ວັນທີ 1 ມິຖຸນານີ້, ສະຖານທູດຈີນປະຈຳມຽນມາໄດ້ບໍລິຈາກເງິນ 40 ລ້ານກັຽດ(kyat) (ເທົ່າກັບປະມານ 1 ແສນ 9 ໝື່ນຢວນ) ໃຫ້ຄະນະກຳມະການສັນຕິພາບມຽນມາ ເພື່ອນຳໃຊ້ໃນການຊ່ວຍເຫຼືອປະຊາຊົນລັດຄາຊີນພາກເໜືອມຽນມາທີ່ພັດພາກຈາກບ້ານເກີດເມືອງນອນຍ້ອນສົງຄາມ.
ທ່ານຮົງລ້ຽງ ເອກອັກຄະລັດຖະທູດຈີນປະຈຳມຽນມາກ່າວວ່າ: ການປະທະກັນປະກອບອາວຸດຄາຊີນໄດ້ເຮັດໃຫ້ປະຊາຊົນທ້ອງຖິ່ນພັດພາກຈາກບ້ານເກີດເມືອງນອນຢ່າງຫຼວງຫຼາຍ, ລັດຖະບານຈີນ ແລະສະຖານທູດຈີນປະຈຳມຽນມາກໍຮູ້ສຶກເສຍໃຈຕໍ່ເລື່ອງນີ້ ແລະຫວັງວ່າເງິນບໍລິຈາກເຫຼົ່ານີ້ຈະສາມາດຊ່ວຍເຫຼືອປະຊາຊົນໄດ້ໃນລະດັບໃດໜຶ່ງ, ໃນອະນາຄົດ ຈີນຈະສະໜອງການສະໜັບສະໜູນ ແລະການຊ່ວຍເຫຼືອຕື່ມອີກຕາມຄວາມຮຽກຮ້ອງຕ້ອງການຂອງລັດຖະບານມຽນມາ ແລະປະຊາຊົນຄາຊີນ. ນອກນີ້, ສະຖານທູດຈີນປະຈຳມຽນມາຍັງຈະບໍລິຈາກລົດງວດໜຶ່ງໃຫ້ມຽນມາຕາມຄວາມຕ້ອງການຂອງຄະນະກຳມະການຕິດຕາມກວດກາການຢຸດຍິງມຽນມາ.
ບົດລາຍງານຂອງອົງການມະນຸດສະທຳອົງການສະຫະປະຊາຊາດໄດ້ສະແດງໃຫ້ເຫັນວ່າ, ນັບແຕ່ຕົ້ນເດືອນເມສາເປັນຕົ້ນມາ, ການປະທະກັນປະກອບອາວຸດລະຫວ່າງທະຫານລັດຖະບານມຽນມາ ແລະກຸ່ມປະກອບອາວຸດທ້ອງຖິ່ນໄດ້ເຮັດໃຫ້ມີປະຊາຊົນ 7400 ຄົນຢູ່ຄາຊີນພັດພາກຈາກບ້ານເກີດເມືອງນອນ ແລະກ່ອນໜ້ານີ້ຢູ່ບ່ອນນີ້ກໍມີປະຊາຊົນພັດພາກຈາກບ້ານເກີດ 1 ແສນຄົນແລ້ວ.
 |
