ວັນທີ 10 ມິຖຸນານີ້, ທ່ານສີຈິ້ນຜິງ ປະທານປະເທດແຫ່ງ ສປ ຈີນຢືນຢັນວ່າ: ນັບແຕ່ອົງການຮ່ວມມືຊຽງໄຮສ້າງຕັ້ງຂຶ້ນເປັນເວລາ 17 ປີມານີ້ ສາມາດຍາດໄດ້ຜົນສຳເລັດສຳຄັນຢ່າງໃຫຍ່ຫຼວງ. ບັນດາປະເທດສະມາຊິກໄດ້ເຄົາລົບແລະປະຕິບັດຕາມກົດບັດອົງການຮ່ວມມືຊຽງໄຮ,ສົນທິສັນຍາການຮ່ວມມືມິດຕະພາບຖານບ້ານໃກ້ເຮືອນຄຽງໄລຍະຍາວລະຫວ່າງປະເທດສະມາຊິກອົງການຮ່ວມມືຊຽງໄຮ ໂດຍໄດ້ສ້າງສາຍພົວພັນຄູ່ຮ່ວມສ້າງສັນແບບບໍ່ຮ່ວມກຸ່ມ,ບໍ່ເປັນປໍລະປັກກັນແລະບໍ່ແນໃສ່ຝ່າຍທີ 3. ທ່ານສີຈິ້ນຜິງຍ້ອງຍໍວ່ານີ້ເປັນການປະດິດສ້າງສຳຄັນຍິ່ງໃນດ້ານທິດສະດີແລະພຶດຕິກຳຂອງການພົວພັນລະຫວ່າງຊາດ ເຊິ່ງໄດ້ສ້າງຮູບແບບໃໝ່ຂອງການຮ່ວມມືພາກພື້ນແລະປະກອບສ່ວນໃໝ່ເພື່ອສັນຕິພາບແລະການພັດທະນາຂອງພາກພື້ນ.
ທ່ານສີຈິ້ນຜິງກ່າວເນັ້ນວ່າ: ປັດຈຸບັນ, ອົງການຮ່ວມມືຊຽງໄຮເປັນອົງການຮ່ວມມື ລະດັບພາກພື້ນແບບກວມລວມທີ່ກວມເນື້ອທີ່ກວ້າງຂວາງທີ່ສຸດແລະມີປະຊາກອນຫຼາຍທີ່ສຸດໃນໂລກ, ເສດຖະກິດຂອງປະເທດສະມາຊິກໄດ້ກວມ 20% ຂອງໂລກແລະປະຊາກອນກວມ 40% ຂອງໂລກ. ອົງການຮ່ວມມືຊຽງໄຮມີປະເທດສັງເກດການ 4 ປະເທດ, ຄູ່ເຈລະຈາ 6 ປະເທດ ແລະໄດ້ສ້າງສາຍພົວພັນຮ່ວມມືກັບອົງການສະຫະປະຊາຊາດແລະອົງການຈັດຕັ້ງສາກົນແລະພາກພື້ນອື່ນໆຢ່າງກວ້າງຂວາງ, ມີບົດບາດແລະຊື່ສຽງອິດທິພົນໃນສາກົນນັບມື້ນັບສູງຂຶ້ນ, ຈົນໄດ້ກາຍເປັນກຳລັງສຳຄັນທີ່ເບິ່ງຂ້າມບໍ່ໄດ້ໃນການສົ່ງເສີມສັນຕິພາບແລະການພັດທະນາຂອງໂລກ,ການຮັກສາຄວາມຍຸຕິທຳແລະຄວາມເປັນທຳໃນສາກົນ.
