ຕາມຂ່າວ CRI: ວັນທີ 10 ມິຖຸນານີ້ໃນໂອກາດພົບປະກັບທ່ານຮາຊັນ ຣູຮານີ ປະທານາທິບໍດີອີຣານຢູ່ນະຄອນຊິ່ງຕາວ, ທ່ານສີຈິ້ນຜິງ ປະທານປະເທດຈີນກ່າວວ່າ, ສັນຍາຮອບດ້ານກ່ຽວກັບບັນຫານິວເຄຼຍອີຣານແມ່ນໝາກຜົນສຳຄັນຂອງລັດທິຫຼາຍຝ່າຍ, ມີຜົນດີຕໍ່ການຮັກສາສັນຕິພາບແລະສະຖຽນລະພາບຂອງເຂດຕາເວັນອອກກາງແລະລະບົບບໍ່ແຜ່ຜາຍອາວຸດນິວເຄຼຍສາກົນ, ຄວນສືບຕໍ່ໄດ້ຮັບການປະຕິບັດຕົວຈິງ.
ທ່ານສີຈິ້ນຜີງຍິນດີຕ້ອນຮັບທ່ານຣູຮານີຢ້ຽມຢາມປະເທດຈີນແລະເຂົ້າຮ່ວມກອງປະຊຸມສຸດຍອດຊິ່ງຕາວຂອງອົງການຮ່ວມມືຊຽງໄຮ. ທ່ານກ່າວຕື່ມວ່າ, ການພົວພັນລະຫວ່າງຈີນແລະອີຣານມີກຳລັງບົ່ມຊ້ອນທີ່ຂະຫຍາຍຕົວເຂົ້າສູ່ລວງເລິກ. ຈີນຍິນດີຮ່ວມກັນກັບອີຣານ, ຮ່ວມກັນຊຸກຍູ້ສາຍພົວພັນຄູ່ຮ່ວມຍຸດທະສາດຮອບດ້ານລະຫວ່າງສອງປະເທດໃຫ້ຂະຫຍາຍຕົວຍາວນານແລະໝັ້ນທ່ຽງ. ສອງຝ່າຍຄວນຖືການລົງເລິກສາຍພົວພັນການເມືອງເປັນສິ່ງນຳໜ້າ, ເພີ່ມຄວາມໄວ້ເນື້ອເຊື່ອໃຈດ້ານຍຸທະສາດຢ່າງບໍ່ຢຸດຢັ້ງ, ເພີ່ມທະວີການໄປມາຫາສູ່ກັນໃນທຸກຂັ້ນ, ສືບຕໍ່ເຂົ້າໃຈກັນແລະສະໜັບສະໜູນເຊິ່ງກັນແລະກັນກ່ຽວກັບບັນຫາສຳຄັນທີ່ພົວພັນເຖິງຜົນປະໂຫຍດໃຈກາງຂອງສອງຝ່າຍ. ຄວນຖືການຮ່ວມກັນສ້າງ "ໜຶ່ງແລວໜຶ່ງເສັ້ນທາງ" ເປັນວຽກງານຕົ້ນຕໍ, ເພີ່ມທະວີການຮ່ວມມືທີ່ຕິດແທ້ຕົວຈິງ, ຖືການຕໍ່ຕ້ານລັດທິກໍ່ການຮ້າຍເປັນຈຸດສຸມ, ຊຸກຍູ້ການຮ່ວມມືດ້ານການປະຕິບັດກົດໝາຍແລະຄວາມໝັ້ນຄົງ, ລົງເລິກການແລກປ່ຽນແລະຮ່ວມມືດ້ານວັດທະນະທຳເພື່ອເພີ່ມມິດຕະພາບລະຫວ່າງຈີນແລະອີຣານ.
ທ່ານສີຈິ້ນຜິງ ກ່າວຕື່ມວ່າ, ຈີນເວລາໃດກໍມີຈຸດຢືນໃນການແກ້ໄຂຄວາມຂັດແຍ້ງສາກົນແລະບັນຫາຈຸດສຸມດ້ວຍສັນຕິວິທີຕະຫຼອດມາ, ຍິນດີເພີ່ມທະວີການຮ່ວມມືກັບອີຣານພາຍໃຕ້ຂອບຫຼາຍຝ່າຍ, ຊຸກຍູ້ການສ້າງສາຍພົວພັນສາກົນແບບໃໝ່.
 |
