ຕໍ່ກັບບັນຫາທີ່ອາເມລິກາ ແລະ ການາດາຮຽກໄຂກອງປະຊຸມລັດຖະມົນຕີຕ່າງປະເທດກ່ຽວກັບບັນຫານິວເຄລຍຂອງແຫຼມເກົາຫຼີນັ້ນ, ທ່ານລູ້ຄ່າງ ໂຄສົກກະຊວງການຕ່າງປະເທດຈີນ ໄດ້ຕອບໂຕ້ໃນວັນທີ 17 ມັງກອນນີ້ວ່າ: ການກະທຳທີ່ກ່ຽວຂ້ອງນັ້ນ ເປັນທີ່ຈະແຈ້ງວ່າແມ່ນແນວຄິດສົງຄາມເຢັນ ແລະພຽງແຕ່ຈະເປັນການແບ່ງແຍກປະຊາຄົມໂລກເທົ່ານັ້ນ ແລະຈະບໍ່ສາມາດຊຸກຍູ້ໃຫ້ບັນຫາໄດ້ຮັບການແກ້ໄຂຢ່າງເໝາະສົມ.
ມີນັກຂ່າວຖາມໃນພິທີຖະແຫຼງຂ່າວຂອງກະຊວງການຕ່າງປະເທດຈີນວ່າ: ວັນທີ 16 ມັງກອນນີ້, ການາດາ ແລະ ອາເມລິກາ ໄດ້ຮຽກບາງປະເທດສົ່ງກອງທັບເຂົ້າຮ່ວມສົງຄາມເກົາຫຼີໂດຍໃນນາມ "ກອງທັບສະຫະປະຊາຊາດ" ໃນຄາວນັ້ນ ໄຂກອງປະຊຸມລັດຖະມົນຕີກ່ຽວກັບບັນຫານິວເຄລຍແຫຼມເກົາຫຼີຢູ່ເມືອງແວນຄູເວີ ປະເທດການາດາ ແລະ ກອງປະຊຸມດັ່ງກ່າວໄດ້ຮຽກໃຫ້ປະຊາຄົມໂລກໃຊ້ຄວາມກົດດັນຕໍ່ ສປປ ເກົາຫຼີຢ່າງແຮງທີ່ສຸດ. ຈີນມີຄວາມຄິດເຫັນແນວໃດຕໍ່ການກະທຳດັ່ງກ່າວ?
ທ່ານລູ້ຄ່າງ ກ່າວວ່າ: ໃຜໆກໍຮູ້ດີແລ້ວວ່າ, "ກອງທັບສະຫະປະຊາຊາດ" ນັ້ນ ແມ່ນສິ່ງກຳເນີດໃນສະໄໝສົງຄາມເຢັນ ແລະ ບໍ່ສອດຄ່ອງກັບຍຸກສະໄໝມາແຕ່ດົນແລ້ວ. ອາເມລິກາ ແລະ ການາດາໃນຖານະເປັນປະເທດຮຽກປະຊຸມ ແລະ ໄຂກອງປະຊຸມໂດຍໃນນາມປະເທດເຂົ້າຮ່ວມ "ກອງທັບສະຫະປະຊາຊາດ" ນັ້ນ, ເປັນທີ່ຈະແຈ້ງວ່າແມ່ນແນວຄິດສົງຄາມເຢັນ ແລະຈະເປັນການແບ່ງແຍກປະຊາຄົມໂລກ ທັງເປັນການທຳຮ້າຍຄວາມພະຍາຍາມຮ່ວມເພື່ອຊຸກຍູ້ການແກ້ໄຂບັນຫານິວເຄລຍແຫຼມເກົາຫຼີຢ່າງເໝາະສົມ.
ທ່ານລູ້ຄ່າງ ກ່າວຕື່ມວ່າ: ຫຼັກໝັ້ນຂອງຈີນໃນບັນຫານິວເຄລຍແຫຼມເກົາຫຼີນັ້ນບໍ່ມີການປ່ຽນແປງແຕ່ຢ່າງໃດ ຄື ພວກຂ້າພະເຈົ້າຍຶດໝັ້ນການປອດນິວເຄລຍຢູ່ແຫຼມເກົາຫຼີ ແລະຍຶດໝັ້ນການປົກປັກຮັກສາສັນຕິພາບແລະສະຖຽນລະພາບຢູ່ແຫຼມເກົາຫຼີຢ່າງສະເໝີຕົ້ນສະເໝີປາຍ ຍຶດໝັ້ນແກ້ໄຂບັນຫາແຫຼມເກົາຫຼີໂດຍຜ່ານການສົນທະນາແລະປຶກສາຫາລືກັນ.
