ກ້ອນກຳລັງການສະແດງ
-----------------------------------------------------------------------------------------------------------------
ດຽວນີ້ພວກເຮົາໄດ້ເຫັນການສະແດງຟ້ອນຮວມໝູ່ກ່ຽວກັບຄວາມສາມັກຄີ ຊົນເຜົ່າຂະໜາດໃຫຍ່ທີ່ສະແດງດ້ວຍ 900 ຄົນທີ່ມີຊື່ວ່າ "ຮັກຊາດຈີນພວກເຮົາ". ເຂົາເຈົ້າໄດ້ນຸ່ງຊຸດມື້ບຸນຂອງຊົນເຜົ່າຕ່າງໆ, ເດີນມາດ້ວຍການຟ້ອນລຳທຳເພງ. ພ້ອມກັນນັ້ນ, ຮູບພາບເບື້ອງຫຼັງຢູ່ເທິງສະໜາມຫຼວງທ່ຽນອ່ານເມີນ ໄດ້ກາຍເປັນຕົວໜັງສືທີ່ວ່າ"ຄວາມສາມັກຄີໃຫຍ່ຂອງປະຊາຊົນບັນດາເຜົ່າໝັ້ນຍືນ".
ຈີນເປັນປະເທດເອກະພາບທີ່ມີຫຼາຍຊົນເຜົ່າ, 56 ຊົນເຜົ່າມີສາຍເລືອດສາຍຊີວິດເຊື່ອມໂຍງເຂົ້າກັນ. ໃນປະຫວັດສາດ 60 ປີທີ່ຈະເລີນຮຸ່ງເຮືອງ, ພີ່ນ້ອງຮ່ວມຊາດຂອງຊົນເຜົ່າຕ່າງໆຮ່ວມທຸກຮ່ວມສຸກ, ຢູ່ຮ່ວມກັນຢ່າງກົມກຽວປອງດອງກັນ, ເຊິ່ງເປັນເພງສັນລະເສີນຄວາມສາມັກຄີແລະຄວາມບາກບັ່ນສູ້ຊົນຂອງປະຊາຊາດຈີນ.
ກ່ອນປະເທດຈີນໃໝ່ສ້າງຕັ້ງຂຶ້ນ, ເຖິງວ່າລັດຖະບານທຸກຊຸດຂອງຈີນລ້ວນແຕ່ມີນະໂຍບາຍແລະລະບອບກ່ຽວກັບວຽກງານຊົນເຜົ່າກໍ່ຕາມ, ແຕ່ບໍ່ຈັກວ່າແມ່ນອຳນາດການເມືອງສູນກາງຂອງເຜົ່າຮັ້ນຫຼືຊົນເຜົ່າສ່ວນໜ້ອຍ, ລ້ວນແຕ່ບໍ່ມີຄວາມສະເໝີພາບລະຫວ່າງຊົນເຜົ່າ. ຫຼັງຈາກປະເທດຈີນໃໝ່ສ້າງຕັ້ງຂຶ້ນແລ້ວ, ລັດຖະບານກາງປະຕິບັດນະໂຍບາຍຊົນເຜົ່າທີ່ສະເໝີພາບ, ສາມັກຄີແລະຊ່ອຍເຫຼືອເຊິ່ງກັນແລະກັນ, ລະຫວ່າງບັນດາຊົນເຜົ່າໄດ້ສ້າງການພົວພັນແບບໃໝ່, ຄື: ເຜົ່າຮັ້ນຈະແຍກອອກຈາກຊົນເຜົ່າສ່ວນໜ້ອຍບໍ່ໄດ້, ຊົນເຜົ່າສ່ວນໜ້ອຍກໍແຍກອອກຈາກເຜົ່າຮັ້ນບໍ່ໄດ້, ຊົນເຜົ່າສ່ວນໜ້ອຍຕ່າງໆກໍ່ແຍກອອກຈາກກັນບໍ່ໄດ້. ໃນປີ 1955, ລັດຖະບານກາງໄດ້ປະຕິບັດລະບອບປົກຄອງຕົນເອງຂອງເຂດຊົນເຜົ່າ, ໄດ້ຮັບປະກັນຖານະ, ສິດແລະຜົນປະໂຫຍດທີ່ສະເໝີພາບດ້ານການເມືອງຂອງຊົນເຜົ່າສ່ວນໜ້ອຍ, ໄດ້ຕອບສະໜອງຄວາມປາຖະໜາຂອງຊົນເຜົ່າສ່ວນໜ້ອຍຕ່າງໆໃນການເຂົ້າຮ່ວມຊີວິດການເມືອງແຫ່ງຊາດ. ພ້ອມກັນນັ້ນ, ລັດຖະບານໂຄລົບແລະປົກປ້ອງເສລີພາບໃນການເຊື່ອຖືສາສະໜາຂອງຊົນເຜົ່າສ່ວນໜ້ອຍ, ສົ່ງເສີມຊົນເຜົ່າສ່ວນໜ້ອຍນຳໃຊ້ແລະພັດທະນາພາສາແລະຕົວໜັງສືຂອງຊົນເຜົ່າຕົນ, ປົກປ້ອງແລະພັດທະນາວັດທະນະທຳຂອງຊົນເຜົ່າສ່ວນໜ້ອຍ, ໂຄລົບຮີດຄອງປະເພນີຂອງຊົນເຜົ່າສ່ວນໜ້ອຍ. ນອກນີ້, ຊົນເຜົ່າສ່ວນໜ້ອຍຍັງໄດ້ຊົມໃຊ້ນະໂຍບາຍພິເສດໃນດ້ານການເງິນ, ການເກີດລູກ, ແລະການເຂົ້າໂຮງຮຽນເປັນຕົ້ນ.
ປະຫວັດສາດແລະພຶດຕິກຳໄດ້ຢືນຢັນເທື່ອແລ້ວເທື່ອອີກວ່າ, ຊະຕາກຳຂອງ ເຜົ່າຕ່າງໆຂອງຈີນລ້ວນແຕ່ຕິດພັນຢ່າງໃກ້ຊິດກັບຊະຕາກຳຂອງປະເທດຊາດ, ປະເທດເປັນເອກະພາບແມ່ນຜົນປະໂຫຍດສູງສຸດຂອງຊົນເຜົ່າຕ່າງໆ. ການຊ່ອຍເຫຼືອເຊິ່ງກັນແລະກັນ, ສາມັກຄີຮັກແພງກັນ, ແມ່ນແຫຼ່ງກຳລັງແຮງຂອງປະຊາຊາດຈີນໃນການສ້າງຄວາມເຂັ້ມແຂງດ້ວຍຕົນເອງໃນຫຼາຍພັນປີມານີ້,ກໍ່ແມ່ນຫຼັກ ອ້າງອີງຮົກຮາກທີ່ຈີນສ້າງສິ່ງມະຫັດສະຈັນເທື່ອແລ້ວເທື່ອອີກ.