ທ່ານຈ້າວເຄີ້ຈື້ ທີ່ປຶກສາແຫ່ງລັດ ທັງເປັນລັດຖະມົນຕີກະຊວງປ້ອງກັນຄວາມສະຫງົບຈີນໄດ້ພົບປະເຈລະຈາກັບທ່ານສົມແກ້ວ ສີລາວົງ ລັດຖະມົນຕີກະຊວງປ້ອງກັນຄວາມສະຫງົບລາວຢູ່ນະຄອນຫຼວງວຽງຈັນໃນວັນທີ 14 ພຶດສະພານີ້. ທ່ານຈ້າວເຄີ້ຈື້ກ່າວວ່າ, ຈີນຍິນດີຮ່ວມກັບຝ່າຍລາວ, ລົງເລິກຜັນຂະຫຍາຍຄວາມເຫັນເປັນເອກະພາບກັນຂອງຜູ້ນຳສອງປະເທດ, ເປີດກວ້າງການຮ່ວມມືໃນດ້ານປົກປັກຮັກສາຄວາມໝັ້ນຄົງແຫ່ງຊາດ, ການຕ້ານການກໍ່ການຮ້າຍ, ການປາບປາມຢາເສບຕິດ ແລະ ອື່ນໆລະຫວ່າງສອງຝ່າຍ, ປັບປຸງກົນໄກຮ່ວມມືວຽກງານຕຳຫຼວດທ້ອງຖິ່ນລະຫວ່າງສອງປະເທດ, ຍົກລະດັບການຮ່ວມມືຕົວຈິງຢ່າງບໍ່ຢຸດຢັ້ງ, ຮ່ວມກັນສ້າງຄູ່ຮ່ວມຊາຕາກຳດ້ານປະຕິບັດກົດໝາຍລະຫວ່າງສອງປະເທດຈີນ-ລາວ ແລະ ຊຸກຍູ້ການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດໃຫ້ກ້າວຂຶ້ນສູ່ລະດັບໃໝ່.
ທ່ານສົມແກ້ວກ່າວວ່າ, ລາວຖະໜຸຖະໜອມມູນເຊື້ອມິດຕະພາບລະຫວ່າງສອງປະເທດ, ຂໍສະແດງຄວາມຂອບໃຈຈີນທີ່ສະໜັບສະໜູນ ແລະ ຊ່ວຍເຫຼືອລາວມາໂດຍຕະຫຼອດ, ຍິນດີຜັນຂະຫຍາຍຄວາມເຫັນເປັນເອກະພາບກັນລະຫວ່າງຜູ້ນຳສອງພັກສອງລັດຢ່າງແທ້ຈິງ, ເພີ່ມທະວີການຮ່ວມມືຕົວຈິງໃນຂົງເຂດປະຕິບັດກົດໝາຍ ແລະ ປ້ອງກັນຄວາມສະຫງົບລະຫວ່າງສອງປະເທດ ແລະ ປົກປັກຮັກສາຄວາມໝັ້ນຄົງ ແລະ ສະຖຽນລະພາບຂອງສອງປະເທດ.
ພາຍຫຼັງການພົບປະກັນແລ້ວ, ສອງຝ່າຍໄດ້ລົງນາມໃນເອກະສານຮ່ວມມືທີ່ກ່ຽວຂ້ອງ.