ສະຫາຍ ເຈືອງ ສົມບູນຂັນ ເກີດເມື່ອວັນທີ່ 5 ມີນາ ປີ 1955, ໃນຄອບຄົວຊາວນາ ທີ່ບ້ານ ສະໝັນ, ເມືອງ ໂພນທອງ, ແຂວງ ຈຳປາສັກ, ເປັນບຸດຂອງທ່ານ ສີແກ້ວ ແລະ ນາງ ຄ່ອງ, ມີອ້າຍເອື້ອຍນ້ອງຄີງນຳກັນ 5ຄົນ. ສະຫາຍໄດ້ສ້າງຄອບຄົວກັບນາງ ດາລາວັນ ພອນແກ້ວ ແລະ ມີລູກນຳກັນ 3ຄົນ, ຍິງ 1ຄົນ, ຊາຍ 2ຄົນ. ປະຈຸບັນຢູ່ບ້ານ ຄຳຮຸ່ງ, ເມືອງ ໄຊທານີ, ນະຄອນຫຼວງວຽງຈັນ. ສະຫາຍເລີ່ມເຄື່ອນໄຫວເຮັດການປະຕິວັດໃນວັນທີ 2 ທັນວາ ປີ 1975, ເຂົ້າພັກສຳຮອງວັນທີ 10/05/1985 ເຂົ້າພັກສົມບູນວັນທີ 9/5/1986.
ຊີວິດ ແລະ ການເຄື່ອນໄຫວປະຕິວັດຂອງສະຫາຍ ເຈືອງ ສົມບູນຂັນມີດັ່ງນີ້:
ສະຫາຍ ເຈືອງ ສົມບູນຂັນເລີ່ມເຄື່ອນໄຫວປະຕີວັດນັບແຕ່ອາຍຸຍັງໄວໜຸ່ມ, ເປັນນັກຮຽນ, ເປັນພະນັກງານຊາວໜຸ່ມ ທີ່ເຮັດວຽກບຸກລຸກຂົນຂວາຍຍຶດອຳນາດຢູ່ເຂດເມືອງ ໂພນທອງ.
· ປີ 1977-1978 ສະຫາຍ ເຈືອງ ສົມບູນຂັນໄດ້ເປັນນັກຮຽນກຽມພາສາ ຢູ່ເມືອງ ກີແອຟ, ສະຫະພາບໂຊຫວຽດ.
· ປີ 1982 ເປັນເລຂາຄະນະຊາວໜຸ່ມ ປະຊາຊົນປະຕິວັດລາວ ແລະ ເປັນປະທານສະມາຄົມນັກສຶກສາລາວປະຈຳເມືອງ ມິນສ, ລັດເບໂລຣຸດຊີ, ສະຫະພາບໂຊຫວຽດ.
· ປີ 1983 ເປັນຜູ້ແປພາສາຢູ່ໂຮງຮຽນພັກຂອງສູນກາງພັກກອມມູນິດແຫ່ງສະຫະພາບໂຊຫວຽດ ສຳລັບພະນັກງານການນຳຂອງລາວ, ໃນເວລານັ້ນ ສະຫາຍ ເຈືອງ ສົມບູນຂັນ ໄດ້ຖືກມອບໝາຍຈາກຄະນະພັກໃຫ້ໄປເປັນເລຂາຊາວໜູ່ມປະຊາຊົນປະຕິວັດລາວ ຂອງເມືອງ ມົດສກູ ທັງເປັນກຳມະການຄະນະບໍລິຫານງານຊາວໜູ່ມປະຊາຊົນປະຕິວັດລາວ ທົ່ວສະຫະພາບໂຊຫວຽດ.
· ວັນທີ 7/10/1987 ພາຍຫຼັງສິ້ນສຸດການປະຕິບັດໜ້າທີ່ຢູ່ສະຫະພາບໂຊຫວຽດແລ້ວ ໄດ້ຮັບແຕ່ງຕັ້ງໃຫ້ເປັນອາຈານສອນຢູ່ໂຮງຮຽນຊັ້ນສູງພັກ ແລະ ລັດທີ່ທ່າງ່ອນ.
· ປີ 1987-1992 ເຮັດວຽກຢູ່ກົມເລຂານຸການຂອງການນຳ, ສັງກັດຫ້ອງວ່າການສູນກາງພັກ, ເປັນພະນັກງານຄົ້ນຄວ້າລວມດ້ານທິດສະດີ ແລະ ບັນຫາຕ່າງໆ.
- ເປັນຮອງຫົວໜ້າກົມ.
- ເປັນຫົວໜ້າກົມ, ທັງເປັນເລຂາສະເພາະຂອງ ທ່ານ ໄກສອນ ພົມວິຫານ
· ແຕ່ປີ 1992-1997 ຖືກແຕ່ງຕັ້ງເປັນຮອງຫົວໜ້າຫ້ອງວ່າການສູນກາງພັກ.
- ເປັນຮອງເລຂາຄະນະພັກ.
- ເປັນຮອງລັດຖະມົນຕີ, ເປັນຮອງຫົວໜ້າຫ້ອງວ່າການສຳນັກງານປະທານປະເທດໄລຍະໜຶ່ງ.
· ປີ 1998 ຖືກແຕ່ງຕັ້ງເປັນຮອງລັດຖະມົນຕີ, ເປັນຫົວໜ້າຫ້ອງວ່າການ ສຳນັກງານນາຍົກລັດຖະມົນຕີ.
· ແຕ່ເດືອນ 4/1998 ເຖິງເດືອນ 8/1999 ຖືກແຕ່ງຕັ້ງໃຫ້ເປັນຜູ້ວ່າການທະນາຄານແຫ່ງ ສປປ ລາວ, ເປັນຮອງເລຂາຄະນະພັກ ກະຊວງການເງິນ-ທະນາຄານ.
· ເດືອນ 10/1999 ຖືກແຕ່ງຕັ້ງເປັນຮອງຫົວໜ້າຄະນະໂຄສະນາອົບຮົມສູນກາງພັກ, ເປັນກຳມະການໃນຄະນະພັກ.
· ວັນທີ 26 ກັນຍາ ປີ 2005 ໄດ້ຖືກແຕ່ງຕັ້ງເປັນລັດຖະມົນຕີຊ່ວຍວ່າການປະຈຳສຳນັກງານນາຍົກລັດຖະມົນຕີ ທັງເປັນຫົວໜ້າຫ້ອງວ່າການສຳນັກງານນາຍົກລັດຖະມົນຕີ.
· ກອງປະຊຸມໃຫຍ່ຄັ້ງທີ VIII ຂອງພັກ ປີ 2006 ໄດ້ຖືກເລືອກຕັ້ງໃຫ້ເປັນກຳມະການ ສູນກາງພັກ, ເປັນເລຂາຄະນະພັກ, ເປັນຫົວໜ້າຄະນະໂຄສະນາອົບຮົມສູນກາງພັກ, ປະທານສະພາວິທະຍາສາດແຫ່ງຊາດ, ເປັນຮອງຫົວໜ້າ, ທັງເປັນຜູ້ປະຈຳການຄະນະຊີ້ນຳວຽກງານ 3 ສ້າງຂັ້ນສູນກາງຈົນເຖິງມື້ສຸດທ້າຍ.
ສະຫາຍ ເຈືອງ ສົມບູນຂັນ ໄດ້ເຕີບໃຫຍ່ຂຶ້ນຈາກຂະບວນການນັກຮຽນນັກສຶກສາ, ເປັນຜູ້ມີນຳ້ໃຈຫ້າວຫັນປະຕິວັດ, ມີຄວາມກ້າວຫານ, ເປັນຜູ້ທີ່ມີຄຸນສົມບັດດີ, ມີມານະຈິດບຸກ ບືນຕໍ່ໜ້າທີ່ວຽກງານ. ສະຫາຍ ແມ່ນໜຶ່ງໃນພະນັກງານເຂດໃຕ້ຂອງລາວທີ່ຖືກຄັດເລືອກໃຫ້ໄປຮຽນການເມືອງຢູ່ເມືອງ ກີແອຟ, ສະຫະພາບໂຊຫວຽດ. ຍ້ອນເປັນຜູ້ຮຽນດີ, ຮຽນເກ່ງ, ສະຫາຍຈຶ່ງຖືກມອບໝາຍໃຫ້ເປັນຄູສອນການເມືອງ, ເປັນພະນັກງານໂຄສະນາອົບ ຮົມ ແລະ ເປັນພະນັກງານການນຳ. ສະຫາຍພ້ອມດ້ວຍໝູ່ຄະນະໄດ້ປະກອບສ່ວນໃນການ ປັບປຸງບູລະນະວຽກງານໃນຂົງເຂດທິດສະດີການເມືອງ-ການປົກຄອງ, ວຽກງານແນວຄິດ ເຊິ່ງບັນດາວຽກດັ່ງກ່າວເປັນວຽກທີ່ຫຍຸ້ງຍາກ, ແຕ່ສະຫາຍກໍ່ມີຄວາມບຸກບືນອົດທົນຜ່ານຜ່າ, ສະຫາຍໄດ້ຮ່ວມກັບໝູ່ຄະນະນຳພາຈັດຕັ້ງປະຕິບັດແນວທາງ, ແຜນນະໂຍບາຍຂອງພັກ, ລະບຽບກົດໝາຍຂອງລັດ, ສະຫາຍກໍ່ເປັນຜູ້ໜຶ່ງທີ່ມີຄວາມຫ້າວຫັນໃນການຄົ້ນຄວ້າ ແລະ ປະກອບຄຳຄິດຄຳເຫັນເຂົ້າໃນການປັບປຸງບູລະນະບັນດາແນວທາງນະໂຍບາຍຂອງພັກ ແລະ ແຜນພັດທະນາເສດຖະກິດ-ສັງຄົມຂອງລັດ.
ສະຫາຍ ເຈືອງ ສົມບູນຂັນ ໄດ້ເຕີບໃຫຍ່ຈາກພະນັກງານວິຊາການ ຈົນກ້າວຂຶ້ນເປັນພະນັກງານການນຳຂອງພັກ ແລະ ລັດ. ສະຫາຍໄດ້ອຸທິດເຫື່ອແຮງ, ສະຕິປັນຍາຂອງຕົນປະກອບສ່ວນເຂົ້າໃນພາລະກິດປະຕິວັດ ເພື່ອຄວາມຢູ່ດີກິນດີຂອງງປະຊາຊົນລາວບັນດາເຜົ່າ, ສະຫາຍມີຄວາມສາມາດໃນການນຳພາ, ເປັນຜູ້ທີ່ມັກສຶກສາຄົ້ນຄວ້າຄວາມຮູ້ດ້ານຕ່າງໆ, ມີຄວາມກະຕືລືລົ້ນໃນການປະຕິບັດໜ້າທີ່ວຽກງານທີ່ໄດ້ຮັບມອບໝາຍ, ເປັນຜູ້ໜຶ່ງທີ່ເອົາໃຈໃສ່ຝຶກຝົນຫຼໍ່ຫຼອມຕົນເອງທາງດ້ານຄຸນສົມບັດສິນທຳປະຕິວັດ, ມີຄວາມທ່ຽງທຳ, ມີນ້ຳໃຈເສຍສະຫຼະ ເພື່ອຜົນປະໂຫຍດສ່ວນລວມຂອງປະເທດຊາດ. ສະຫາຍ ເຈືອງ ສົມບູນຂັນ ຍາມໃດກໍ່ມີຄວາມເປັນຫ່ວງເປັນໄຍ, ໃກ້ຊິດຕິດແທດກັບພະນັກງານ ແລະ ປະຊາຊົນ. ພ້ອມກັນນັ້ນ, ສະຫາຍ ເຈືອງ ສົມບູນຂັນ ກໍ່ເປັນຜູ້ກຳແໜ້ນແນວທາງຕ່າງປະເທດຂອງພັກ. ສະຫາຍ ມີເພື່ອນມິດສາກົນຢູ່ກວ້າງຂວາງ.
ສະຫາຍ ເຈືອງ ສົມບູນຂັນ ແມ່ນພະນັກງານທີ່ມີແບບແຜນວິທີເຮັດວຽກ ແລະ ມີແບບແຜນດຳລົງຊີວິດທີ່ງ່າຍດາຍ ແລະ ປະຢັດ. ມີຄຸນສົມບັດສິນທຳປະຕິວັດ, ມີຄວາມສາມັກຄີເປັນເອກະພາບພາຍໃນພັກ, ພາຍໃນກົມກອງ, ເປັນຜູ້ຍຶດໝັ້ນໃນຫຼັກການນຳພາຂອງພັກ, ຍຶດໝັ້ນໃນອຸດົມການການປະຕິວັດອັນສູງສົ່ງ. ສະຫາຍໄດ້ເປັນແບບຢ່າງອັນດີໃຫ້ແກ່ພະນັກງານ-ສະມາຊິກພັກ; ສະຫາຍຍັງໄດ້ເອົາໃຈໃສ່ສຶກສາອົບຮົມຄອບຄົວ, ລູກຫຼານໃຫ້ກາຍເປັນຜູ້ທີ່ດີ, ມີຄວາມຮູ້ຄວາມສາມາດ.
ລວມຄວາມວ່າ ຕະຫຼອດໃນໄລຍະຫຼາຍສິບປີແຫ່ງການເຄື່ອນໄຫວປະຕິວັດ ເຖິງຈະຢູ່ໃນຖານະ ແລະ ໜ້າທີ່ໃດ, ຈະແມ່ນວຽກງານໜັກໜ່ວງ, ຫຍຸ້ງຍາກສັບສົນປານໃດກໍ່ຕາມ, ສະຫາຍ ເຈືອງ ສົມບູນຂັນ ກໍ່ໄດ້ມີຄວາມອົດທົນຜ່ານຜ່າມີຄວາມຮັບຜິດຊອບສູງ, ມີມານະຈິດປະຕິວັດໜຽວແໜ້ນ, ມີຄວາມຈົງຮັກພັກດີຕໍ່ພັກຕໍ່ລັດຕໍ່ປະເທດຊາດ ເຊິ່ງໄດ້ສະແດງແຈ້ງເຖິງທາດແທ້ຂອງພະນັກງານປະຕິວັດທີ່ແທ້ຈິງ.
ດ້ວຍຜົນງານ ແລະ ຄຸນງາມຄວາມດີຂອງສະຫາຍໃນການປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ, ສະຫາຍ ເຈືອງ ສົມບູນຂັນ ຈຶ່ງໄດ້ຮັບ ການຍ້ອງຍໍຈາກພັກ ແລະ ລັດເຮົາ ກໍຄືຈາກປະເທດເພື່ອນມິດ ດ້ວຍຮູບການຍ້ອງຍໍປະເພດຕ່າງໆດັ່ງນີ້:
- ຫຼຽນໄຊອິດສະຫຼະ ຊັ້ນ I 1 ໜ່ວຍ
- ຫຼຽນໄຊແຮງງານ ຊັ້ນ I 3ໜ່ວຍ
- ຫຼຽນໄຊແຮງງານຊັ້ນ II 4 ໜ່ວຍ
- ຫຼຽນໄຊແຮງງານຊັ້ນ III 2 ໜ່ວຍ
- ຫຼຽນໄຊເອກະລາດຂອງ ສສ. ຫວຽດນາມ 1 ໜ່ວຍ
- ໃບຍ້ອງຍໍຂອງສະພາຄຸ້ມຄອງນັກສຶກສາຕ່າງປະເທດຂອງລັດ ເບໂລຣຸດເຊີ, ສະຫະພາບໂຊຫວຽດ 1 ໃບ
- ໃບຍ້ອງຍໍຂອງສະພາວິທະຍາສາດ ມະຫາວິທະຍາໄລຂອງລັດເບໂລຣຸດເຊີ, ສະຫະພາບໂຊຫວຽດ 1 ໃບ
- ນອກຈາກນັ້ນຍັງໄດ້ຮັບໃບຍ້ອງຍໍຈາກຂັ້ນຕ່າງໆຢູ່ພາຍໃນປະເທດອີກຈຳນວນໜຶ່ງ.
ສະຫາຍ ເຈືອງ ສົມບູນຂັນ ໄດ້ເສຍຊີວິດດ້ວຍອຸບັດຕິເຫດ ເຮືອບິນຕົກໃນເວລາໄປປະຕິບັດໜ້າທີ່ທີ່ ແຂວງຊຽງຂວາງ, ໃນເວລາ 6 ໂມງ 23 ນາທີ ຂອງວັນທີ 17 ພຶດສະພາ ປິ 2014 ລວມອາຍຸໄດ້ 59 ປີ.
 |
