ລັດຖະມົນຕີການຕ່າງປະເທດຈີນສິ້ນສຸດການຢ້ຽມຢາມອາຊີຕາເວັນອອກສຽງໃຕ້
ຕາມຂ່າວCRI: ວັນທີ6ສິງຫານີ້, ທ່ານຫວາງ ອີ້, ລັດຖະມົນຕີວ່າການກະຊວງການຕ່າງປະເທດຈີນໄດ້ສິ້ນສຸດການຢ້ຽມຢາມອາຊີຕາເວັນອອກສຽງໃຕ້ເປັນເວລາ6ວັນ. ໂດຍຕອບສະໜອງຕາມຄຳເຊີນຂອງທ່ານອານີຟານ ອາມານ, ລັດຖະມົນຕີວ່າການກະຊວງການຕ່າງປະເທດມະເລເຊຍ, ທ່ານສຸຣະພົງ ໂຕວິຈັກໄຊກຸນ, ຮອງນາຍົກລັດຖະມົນຕີທັງເປັນລັດຖະມົນຕີວ່າການກະຊວງການຕ່າງປະເທດໄທ, ທ່ານທອງລຸນ ສີສຸລິດ, ຮອງນາຍົກລັດຖະມົນຕີທັງເປັນລັດຖະມົນຕີວ່າການກະຊວງການຕ່າງປະເທດລາວພ້ອມດ້ວຍທ່ານຟາມ ບິງ ມິງ, ລັດຖະມົນຕີວ່າການກະຊວງການຕ່າງປະເທດຫວຽດນາມ, ທ່ານຫວາງ ອີ້ລັດຖະມົນຕີວ່າການກະຊວງການຕ່າງປະເທດຈີນໄດ້ເດີນທາງໄປໄທເພື່ອເຂົ້າຮ່ວມເວທີປຶກສາຫາລືຂັ້ນສູງຈີນ-ອາຊຽນແລະຢ້ຽມຢາມຢ່າງເປັນທາງການຕໍ່ມະເລເຊຍ, ລາວແລະຫວຽດນາມແຕ່ວັນທີ1ຫາວັນທີ6ສິງຫານີ້.
ໃນໄລຍະຢ້ຽມຢາມ, ທ່ານນາຈິບ ຕູນ ຣາຊັກ, ນາຍົກລັດຖະມົນຕີມະເລເຊຍ, ທ່ານນາງຍິ່ງລັກ ຊິນນະວັດ, ນາຍົກລັດຖະມົນຕີໄທ, ທ່ານຈູມມາລີ ໄຊຍະສອນ, ປະທານປະເທດລາວແລະທ່ານທອງສິງ ທຳມະວົງ, ນາຍົກລັດຖະມົນຕີລາວ, ທ່ານຫງວຽນ ຟູ ຈອງ, ເລຂາທິການໃຫຍ່ສູນກາງພັກກອມມູນິດຫວຽດນາມ, ທ່ານຫງວຽນ ເຕີນ ຢຸງ, ນາຍົກລັດຖະມົນຕີຫວຽດນາມໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານຫວາງ ອີ້.
ວັນທີ2ສິງຫານີ້, ທ່ານຫວາງ ອີ້ໄດ້ກ່າວຄຳປາໄສໃນພິທີໄຂກອງປະຊຸມເວທີປຶກສາຫາລືຂັ້ນສູງຈີນ－ອາຊຽນທີ່ນະຄອນຫຼວງບາງກອກຂອງໄທ. ທ່ານກ່າວວ່າ, ພື້ນຖານສຳຄັນທີ່ສຸດຂອງການພັດທະນາການພົວພັນລະຫວ່າງຈີນກັບອາຊຽນແມ່ນພວກເຮົາໄດ້ຮ່ວມກັນປົກປັກຮັກສາສັນຕິພາບແລະສະຖຽນລະພາບຂອງພາກພື້ນ. ຄວາມເຫັນທີ່ເປັນເອກະສັນກັນທີ່ສຳຄັນທີ່ສຸດແມ່ນຍິນດີຜ່ານການຮ່ວມມືເພື່ອເລັ່ງລັດບັນລຸການພັດທະນາຮ່ວມກັນຂອງພວກເຮົາ. ບົດຮຽນທີ່ສຳຄັນທີ່ສຸດແມ່ນຍຶດໝັ້ນ"ຮູບແບບອາຊີ"，"ຮູບແບບອາຊຽນ"ໂດຍຕະຫຼອດ, ແກ້ໄຂຄວາມຂັດແຍ່ງດ້ວຍການປຶກສາຫາລືຢ່າງມີໄມຕີຈິດມິດຕະພາບແລະການສົນທະນາຢ່າງສະເໝີພາບ. ບົດຮຽນແລະຄວາມເຫັນທີ່ເປັນເອກະສັນກັນດັ່ງກ່າວລ້ຳຄ່າຫຼາຍ, ເປັນໜ້າສຳລັບພວກເຮົາຍຶດໝັ້ນຕໍ່ໄປ. ເມື່ອເວົ້າເຖິງການພັດທະນາການພົວພັນລະຫວ່າງຈີນກັບອາຊຽນໃນບາດກ້າວຕໍ່ໄປ, ທ່ານຫວາງ ອີ້ກ່າວວ່າ, ໜຶ່ງແມ່ນລົງເລິກການຮ່ວມມືຢ່າງຮອບດ້ານ, ບັນລຸການພັດທະນາທີ່ມີຜົນປະໂຫຍດຮ່ວມກັນ. ສອງແມ່ນຍຶດໝັ້ນຮູບແບບສັນຕິພາບ, ແກ້ໄຂຄວາມຂັດແຍ່ງຢ່າງເໝາະສົມດ້ວຍການສົນທະນາຢ່າງສະເໝີພາບແລະການປຶກສາຫາລືຢ່າງມີໄມຕີຈິດມິດຕະພາບ.
ໃນເວລາພົບປະກັບທ່ານສຸຣະກຽດ ສະຖຽນໄທ, ອະດີດຮອງນາຍົກລັດຖະມົນຕີໄທທ່ານຫວາງ ອີ້ໄດ້ກ່າວວ່າ, ການແກ້ໄຂຄວາມຂັດແຍ່ງກ່ຽວກັບໝູ່ເກາະໜານຊາຈີນສາມາດເຮັດຈາກໃນ3ດ້ານ. ໜຶ່ງແມ່ຍຶດໝັ້ນໃຫ້ຝ່າຍທີ່ກ່ຽວຂ້ອງໂດຍກົງຜ່ານການປຶກສາຫາລືແລະເຈລະຈາເພື່ອບັນລຸແຜນການແກ້ໄຂ, ສອງແມ່ນສືບຕໍ່ຈັດຕັ້ງປະຕິບັດ＜ຖະແຫຼງການແຫ່ງການປະພຶດຂອງຝ່າຍຕ່າງໆຢູ່ທະເລຈີນໃຕ້＞, ແລະໃນຂະບວນການນີ້ຊຸກຍູ້ການປຶກສາຫາລືກ່ຽວກັບ"ກົດບັດແຫ່ງການປະພຶດໃນທະເລຈີນໃຕ້. " ສາມແມ່ນຕັ້ງໜ້າຄົ້ນຄວ້າ"ການພັດທະນາຮ່ວມກັນ". ໃນໄລຍະຢ້ຽມຢາມຫວຽດນາມ, ທ່ານຫວາງ ອີ້ຍັງໄດ້ສະເໜີຂໍ້ສະເໜີ4ຂໍ້ກ່ຽວກັບການເລັ່ງລັດຂະບວນການ＂ກົດບັດແຫ່ງການປະພຶດໃນທະເລຈີນໃຕ້＂ຂອງຈີນ, ເຊິ່ງກໍຄື, ຕ້ອງມີຄວາມຄາດຫວັງທີ່ສົມເຫດສົມຜົນ, ຕ້ອງປຶກສາຫາລືໃຫ້ເປັນເອກະພາບກັນ, ຕ້ອງກຳຈັດສິ່ງລົບກວນຕ່າງໆ, ແລະຄວນຄ່ອຍເປັນຄ່ອຍໄປ.
