ທ່ານອັນໂຕນີໂອ ກູເຕີເຣັສ ເລຂາທິການໃຫຍ່ອົງການສະຫະປະຊາຊາດກ່າວໃນວັນທີ 28 ມີນານີ້ວ່າ, ການເຄື່ອນໄຫວຮັກສາສັນຕິພາບຂອງອົງການສະຫະປະຊາຊາດພວມຜະເຊີນກັບການທ້າທາຍຢ່າງໜັກໜ່ວງ, ດັ່ງນັ້ນຄວນປະຕິບັດການເຄື່ອນໄຫວປະສົມທີ່ເຂັ້ມແຂງເພື່ອເຮັດໃຫ້ການເຄື່ອນໄຫວໃນການຮັກສາສັນຕິພາບເຂັ້ມແຂງແລະປອດໄພກວ່າເກົ່າ.
ໃນການອະພິປາຍລະດັບສູງກ່ຽວກັບການເຄື່ອນໄຫວຮັກສາສັນຕິພາບຂອງອົງການສະຫະປະຊາຊາດທີ່ຈັດຂຶ້ນຢູ່ສະພາຄວາມໝັ້ນຄົງໃນວັນທີ 28 ມີນານີ້, ທ່ານ ກູເຕີເຣັສ ກ່າວວ່າ, ການເຄື່ອນໄຫວຮັກສາສັນຕິພາບຂອງອົງການສະຫະປະຊາຊາດໄດ້ຜະເຊີນກັບສະພາບແວດລ້ອມທີ່ສັບສົນແລະອັນຕະລາຍກວ່າເກົ່າ. ປີຜ່ານມາມີເຈົ້າໜ້າທີ່ຮັກສາສັນຕິພາບ 59 ຄົນເສຍຊີວິດຍ້ອນການຫຼອນໂຈມຕີ, ທຽບໃສ່ຈຳນວນ 34 ຄົນເມື່ອປີ 2016 ໄດ້ເພີ່ມຂຶ້ນຢ່າງຫຼວງຫຼາຍ.
ທ່ານ ກູເຕີເຣັສ ກ່າວຕື່ມວ່າ, ຕົນພວມສະເໜີຂໍ້ລິເລີ່ມການ "ປະຕິບັດມາດຕະການເພື່ອຮັກສາສັນຕິພາບ", ເພື່ອລະດົມຄູ່ຮ່ວມມືແລະຝ່າຍຕ່າງໆທີ່ກ່ຽວຂ້ອງທັງໝົດສາມາດສະໜັບສະໜູນພາລະກິດຮັກສາສັນຕິພາບຂອງອົງການສະຫະປະຊາຊາດ.