ພັກຝ່າຍຄ້ານກຳປູເຈຍຈັດງານໂຮມຊຸມນຸມປະທວ້ງຄັ້ງທຳອິດພາຍຫຼັງລັດຖະບານຊຸດໃໝ່ສ້າງຕັ້ງຂຶ້ນ
ຕາມຂ່າວສານຊິນຮວາ: ວັນທີ6 ຕຸລານີ້, ພັກກູ້ຊາດກຳປູເຈຍເຊິ່ງເປັນພັກຝ່າຍຄ້ານຂອງກຳປູເຈຍໄດ້ຈັດງານໂຮມຊຸມນຸມຢູ່ສະໜາມຫຼວງປະຊາທິປະໄຕຂອງນະຄອນຫຼວງພະນົມເປັນ, ຮຽກຮ້ອງໃຫ້ດຳເນີນການສຳຫຼວດທີ່ເປັນອິດສະຫຼະຕໍ່ການກະທຳທີ່ລະເມີດລະບຽບການຂອງການເລືອກຕັ້ງທົ່ວໄປ.
ຜູ່ສະໜັບສະໜູນພັກກູ້ຊາດປະມານ 5000 ຄົນທີ່ມາຈາກແຫ່ງຕ່າງໆທົ່ວປະເທດໄດ້ເຂົ້າຮ່ວມງານໂຮມຊຸມນຸມ. ໃນງານໂຮມຊຸມນຸມ, ທ່ານສຳລັງສີ ປະທານພັກກູ້ຊາດກ່າວວ່າ, ເດັດຂາດບໍ່ຮັບຮອງຜົນການເລືອກຕັ້ງທົ່ວໄປທີ່ "ມີການກະທຳທີ່ລະເມີດລະບຽບການອັນໜັກໜ່ວງ", ຕ້ອງດຳເນີນການສຳຫຼວດຢ່າງເຖິງຖອງ, ພັກກູ້ຊາດຈະສືບຕໍ່ປະຕິເສດສະພາແຫ່ງຊາດຊຸດໃໝ່, ເດັດຂາດບໍ່ເຂົ້າຮ່ວມກອງປະຊຸມຂອງສະພາແຫ່ງຊາດ. ໃນງານໂຮມຊຸມນຸມ, ພັກກູ້ຊາດຍັງກ່າວວ່າ, ພັກກູ້ຊາດຈະສືບຕໍ່ຈັດການປະທ້ວງຂະໜາດໃຫຍ່ຢູ່ທົ່ວປະເທດໃນວັນທີ 23 ຕຸລານີ້, ພ້ອມທັງຈະ ອຸທອນຕໍ່ອົງການຈັດຕັ້ງສາກົນເຊັ່ນສະຫະປະຊາຊາດເປັນຕົ້ນ.
ການເລືອກຕັ້ງສະພາແຫ່ງຊາດຄັ້ງທີ5 ຂອງກຳປູເຈຍຈັດຂຶ້ນໃນວັນທີ 28 ກໍລະກົດປີນີ້, ພັກປະຊາຊົນໄດ້ຮັບສິດຈັດຕັ້ງລັດຖະບານ,ທ່ານຮຸນເຊັນດຳລົງຕຳແໜ່ງນາຍົກລັດຖະມົນຕີຕໍ່. ພັກກູ້ຊາດຖືການລະເມີດລະບຽບການຢ່າງໜັກໜ່ວງເປັນຂໍ້ອ້າງປະຕິເສດບໍ່ຮັບຮອງຜົນການເລືອກຕັ້ງທົ່ວໄປແລະປະຕິເສດບໍ່ເຂົ້າຮ່ວມສະພາແຫ່ງຊາດຊຸດໃໝ່, ພ້ອມທັງຮຽກຮ້ອງໃຫ້ສ້າງຕັ້ງຄະນະກຳມະການສຳຫຼວດທີ່ເປັນອິດສະຫຼະເພື່ອດຳເນີນການສຳຫຼວດ,ແຕ່ຖືກພັກປະຊາຊົນປະຕິເສດ.
