ຂົງເຂດຊີວິດການເປັນຢູ່ຂອງປະຊາຊົນຈີນມີຄວາມກ້າວໜ້າຢ່າງເດັ່ນຊັດໃນ 10 ປີມານີ້
(GMT+08:00) 2012-11-13 14:42:44 cri
ບັນຫາເຮືອນຢູ່ກໍ່ແມ່ນບັນຫາທີ່ປະຊາຊົນຈີນໃຫ້ຄວາມສົນໃຈຫຼາຍທີ່ສຸດ. ທ່ານຈ່ຽງເຫວີຍຊິນ, ລັດຖະມົນຕີວ່າການກະຊວງເຮືອນຢູ່ແລະການກໍ່ສ້າງຕົວເມືອງແລະຊົນນະບົດຈີນກ່າວວ່າ, ການກໍ່ສ້າງເຮືອນນະໂຍບາຍໃນຕົວເມືອງຈີນໄດ້ດຳເນີນໄປເປັນຢ່າງດີ, ໄດ້ເພີ່ມທະວີການປັບປຸງເຮືອນຢູ່ທີ່ອັນຕະລາຍຂອງຊົນນະບົດຕື່ມອີກ, ແລະຈະໃຫ້ສຳເລັດຕາມເປົ້າໝາຍທີ່ວາງໄວ້. ນອກນີ້, ກະຊວງເຮືອນຢູ່ແລະການກໍ່ສ້າງຕົວເມືອງແລະຊົນນະບົດຂອງຈີນພວມຕັ້ງໜ້າຄົ້ນຄວ້າເພີ່ມຈຸດທົດລອງເກັບອາກອນອະສັງຫາລິມະຊັບ, ນະໂຍບາຍຈຳກັດອະສັງຫາລິມະຊັບຈະບໍ່ມີການປ່ຽນແປງໃນໄລຍະມໍ່ໆນີ້ເທື່ອ.
ບັນຫາສິ່ງແວດລ້ອມກໍ່ແມ່ນຫົວຂໍ້ຂອງຊີວິດການເປັນຢູ່ທີ່ກ່ຽວພັນເຖິງຊີວິດຂອງທຸກຄົນ. ທ່ານໂຈ່ວເຊີງສຽນ, ລັດຖະມົນຕີວ່າການກະຊວງອະນຸລັກສິ່ງແວດລ້ອມຈີນກ່າວວ່າ, ເສດຖະກິດສັງຄົມພັດທະນາຮອດລະດັບໃດໜຶ່ງ, ກໍ່ຈະເກີດບັນຫາສິ່ງແວດລ້ອມຕາມມາ, ນີ້ແມ່ນກົດເກນ. ປະຈຸບັນ, ການອະນຸລັກສິ່ງແວດລ້ອມຂອງຈີນໄດ້ດີຂຶ້ນໃນລະດັບໜຶ່ງແລ້ວ, ແຕ່ວ່າບໍ່ໄດ້ດີຂຶ້ນໃນດ້ານລວມ, ສະພາບການສິ່ງແວດລ້ອມຍັງສັບສົນຢູ່. ເພື່ອເຮັດໃຫ້ອຸປະຕິເຫດທີ່ເກີດຂຶ້ນຍ້ອນບັນຫາສິ່ງແວດລ້ອມໃຫ້ຫຼຸດລົງນັ້ນ, ທ່ານໂຈ່ວເຊີງສຽງກ່າວວ່າຈະປະຕິບັດມາດຕະການດັ່ງລຸ່ມນີ້:
"ອັນທີໜຶ່ງ, ປະຕິບັດຕາມກົດໝາຍຢ່າງເດັດຂາດ. ອັນທີສອງ, ອອກແຮງຊຸກຍູ້ການແຈ້ງຂໍ້ມູນຂ່າວສານຢ່າງເປີດເຜີຍ. ອັນທີສາມ, ເພີ່ມຄວາມສາມາດໃຫ້ປະຊາຊົນໄດ້ເຂົ້າຮ່ວມຕື່ມອີກ, ອັນທີສີ່, ສ້າງກົນໄກປະເມີນຄວາມສ່ຽງໃນທົ່ວສັງຄົມໃຫ້ສົມບູນຂຶ້ນ, ປ້ອງກັນບໍ່ໃຫ້ເກີດອຸປະຕິເຫດຢ່າງກະທັນຫັນ."
