|
ປີ 2002, ພັກກອມມູນິດຈີນໄດ້ສະເຫນີອອກມາວ່າ,ຈີນຈະສ້າງສາສັງຄົມພໍຢູ່ພໍກິນແລະມີສ່ວນເຫຼືອຢ່າງຮອບດ້ານໃນ 20 ປີທຳອິດຂອງສັດຕະວັດນີ້, ແລະຖືການຈໍ່ຕົວເປັນລະບົບສຶກສາພົນລະເມືອງ ທັນສະໄຫມທີ່ຂ້ອນຂ້າງບໍລິບູນນັ້ນ ເປັນຈຸດຫມາຍຫນ່ຶງຂອງການສ້າງສັງຄົມພໍຢູ່ພໍກິນແລະມີສ່ວນເຫຼືອຢ່າງຮອບດ້ານ.ຫວ່າງມໍ່ໆນີ້,ນັກຂ່າວວິທະຍຸພວກເຮົາໄດ້ໄປສຳພາດບຸກຄົນວົງການການສຶກສາຈຳນວນໜຶ່ງກ່ຽວກັບເລື່ອງເຮັດແນວໃດສ້າງລະບົບການສຶກສາພົນລະເມືອງທັນສະໄຫມ,ພວກເຮົາ ກໍ່ຂໍສະເຫນີສະພາບທີ່ກ່ຽວຂ້ອງສູ່ທ່ານຟັງ.
ອັນທີ່ວ່າລະບົບການສຶກສາພົນລະເມືອງ, ທຳມະດາແລ້ວແມ່ນຫມາຍເຖິງລະບົບການສຶກ ສາທີ່ລັດກຳນົດໄວ້ ໃນກົດຫມາຍແລະເຫມາະໃຊ້ສຳລັບພົນລະເມືອງຂອງປະເທດຕົນ,ອີງຕາມຂໍ້ກຳ ນົດທີ່ລະບຸໄວ້ໃນກົດຫມາຍວ່າດ້ວຍການສຶກສາຂອງຈີນ,ການສຶກສາຢູ່ໂຮງຮຽນຄື: ການສຶກສາກ່ອນໄວຮຽນ ການສຶກສາຊັ້ນຕົ້ນຄືຊັ້ນປະຖົມ, ການສຶກສາຊັ້ນກາງຄືຊັ້ນມັດທະຍົມຕົ້ນຮອດຊັ້ນມັດທະຍົມປາຍແລະການສຶກສາຊັ້ນສູງ ແມ່ນໂຄງຮ່າງພື້ນຖານຂອງການສຶກສາພົນລະເມືອງສ່ວນການຮຽນບຳ ລຸງ,ການຝຶກອົບຮົມແລະການສຶກສາຕໍ່ອື່ນໆທີ່ມີຫຼາຍຢ່າງຫຼາຍແນວ,ຖືກຖືເປັນພາກສ່ວນສຳຄັນທີ່ຄ້ຳຊູລະບົບການສຶກສາພົນລະເມືອງ,ສ່ວນລະບົບການສຶກສາພົນລະເມືອງທີ່ສອດຄ່ອງກັບກະແສຍຸກສະໄຫມ,ສອດຄ່ອງກັບ ຄວາມຕ້ອງການໃນການພັດທະນາສັງຄົມທັນສະໄຫມຖືກເອີ້ນເປັນລະບົບການສຶກສາພົນລະເມືອງທັນສະໄຫມ.
ແຕ່ຊຸມປີ 90 ສັດຕະວັດແລ້ວນີ້ເປັນຕົ້ນມາ, ການລົງທຶນເຂົ້າໃນການສຶກສາຂອງຈີນໄດ້ເພີ່ມຂຶ້ນຢ່າງບໍ່ຢຸດຢັ້ງ, ການສຶກສາທຸກຂັ້ນ ທຸກປະເພດ ໄດ້ມີການພັດທະນາຢ່າງວ່ອງໄວ, ຮອດປີ 2000,ຈີນໄດ້ບັນລຸການເຜີຍແຜ່ການສຶກສາພາກບັງຄັບ 9 ປີຄືຈາກຊັ້ນປະຖົມຮອດຊັ້ນມັດທະນຍົມຕົ້ນໃນຂັ້ນພື້ນຖານຕາມເວລາກຳນົດ,ໄດ້ລົບລ້າງຊາວຫນຸ່ມໄວສະກັນຜູ້ກືກຫນັງສືໃນຂັ້ນພື້ນຖານ, ປີ 2001 ,ອັດຕາກວມປະຊາກອນຂອງການເຜີຍແຜ່ການສຶກສາພາກບັງຄັບແລະລົບລ້າງຊາວຫນ່ມໄວສະກັນຜູ້ກືກຫນັງສືຂອງຈີນໄດ້ບັນລຸເຖິງ 91%.ປະຈຸບັນ,ລະດັບຮັບການສຶກສາຂອງປະຊາກອນທ່ົວປະເທດຈີນສະເລ່ຍແລ້ວ ໄດ້ຈາກ 6 ປີເມື່ອປີ 1999 ເພີ່ມຂຶ້ນຮອດ 8 ປີຂອງປະຈຸບັນແລ້ວ,ທັງຫມົດເຫຼົ່ານີ້ສະແດງໃຫ້ເຫັນວ່າ ຈີນໄດ້ສ້າງລະບົບການສຶກສາພົນລະເມືອງທັນສະໄຫມທີ່ມີອົງປະ ກອບຂ້ອນຂ້າງສົມບູນໃນເບື້ອງຕົ້ນແລ້ວ.
ແຕ່ວ່າ,ເມື່ອທຽບກັບປະເທດພັດທະນາແລ້ວ,ລະດັບກວມລວມການສຶກສາຂອງຈີນຍັງຂ້ອນຂ້າງຕ່ຳ, ລະດັບຮັບການສຶກສາຂອງພົນລະເມືອງປະເທດພັດທະນາສະເລ່ຍແລ້ວ ແມ່ນ 12 ປີຂຶ້ນໄປ,ຫຼາຍກວ່າຈີນຢ່າງຫນ້ອຍ 4 ປີ,ໃນເວລາໃຫ້ສຳພາດຕໍ່ນັກຂ່າວວິທະຍຸພວກເຮົາ,ທ່ານໂຈວມານເຊີນ ຮອງຫົວຫນ້າສູນຄົ້ນຄວ້າພັດທະນາການສຶກສາແຫ່ງຊາດ ຂອງກະຊວງສຶກສາທິການຂອງຈີນຊີ້ອອກວ່າ,ຂໍກະແຈຂອງການພັດທະນາແລະບູລະນະລະບົບການສຶກສາພົນລະ ເມືອງທັນສະໄຫມຕື່ມອີກແມ່ນກຳການສຶກສາພື້ນຖານໃຫ້ດີ,ໂດຍສະເພາະແມ່ນພັດທະນາການສຶກສາມັດທະຍົມປາຍສາມປີໃຫ້ດີ,ທ່ານເວົ້າວ່າ,ຂໍກະແຈຂອງລະບົບການສຶກສາພົນລະເມືອງ ຍັງຄົງແມ່ນໄລຍະການສຶກສາພື້ນ ຖານ,ການສຶກສາພື້ນຖານຂອງພວກເຮົາກໍແມ່ນຈາກການສຶກສາກ່ອນໄວຮຽນຮອດມັດທະຍົມປາຍ,ນີ້ແມ່ນໄລຍະສ້າງພື້ນຖານໃຫ້ແກ່ນັກຮຽນ, ສ່ວນບ່ອນທີ່ອ່ອນແອໃນສະເພາະຫນ້ານີ້ແມ່ນການສຶກສາຊັ້ນມັດທະຍົມປາຍ.
ຍ້ອນວ່າ,ປະຈຸບັນ,ຈີນໄດ້ເຜີຍແຜ່ການສຶກສາຈາກຊັ້ນປະຖົມຮອດຊັ້ນມັດທະຍົມແລ້ວ, ເມື່ອ ປຽບທຽບກັນແລ້ວ, ເຫັນວ່າ, ການສຶກສາໃນໄລຍະຊັ້ນມັດທະຍົມປາຍ ທີ່ອັດຕາເຂົ້າຮຽນຕ່ຳຮອດ 50%,ນັ້ນກໍ່ປະກົດວ່າບໍ່ສາມາດຕອບສະຫນອງກັບຄວາມຕ້ອງການຂອງສັງຄົມ, ໂດຍສະເພາະແມ່ນໃນຕົວເມືອງ,ບັນຫາດັ່ງກ່າວຍິ່ງພົ້ນເດັ່ນຂຶ້ນ, ດຽວນີ້,ຄອບຄົວໃນຕົວເມືອງຂອງຈີນສ່ວນຫຼາຍແມ່ນມີລູກຜູ້ດຽວ,ເກືອບຫມົດທຸກຄອບຄົວລ້ວນແຕ່ຫວັງໃຫ້ລູກຂອງຕົນສາມາດເຂົ້າຮຽນຊັ້ນມັດທະຍົມປາຍແລ້ວເສັງເຂົ້າມະຫາວິທະຍາໄລ, ນີ້ກໍ່ເຮັດໃຫ້ພວກເຂົາເຈົ້າມີຄວາມປາຖະຫນາອັນແຮງກ້າພິເສດທີ່ຢາກຮັບການສຶກສາຊັ້ນມັດທະຍົມປາຍ,ໃນບົດລາຍງານຂອງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 16 ຂອງພັກກອມມູນິດຈີນໄດ້ສະເຫນີອອກມາວ່າ ຕ້ອງອອກແຮງພັດທະນາການສຶກສາ ຊັ້ນມັດ ທະຍົມປາຍ,ແລ້ວເຜີຍແຜ່ການສຶກສາຊັ້ນມັດທະຍົມປາຍນັ້ນ,ກໍ່ແມ່ນສະເຫນີອອກໂດຍແນໃສ່ຄວາມຕ້ອງການດັ່ງກ່າວຂອງສັງຄົມ, ຕາມການຄາດຄະເນຂອງຂະແຫນງການສຶກສາ,ຮອດປີ 2020,ອັດ ຕາເຂົ້າຮຽນຂອງການສຶກສາຊັ້ນມັດທະຍົມປາຍຂອງຈີນຈະຍົກສູງຂຶ້ນຮອດ90%, ຄຽງຄູ່ກັບການສຶກ ສາຊັ້ນມັດທະຍົມປາຍມີການຂະຫຍາຍຕົວ,ການສຶກສາຊັ້ນສູງຂອງຈີນກໍ່ຈະສືບຕໍ່ຂະຫຍາຍຕົວ,ຮອດປີ 2020 , ອັດຕາເຂົ້າຮຽນຂອງການສຶກສາຊັ້ນສູງປະເພດຕ່າງໆຂອງຈີນຈະຈາກ 14% ໃນປະຈຸບັນເພີ່ມຂຶ້ນຮອດ 32%.
ໃນຂະນະດຽວກັນນັ້ນ,ຜູ້ຊ່ຽວຊານດ້ານການສຶກສາຂອງຈີນຈຳນວນໜຶ່ງກໍ່ຊີ້ອອກວ່າ, ເວົ້າສຳ ລັບເຂດຊົນນະບົດອັນໄພສານແລ້ວ,ປັບປຸງຫມາກຜົນຂອງການເຜີຍແຜ່ການສຶກສາພາກບັງຄັບ 9 ປີແມ່ນສຳຄັນເປັນພິເສດ, ໂດຍສະເພາະແມ່ນເຂດຊົນນະບົດທີ່ເສດຖະກິດ ດ້ອຍພັດທະນາຈຳນວນຫນື່ງ, ແມ່ນຜ່ານວິທີລັດຖະບານໃຫ້ການສະຫນັບສະນຸນແລະບຸກຄົນຜູ້ມີໃຈເອື້ອເຟື້ອບໍລິຈາກເປັນຕົ້ນ,ມາຍົກສູງອັດຕາເຂົ້າຮຽນ,ເຜີຍແຜ່ການສຶກສາຈາກຊັ້ນປະຖົມຮອດຊັ້ນມັດທະຍົມຕົ້ນ,ສ່ວນຢູ່ເຂດເຫຼົ່ານີ້,ຊາວກະສິກອນສ່ວນຫຼາຍອາໄສການປູກຝັງມາທຳມາຫາກິນ,ຖ້າປະສົບປີເກີດໄພແຫ້ງແລ້ວຫຼືໄພນ້ຳນອງ,ຜົນຜະລິດກະສິກຳຫຼຸດຫນ້ອຍລົງ,ຫຼືເຈັບໄຂ້ໄດ້ປ່ວຍຫຼືພິການເປັນຕົ້ນ,ກໍ່ຈະເຮັດໃຫ້ຄອບ ຄົວຊາວກະສິກອນ ມີຄວາມຫຍຸ້ງຍາກດ້ານເສດຖະກິດ, ອາດຈະເຮັດໃຫ້ລູກເຕົ້າຈຳເປັນຕ້ອງເຄີກຮຽນ,ສະນັ້ນ,ຢູ່ເຂດເສດຖະກິດດ້ອຍພັດທະນາ, ເຜີຍແຜ່ການສຶກສາຊັ້ນປະຖົມແລະຊັ້ນມັດທະຍຍົມຕົ້ນ, ຍົກລະດັບຮັບການສຶກສາຂອງຊາວຫນຸ່ມເຍົາວະຊົນໃນເກນ ອາຍຸໃຫ້ສູງຂຶ້ນນັ້ນແມ່ນສຳຄັນທີ່ສຸດ.
ໃນເວລາໄປສຳພາດຂ່າວ,ນັກຂ່າວຍັງເຫັນວ່າ, ບຸກຄົນວົງການການສຶກສາຍັງສຸດທີ່ເອົາໃຈໃສ່ນຳການພົ້ນເດັ່ນສີສັນພິເສດທັນສະໄຫມ ໃນການສ້າງລະບົບການສຶກສາພົນລະເມືອງທັນສະໄຫມ, ທ່ານນາງເຊີນຈື້ລີ້ລັດຖະມົນຕີກະຊວງສຶກສາທິການຂອງຈີນຊີ້ອອກວ່າ, ໃນຕໍ່ໄປພາຍຫນ້າ,ຈະດຳເນີນການປະຕິຮູບຢ່າງກ້າຫານຕໍ່ການສຶກສາໃນປະຈຸບັນ, ເພື່ອສອດຄ່ອງກັບຄວາມຕ້ອງການຂອງການສຶກສາທັນສະໄຫມ,ທ່ານນາງເວົ້າວ່າ,ພວກເຮົາຊຸກຍູ້ການສຶກສາຄຸນທາດຢ່າງຮອບດ້ານ, ຕ້ອງຍຶດຫມັ້ນການປະດິດສ້າງການສຶກສາລົງເລິກປະຕິຮູບການສຶກສາ, ເຈາະຈົງບຳລຸງສ້າງຈິດໃຈປະດິດສ້າງແລະຄວາມສາມາດດ້ານພຶດຕິກຳຂອງນັກຮຽນ, ເລ່ັງາລັດການປະຕິຮູບຫຼັກສູດແບບຮຽນແລະລະບອບປະເມີນການສອບເສັງໃຫ້ໄວເຂົ້າ.
ທ່ານນາງເຊີນຈື້ລີ້ ຊີ້ອອກວ່າ,ຈີນຢາກບັນລຸທັນສະໄຫມ, ກ່ອນອື່ນ,ຕ້ອງບັນລຸໃຫ້ທັດສະນະຄະຕິຂອງຜູ້ສຶກສາຄື:ຄູອາຈານແລະຜູ້ຄຸ້ມຄອງການສຶກສາຫັນເປັນທັນສະໄຫມ,ຖັດມາແມ່ນເຮັດໃຫ້ວິທີແລະພາຫະນະການສຶກສາຫັນເປັນທັນສະໄຫມ. ຂະແຫນງການສຶກສາຂອງຈີນໄດ້ເອົາໃຈໃສ່ທີ່ສຸດນຳການຝຶກອົບຮົມຕໍ່ຄູອາຈານແລະຜູ້ຄຸ້ມຄອງການສຶກສາໂດຍຕະຫຼອດ,ເພື່ອຍົກລະດັບແນວຄິດແລະລະດັບວິຊາສະເພາະຂອງພວກເຂົາເຈົ້າໃຫ້ສູງຂຶ້ນ, ປະຈຸບັນ,ການຝຶກອົບຮົມດ້ານເຕັກນິກຂໍ້ມູນຂ່າວສານທີ່ແນໃສ່ຄູອາຈານຫມົດທຸກຄົນນັ້ນ ກໍ່ພວມດຳເນີນຢ່າງກວ້າງຂວາງຢູ່ແຫ່ງຕ່າງໆທົ່ວປະເທດ,ພ້ອມກັນນັ້ນ,ການປະຕິຮູບຫຼັກສູດການສຶກສາພື້ນຖານຮອບໃຫມ່ກໍ່ໄດ້ດຳເນີນຂຶ້ນແລ້ວ,ນີ້ຖືກຖືເປັນການປະຕິຮູບສຳຄັນລາຍຫນ່ຶງ ໃນການພັດທະນາການສຶກສາທັນສະໄຫມຂອງຈີນ, ທ່ານໂຈວ ມານເຊີນ ຮອງຫົວຫນ້າສູນຄົ້ນຄວ້າພັດທະນາການສຶກສາແຫ່ງຊາດຂອງກະຊວງສຶກສາທິການຂອງຈີນເຫັນວ່າ,ການປະຕິຮູບຫຼັກສູດຈະປ່ຽນແປງໃຫມ່ຕໍ່ຫຼັກສູດການສິດສອນຈາກຊັ້ນປະຖົມ ຮອດຊັ້ນມັດທະຍົມປາຍທີ່ມີຢູ່ໃນປະຈຸບັນ, ຕ້ອງສອດຄ່ອງກັບຄວາມຕ້ອງການຂອງຍຸກສະໄຫມ,ສະແດງໃຫ້ເຫັນລັກສະນະການສຶກສາຂ້າມຂະແຫນງວິຊາ, ສອດຄ່ອງກັບກົດເກນການຂະຫຍາຍຕົວດ້ານຮ່າງ ກາຍແລະດ້ານຈິດໃຈຂອງເດັກນ້ອຍ.
ການປະຕິຮູບຫຼັກສູດທີ່ຫາກໍ່ເລ່ີມດຳເນີນບໍ່ດົນ, ໄດ້ຕັ້ງຫນ້າຊອກຄົ້ນຫຼັກສູດການສຶກສາ,ເນື້ອໃນຂອງແບບຮຽນ,ວິທີແລະພາຫະນະການສຶກສາ, ຕົວຢ່າງຄື: ປ່ຽນແປງເບົ້າແບບຂອງແຕ່ກ່ອນ ຄື:ແຫ່ງຕ່າງໆທົ່ວປະເທດປະຕິບັດຫຼັກສູດການສຶກສາແລະແບບຮຽນເປັນເອກະພາບ,ທົດລອງຮຽບຮຽງແບບຮຽນຫຼາຍແບບໃຕ້ການຊີ້ນຳຂອງຫຼັກສູດການສຶກສາອັນດຽວກັນ, ໃຫ້ໂຮງຮຽນເລືອກໃຊ້ແບບ ຮຽນໂດຍແນໃສ່ສະພາບລະອຽດຂອງນັກຮຽນ, ຈົນກະທັ້ງທົດລອງຕັ້ງຫຼັກສູດການສິດສອນຫຼາຍຊະ ນິດໃຫ້ແກ່ນັກຮຽນຮຽນຊັ້ນດຽວກັນ,ໂດຍແນໃສ່ເຂດຕົວເມືອງແລະຊົນນະບົດທີ່ຕ່າງກັນ.
ໃນສູ່ມື້ນີ້, ທັດສະນະຄະຕິການສຶກສາແບບໃຫມ່ທີ່ ສອດຄ່ອງກັບຄວາມຕ້ອງການຂອງຍຸກສະໄຫມໄດ້ຖືກຄູອາຈານອັນໄພສານຂອງຈີນຮັບເຫັນດີນຳແລ້ວ, ພວກເຂົາເຈົ້າໃຊ້ແລວຄວາມຄຶດໃຫມ່ ຂອງການປະຕິຮູບການສຶກສາເຂົ້າໃນພຶດຕິກຳການສິດສອນຢ່າງເປັນເຈົ້າການ,ນາງຊິວຟາງ ຄູສອນຊັ້ນປະຖົມຜູ້ຫນ່ຶງໃນເມືອງໄທຢວນ ແຂວງຊານຊີ ພາກເຫນືອຂອງຈີນ ໄດ້ບອກນັກຂ່າວວ່າ, ໂຮງ ຮຽນຂອງພວກເຂົາເຈົ້າພວມປ່ຽນແປງວິທີການສິດສອນດັ້ງເດີມແບບຖອກໃສ່, ລິເລີ່ມການສິດສອນແບງແງະໄງ້ແລະແບບຊັກນຳ,ເພື່ອບຳລຸງສ້າງຄວາມສາມາດຮ່ຳຮຽນຢ່າງເປັນເຈົ້າການຂອງນັກຮຽນ, ກະຕຸກນ້ຳໃຈປະດິດສ້າງໃຫມ່ຂອງພວກເຂົາເຈົ້າ.
ການສ້າງລະບົບການສຶກສາພົນລະເມືອງທັນສະໄຫມ, ໃຫ້ພົນລະເມືອງໄດ້ຮັບການສຶກສາຄຸນນະພາບສູງທີ່ມີລະດັບຍ່ິງສູງກວ່ານັ້ນ, ແມ່ນທິດພະຍາຍາມອັນຫນື່ງຂອງຈຸດຫມາຍສູ້ຊົນສ້າງສາສັງ ຄົມແບບພໍຢູ່ພໍກິນແລະມີສ່ວນເຫຼືອ ຢ່າງຮອບດ້ານທີ່ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ 16 ຂອງພັກກອມມູນິດຈີນ ພັກຄອງອຳນາດຂອງຈີນສະເຫນີອອກມາ,ວົງການການສຶກສາຂອງຈີນພວມຊອກຫາທຸກວິທີກ້າວໄປສູ່ທິດດັ່ງກ່າວ. |
