ທ່ານຢາງເຈສື ກຳມະການກົມການເມືອງສູນກາງພັກ, ທີ່ປຶກສາແຫ່ງລັດຈີນທີ່ພວມຢ້ຽມຢາມອາເມລິກາ ໄດ້ພົບປະຫາລືກັບທ່ານເຣັກສ໌ ຕີເລີເຊິນ ລັດຖະມົນຕີກະຊວງການຕ່າງປະເທດອາເມລິກາ ໃນວັນທີ 8 ກຸມພານີ້.
ທ່ານຢາງເຈສື ກ່າວວ່າ: ໃນໜຶ່ງປີຜ່ານມາ, ໂດຍພາຍໃຕ້ການຊີ້ນຳຮ່ວມຈາກທ່ານສີຈິ້ນຜິງ ປະທານປະເທດຈີນ ແລະ ທ່ານໂດນັນ ທຣຳ ປະທານາທິບໍດີອາເມລິກາ, ສາຍພົວພັນລະຫວ່າງຈີນ-ອາເມລິກາໄດ້ມີຄວາມຄືບໜ້າເປັນຢ່າງດີ ແລະຫຼັງເຂົ້າສູ່ປີ 2018, ປະມຸກລັດສອງປະເທດກໍໄດ້ແລກປ່ຽນຄວາມເຫັນຫຼາຍເທື່ອ ໂດຍຜ່ານທາງໂທລະສັບ ແລະການສື່ສານຕ່າງໆ ເຊິ່ງເປັນການຊີ້ທິດທາງໃຫ້ແກ່ການພັດທະນາສາຍພົວພັນລະຫວ່າງສອງປະເທດໃນປີນີ້. ຄະນະປະຕິບັດງານຂອງສອງປະເທດຄວນສືບຕໍ່ຕັ້ງໜ້າຈັດຕັ້ງປະຕິບັດຕາມຂໍ້ຕົກລົງ ແລະຜົນການພົບປະລະຫວ່າງປະມຸກລັດສອງປະເທດຢູ່ນະຄອນຫຼວງປັກກິ່ງ ຮັກສາການແລກປ່ຽນລະຫວ່າງການນຳຂັ້ນສູງ ແລະທຸກຂັ້ນຢ່າງແໜ້ນແຟ້ນ ນຳໃຊ້ກົນໄກການສົນທະນາຂັ້ນສູງ 4 ກົນໄກໃຫ້ດີ, ເປີດກວ້າງການແລກປ່ຽນແລະຮ່ວມມືໃນຂົງເຂດຕ່າງໆ ເຊັ່ນ ເສດຖະກິດການຄ້າ, ສອງກອງທັບ, ການປະຕິບັດກົດໝາຍ, ການປາບປາມຢາເສບຕິດ, ວັດທະນະທຳ ແລະ ລະຫວ່າງທ້ອງຖິ່ນຂອງສອງປະເທດ ເພີ່ມທະວີການແລກປ່ຽນປະສານງານຕໍ່ບັນຫາສາກົນແລະພາກພື້ນທີ່ສຳຄັນ ເຊັ່ນ ບັນຫານິວເຄລຍຢູ່ແຫຼມເກົາຫຼີ ຍຶດໝັ້ນຄວບຄຸມແລະຄຸ້ມຄອງຄວາມຂັດແຍ້ງກັນ ແລະບັນຫາທີ່ອ່ອນໄຫວລະຫວ່າງສອງຝ່າຍດ້ວຍວິທີທີ່ສ້າງສັນ ເພື່ອຮັບປະກັນໃຫ້ສາຍພົວພັນລະຫວ່າງຈີນ-ອາເມລິກາໄດ້ຮັບຜົນດີຫຼາຍຍິ່ງຂຶ້ນ.
ທ່ານຕີເລີເຊິນ ກ່າວວ່າ: ສາຍພົວພັນລະຫວ່າງອາເມລິກາ-ຈີນມີຄວາມສຳຄັນຫຼາຍ ອາເມລິກາຍິນດີພະຍາຍາມຮ່ວມກັບຈີນ ເພື່ອຈັດຕັ້ງປະຕິບັດຕາມຂໍ້ຕົກລົງແລະຜົນການພົບປະລະຫວ່າງປະມຸກລັດສອງປະເທດຢູ່ນະຄອນຫຼວງປັກກິ່ງ, ປັບປຸງແລະເປີດກວ້າງການຮ່ວມມືແບບຕ່າງຝ່າຍຕ່າງມີຜົນປະໂຫຍດ, ແກ້ໄຂຄວາມຂັດແຍ້ງລະຫວ່າງສອງປະເທດໃຫ້ເໝາະສົມດ້ວຍການເຄົາລົບເຊິ່ງກັນແລະກັນ ເພື່ອຊຸກຍູ້ສາຍພົວພັນລະຫວ່າງສອງປະເທດໃຫ້ໄດ້ຮັບຄວາມຄືບໜ້າທີ່ດີຂຶ້ນກວ່າເກົ່າ.