ທ່ານຫຼີເຄີ້ສຽງເຂົ້າຢ້ຽມຂ່ຳນັບທ່ານຈຸມມາລີ ໄຊຍະສອນ
ຕາມຂ່າວ CRI: ວັນທີ 26 ກັນຍານີ້ ຢູ່ທີ່ນະຄອນຫຼວງປັກກິ່ງ, ທ່ານຫຼີເຄີ້ສຽງ, ກຳມະການປະຈຳກົມການເມືອງສູນກາງພັກ, ນາຍົກລັດຖະມົນຕີຈີນ ໄດ້ເຂົ້າຢ້ຽມຂ່ຳນັບທ່ານຈຸມມາລີ ໄຊຍະສອນ, ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດລາວ ເນື່ອງໃນໂອກາດເດີນທາງມາຢ້ຽມຢາມຈີນ.
ທ່ານຫຼີເຄີ້ສຽງ ກ່າວວ່າ: ຈີນຍິນດີແລກປ່ຽນ ແລະ ໄປມາຫາສູ່ກັນກັບການນຳຂັ້ນສູງລາວຢ່າງແໜ້ນແຟ້ນ, ຊຸກຍູ້ການຮ່ວມມືໃນຂົງເຂດຕ່າງໆ ເຊັ່ນ: ການຄ້າ, ການລົງທຶນ ແລະພື້ນຖານໂຄງການເປັນຕົ້ນ, ເປີດກວ້າງການແລກປ່ຽນດ້ານວັດທະນະທຳ-ສັງຄົມແລະລະຫວ່າງທ້ອງຖິ່ນຂອງສອງປະເທດ, ຊຸກຍູ້ການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງຈີນ-ລາວໃຫ້ພັດທະນາກ້າວໄປໜ້າຢ່າງຕໍ່ເນື່ອງ.
ທ່ານຫຼີເຄີ້ສຽງ ກ່າວຕື່ມວ່າ: ກອງປະຊຸມຕ່າງໆຂອງຜູ້ນຳອາຊີຕາເວັນອອກຄັ້ງທີ 8 ຈະຈັດຂຶ້ນໃນໄວໆນີ້, ຈີນຄອງຄອຍຈະຮ່ວມກັນກັບປະເທດຕ່າງໆທີ່ຮ່ວມປະຊຸມໃນການສະແຫວງຫາການວາງແຜນຂະໜາດໃຫຍ່ກ່ຽວກັບສັນຕິພາບ, ການພັດທະນາແລະການຮ່ວມມືໃນພາກພື້ນ. ຈີນຍິນດີຮ່ວມກັນກັບບັນດາປະເທດອາຊຽນເພີ່ມທະວີຄວາມໄວ້ເນື້ອເຊື່ອໃຈເຊິ່ງກັນແລະກັນ, ລົງເລິກການຮ່ວມມື, ສ້າງແລະຍົກລະດັບເຂດການຄ້າເສລີຈີນ-ອາຊຽນ, ຊຸກຍູ້ການກໍ່ສ້າງການເຊື່ອມຈອດເຊິ່ງກັນແລະກັນ, ເພີ່ມທະວີການຮ່ວມມືດ້ານການທະນາຄານ, ຮ່ວມກັນດຳເນີນການຮ່ວມມືທາງທະເລ, ເຮັດໃຫ້ການພົວພັນລະຫວ່າງຈີນ-ອາຊຽນໄດ້ຮັບການພັດທະນາຫຼາຍຍິ່ງຂຶ້ນ. ຫວັງວ່າລາວຈະເສີມຂະຫຍາຍບົດບາດອັນຕັ້ງໜ້າເພື່ອເພີ່ມທະວີການພົວພັນລະຫວ່າງຈີນ-ອາຊຽນ ໂດຍເຮັດຄືດັ່ງທີ່ເຄີຍໄດ້ປະຕິບັດຜ່ານມາ.
ທ່ານຈຸມມາລີ ໄຊຍະສອນ ກ່າວວ່າ: ຫວັງວ່າສອງຝ່າຍຈະປະສານສົມທົບກັບແຜນການພັດທະນາຂອງແຕ່ລະປະເທດ, ເລັ່ງລັດຊຸກຍູ້ການຮ່ວມມືໃນບັນດາໂຄງການໃຫຍ່ ເຊັ່ນ ໂຄງການທາງລົດໄຟລາວ-ຈີນ ເປັນຕົ້ນ, ລາວຍິນດີຕ້ອນຮັບວິສາຫະກິດຈີນໄປລົງທຶນແລະຂະຫຍາຍກິດຈະການຢູ່ລາວໃຫ້ຫຼາຍກວ່າເກົ່າ. ຝ່າຍລາວຍິນດີພະຍາຍາມຮ່ວມກັນກັບຝ່າຍຈີນ, ຊຸກຍູ້ການພົວພັນລະຫວ່າງລາວ-ຈີນແລະການພົວພັນລະຫວ່າງອາຊຽນ-ຈີນໃຫ້ກ້າວຂຶ້ນສູ່ລະດັບໃໝ່ຢ່າງບໍ່ຢຸດຢັ້ງ.
