ກອງປະຊຸມຄັ້ງທີ 18 ຂອງສະພາມົນຕີປະມຸກລັດປະເທດສະມາຊິກອົງການຮ່ວມມືຊຽງໄຮຈະຈັດຂຶ້ນຢູ່ນະຄອນຊິ່ງຕາວແຂວງຊ່ານຕຸ່ງຈີນແຕ່ວັນທີ 9 ຫາ 10 ມິຖຸນານີ້ ເຊິ່ງເປັນກອງປະຊຸມສຸດຍອດຄັ້ງທຳອິດ ພາຍຫຼັງອົງການດັ່ງກ່າວໄດ້ຮັບປະເທດສະມາຊິກໃໝ່.
ວັນທີ 15 ມິຖຸນາປີຜ່ານມານີ້, ອິນເດຍ ແລະ ປາກິສະຖານໄດ້ເຂົ້າເປັນປະເທດພາຄີສົມບູນຂອງອົງການຮ່ວມມືຊຽງໄຮ ເຊິ່ງອົງການດັ່ງກ່າວໄດ້ຮັບເອົາປະເທດສະມາຊິກໃໝ່ເປັນຄັ້ງທຳອິດ.
ທ່ານໂລຈ້າວຮຸ່ຍ ເອກອັກຄະລັດຖະທູດຈີນປະຈຳອິນເດຍເຫັນວ່າ, ພາຍຫຼັງອິນເດຍ ແລະ ປາກິສະຖານເຂົ້າເປັນປະເທດສະມາຊິກອົງການຮ່ວມມືຊຽງໄຮແລ້ວ, ດິນແດນຂອງ 8 ປະເທດສະມາຊິກອົງການຮ່ວມມືຊຽງໄຮຈາກຂົ້ວໂລກເໜືອຈົນເຖິງມະຫາສະມຸດອິນເດຍ ໄດ້ກວມ 3 ສ່ວນ 5 ຂອງເນື້ອທີ່ທັງໝົດຂອງທະວີບອາຊີ-ເອີຣົບ, ມີພົນລະເມືອງຫຼາຍກວ່າ 3,1 ຕື້ຄົນ ແລະ ລວມຍອດຜະລິດຕະພັນພາຍໃນ ຫຼື GDP ມີຫຼາຍກວ່າ 17.000 ຕື້ໂດລາສະຫະລັດ ເຊິ່ງເຮັດໃຫ້ອົງການດັ່ງກ່າວກາຍເປັນອົງການຈັດຕັ້ງທີ່ມີອິດທິພົນໃນເວທີສາກົນ. ອາດເວົ້າໄດ້ວ່າ, ການຮັບປະເທດສະມາຊິກໃໝ່ໄດ້ເພີ່ມກຳລັງຊຸກດັນທີ່ແຂງແຮງໃຫ້ແກ່ການພັດທະນາຂອງອົງການຮ່ວມມືຊຽງໄຮ.
ທ່ານຣາຊິດ ອາລີມົຟ ເລຂາທິການໃຫຍ່ອົງການຮ່ວມມືຊຽງໄຮເຫັນວ່າ, ອິນເດຍ ແລະ ປາກິສະຖານຕັ້ງໜ້າເຂົ້າຮ່ວມການຮ່ວມມືອົງການຮ່ວມມືຊຽງໄຮ ຈະເຮັດໃຫ້ອົງການດັ່ງກ່າວມີລັກສະນະກວ້າງຂວາງກວ່າເກົ່າ ແລະ ຈະມີອິດທິພົນສາກົນກວ່າເກົ່າ.
 |
