ວັນທີ 14 ພຶດສະພານີ້, ເຈົ້າໜ້າທີ່ຕຳຫຼວດອິນໂດເນເຊຍເປີດເຜີຍວ່າ, ຫ້ອງການຕຳຫຼວດເມືອງຊູຣາບາຢາ ເທດສະບານແຂວງຈາວາຕາເວັນອອກອິນໂດເນເຊຍຖືກໂຈມຕີ ເຊິ່ງເຮັດໃຫ້ປະຊາຊົນ 2 ຄົນ ແລະ ຕຳຫຼວດ 4 ຄົນໄດ້ຮັບບາດເຈັບ ແລະ ຜູ້ກໍ່ເຫດ 4 ຄົນເສຍຊີວິດທັງໝົດ.
ທ່ານຕິໂຕ ການາວຽນ ຫົວໜ້າກອງບັນຊາການຕຳຫຼວດແຫ່ງຊາດອິນໂດເນເຊຍກ່າວໃນພິທີຖະແຫຼງຂ່າວທີ່ຈັດຂຶ້ນຢູ່ເມືອງຊູຣາບາຢາໃນວັນທີ 14 ພຶດສະພານີ້ວ່າ, 7 ໂມງເຊົ້າວັນທີ 13 ພຶດສະພານີ້, ໂບດ 3 ແຫ່ງຂອງເມືອງດັ່ງກ່າວຖືກໂຈມຕີແບບສະຫຼະຊີບຕາມລຳດັບ, ປັດຈຸບັນ, ຈຳນວນຜູ້ເສຍຊີວິດໄດ້ເພີ່ມຂຶ້ນເປັນ 14 ຄົນ ແລະ ອີກ 40 ກວ່າຄົນໄດ້ຮັບບາດເຈັບ. ຕອນຄ່ຳມື້ດຽວກັນ, ອາພາດເມັນທາງພາກໃຕ້ເມືອງຊູຣາບາຢາເກີດເຫດການລະເບີດ ເຊິ່ງເຮັດໃຫ້ 3 ຄົນເສຍຊີວິດ ແລະ ຫຼາຍຄົນໄດ້ຮັບບາດເຈັບ.
ຜົນການສຳຫຼວດເບື້ອງຕົ້ນສະແດງໃຫ້ເຫັນວ່າ, ຜູ້ກໍ່ເຫດການລະເບີດດັ່ງກ່າວແມ່ນສະມາຊິກຂອງ 2 ຄອບຄົວ, ເຂົາເຈົ້າຮູ້ຈັກກັນ ແລະ ໄດ້ຮັບອິດທິພົນຈາກແນວຄິດຫົວຮຸນແຮງ "ລັດອິສລາມ" ຫຼື IS.
 |
