ຄັດຄ້ານປະເທດໃດໆທີ່ນຳໃຊ້ອາວຸດເຄມີ ແລະການແກ້ໄຂບັນຫາຊີຣີໂດຍວິທີທາງການເມືອງແມ່ນວິທີພຽງໜຶ່ງດຽວ

ວັນທີ 10 ເມສານີ້, ທ່ານເກີງສວງ ໂຄສົກກະຊວງການຕ່າງປະເທດຈີນກ່າວຢູ່ນະຄອນຫຼວງປັກກິ່ງວ່າ: ຈີນເດັດດ່ຽວຄັດຄ້ານປະເທດ, ອົງການຈັດຕັ້ງ ຫຼື ບຸກຄົນໃດໆກໍຕາມທີ່ນຳໃຊ້ອາວຸດເຄມີ ເຊິ່ງບໍ່ວ່າໃນສະພາບການໃດໆ ແລະດ້ວຍເຈຕະນາໃດໆກໍຕາມ. ຈີນສະໜັບສະໜູນການແກ້ໄຂບັນຫາຊີຣີໂດຍວິທີທາງການເມືອງ, ຄັດຄ້ານການນຳໃຊ້ ຫຼື ຂົ່ມຂູ່ນຳໃຊ້ກຳລັງອາວຸດໃນການພົວພັນສາກົນ.

ຂ່າວແຈ້ງວ່າ: ຢູ່ເຂດກູຕາຕາເວັນອອກປະເທດຊີຣີໄດ້ເກີດເຫດການໂຈມຕີດ້ວຍອາວຸດເຄມີອີກເທື່ອໜຶ່ງ ເຮັດໃຫ້ມີປະຊາຊົນເສຍຊີວິດ ສົງຜົນເຮັດໃຫ້ສະຖະນະການໃນປັດຈຸບັນເຄັ່ງຕຶງຍິ່ງຂຶ້ນ, ສະພາຄວາມໝັ້ນຄົງອົງການສະຫະປະຊາຊາດໄດ້ຈັດກອງປະຊຸມສຸກເສີນ. ຂະນະທີ່ທ່ານໂດນັນ ທຣຳ ປະທານາທິບໍດີອາເມລິກາກ່າວວ່າ: ຈະມີການຕັດສິນໃຈທີ່ສຳຄັນຕໍ່ບັນຫາຊີຣີພາຍໃນ 24 ຫາ 48 ຊົ່ວໂມງ. ກ່ອນໜ້ານີ້, ເຈົ້າໜ້າທີ່ຂັ້ນສູງຂອງລັດຖະບານອາເມລິກາກໍຊີ້ໃຫ້ເຫັນວ່າ ອາດຈະປະຕິບັດການທາງທະຫານຕົວຈິງ.