ຄືນວັນທີ 31 ພຶດສະພາຜ່ານມາ, ກ່ອນອອກເດີນທາງໄປເຂົ້າຮ່ວມກອງປະຊຸມສຸດຍອດສະພາມົນຕີປະມຸກລັດປະເທດສະມາຊິກອົງການຮ່ວມມືຊຽງໄຮ້ທີ່ຊິງຕາວແລະຢ້ຽມຢາມຈີນທາງລັດຖະກິດ, ທ່ານວະລາດີເມຍ ປູຕິນ ປະທານາທິບໍດີສະຫະພັນຣັດເຊຍໄດ້ຕ້ອນຮັບການເຂົ້າສຳພາດພິເສດຂອງທ່ານເຊິ້ນໄຫຊົງ ຜູ້ອຳນວຍການໃຫຍ່ສະຖານີວິທະຍຸໂທລະພາບສູນກາງຈີນຢູ່ວັງແກຣມແລງນະຄອນຫຼວງມົສກູປະເທດຣັດເຊຍ.
ໃນໄລຍະການໃຫ້ສຳພາດເປັນເວລາປະມານ 40 ນາທີ, ທ່ານປູຕິນໄດ້ເລົ່າສູ່ຟັງຄວາມປະທັບໃຈຂອງຕົນຕໍ່ທ່ານປະທານສີຈິ້ນຜິງ ແລະໄດ້ຕອບຄຳຖາມກ່ຽວກັບຈຸດຄືກັນລະຫວ່າງ "ຄວາມຝັນຂອງຣັດເຊຍ"ທີ່ຕົນສະເໜີອອກໃນບົດລາຍງານວຽກງານລັດຖະບານກັບ "ຄວາມໄຝ່ຝັນຂອງຈີນ" ແລະໄດ້ສະແດງວິໄສທັດຕໍ່ອະນາຄົດຂອງສາຍພົວພັນຣັດເຊຍຈີນແລະອົງການຮ່ວມມືຊຽງໄຮ້ພາຍຫຼັງທີ່ຂະຫຍາຍຕົວ ທັງໄດ້ຕອບຄຳຖາມກ່ຽວກັບການສ້າງ"ໜຶ່ງແລວໜຶ່ງເສັ້ນທາງ",ບັນຫາຈຸດສຸມສາກົນເປັນຕົ້ນແມ່ນ: ບັນຫາແຫຼມເກົາຫຼີ ກໍຄືສາຍພົວພັນຣັດເຊຍກັບປະເທດຕາເວັນຕົກແລະອື່ນໆ.
ນີ້ແມ່ນທ່ານປູຕິນໃຫ້ສຳພາດສະເພາະຕໍ່ສື່ມວນຊົນຕ່າງປະເທດຫຼັງຂຶ້ນດຳລົງຕຳແໜ່ງເປັນປະທານາທິບໍດີຣັດເຊຍຊຸດໃໝ່ ທັງເປັນເທື່ອທຳອິດທີ່ທ່ານປູຕິນໃຫ້ສຳພາດສະເພາະຕໍ່ສື່ມວນຊົນຈີນຢູ່ວັງແກລມແລງ. ນອກນີ້, ທ່ານປູຕິນຍັງໄດ້ຕອບຫຼາຍຄຳຖາມຂອງເພື່ອນມິດທີ່ໃຊ້ອິນເຕີເນັດຂອງເວັບໄຊ CCTVຄໍລຳຂ່າວດ້ວຍຄວາມສົນໃຈອີກດ້ວຍ.