ວັນທີ 5 ມິຖຸນານີ້, ກອງປະຊຸມສະມັດຊາໃຫຍ່ອົງການສະຫະປະຊາຊາດຄັ້ງທີ 72 ໄດ້ເລືອກຕັ້ງທ່ານນາງ ມາເຣຍ ເຟີນັນດາ ເອສປີໂນຊາ ກາເຊັສ ລັດຖະມົນຕີກະຊວງການຕ່າງປະເທດເອກວາດໍເປັນປະທານກອງປະຊຸມສະມັດຊາໃຫຍ່ອົງການສະຫະປະຊາຊາດຄັ້ງທີ 73 ແລະຈະເຂົ້າຮັບຕຳແໜ່ງແທນທ່ານມີໂຣສະລັຟ ລັດຄາກ ປະທານກອງປະຊຸມສະມັດຊາໃຫຍ່ຄົນປັດຈຸບັນຂະນະຈັດກອງປະຊຸມສະມັດຊາໃຫຍ່ຄັ້ງໃໝ່ໃນເດືອນກັນຍາປີນີ້ ແລະກໍເປັນປະທານເພດຍິງຄົນທີ 4 ໃນປະຫວັດສາດອົງການສະຫະປະຊາຊາດ.
ທ່ານອັນໂຕນີໂອ ກູເຕີເຣັສ ເລຂາທິການໃຫຍ່ອົງການສະຫະປະຊາຊາດສະແດງຄວາມຊົມເຊີຍຕໍ່ກອງປະຊຸມສະມັດຊາໃຫຍ່ທີ່ໄດ້ຜູ້ຍິງເປັນປະທານອີກຄັ້ງ.
ກອງປະຊຸມສະມັດຊາໃຫຍ່ອົງການສະຫະປະຊາຊາດຈະຈັດກອງປະຊຸມຄັ້ງໃໝ່ໃນເດືອນກັນຍາຂອງແຕ່ລະປີ. ອີງຕາມຫຼັກການສະເໝີພາບທີ່ປ່ຽນກັນເປັນປະທານຂອງບຸກຄົນພາກພື້ນຕ່າງໆ, ຕຳແໜ່ງປະທານກອງປະຊຸມສະມັດຊາໃຫຍ່ອົງການສະຫະປະຊາຊາດຈະໃຫ້ 5 ພາກພື້ນ ຄື ອາຊີປາຊີຟິກ, ອາຟຣິກາ, ເອີຣົບຕາເວັນອອກ, ອາເມຣິກາລາຕິນ-ກາຣາອິບ ແລະ ເອີຣົບຕາເວັນຕົກ-ປະເທດອື່ນໆ ລວມທັງອາເມຣິກາເໜືອ ປ່ຽນກັນນຳສະເໜີບຸກຄົນໃນພາກພື້ນຕົນເຂົ້າຮ່ວມການເລືອກຕັ້ງ ແລະດຳລົງຕຳແໜ່ງເປັນເວລາ 1 ປີ. ນັບແຕ່ປີ 1945 ຈົນເຖິງປັດຈຸບັນ, ກອງປະຊຸມສະມັດຊາໃຫຍ່ອົງການສະຫະປະຊາຊາດ ໄດ້ເລືອກຕັ້ງຜູ້ຍິງເປັນປະທານມີພຽງແຕ່ 4 ຄົນເທົ່ານັ້ນ.
