ຄຳປາໄສໃນພິທີສະເຫຼີມສະຫຼອງວັນຄົບຮອບ60ປີແຫ່ງການສະຖາປະນາສປຈີນ
-----------------------------------------------------------------------------------------------------------------
ພີ່ນ້ອງຮ່ວມຊາດທົ່ວປະເທດ, ບັນດາສະຫາຍ, ເພື່ອນມິດທັງຫຼາຍ:
ມື້ນີ້, ພວກເຮົາຊຸມນຸມກັນຢ່າງຄຶກຄື້ນ, ເພື່ອສະເຫຼີມສະຫຼອງວັນຄົບຮອບ60ປີແຫ່ງການສະຖາປະນາສປຈີນ. ໃນກາລະໂອກາດທີ່ສີລິມຸງຄຸນແລະເຄັ່ງຂຶມດັ່ງກ່າວ, ປະຊາຊົນບັນດາເຜົ່າໃນທົ່ວປະເທດຈີນລ້ວນແຕ່ຮູ້ສຶກພາກພູມໃຈທີ່ສຸດຕໍ່ການພັດທະນາແລະຄວາມກ້າວໜ້າຂອງປະເທດຊາດທີ່ຍິ່ງໃຫຍ່, ລ້ວນແຕ່ມີຄວາມໝັ້ນໃຈອັນເຕັມປ່ຽມຕໍ່ອະນາຄົດອັນສະຫວ່າງສະໄຫວທີ່ບັນລຸໃຫ້ປະຊາຊາດຈີນຟື້ນຟູຄວາມຈະເລີນຮຸ່ງເຮືອງຢ່າງຍິ່ງໃຫຍ່.
ນະທີ່ນີ້, ຂ້າພະເຈົ້າຂໍຕາງໜ້າສູນກາງພັກຄອມມູນິດ, ສະພາປະຊາຊົນແຫ່ງຊາດຈີນ, ລັດຖະບານຈີນ, ສະພາປຶກສາການເມືອງປະຊາຊົນທົ່ວປະເທດຈີນແລະຄະນະກຳມະການການທະຫານສູນກາງຈີນ, ສະແດງຄວາມຄິດຮອດຄິດເຖິງອັນເລິກເຊິ່ງຕໍ່ຜູ້ອາວຸໂສປະຕິວັດແລະຜູ້ເສຍສະຫຼະເພື່ອການປະຕິວັດທີ່ສ້າງຄຸນງາມຄວາມດີທີ່ອະມະຕະເພື່ອເອກະລາດຂອງຊາດ, ການປົດປ່ອຍປະຊາຊົນ, ຄວາມເຂັ້ມແຂງຂອງປະເທດແລະຄວາມຜາສຸກຂອງປະຊາຊົນ! ສະແດງຄວາມຊົມເຊີຍອັນອົບອຸ່ນຕໍ່ປະຊາຊົນບັນດາເຜົ່າທົ່ວປະເທດແລະພີ່ນ້ອງຮັກຊາດຢູ່ຈີນແລະຕ່າງປະເທດ! ສະແດງຄວາມຂອບໃຈຢ່າງຈິງໃຈຕໍ່ເພື່ອນມິດບັນດາປະເທດທີ່ເອົາໃຈໃສ່ແລະສະໜັບສະໜູນການພັດທະນາຂອງຈີນ.
ໃນມື້ນີ້ເມື່ອ60ປີກ່ອນ, ໂດຍຜ່ານການບາກບັ່ນສູ້ຊົນຢ່າງລຳບາກກາກກຳເປັນເວລາ100 ກວ່າປີໃນຍຸກປະຈຸບັນ, ປະຊາຊົນຈີນຍາດໄດ້ໄຊຊະນະອັນຍິ່ງໃຫຍ່ແຫ່ງການປະຕິວັດຂອງຈີນ, ຢູ່ທີ່ນີ້, ທ່ານປະທານໝາວເຈີຕົ່ງໄດ້ປະກາດຕໍ່ໂລກຢ່າງເຄັ່ງຂຶມວ່າ, ສາທາລະນະລັດປະຊາຊົນຈີນໄດ້ສ້າງຕັ້ງຂຶ້ນແລ້ວ. ປະຊາຊົນຈີນໄດ້ລຸກຂຶ້ນແລ້ວ, ແຕ່ນັ້ນມາ, ປະຊາຊາດຈີນທີ່ມີອາລິຍະທຳ5ພັນກວ່າປີໄດ້ກ້າວເຂົ້າສູ່ສັງກາດໃໝ່ແຫ່ງການພັດທະນາກ້າວໄປໜ້າ.
60ປີມານີ້, ພາຍໃຕ້ການນຳພາຂອງໝູ່ຄະນະນຳສູນກາງ3ຮຸ່ນຂອງພັກທີ່ຕ່າງຖືສະຫາຍໝາວເຈີຕົ່ງ, ສະຫາຍເຕິ້ງສຽວຜິງແລະສະຫາຍຈ່ຽງເຈີມິນເປັນແກນນຳແລະສູນກາງພັກນັບແຕ່ກອງປະຊຸມໃຫຍ່ຄັ້ງທີ16ຂອງພັກເປັນຕົ້ນມາ, ປະຊາຊົນບັນດາເຜົ່າຂອງຈີນທີ່ດຸໝັ່ນແລະສະຫຼາດສ່ອງໃສຮ່ວມໃຈຮ່ວມແຮງກັນແລະພ້ອມກັນບາກບັ່ນສູ້ຊົນຢ່າງທໍລະຫົດອົດທົນ, ເອົາຊະນະຄວາມທຸກຍາກນາໆປະການແລະການທົດສອບຂອງໄພອັນຕະລາຍຕ່າງໆ, ຍາດໄດ້ຜົນສຳເລັດອັນຍິ່ງໃຫຍ່ທີ່ປະຈັກຕາຊາວໂລກ, ບັນເລງເພງເດີນທີ່ສ້າງຕົນເອງໃຫ້ເຂັ້ມແຂງຢ່າງບໍ່ຢຸດຢັ້ງ. ມື້ນີ້, ຈີນ ທີ່ເປັນປະເທດສັງຄົມນິຍົມທີ່ອວ່າຍໜ້າໄປສູ່ການຫັນເປັນທັນສະໄໝ, ອວ່າຍໜ້າສູ່ໂລກແລະອວ່າຍໜ້າສູ່ອະນາຄົດ ໄດ້ຕັ້ງຢູ່ທາງຕາເວັນອອກຂອງໂລກ.
ການພັດທະນາໃນ60ປີມານີ້ຂອງປະເທດຈີນໃໝ່ໄດ້ຢືນຢັນຢ່າງເຕັມທີ່ວ່າ, ມີແຕ່ສັງຄົມນິຍົມຈິ່ງສາມາດກູ້ເອົາຈີນໄດ້, ມີແຕ່ການປະຕິຮູບແລະໄຂປະຕູສູ່ພາຍນອກຈິ່ງສາມາດພັດທະນາຈີນ, ພັດທະນາສັງຄົມນິຍົມ, ແລະພັດທະນາລັດທິມາກ. ປະຊາຊົນຈີນມີຄວາມໝັ້ນໃຈ, ມີຄວາມສາມາດສ້າງສາປະເທດຊາດຂອງຕົນໃຫ້ດີ, ແລະກໍມີຄວາມໝັ້ນໃຈແລະມີຄວາມສາມາດທຳຄວາມພະຍາຍາມປະກອບສ່ວນຂອງຕົນເພື່ອໂລກ.
ພວກເຮົາຈະຍຶດໝັ້ນເດີນຕາມເສັ້ນທາງສັງຄົມນິຍົມທີ່ມີສີສັນພິເສດຂອງຈີນຢ່າງໝັ້ນໜຽວບໍ່ປ່ຽນແປງ,ຜັນຂະຫຍາຍປະຕິບັດທິດສະດີພື້ນຖານ,ແນວທາງພື້ນຖານ,ໂຄງຮ່າງພື້ນຖານແລະບົດຮຽນພື້ນຖານຂອງພັກຢ່າງຮອບດ້ານ,ສືບຕໍ່ປົດປ່ອຍແນວຄິດ,ຍຶດໝັ້ນປະຕິຮູບແລະໄຂປະຕູສູ່ພາຍນອກ,ຊຸກຍູ້ການພັດທະນາຕາມຫຼັກວິທະຍາສາດ,ຊຸກຍູ້ໃຫ້ສັງຄົມກົມກຽວກັນ,ຊຸກຍູ້ຂະບວນວິວັດສ້າງສາສັງຄົມທີ່ພໍຢູ່ພໍກິນແລະຍັງມີສ່ວນເຫຼືອຢ່າງຮອບດ້ານ,ສ້າງສະພາບໃໝ່ແຫ່ງພາລະກິດສັງຄົມນິຍົມທີ່ມີສີສັນພິເສດຂອງຈີນຢ່າງບໍ່ຢຸດຢັ້ງ,ຂຽນໜ້າປະຫວັດສາດໃໝ່ແຫ່ງຊີວິດການເປັນຢູ່ທີ່ດີງາມຂອງປະຊາຊົນ.
ພວກເຮົາຈະຍຶດໝັ້ນທິດທາງ"ທ້ອນໂຮມປະເທດຊາດໂດຍສັນຕິ, ປະເທດດຽວມີສອງລະບອບ"ຢ່າງໝັ້ນໜຽວບໍ່ປ່ຽນແປງ,ຮັກສາຄວາມຈະເລີນຮຸ່ງເຣືອງແລະສະຖຽນລະພາບຖາວອນຂອງຮົງກົງແລະມາກາວ,ຊຸກຍູ້ການພົວພັນລະຫວ່າງສອງຝັ່ງຊ່ອງແຄບໄຕ້ຫວັນໃຫ້ຂະຫຍາຍຕົວໂດຍສັນຕິ,ສືບຕໍ່ສູ້ຊົນເພື່ອເຮັດໃຫ້ການທ້ອນໂຮມປະເທດຊາດເຂົ້າເປັນເອກະພາບກັນໂດຍສັນຕິທີ່ເປັນຄວາມປາຖະໜາຮ່ວມຂອງປະຊາຊາດຈີນບັນລຸຜົນເປັນຈິງ.
ພວກເຮົາຈະຍຶດໝັ້ນ ນະໂຍບາຍການຕ່າງປະເທດທີ່ສັນຕິພາບທີ່ເປັນເອກະລາດແລະເປັນເຈົ້າຕົນເອງຢ່າງໝັ້ນໜຽວບໍ່ປ່ຽນແປງ,ຍຶດໝັ້ນເດີນຕາມເສັ້ນທາງພັດທະນາໂດຍສັນຕິ,ປະຕິບັດຍຸດທະສາດໄຂປະຕູສູ່ພາຍນອກທີ່ຕ່າງຝ່າຍຕ່າງມີຜົນປະໂຫຍດ,ພັດທະນາມິດຕະພາບແລະການຮ່ວມມືກັບທຸກປະເທດບົນພື້ນຖານຫຼັກ5ປະການຢູ່ຮ່ວມກັນໂດຍສັນຕິ,ສືບຕໍ່ຮ່ວມກັບປະຊາຊົນບັນດາປະເທດໃນໂລກຊຸກຍູ້ພາລະກິດອັນສູງສົ່ງແຫ່ງສັນຕິພາບແລະການພັດທະນາຂອງມວນມະນຸດ,ຊຸກຍູ້ການສ້າງໂລກທີ່ກົມກຽວກັນທີ່ມີສັນຕິພາບຖາວອນແລະຈະເລີນຮຸ່ງເຮືອງພ້ອມກັນ.
ກອງທັບປົດປ່ອຍປະຊາຊົນຈີນແລະກອງຕຳຫຼວດປະກອບອາວຸດປະຊາຊົນຈີນຈະເສີມຂະຫຍາຍມູນເຊື້ອທີ່ສະຫງ່າລາສີ,ເພີ່ມທະວີການກໍ່ສ້າງຕົວເອງ,ປະຕິບັດພາລະໜ້າທີ່ຢ່າງແທ້ຈິງ,ສ້າງຄຸນງາມຄວາມດີໃໝ່ເພື່ອປົກປັກຮັກສາອະທິປະໄຕ,ຄວາມປອດໄພແລະຜືນແຜ່ນດິນອັນຄົບຖ້ວນຂອງຊາດ,ປົກປັກຮັກສາສັນຕິພາບຂອງໂລກ.
ປະຫວັດສາດໄດ້ສອນໃຫ້ພວກເຮົາຮູ້ວ່າ,ເສັ້ນທາງກ້າວໄປໜ້າບໍ່ເຄີຍສະດວກສະບາຍຈັກເທື່ອ,ແຕ່ປະຊາຊົນທີ່ກຳຊະຕາກຳຂອງຕົນແລະສາມັກຄີກັນນັ້ນຍ່ອມຈະຜ່ານຜ່າຄວາມຍາກລຳບາກທຸກຢ່າງໄດ້ຢ່າງແນ່ນອນແລະສ້າງພາລະກິດປະຫວັດສາດອັນຍິ່ງໃຫຍ່ຢ່າງບໍ່ຢຸດຢັ້ງ.
ເມື່ອເບິ່ງໄປໃນອະນາຄົດ,ການພັດທະນາຂອງຈີນມີອະນາຄົດທີ່ສວຍງາມ.ທົ່ວພັກ,ທົ່ວກອງທັບແລະປວງຊົນບັນດາເຜົ່າທົ່ວປະເທດຈະສາມັກຄີກັນຢ່າງແໜ້ນແຟ້ນກວ່າເກົ່າ,ຊູຄັນທຸງອັນຍິ່ງໃຫຍ່ແຫ່ງສັງຄົມນິຍົມທີ່ມີສີສັນພິເສດຂອງຈີນ ,ກ້າວໄປໜ້າພ້ອມກັບຍຸກສະໄໝ,ບຸກບືນສູ້ຊົນ,ສືບຕໍ່ກ້າວໄປສູ່ເປົ້າໝາຍອັນຍິ່ງໃຫຍ່ແຫ່ງການສ້າງປະເທດທັນສະໄໝສັງຄົມນິຍົມທີ່ມັ່ງຄັ່ງເຂັ້ມແຂງ ,ປະຊາທິປະໄຕ,ສີວິໄລແລະກົມກຽວກັນ,ບັນລຸການຟື້ນຟູຄວາມຈະເລີນຮຸ່ງເຮືອງອັນຍິ່ງໃຫຍ່ຂອງປະຊາຊາດຈີນ, ສືບຕໍ່ປະກອບສ່ວນໃໝ່ຫຼາຍກວ່າເກົ່າເພື່ອມວນມະນຸດດ້ວຍການອອກແຮງງານຢ່າງດຸໝັ່ນແລະສູ້ຊົນຢ່າງບໍ່ລົດລະຂອງຕົນ.
ສາທາລະນະລັດປະຊາຊົນຈີນທີ່ຍິ່ງໃຫຍ່ໝັ້ນຍືນ!
ພັກກອມມູນິດຈີນທີ່ຍິ່ງໃຫຍ່ໝັ້ນຍືນ!
ປະຊາຊົນຈີນທີ່ຍິ່ງໃຫຍ່ໝັ້ນຍືນ!
