ຕາມຂ່າວສານຊິນຮວາ: ວັນທີ 3 ມິຖຸນານີ້, ທ່ານເຈມສ໌ ມາຕິສ໌ ລັດຖະມົນຕີກະຊວງປ້ອງກັນປະເທດອາເມຣິກາໄດ້ເປີດເຜີຍຕໍ່ສື່ມວນຊົນໃນຖ້ຽວບິນຈາກສິງກະໂປກັບຄືນນະຄອນຫຼວງວໍຊິງຕັນວ່າ, ອາເມຣິກາຈະບໍ່ຖອນທະຫານອອກຈາກແຫຼມເກົາຫຼີໃນໄວໆນີ້.
ອີງຕາມການບັນທຶກການສົນທະນາລະຫວ່າງທ່ານມາຕິສ໌ກັບສື່ມວນຊົນຂອງກະຊວງປ້ອງກັນປະເທດອາເມຣິກາ, ທ່ານມາຕິສ໌ກ່າວວ່າ, ການຖອນທະຫານບໍ່ຢູ່ໃນຂອບເຂດປຶກສາຫາລືຂອງພວກເຮົາ, ຈາກນີ້ໄປ 5 ປີ ຫຼື 10 ປີ, ອາເມຣິກາ ແລະ ສ. ເກົາຫຼີອາດຈະພິຈາລະນາບັນຫາດັ່ງກ່າວຄືນໃໝ່.
ວັນທີ 2 ພຶດສະພາຜ່ານມານີ້, ທ່ານກິມຢຸຍກຽມ ໂຄສົກທຳນຽບຊົງວາເດ ສ.ເກົາຫຼີເປີດເຜີຍວ່າ, ໂດຍແນໃສ່ຄວາມເວົ້າຂອງທ່ານມູນຈຸງອິນ ຜູ້ຊ່ວຍພິເສດດ້ານການຕ່າງປະເທດ ແລະ ປ້ອງກັນຄວາມໝັ້ນຄົງຂອງປະທານາທິບໍດີ ກ່ຽວກັບ "ການລົງນາມໃນສັນຍາສັນຕິພາບແຫຼມເກົາຫຼີຄວນພິຈາລະນາຖອນທະຫານອາເມຣິກາອອກຈາກແຫຼມເກົາຫຼີ", ທ່ານມູນເຈອິນ ປະທານາທິບໍດີ ສ.ເກົາຫຼີກ່າວຢ່າງຈະແຈ້ງວ່າ, ກອງທະຫານອາເມຣິກາປະຈຳ ສ.ເກົາຫຼີເປັນບັນຫາກ່ຽວກັບພັນທະມິດສ.ເກົາຫຼີກັບອາເມລິກາ ແລະ ບໍ່ມີສ່ວນກ່ຽວຂ້ອງກັບສັນຍາສັນຕິພາບ.
 |
