຍຸດທະສາດພັດທະນາດ້ວຍການປະດິດສ້າງໃໝ່ ໄດ້ຮັບການປະຕິບັດກ້າວສູ່ລວງເລິກ. ຂົງເຂດວິທະຍາສາດເຕັກໂນໂລຊີ ໄດ້ຮັບໝາກຜົນສຳຄັນທີ່ນຳໜ້າໃນໂລກຈຳນວນໜຶ່ງ. ຂະບວນການປະຊາຊົນປະກອບທຸລະກິດແລະທົ່ວປວງຊົນປະດິດສ້າງໃໝ່ ໄດ້ດຳເນີນຂຶ້ນຢ່າງກວ້າງຂວາງ, ວິສາຫະກິດທີ່ລົງທະບຽນໃໝ່ໃນໝົດປີຜ່ານມາ ໄດ້ເພີ່ມຂຶ້ນ 24,5%, ສະເລ່ຍແລ້ວໄດ້ເພີ່ມຂຶ້ນ 15.000 ແຫ່ງຕໍ່ມື້, ບວກກັບຫົວໜ່ວຍທຸລະກິດສ່ວນບຸກຄົນແລະອື່ນໆ, ຫົວໜ່ວຍທຸລະກິດຕະຫຼາດປະເພດຕ່າງໆ ໄດ້ເພີ່ມຂຶ້ນ 45.000 ແຫ່ງຕໍ່ມື້.
ຄວາມສາມາດຄ້ຳຊູເສດຖະກິດຂອງພື້ນຖານໂຄງລ່າງ ໄດ້ຍົກສູງຂຶ້ນຢ່າງບໍ່ຢຸດຢັ້ງ. ໄລຍະທາງລົດໄຟຄວາມໄວສູງທີ່ເປີດບໍລິການແລ້ວ ບັນລຸຫຼາຍກວ່າ 19.000 ກິໂລແມັດ, ທາງດ່ວນທີ່ສ້າງໃໝ່ແລະປັບປຸງໃໝ່ 6700 ກວ່າກິໂລແມັດ, ທາງຫຼວງໃນຊົນນະບົດ 290.000 ກິໂລແມັດ. ໂຄງການຊົນລະປະທານສຳຄັນທີ່ລົງມືກໍ່ສ້າງໃໝ່ 21 ໂຄງການ. ລວມຍອດຜູ້ໃຊ້ໂທລະຄົມເຄື່ອນທີ່ລະບົບ 4G ເພີ່ມຂຶ້ນ 340 ລ້ານເລກໝາຍ, ໄລຍະການວາງສາຍກາບໃຍແສງບັນລຸເຖິງ 5 ລ້ານ 5 ແສນກວ່າກິໂລແມັດ.
ຊີວິດການເປັນຢູ່ຂອງປະຊາຊົນ ໄດ້ປັບປຸງດີຂຶ້ນຕື່ມ. ລາຍຮັບທີ່ສາມາດຈັບຈ່າຍໄດ້ສະເລ່ຍຕໍ່ຫົວຄົນໃນທົ່ວປະເທດ ເພີ່ມຂຶ້ນ 6,3%. ປະຊາກອນຜູ້ທຸກຍາກໃນຊົນນະບົດ ຫຼຸດລົງ 12 ລ້ານ 4 ແສນຄົນ, ປະຊາກອນຍົກຍ້າຍຖິ່ນຖານເພື່ອຫຼຸດຜ່ອນຄວາມທຸກຍາກຫຼາຍກວ່າ 2 ລ້ານ 4 ແສນຄົນ. ການທ່ອງທ່ຽວພາຍໃນປະເທດ ຂະຫຍາຍຕົວຢ່າງວ່ອງໄວ, ນັກທ່ອງທ່ຽວໄປທ່ຽວຮົງກົງ,ມາກາວ,ໄຕ້ຫວັນແລະໄປທ່ຽວຕ່າງປະເທດ ຫຼາຍວ່າ 120 ລ້ານເທື່ອຄົນ, ລະດັບຊີວິດການເປັນຢູ່ຂອງປະຊາຊົນໃນຊົນນະບົດແລະຕົວເມືອງ ໄດ້ຍົກສູງຂຶ້ນໃໝ່.
ຈີນປະສົບຜົນສຳເລັດໃນການເປັນເຈົ້າພາບຈັດກອງປະຊຸມສຸດຍອດກຸ່ມ 20 ປະເທດ ຫຼື ຈີ 20 ຢູ່ເມືອງຫັງໂຈ່ວໂດຍໄດ້ຊຸກຍູ້ໃຫ້ກອງປະຊຸມໄດ້ຮັບຜົນສຳເລັດສຳຄັນທີ່ມີລັກສະນະປະດິດສ້າງ, ນຳໜ້າແລະເປັນກົນໄກ ເຊິ່ງໄດ້ຂີດໝາຍອັນເລິກເຊິ່ງໃນຂະບວນການຄຸ້ມຄອງເສດຖະກິດໂລກ.
ເມື່ອທົບທວນຄືນໄລຍະໜຶ່ງປີຜ່ານມາແລ້ວເຫັນວ່າ ເປັນປີທີ່ບໍ່ທຳມະດາ. ຈີນໄດ້ຜະເຊີນກັບສະພາບແວດລ້ອມພາຍນອກ ທີ່ເສດຖະກິດໂລກແລະການຄ້າໂລກຂະຫຍາຍຕົວໃນລະດັບຕ່ຳສຸດໃນຮອບ 7 ປີຜ່ານມາ, ຕະຫຼາດການທະນາຄານສາກົນ ມີຄວາມປັ່ນປ່ວນຮຸນແຮງຂຶ້ນ, ສິ່ງທ້າທາຍໃນພາກພື້ນແລະສາກົນເກີດຂຶ້ນຢ່າງກະທັນຫັນແລະເກີດຂຶ້ນຫຼາຍ ຂະນະທີ່ພາຍໃນປະເທດ, ຈີນປະສົບຄວາມຫຍຸ້ງຍາກຕ່າງໆນາໆເປັນຕົ້ນ, ບັນຫາພົ້ນເດັ່ນໃນດ້ານໂຄງປະກອບເສດຖະກິດ, ຄວາມສ່ຽງແລະໄພອັນຕະລາຍທີ່ແຝງຊ້ອນນັ້ນ ປາກົດຂຶ້ນມາ, ເສດຖະກິດມີຄວາມສ່ຽງສູງຂຶ້ນທີ່ຈະຊຸດໂຊມລົງ ທັງປະສົບສະພາບສັບສົນຕ່າງໆຄື ການປະຕິຮູບເຂົ້າສູ່ໄລຍະຜ່ານຜ່າຄວາມຫຍຸ້ງຍາກທີ່ສຸດ, ສາຍພົວພັນດ້ານຜົນປະໂຫຍດຢູ່ໃນໄລຍະການປັບປຸງຢ່າງເລິກເຊິ່ງ ແລະ ປັດໄຈທີ່ກະທົບເຖິງຄວາມສະຫງົບຂອງສັງຄົມ ໄດ້ເພີ່ມຂຶ້ນ. ພາຍໃຕ້ສະພາບດັ່ງກ່າວ, ການທີ່ສາມາດຮັກສາເສດຖະກິດໃຫ້ພັດທະນາຢ່າງໝັ້ນທ່ຽງແລະມີທ່າອ່ຽງຂະຫຍາຍຕົວດີຂຶ້ນນັ້ນແມ່ນໝາກຜົນທີ່ໄດ້ມາບໍ່ງ່າຍ ເຊິ່ງນີ້ໄດ້ພິສູດໃຫ້ເຫັນອີກຄັ້ງໃໝ່ວ່າ ປະຊາຊົນຈີນມີກຳລັງໃຈ, ມີສະຕິປັນຍາ ແລະ ມີຄວາມສາມາດໃນການເອົາຊະນະຄວາມຫຍຸ້ງຍາກທຸກຢ່າງ, ເສດຖະກິດຈີນມີທ່າແຮງບົ່ມຊ້ອນ, ມີຄວາມເຂັ້ມແຂງທົນທານແລະການພັດທະນາຂອງຈີນຈະມີອະນາຄົດທີ່ສົດໃສກວ່າເກົ່າ.
ໜຶ່ງປີຜ່ານມາ, ລັດເຮົາຕົ້ນຕໍໄດ້ເຮັດວຽກງານດັ່ງລຸ່ມນີ້:
ໜຶ່ງ, ສືບຕໍ່ປະດິດສ້າງໃໝ່ແລະເພີ່ມທະວີການດັດສົມຄວບຄຸມມະຫາພາກ, ການພັດທະນາຂອງເສດຖະກິດຢູ່ໃນລະດັບສົມເຫດສົມຜົນ.
ສອງ: ໂຄງປະກອບການສະໜອງໄດ້ຮັບການປັບປຸງດີຂຶ້ນ.
ສາມ: ສຸມທຸກຄວາມພະຍາຍາມລົງເລິກການປະຕິຮູບແລະໄຂປະຕູສູ່ພາຍນອກ, ການພັດທະນາມີຊີວິດຊີວາເພີ່ມຂຶ້ນຕື່ມອີກ.
ຕັ້ງໜ້າເປີດກວ້າງການໄຂປະຕູສູ່ພາຍນອກ. ຊຸກຍູ້ການກໍ່ສ້າງ "ໜຶ່ງແລວທາງໜຶ່ງເສັ້ນທາງ" ແລະເພີ່ມທະວີການເຊື່ອມໂຍງທາງຍຸດທະສາດແລະຮ່ວມມືຕົວຈິງກັບປະເທດລຽບຕາມ "ໜຶ່ງແລວທາງໜຶ່ງເສັ້ນທາງ". ເງິນຢວນຈີນຖືກຈັດເຂົ້າໃນກົນໄກສິດຖອນເງິນພິເສດ ຫຼື SDR ຂອງອົງການກອງທຶນເງິນຕາສາກົນຢ່າງເປັນທາງການ, ຕະຫຼາດຫຸ້ນເຊິ່ນເຈີ້ນ-ຮົງກົງເຊື່ອມຈອດການຊື້ຂາຍກັນ. ຈີນໄດ້ນຳໃຊ້ທຶນຕ່າງປະເທດ 130 ຕື້ກວ່າໂດລາສະຫະລັດ ແລະສືບຕໍ່ຄອງອັນດັບໜຶ່ງໃນບັນດາປະເທດພວມພັດທະນາ.
ສີ່: ເພີ່ມທະວີບົດບາດການນຳພາດ້ວຍການປະດິດສ້າງ, ກຳລັງແຮງໃໝ່ໃນການຊຸກຍູ້ເສດຖະກິດໄດ້ຈະເລີນເຕີບໂຕຢ່າງວ່ອງໄວ.
ຫ້າ, ຊຸກຍູ້ການພັດທະນາຢ່າງເປັນເອກະພາບ ແລະກົມກຽວກັນ ລະຫວ່າງເຂດແຄວ້ນແລະລະຫວ່າງຕົວເມືອງ-ຊົນນະບົດ, ຈຸດເຕີບໂຕໃໝ່ແລະເຂດເຕີບໂຕໃໝ່ ໄດ້ເປັນຮູບເປັນຮ່າງຂຶ້ນຢ່າງເລັ່ງດ່ວນ.
ຫົກ: ເພີ່ມທະວີການກໍ່ສ້າງຄວາມສີວິໄລທາງຊີວະພາບ, ການພັດທະນາສີຂຽວ ໄດ້ມີຄວາມຄືບໜ້າໃໝ່.
ເຈັດ: ເອົາໃຈໃສ່ຮັບປະກັນແລະປັບປຸງຊີວິດກາເປັນຢູ່ຂອງປະຊາຊົນໃຫ້ດີຂຶ້ນ, ປະຊາຊົນມີຄວາມຮູ້ສຶກທີ່ໄດ້ຮັບຜົນປະໂຫຍດຫຼາຍຂຶ້ນ.
ແປດ: ຊຸກຍູ້ການປະດິດສ້າງດ້ານການກໍ່ສ້າງແລະຄຸ້ມຄອງລັດ, ສັງຄົມຮັກສາຄວາມສະຫງົບໝັ້ນຄົງແລະກົມກຽວປອງດອງກັນ.
ບັນດາຜູ້ແທນ!
ໝາກຜົນທີ່ຍາດມາໄດ້ໃນໄລຍະໜຶ່ງປີຜ່ານມາ ເປັນຜົນຈາກການນຳພາຢ່າງຖືກຕ້ອງຂອງສູນກາງພັກທີ່ມີສະຫາຍ ສີຈິ້ນຜິງ ເປັນໃຈກາງ ທັງເປັນຜົນຈາກຄວາມສາມັກຄີສູ້ຊົນຂອງທົ່ວພັກທົ່ວກອງທັບແລະປະຊາຊົນບັນດາເຜົ່າທົ່ວທັງຊາດ. ຂ້າພະເຈົ້າຂໍຕາງໜ້າລັດຖະບານ ສະແດງຄວາມຂອບໃຈຢ່າງຈິງໃຈຕໍ່ປະຊາຊົນບັນດາເຜົ່າທົ່ວທັງຊາດ, ບັນດາພັກຝ່າຍປະຊາທິປະໄຕ, ອົງການຈັດຕັ້ງມະຫາຊົນແລະບຸກຄົນວົງການຕ່າງໆ. ຂໍສະແດງຄວາມຂອບໃຈດ້ວຍຄວາມຈິງໃຈຕໍ່ພີ່ນ້ອງຮ່ວມຊາດເຂດບໍລິການພິເສດຮົງກົງ, ເຂດບໍລິຫານພິເສດມາກາວ, ໄຕ້ຫວັນແລະພີ່ນ້ອງຮ່ວມຊາດຕ່າງດ້າວ ແລະຂໍສະແດງຄວາມຂອບໃຈຢ່າງຈິງໃຈຕໍ່ລັດຖະບານບັນດາປະເທດ, ອົງການຈັດຕັ້ງສາກົນ, ເພື່ອນມິດປະເທດຕ່າງໆທີ່ເອົາໃຈໃສ່ແລະສະໜັບສະໜູນພາລະກິດສ້າງສາປະເທດຈີນໃຫ້ຫັນເປັນທັນສະໄໝ.
ພວກເຮົາກໍໄດ້ເຫັນຢ່າງມີສະຕິວ່າ ການພັດທະນາເສດຖິດ-ສັງຄົມຂອງຈີນຍັງມີຄວາມຫຍຸ້ງຍາກແລະບັນຫາບໍ່ໜ້ອຍ, ຍັງຕ້ອງເພີ່ມຂີດຄວາມສາມາດສ້າງກຳລັງແຮງໃໝ່ຢູ່ພາຍໃນເພື່ອຊຸກຍູ້ການເຕີບໂຕຂອງເສດຖະກິດ, ຂີດຄວາມສາມາດການຜະລິດຂອງບາງຂະແໜງການຍັງເຫຼືອເຟືອຢ່າງໜັກໜ່ວງ, ວິສາຫະກິດຈຳນວນໜຶ່ງ ຍັງມີຄວາມຫຍຸ້ງຍາກຫຼາຍສົມຄວນ ໃນການຜະລິດແລະດຳເນີນທຸລະກິດ, ທ່າອ່ຽງຂະຫຍາຍຕົວຂອງເສດຖະກິດເຂດແຄວ້ນແຕກຕ່າງກັນຫຼາຍ, ຄວາມຂັດແຍ້ງດ້ານລາຍຮັບລາຍຈ່າຍການເງິນ ມີຫຼາຍສົມຄວນ, ຄວາມສ່ຽງດ້ານເສດຖະກິດການເງິນແມ່ນປະໝາດບໍ່ໄດ້. ສະພາບມົນລະມິດຂອງສິ່ງແວດລ້ອມ ຍັງໜັກໜ່ວງຄືເກົ່າ ໂດຍສະເພາະບາງເຂດແຄວ້ນ ຍັງເກີດບັນຫາໝອກຄວັນພິດເລື້ອຍໆ ແລະຍັງຕ້ອງເພີ່ມທະວີມາດຕະການແກ້ໄຂຕື່ມອີກ. ປະຊາຊົນຍັງມີຄວາມບໍ່ພໍໃຈຫຼາຍຢ່າງໃນດ້ານເຮືອນຢູ່, ການສຶກສາ, ການປິ່ນປົວພະຍາດ, ການລ້ຽງດູເບິ່ງແຍງຄົນຊະລາ, ຄວາມປອດໄພດ້ານອາຫານແລະຢາ, ການແບ່ງປັນລາຍຮັບແລະອື່ນໆ. ນອກນີ້, ຢູ່ຈີນຍັງໄດ້ມີອຸບັດເຫດຮ້າຍແຮງທີ່ໜ້າເສຍໃຈເກີດຂຶ້ນຈຳນວນໜຶ່ງໃນຂົງເຂດບໍ່ຖ່ານຫີນ, ການກໍ່ສ້າງ, ຄົມມະນາຄົມ ແລະ ອື່ນໆ. ວຽກງານຂອງລັດຍັງມີຂໍ້ຜຸກຜ່ອງ, ບາງມາດຕະການແລະນະໂຍບາຍປະຕິຮູບ ຍັງບໍ່ທັນໄດ້ຮັບການຈັດຕັ້ງປະຕິບັດໃຫ້ເປັນຮູບປະທຳ, ຍັງມີບັນຫາພົ້ນເດັ່ນສົມຄວນເປັນຕົ້ນວິສາຫະກິດກ່ຽວຂ້ອງຕ້ອງເສຍຄ່າທຳນຽມຫຼາຍ, ປະຊາຊົນໃຊ້ບໍລິການຂອງລັດບໍ່ສະດວກແລະອື່ນໆ, ໃນການປະຕິບັດກົດໝາຍທາງບໍລິຫານຂອງເຈົ້າໜ້າທີ່ ຍັງມີປາກົດການຫຍໍ້ທໍ້ທີ່ບໍ່ເປັນລະບຽບແບບແຜນ, ບໍ່ຍຸຕິທຳແລະບໍ່ມີມາລະຍາດ, ພະນັກງານການນຳຈຳນວນໜ້ອຍ ຍັງຂີ້ຄານໃນວຽກງານບໍລິຫານ, ບໍ່ມີຄວາມຮັບຜິດຊອບ ຫຼື ປະຕິເສດໜ້າທີ່ຮັບຜິດຊອບ, ບັນຫາການສໍ້ລາດບັງຫຼວງໃນບາງຂົງເຂດຍັງເກີດຂຶ້ນບາງຄັ້ງບາງຄາວ. ພວກເຮົາຕ້ອງກ້າຜະເຊີນກັບສິ່ງທ້າທາຍ, ກ້າຮັບຜິດຊອບແລະສຸມທຸກຄວາມພະຍາຍາມປະຕິບັດໜ້າທີ່ວຽກງານຂອງລັດໃຫ້ດີ, ປະຕິບັດພາລະກຳປະຫວັດສາດໃຫ້ດີແລະບໍ່ໃຫ້ປະຊາຊົນຜິດຫວັງ.
2 ວາງແຜນແມ່ບົດວຽກງານໃນປີ 2017
ເມື່ອວິເຄາະສະຖານະການທັງພາຍໃນແລະຕ່າງປະເທດໂດຍສັງລວມ, ພວກເຮົາຕ້ອງກຽມພ້ອມຢ່າງເຕັມສ່ວນເພື່ອຮັບມືກັບສະພາບທີ່ຫຍຸ້ງຍາກສັບສົນກວ່າເກົ່າ. ການຂະຫຍາຍຕົວຂອງເສດຖະກິດໂລກຍັງມີທ່າອ່ຽງອ່ອນແອຕໍ່ໄປ, ແນວຄິດ "ຕ້ານໂລກາພິວັດ" ແລະລັດທິປົກປ້ອງມີທ່າອ່ຽງຟື້ນຕົວຄືນ, ທິດທາງນະໂຍບາຍຂອງກຸ່ມເສດຖະກິດສຳຄັນພ້ອມດ້ວຍຜົນກະທົບຕໍ່ເສດຖະກິດໂລກຍັງບໍ່ແນ່ນອນ ແລະມີປັດໄຈບໍ່ໝັ້ນທ່ຽງບໍ່ແນ່ນອນເພີ່ມຫຼາຍຂຶ້ນ. ການພັດທະນາຂອງຈີນ ກຳລັງຢູ່ໃນໄລຍະສຳຄັນທີ່ຕ້ອງຜ່ານຜ່າຄວາມຫຍຸ້ງຍາກເພື່ອກ້າວໜ້າໄປ, ການພັດທະນາຂອງເສດຖະກິດ ຍັງມີຄວາມຂັດແຍ້ງແລະບັນຫາພົ້ນເດັ່ນບໍ່ໜ້ອຍ. ຈາກນີ້, ຈີນບໍ່ສາມາດປະໝາດຄວາມຫຍຸ້ງຍາກແລະຄວາມໝັ້ນໃຈກໍບໍ່ສາມາດຫວັ່ນໄຫວຄອນແຄນ.
ເປົ້າໝາຍສຳຄັນໃນການພັດທະນາເສດຖະກິດຈີນໃນປີນີ້ຄື: GDP ຂະຫຍາຍຕົວປະມານ 6，5%, ພະຍາຍາມສູ້ຊົນໃຫ້ໄດ້ຮັບຜົນງານທີ່ດີກວ່ານີ້ໃນເວລາປະຕິບັດຕົວຈິງ. ລາຄາຜູ້ບໍລິໂພກເພີ່ມຂຶ້ນໃນລະດັບ 3%. ແຮງງານປະກອບອາຊີບໃນຕົວເມືອງ ເພີ່ມຂຶ້ນຫຼາຍກວ່າ 11 ລ້ານຄົນ, ອັດຕາຫວ່າງງານທີ່ຈົດທະບຽນໃນຕົວເມືອງ ຄວບຄຸມບໍ່ໃຫ້ເກີນ 4，5%. ການຄ້ານຳເຂົ້າແລະສົ່ງອອກສິນຄ້າ ກັບຄືນສູ່ສະພາບໝັ້ນທ່ຽງແລະມີທ່າອ່ຽງຂະຫຍາຍຕົວດີຂຶ້ນ, ລາຍຮັບລາຍຈ່າຍສາກົນ ກ້ຳເກິ່ງກັນໂດຍພື້ນຖານ. ລາຍຮັບຂອງປະຊາຊົນມີຈັງຫວະການເຕີບໂຕພ້ອມກັບການຂະຫຍາຍຕົວຂອງເສດຖະກິດໂດຍພື້ນຖານ, ເຮັດໃຫ້ພະລັງງານທີ່ນຳໃຊ້ໃນການຜະລິດ GDP ແຕ່ລະຫົວໜ່ວຍ ສະເລ່ຍແລ້ວ ຫຼຸດລົງກວ່າ 3,4%, ປະລິມານການປ່ອຍສິ່ງມົນລະພິດສຳຄັນສືບຕໍ່ຫຼຸດໜ້ອຍລົງ.
ເຮັດວຽກຂອງລັດຖະບານໃນປີນີ້ໃຫ້ດີ, ຕ້ອງກຳແໜ້ນຫຼາຍຈຸດລຸ່ມນີ້. ໜຶ່ງແມ່ນຈັດຕັ້ງປະຕິບັດຫຼັກການລວມທີ່ສະແຫວງຫາຄວາມຄືບໜ້າໃນຄວາມໝັ້ນທ່ຽງ, ຮັກສາຄວາມໜັກແໜ້ນດ້ານຍຸດທະສາດ. ສອງ, ຍຶດໝັ້ນຖືກການຊຸກຍູ້ການປະຕິຮູບໂຄງປະກອບຝ່າຍການສະໜອງເປັນສາຍຫຼັກ. ສາມ, ເປີດກວ້າງຄວາມຕ້ອງການລວມຢ່າງເໝາະສົມແລະຍົກສູງປະສິດທິພາບ. ສີ່, ອາໄສການປະດິດສ້າງໃໝ່ເພື່ອຊຸກຍູ້ກຳລັງແມ່ແຮງໃໝ່ເຂົ້າແທນກຳລັງແມ່ແຮງເກົ່າແລະປັບປຸງໂຄງປະກອບໃຫ້ດີຂຶ້ນ. ຫ້າ, ອອກແຮງແກ້ໄຂບັນຫາພົ້ນເດັ່ນທີ່ປະຊາຊົນສົນໃຈຢ່າງກວ້າງຂວາງ.
ສາມ. ໜ້າທີ່ວຽກງານຈຸດໜັກໃນປີ 2017
(ໜຶ່ງ)ໃຊ້ວິທີການປະຕິຮູບເພື່ອລົງເລິກຊຸກຍູ້ "3 ຕັດຖິ້ມ 1 ຫຼຸດລົງ 1 ແກ້ໄຂ".
ຕັດຖິ້ມຄວາມສາມາດການຜະລິດຢ່າງປະສິດທິຜົນອັນແທ້ຈິງ. ປີນີ້ຕ້ອງຕັດຖິ້ມຄວາມສາມາດ ການຜະລິດເຫຼັກກ້າລົງອີກ 50 ລ້ານໂຕນ, ຕັດຖິ້ມຄວາມສາມາດການຜະລິດຖ່ານຫີນຫຼາຍກວ່າ 150 ລ້ານໂຕນ. ພ້ອມດຽວກັນນັ້ນ, ຕ້ອງຢຸດ ຫຼື ເລື່ອນເວລາການກໍ່ສ້າງຄວາມສາມາດການຜະລິດໄຟຟ້າດ້ວຍຖ່ານຫີນ 50 ລ້ານກິໂລວັດຂຶ້ນໄປ, ເພື່ອປ້ອງກັນແລະແກ້ໄຂຄວາມສ່ຽງທີ່ຄວາມສາມາດການຜະລິດໄຟຟ້າດ້ວຍຖ່ານຫີນເຫຼືອເຟືອ, ຍົກສູງປະສິດທິພາບຂອງຂະແໜງການຜະລິດໄຟຟ້າດ້ວຍຖ່ານຫີນ, ຈົ່ງໂອກາດໃຫ້ແກ່ການພັດທະນາພະລັງງານສະອາດ.
ໃຊ້ນະໂນບາຍງົບປະລິມານເຮືອນໃໝ່ທີ່ຄ້າງໄວ້ຕາມສະພາບຕົວຈິງຂອງແຕ່ລະເມືອງ. ປັດ ຈຸບັນນີ້, ປະລິມານເຮືອນໃໝ່ໃນຕະຫຼາດເຮືອນຢູ່ໃນຕົວເມືອງລະດັບທີ 3 ແລະລະດັບທີ 4 ຍັງມີຈຳນວນຫຼວງຫຼາຍ, ຕ້ອງສະໜັບສະໜູນຄວາມຕ້ອງການດ້ານການອາໄສຂອງພົນລະເມືອງເອງແລະຄວາມຕ້ອງການຊື້ເຮືອນຂອງຜູ້ທີ່ເຂົ້າເຮັດວຽກໃນຕົວເມືອງ. ຍຶດໝັ້ນລັກສະນະເປັນທີ່ຢູ່ອາໄສຂອງເຮືອນຢູ່, ໃຫ້ອົງການປົກຄອງທ້ອງຖິ່ນແບກຫາບໜ້າທີ່ຮັບຜິດຊອບຕົ້ນຕໍ, ເລັ່ງລັດສ້າງແລະປັບປຸງກົນໄກຖາວອນເພື່ອຊຸກຍູ້ຕະຫຼາດເຮືອນຢູ່ແລະທີ່ດິນພັດທະນາຢ່າງໝັ້ນທ່ຽງແລະປອດໄສ.
ຕັດຖິ້ມບົດບາດໄມ້ງັດຢ່າງຕັ້ງໜ້າ, ໝັ້ນທ່ຽງແລະເໝາະສົມ. ຖືການຫຼຸດອັດຕາໄມ້ງັດຂອງວິສາຫະກິດໃຫ້ຕ່ຳລົງເປັນວຽກງານສຳຄັນພິເສດ.
ຫຼຸດຕົ້ນທຶນໃຫ້ຕ່ຳລົງດ້ວຍຫຼາຍມາດຕະການ. ພາກສ່ວນຕ່າງໆທີ່ກ່ຽວຂ້ອງຕ້ອງສະຫຼະຜົນກຳໄລສ່ວນຕົວເພື່ອຜົນປະໂຫຍດສ່ວນລວມ, ເຮັດໃຫ້ວິສາຫະກິດສາມາດຫຼຸດຜ່ອນຄວາມແບກຫາບໃຫ້ໜ້ອຍລົງ, ສ້າງເງື່ອນໄຂເອື້ອຍອຳນວຍເພື່ອສ້າງທ່າແຮງໃໝ່ຂອງຈີນໃນການແຂ່ງຂັນ.
ເລັ່ງລັດແກ້ໄຂຂໍ້ອ່ອນແອຢ່າງຖືກຕ້ອງ. ເລັ່ງລັດຍົກລະດັບຄວາມສາມາດເສົາຄໍ້າໃນດ້ານຕ່າງໆ, ເຊັ່ນ: ການບໍລິການສາທາລະນະ, ພື້ນຖານໂຄງລ່າງ, ພັດທະນາຢ່າງມີຫົວຄິດປະດິດສ້າງ, ສະພາບແວດລ້ອມດ້ານສິ່ງແວດລ້ອມແລະອື່ນໆ.
ເຂດທຸກຍາກແລະຜູ້ທຸກຍາກ ເປັນຂໍ້ອ່ອນແອທີ່ສຸດໃນການສ້າງສັງຄົມອີ່ມໜໍາສຳລານຢ່າງ ຮອບດ້ານ. ຕ້ອງລົງເລິກຈັດຕັ້ງປະຕິບັດມາດຕະການຫຼຸດຜ່ອນຄວາມທຸກຍາກຢ່າງຖືກຕ້ອງ, ປີນີ້ຈະຫຼຸດຈຳນວນຜູ້ທຸກຍາກຢູ່ເຂດຊົນນະບົດໃຫ້ໜ້ອຍລົງອີກ 10 ລ້ານຄົນຂຶ້ນໄປ, ສຳເລັດໜ້າທີ່ຍົກຍ້າຍປະຊາຊົນ 3 ລ້ານ 4 ແສນຄົນໄປບ່ອນອື່ນເພື່ອຊ່ວຍໃຫ້ພົ້ນອອກຈາກຄວາມທຸກຍາກ. ງົບປະມານຫຼຸດຜ່ອນຄວາມທຸກຍາກລາຍສະເພາະຂັ້ນສູນກາງຈະເພີ່ມຂຶ້ນ 30% ຂຶ້ນໄປ.
(ສອງ)ລົງເລິກການປະຕິຮູບໃນຂົງເຂດອັນສຳຄັນແລະຂັ້ນຕອນສຳຄັນ
ຊຸກຍູ້ການຫັນປ່ຽນພາລະບົດບາດຂອງລັດຖະບານຢ່າງຕໍ່ເນື່ອງ.
ສືບຕໍ່ຊຸກຍູ້ການປະຕິຮູບໂຄງປະກອບການເງິນແລະສ່ວຍສາອາກອນ.
ປະຕິບັດການປະຕິຮູບໂຄງປະກອບການທະນາຄານໃຫ້ໄດ້ຮັບປະສິດທິຜົນ.
ເລັ່ງລັດຊຸກຍູ້ການປະຕິຮູບລັດວິສາຫະກິດແລະຊັບສິນຂອງລັດ.
ກະຕຸກຊູກຍູ້ຄວາມມີຊີວິດຊີວາຂອງເສດຖະກິດທີ່ບໍ່ແມ່ນພາກສ່ວນລວມຢ່າງມີຜົນດີກວ່າເກົ່າ.
ເພີ່ມທະວີການກໍ່ສ້າງລະບຽບການປົກປ້ອງສິດຊັບສິນ.
ອອກແຮງຊຸກຍູ້ການປະຕິຮູບໂຄງປະກອບສັງຄົມ.
ລົງເລິກການປະຕິຮູບໂຄງປະກອບສິວິໄລລະບົບນິເວດ.
(ສາມ) ຂຸດຄົ້ນກຳລັງບົ່ມຊ້ອນດ້ານຄວາມຕ້ອງການພາຍໃນຕື່ມອີກ.
ຊຸກຍູ້ການບໍລິໂພກໃຫ້ເຕີບໂຕຢ່າງໝັ້ນທ່ຽງ. ໜຶ່ງ, ຕ້ອງເລັ່ງລັດພັດທະນາການບໍລິໂພກ ການບໍລິການ. ສອງ, ເພີ່ມທະວີການບໍລິໂພກຜະລິດຕະພັນທີ່ມີຄຸນນະພາບສູງ. ສາມ, ປັບປຸງ ຕະຫຼາດໃຫ້ເປັນລະບຽບຮຽບຮ້ອຍ.
ຕັ້ງໜ້າເປີດກວ້າງການລົງທຶນທີ່ມີປະສິດທິຜົນ. ຊີ້ນຳເງິນທຶນ ເຂົ້າສູ່ຂົງເຂດທີ່ຍັງອ່ອນແອ, ປັບປຸງໂຄງປະກອບໃຫ້ດີຂຶ້ນ, ຊຸກຍູ້ການປະດິດສ້າງໃໝ່ ແລະເປັນຜົນປະໂຫຍດໃຫ້ແກ່ຊີວິດການເປັນຢູ່ຂອງປະຊາຊົນໃຫ້ຫຼາຍກວ່າເກົ່າ. ປີນີ້ ຕ້ອງສຳເລັດການລົງທຶນເຂົ້າໃນການກໍ່ສ້າງທາງລົດໄຟເປັນມູນຄ່າ 800 ຕື້ຢວນ, ການລົງທຶນເຂົ້າໃນການຂົນສົ່ງດ້ວຍທາງຫຼວງແລະທາງນ້ຳເປັນມູນຄ່າ 1800 ຕື້ຢວນ, ລົງມືກໍ່ສ້າງ 15 ໂຄງການຊົນລະປະທານຂະໜາດໃຫຍ່, ສືບຕໍ່ເພີ່ມທະວີການກໍ່ສ້າງໂຄງການທີ່ສຳຄັນ ເຊັ່ນຄົມມະນາຄົມລົດລາງ, ການບິນພົນລະເຮືອນ, ພື້ນຖານໂຄງລ່າງດ້ານໂທລະຄົມ ແລະອື່ນໆ. ການເງິນສູນກາງຈະຈັດງົບປະມານ 507 ຕື້ 600 ລ້ານຢວນ. ຈັດຕັ້ງປະຕິບັດແລະປັບປຸງນະໂຍບາຍແລະມາດຕະຖານເພື່ອຊຸກຍູ້ການລົງທຶນຈາກສັງຄົມ.
ປັບປຸງແຜນການພັດທະນາຂອງພາກພື້ນ.
ຊຸກຍູ້ການຫັນເປັນຕົວເມືອງແບບໃໝ່ຢ່າງໜັກແໜ້ນ.
(ສີ່) ໃຊ້ການປະດິດສ້າງໃໝ່ເພື່ອນຳພາເສດຖະກິດຮູບປະທຳຫັນປ່ຽນຮູບການພັດທະນາແລະ ຍົກລະດັບໃຫ້ສູງຂຶ້ນ. ເສດຖະກິດຮູບປະທຳເປັນພື້ນຖານແຫ່ງການພັດທະນາຂອງຈີນແຕ່ໃດໆມາ, ວຽກດ່ວນໃນປັດຈຸບັນ ແມ່ນຕ້ອງເລັ່ງລັດຫັນປ່ຽນຮູບການພັດທະນາແລະຍົກລະດັບໃຫ້ສູງຂຶ້ນ.
ຍົກລະດັບຄວາມສາມາດປະດິດສ້າງໃໝ່ດ້ານວິທະຍາສາດເຕັກໂນໂລຊີໃຫ້ສູງຂຶ້ນ.
ເລັ່ງລັດບໍາລຸງສ້າງຂະແໜງການທີ່ຈະເລີນໃໝ່ໃຫ້ເຕີບໃຫຍ່. ປະຕິບັດແຜນການພັດທະນາຂະແໜງການທີ່ຈະເລີນໃໝ່ທີ່ມີລັກສະນະຍຸດທະສາດຢ່າງຮອບດ້ານ, ເລັ່ງລັດການຄົ້ນຄວ້າພັດທະນາເຕັກນິກວັດຖຸດິບໃໝ່, AI, ວົງຈອນໄຟຟ້າອິນເຕີເກຼດ，ການຜະລິດຢາປົວພະຍາດດ້ວຍຊີວະຊາດ, 5G ແລະອື່ນໆ, ທັງນຳໃຊ້ໃຫ້ມີຜົນຕົວຈິງ, ພັດທະນາກຸ່ມຂະແໜງການໃຫ້ມີຂະໜາດໃຫຍ່ແລະເຂັ້ມແຂງ. ສະໜັບສະໜູນແລະນຳພາພັດທະນາເສດຖະກິດແບ່ງປັນ, ຍົກສູງປະສິດທິພາບໃນການນຳໃຊ້ຊັບພະຍາກອນສັງຄົມ, ອໍານວຍຄວາມສະດວກໃຫ້ແກ່ຊີວິດການເປັນຢູ່ຂອງປະຊາຊົນ.
ອອກແຮງປັບປຸງແລະຍົກລະດັບຂະແໜງການດັ້ງເດີມໃຫ້ສູງຂຶ້ນ. ອອກແຮງພັດທະນາຂະແໜງການຜະລິດທີ່ກ້າວໜ້າ ແລະຊຸກຍູ້ການຜະລິດຂອງຈີນ ກ້າວໄປສູ່ລະດັບກາງແລະສູງ.
ຊຸກຍູ້ການປະກອບທຸລະກິດແລະປະດິດສ້າງໃໝ່ຂອງມວນຊົນຢ່າງຕໍ່ເນື່ອງ.
ຍົກສູງລະດັບຄຸນນະພາບຢ່າງຮອບດ້ານ, ຕ້ອງສົ່ງເສີມຈິດໃຈ "ນາຍຊ່າງ" ຢ່າງແຂງແຮງ, ບຳລຸງສ້າງ "ນາຍຊ່າງຈີນ'' ທີ່ມີຈຳນວນຫຼວງຫຼາຍ, "ຍີ່ຫໍ້ຈີນ"ທີ່ມີຊື່ສຽງໃນທົ່ວໂລກ, ຊຸກຍູ້ການພັດທະນາເສດຖະກິດຂອງຈີນເຂົ້າສູ່ຍຸກສະໄໝທີ່ເນັ້ນໜັກຄຸນນະພາບ.
(ຫ້າ) ຊຸກຍູ້ກະສິກຳໃຫ້ພັດທະນາຢ່າງໝັ້ນທ່ຽງແລະເຮັດໃຫ້ຊາວກະສິກອນມີລາຍໄດ້ເພີ່ມຂຶ້ນຢ່າງຕໍ່ເນື່ອງ.
ຊຸກຍູ້ການປັປບຸງໂຄງປະກອບກະສິກຳ.
ເພີ່ມທະວີການພັດທະນາກະສິກຳແບບທັນສະໄໝ.
ລົງເລິກການປະຕິຮູບຊົນນະບົດ.
ເພີ່ມທະວີການກໍ່ສ້າງພື້ນຖານໂຄງລ່າງສາທາລະນະຢູ່ຊົນນະບົດ.
(ຫົກ) ເປີດກວ້າງການເປີດປະຕູສູ່ພາຍນອກຢ່າງຕັ້ງໜ້າແລະເປັນເຈົ້າການ.
ຊຸກຍູ້ການສ້າງ 'ໜຶ່ງແລວທາງໜຶ່ງເສັ້ນທາງ' ຢ່າງໜັກແໜ້ນ. ຍຶດໝັ້ນຫຼັກການທີ່ ຮ່ວມກັນປຶກສາຫາລື, ຮ່ວມກັນກໍ່ສ້າງແລະຮ່ວມກັນຊົມໃຊ້. ລົງເລິກການຮ່ວມມືສາກົນເພື່ອຍົກລະດັບຄວາມສາມາດການຜະລິດ. ເພີ່ມທະວີການແລກປ່ຽນແລະການຮ່ວມມືໃນຂົງເຂດການສຶກສາ, ວັດທະນະທຳ, ທ່ອງທ່ຽວແລະອື່ນໆ. ຈັດເວທີປຶກສາຫາລືລະດັບສູງວ່າດ້ວຍການຮ່ວມມືສາກົນພາຍໃຕ້ຫົວຂໍ້ 'ໜຶ່ງແລວທາງໜຶ່ງເສັ້ນທາງ' ຢ່າງມີຄຸນນະພາບສູງ, ຂຽນໜ້າໃໝ່ໃນປຶ້ມປະຫວັດການຮ່ວມມືແບບຕ່າງຝ່າຍຕ່າງມີຜົນປະໂຫຍດ.
ຊຸກຍູ້ການຄ້າກັບຕ່າງປະເທດສືບຕໍ່ຟື້ນຟູຄວາມໝັ້ນທ່ຽງແລະກ້າວໄປສູ່ທາງດີ.
ອອກແຮງປັບປຸງສະພາບແວດລ້ອມໃຫ້ແກ່ການລົງທຶນຂອງນັກທຸລະກິດຕ່າງປະເທດ.
ຊຸກຍູ້ການຄ້າແລະການລົງທຶນສາກົນໃຫ້ມີເສລີພາບແລະຄວາມສະດວກຫຼາຍກວ່າເກົ່າ. ໂລກາພິວັດດ້ານເສດຖະກິດສອດຄ່ອງກັບຜົນປະໂຫຍດກົກຮາກຂອງບັນດາປະເທດໃນໂລກ. ຈີນຈະຊຸກຍູ້ການຮ່ວມມືດ້ານເສດຖະກິດຂອງໂລກຢ່າງເດັດດ່ຽວໜຽວແໜ້ນ, ຮັກສາຖານະຕົ້ນຕໍຂອງໂຄງປະກອບການຄ້າຫຼາຍຝ່າຍ, ຕັ້ງໜ້າເຂົ້າຮ່ວມການເຈລະຈາການຄ້າຫຼາຍຝ່າຍ. ພວກຂ້າພະເຈົ້າຍິນດີຮ່ວມກັບປະເທດທີ່ກ່ຽວຂ້ອງ, ຊຸກຍູ້ອະນຸສັນຍາຍົກລະດັບເຂດການຄ້າເສລີຈີນ-ອາຊຽນໃຫ້ບັງເກີດຜົນຢ່າງຮອບດ້ານ, ສຳເລັດການເຈລະຈາກ່ຽວກັບສາຍພົວພັນຄູ່ເສດຖະກິດຮອບດ້ານຂອງພາກພື້ນໂດຍໄວ, ຊຸກຍູ້ການສ້າງເຂດການຄ້າເສລີອາຊີປາຊີຟິກ. ສືບຕໍ່ເຈລະຈາກັບປະເທດແລະເຂດແຄວ້ນທີ່ກ່ຽວຂ້ອງກ່ຽວກັບສັນຍາການຄ້າແລະການລົງທຶນ. ຈີນເປັນປະເທດທີ່ຮັບຜິດຊອບ, ໄດ້ປະຕິບັດຕາມຄຳໝັ້ນສັນຍາຂອງຕົນຢ່າງຕັ້ງອົກຕັ້ງໃຈຕະຫຼອດມາ, ພ້ອມທັງຈະເດັດດ່ຽວປົກປ້ອງສິດແລະຜົນປະໂຫຍດຂອງຕົນເທົ່າທີ່ຄວນ.
(ເຈັດ) ເພີ່ມຄວາມເຂັ້ມແຂງໃນການອະນຸລັກສິ່ງແວດລ້ອມລະບົບນິເວດ.
ເດັດດ່ຽວປົກປັກຮັກສາທ້ອງຟ້າທີ່ສະອາດແຈ່ມໃສ. ປີນີ້ປະລິມານລະບາຍຊຸນເຟີດີອອກສິດ, ສິ່ງປະສົມນີເຕີແລະອົກຊີ ຕ່າງຈະຫຼຸດລົງ 3%, ຄວາມເຂັ້ມຂຸ້ນຂອງ PM2,5 ຢູ່ເຂດສຳຄັນຫຼຸດລົງຢ່າງເດັ່ນຊັດ. ໜຶ່ງ,ຕ້ອງເລັ່ງລັດແກ້ໄຂບັນຫາມົນລະພິດຈາກການນໍາໃຊ້ຖ່ານຫີນ. ສອງ, ຊຸກຍູ້ການແກ້ໄຂແຫຼ່ງມົນລະພິດຢ່າງຮອບດ້ານ. ສາມ, ເພີ່ມຄວາມເຂັ້ມແຂງໃນການແກ້ໄຂການລະບາຍຄວັນລົດ. ສີ່, ຮັບມືກັບອາກາດທີ່ມີມົນລະພິດໜັກໜ່ວງຢ່າງມີປະສິດທິຜົນ. ຫ້າ, ປະຕິບັດກົດໝາຍດ້ານສິ່ງແວດລ້ອມ, ຕິດຕາມກວດກາແລະສືບຫາຄວາມຮັບຜິດຊອບຢ່າງເຂັ້ມງວດ.
ເພີ່ມຄວາມເຂັ້ມແຂງໃນການປ້ອງກັນແລະແກ້ໄຂການມົນລະພິດຂອງນໍ້າແລະທີ່ດິນ. ສຸມໃສ່ການປ້ອງກັນແລະແກ້ໄຂສິ່ງມົນລະພິດນໍ້າຢູ່ເຂດລ້ອງແມ່ນໍ້າທີ່ສຳຄັນແລະມົນລະພິດດ້ານກະສິກຳ.
ຊຸກຍູ້ການອະນຸລັກລະບົບນິເວດ.
(ແປດ) ຊຸກຍູ້ການສ້າງສັງຄົມໂດຍຖືການຄໍ້າປະກັນແລະປັບປຸງຊີວິດການເປັນຢູ່ຂອງປະ ຊາຊົນເປັນຈຸດໜັກ.
ອອກແຮງຊຸກຍູ້ການປະກອບອາຊີບແລະສ້າງທຸລະກິດ. ປີນີ້ມີນັກສຶກສາທີ່ຮຽນຈົບໂຮງຮຽນຊັ້ນສູງ 7 ລ້ານ 9 ແສນ 5 ໝື່ນຄົນ, ເຊິ່ງໄດ້ສ້າງສະຖິຕິສູງສຸດອີກໃນປະຫວັດສາດ, ຕ້ອງປະຕິບັດແຜນການຊຸກຍູ້ການປະກອບອາຊີບ, ນຳພາສ້າງທຸລະກິດ, ການເຕີບໂຕຢູ່ຮາກຖານແລະແຜນການອື່ນໆ, ຊຸກຍູ້ການປະກອບອາຊີບແລະສ້າງທຸລະກິດດ້ວຍຫຼາຍຊ່ອງທາງ.
ດຳເນີນວຽກງານການສຶກສາຢ່າງຍຸຕິທຳແລະມີຄຸນນະພາບດີ.
ຊຸກຍູ້ການພັດທະນາຂົງເຂດສາທາລະນະສຸກ.
ສ້າງເຄືອຂ່າຍຮັບປະກັນຊີວິດການເປັນຢູ່ຂອງປະຊາຊົນຢ່າງໜັກແໜ້ນ.
ພັດທະນາວຽກງານວັດທະນະທຳແລະຂະແໜງການວັດທະນະທຳ.
ຊຸກຍູ້ການປະດິດສ້າງວິທີການຄຸ້ມຄອງສັງຄົມ
（9）ເພີ່ມທະວີການກໍ່ສ້າງຂອງລັດຢ່າງຮອບດ້ານ. ເລັ່ງລັດຫັນປ່ຽນພາລະບົດບາດຂອງລັດ, ຍົກສູງປະສິດທິພາບການບໍລິຫານແລະຮັບໃຊ້ປະຊາຊົນໃຫ້ດີກວ່າເກົ່າ.
ຍຶດໝັ້ນປະຕິບັດໜ້າທີ່ຕຳແໜ່ງຮອບດ້ານຕາມກົດໝາຍ.
ຮັກສາຄວາມປອດໄສຂາວສະອາດຢ່າງສະເໝີຕົ້ນສະເໝີປາຍ. ຮັກສາຄວາມເຂັ້ມງວດໃນການລົງໂທດການສໍ້ລາດບັງຫຼວງ, ສຸມໃສ່ຂົງເຂດສຳຄັນ, ກວດກາແລະປະຕິບັດລະບຽບວິໄນຕໍ່ປາກົດການຫຍໍ້ທໍ້ແລະບັນຫາການສໍ້ລາດບັງຫຼວງ.
ປະຕິບັດໜ້າທີ່ວຽກງານແລະພັດທະນາພາລະກິດ ດ້ວຍຄວາມດຸໝັ່ນແລະຄວາມຮັບຜິດຊອບສູງ. ພະນັກງານທັງຫຼາຍຕ້ອງເປັນເຈົ້າການບຸກເບີນກ້າວໜ້າແລະປະຕິບັດວຽກງານໃຫ້ໄດ້ຮັບຜົນສຳເລັດ, ຮ່ວມແຮງຮ່ວມໃຈກັບປະຊາຊົນຜ່ານຜ່າຄວາມຫຍຸ້ງຍາກ, ຊຸກຍູ້ການພັດທະນາແລະສ້າງອະນາຄົດທີ່ສົດໃສດ້ວຍການເຮັດແທ້ທຳຈິງ.
ບັນດາຜູ້ແທນ!
ເມື່ອຜະເຊີນກັບສະພາບເສດຖະກິດການເມືອງຂອງໂລກທີ່ຜັນແປຢ່າງເລິກເຊິ່ງ, ຈີນຈະຍຶດໝັ້ນຢືນຢູ່ຂ້າງສັນຕິພາບແລະສະເຖຍລະພາບ, ທ່ຽງທຳຍຸດຕິທຳຢ່າງສະເໝີຕົ້ນສະເໝີປາຍ, ເປັນຜູ້ກໍ່ສ້າງສັນຕິພາບຂອງໂລກ, ເປັນຜູ້ປະກອບສ່ວນເຂົ້າໃນການພັດທະນາຂອງໂລກ, ເປັນຜູ້ຮັກສາລະບຽບສາກົນ. ພວກເຮົາຈະຍຶດໝັ້ນເດີນຕາມເສັ້ນທາງພັດທະນາໂດຍສັນຕິຢ່າງເດັດດ່ຽວໜຽວແໜ້ນ, ປົກປັກຮັກສາອິດທິພົນແລະປະສິດທິຜົນຂອງລະບົບຫຼາຍຝ່າຍຢ່າງເດັດດ່ຽວໜຽວແໜ້ນ, ຄັດຄ້ານລັດທິປົກປ້ອງຮູບແບບຕ່າງໆ, ລົງເລິກເຂົ້າຮ່ວມຂະບວນການຄຸ້ມຄອງໂລກ, ນຳພາເສດຖະກິດໂລກາພິວັດຂະຫຍາຍຕົວໄປສູ່ທິດກວມລວມ, ຕ່າງຝ່າຍຕ່າງມີຜົນປະໂຫຍດ, ຍຸດຕິທຳແລະສົມເຫດສົມຜົນກວ່າເກົ່າ. ສົ່ງເສີມກໍ່ສ້າງຂອບສາຍພົວພັນລະຫວ່າງປະເທດໃຫຍ່ທີ່ໝັ້ນທ່ຽງໂດຍລວມແລະພັດທະນາຢ່າງກ້ຳເກິ່ງກັນ, ສຸມກຳລັງເຂົ້າໃນການສ້າງສະພາບແວດລ້ອມອ້ອມຂ້າງທີ່ມີມິດໄມຕີຕໍ່ປະເທດໃກ້ຄຽງ, ໄວ້ເນື້ອເຊື່ອໃຈກັນແລະພັດທະນາຮ່ວມກັນ, ຍົກລະດັບການຮ່ວມມືກັບປະເທດພວມພັດທະນາໃຫ້ສູງຂຶ້ນຮອບດ້ານ, ຕັ້ງໜ້າສະເໜີແຜນການສ້າງສັນເພື່ອແກ້ໄຂບັນຫາຈຸດສຸມໃນທົ່ວໂລກແລະພາກພື້ນ. ເລັ່ງລັດປັບປຸງກົນໄກຮັກສາສິດຜົນປະໂຫຍດຢູ່ຕ່າງປະເທດໃຫ້ມີປະສິດທິຜົນກວ່າເກົ່າແລະ ເສີມສ້າງຄວາມສາມາດໃນດ້ານນີ້. ພວກເຮົາຍິນດີຮ່ວມກັບປະຊາຄົມໂລກ ສຸມກຳລັງເຂົ້າໃນການສ້າງສາຍພົວພັນສາກົນແບບໃໝ່ໂດຍມີການຮ່ວມມືແບບຕ່າງຝ່າຍຕ່າງມີຜົນປະໂຫຍດເປັນໃຈກາງ ແລະປະກອບສ່ວນອັນໃໝ່ເຂົ້າໃນການສ້າງປະຊາຄົມຮ່ວມຊະຕາກຳຂອງມວນມະນຸດ.