|
ຢູ່ພາກຕາເວັນຕົກຂອງກິ່ງແຂວງຕາລີເຜົ່າປາຍປົກຄອງຕົນເອງຂອງແຂວງຢູນນານຊາຍແດນພາກຕາເວັນຕົກສຽງໃຕ້ຂອງຈີນ,ມີເມືອງບູຮານເມືອງໜື່ງຊື່ວ່າເມືອງຢັ້ງປີ້.ໃນສະໄໝບູຮານ,ເມືອງດັ່ງກ່າວເປັນບ່ອນທີ່ເສັ້ນທາງຜ້າໄໝຜ່ານແຕ່ຈີນໄປຫາອາຊີອາຄະເນແລະອາຊີໃຕ້.ປະຈຸບັນ,ທາງຫຼວງຢູນນານມຽນມາທີ່ສ້າງໃນໄລຍະສົງຄາມຕໍ່ຕ້ານຍີ່ປຸ່ນໄດ້ເນັ່ງຜ່ານເມືອງດັ່ງກ່າວ.ທາງດ່ວນແຕ່ເມືອງຕາລີຮອດເມືອງປາວຊານແລະທາງຫຼວງແຫ່ງຊາດເລກ320ກໍໄດ້ຜ່ານເມືອງນີ້ໄປ.
ເມືອງຢັ້ງປີ້ໃນຊູ່ມື້ນີ້ເປັນເມືອງປົກຄອງຕົນເອງທີ່ມີີ17ຊົນເຜົ່າເຊັ່ນ,ເຜົ່າອີ,ເຜົ່າຮ້ານ,ເຜົ່າປາຍ,ເຜົ່າຮຸຍເປັນຕົ້ນຕັ້ງພູມລຳເນົາຢູ່ແຫ່ງນີ້.ໃນນັ້ນ,ເຜົ່າອີທີ່ຊ່າງຟ້ອນລຳທຳເພງແລະມີສີໄມ້ລາຍມືຫຼາຍດ້ານກວມຍອດຈຳນວນປະຊາກອນເມືອງຢັ້ງປີ້45%ຂຶ້ນໄປ.ທ່ານສາຈົ່ງວ້າງເລຂາຄະນະພັກເມືອງຢັ້ງປີ້ທີ່ເປັນຊາວເຜົ່າອີໄດ້ພັນລະນາບ້ານເກີດເມືອງນອນຂອງຕົນຄືດັ່ງນີ້:"ເມືອງຢັ້ງປີ້ມີປະຫວັດດົນນານ,ມີວັດທະນະທຳກ້ານກຸ່ງຮຸ່ງເຮືອງ,ດິນກວ້າງຄົນໜ້ອຍ,ມີຊັບໃນດິນສິນໃນນຳ້ອຸດົມສົມບູນ,ມີພູຜາແມ່ນຳ້ທີ່ສວຍສົດງົດງາມແລະມີຊີວະພາບອັນດີງາມ."
ທີ່ດິນ,ປ່າໄມ້ແລະນ້ຳແມ່ນຊັບພະຍາກອນທຳມະຊາດສຳຄັນສາມຢ່າງຂອງເມືອງຢັ້ງປີ້,ອັນໄດ້ກາຍເປັນພາບວິວທິວທັດອັນສວຍສົດງົດງາມຂອງບ້ານເຜົ່າອີຄືມີດິນແດນກວ້າງໃຫຍ່ໄພສານແລະມີຊັບພະຍາກອນອັນອຸດົມສົມບູນ,ນ້ຳໃສປານແວ່ນ,ພູດອຍຂຽວອຸ່ມທຸ່ມ.
ເມືອງຢັ້ງປີ້ມີດິນແດນກວ້າງໃຫຍ່ໄພສານ,ໃນແຕ່ລະຕາລາງກິໂລແມັດມີພຽງ15ຄົນ,ທີ່ດິນທີ່ສະເລ່ຍຕາມຫົວຄົນແມ່ນ28,79ໄຮ່ຈີນ,ໃນນັ້ນ,ມີເຂດປ່າໄມຫຼາຍສົມຄວນ.
ທຳມະຊາດໄດ້ສະໜອງຊັບພະຍາກອນຊີວະພາບສັດແລະພຶກສາຊາດອັນອຸດົມສົມບູນໃຫ້ແກ່ເມືອງຢັ້ງປີ້,ເຮັດໃຫ້ເມືອງຢັ້ງປີ້ກາຍເປັນພາກສ່ວນໜື່ງຂອງເຂດອະນຸລັກທຳມະຊາດລະບົບຊີວະພາບລະດັບຊາດທີ່ເປັນຮ່ອງຮອຍລານນ້ຳກ້າມພູຊາງຊານໜອງແສ,ປ່າໄມ້ແລະໜອງເທິງພູພຽງ.ພາຍໃນແດນເມືອງຢັ້ງປີ້ມີພູຜາກໍມີປ່າໄມ້ຂຽວອຸ່ມທຸ່ມ,ອັດຕາປ່າໄມ້ປົກຫຸ້ມບັນລຸເຖິງ67,2%,ມີພຶກສາຊາດ2849ຊະນິດ182ປະເພດຢັ່ງຢາຍກັນຢູ່ແຫ່ງຕ່າງໆ.
ເມືອງຢັ້ງປີ້ມີຊັບພະຍາກອນນ້ຳອຸດົມສົມບູນ,ມີແມ່ນຳ້ລຳເຊນ້ອຍໃຫຍ່ລວມ117ສາຍ.ແມ່ນ້ຳເຫຼົ່ານີ້ມີຈຸດພິເສດທີ່ລະດັບນ້ຳໂຕນກັນຫຼາຍແລະມີປະລິມານນ້ຳໄຫຼສະໝ່ຳສະເໝີໂດຍທຽບຖານ,ພະລັງງານນ້ຳບົ່ມຊ້ອນມີເຖິງ4ແສນ5ໝື່ນ2100ກິໂລວັດ,ມີເງື່ອນໄຂອັນດີງາມໃນການພັດທະນາໂຮງໄຟຟ້ານ້ຳຕົກແບບຂັ້ນໄດແລະສ້າງຊົນລະປະທານກະສິກຳ.
ພ້ອມກັນນັ້ນ,ເມືອງຢັ້ງປີ້ຍັງມີສັດປ່າຫາຍາກນັບເປັນຮ້ອຍຊະນິດແລະແຮ່ທາດ30ກວ່າຊະນິດເຊັ່ນ,ຫີນອ່ອນ,ອັງຕີມວນ,ສັງກະສີ,ທອງ,ຫີນກະລາຟິດແລະບາເປັນຕົ້ນ.
ປີ2000,ລະດັບຊີວິດການເປັນຢູ່ຂອງປະຊາຊົນເມືອງຢັ້ງປີ້ໄດ້ບັນລຸເຖິງຂັ້ນກິນອ່ີມນຸ່ງອຸ່ນ.ການກ້າວໄປສູ່ຊີວິດອັນເຫຼືອຢູ່ເຫຼືອກິນໄດ້ກາຍເປັນຫົວຂໍ້ໂຈຕະນາກັນຂອງປະຊາຊົນທົ່ວເມືອງ.ທັດສະນະຕັດສິນແລວຄວາມຄິດ,ແລວຄວາມຄິດຕັດສິນທາງອອກ.ຫຼາຍປີມານີ້,ເພື່ອອອກແຮງຊຸກຍູ້ເສດຖະກິດສັງຄົມຂອງທົ່ວເມືອງໃຫ້ບັນລຸການພັດທະນາແບບກ້າວກະໂດດ,ສ້າງພື້ນຖານອັນໝັ້ນແກ່ນເພື່ອບັນລຸການເຫຼືອຢູ່ເຫຼືອກິນ,ອົງການປົກຄອງເມືອງຢັ້ງປີ້ໄດ້ສົມທົບກັບສະພາບຕົວຈິງ,ອີງໃສ່ທ່າແຮງຊັບພະຍາກອນທຳມະຊາດຂອງເມືອງຢັ້ງປີ້,ໄດ້ວາງແລວຄວາມຄິດພັດທະນາທີ່ສອດຄ່ອງກັບສະພາບຕົວຈິງຂອງເມືອງ.
ການຫັນການພັດທະນາໝາກມັນຫໍ້ໃຫ້ເປັນແບບອຸດສາຫະກຳໄດ້ກາຍເປັນຂອດສຳຄັນໃນການພັດທະນາເມືອງຢັ້ງປີ້.ທ່ານສາຈົ່ງວ້າງ ເລຂາຄະນະພັກເມືອງຢັ້ງປີ້ສະເໜີໃຫ້ຮູ້ວ່າ:"ເມືອງຢັ້ງປ້ີມີປະຫວັດປູກໝາກມັນຫໍ້ມາຍາວນານ.ເມື່ອ3500ກວ່າປີກ່ອນກໍໄດ້ມີຕົ້ນໝາກມັນຫໍ້ເກີດຢູ່ຫັ້ນແລ້ວ.ໝາກມັນຫໍ້ຢັ້ງປີ້ມີຊື່ສຽງຍ້ອນເປັນໝາກໜ່ວຍໃຫຍ່,ເປືອກບາງ,ເນື້ອຂາວ,ກິ່ນຫອມແລະມີເນື້ອຫຼາຍ.ມີຕົ້ນໝາກມັນຫໍ້ແຈກຢາຍຢູ່ທົ່ວທຸກແຫ່ງໃນເມືອງ,ຕົ້ນໝາກມັນຫໍ້ບູຮານທີ່ມີອາຍຸຫຼາຍຮ້ອຍປີ,ຈົນຮອດສູ່ມື້ນີ້ກໍຍັງເປັນໝາກດົກໜານັ້ນມີຢູ່ຫຼວງຫຼາຍ.ໃນງານຮ່ວມມືເຕັກນິກປູກຕົ້ນໝາກມັນຫໍ້ທົ່ວປະເທດຈີນເມື່ອປີ1979,ໝາກມັນຫໍ້ຂອງເມືອງຢັ້ງປີ້ເຄີຍໄດ້ຮັບລາງວັນ"ຄຸນນະພາບທີໜຶ່ງໃນທົ່ວປະເທດຈີນ".ປີ1995,ຄະນະລັດຖະບານຈີນໄດ້ຕົກລົງມອບນາມມະຍົດເປັນ"ບ້ານໝາກມັນຫໍ້ຂອງຈີນ"ໃຫ້ເມືອງຢັ້ງປີ້.ໝາກມັນຫໍ້ແມ່ນຜະລິດຕະພັນກະສິກຳສຳຮອງຢ່າງດຽວທີ່ລາຄາບໍ່ເຄີຍຕົກມີແຕ່ເພີ່ມຂຶ້ນໃນ20ກວ່າປີແຕ່ດຳເນີນການປະຕິຮູບມານີ້."
ໃນຫຼາຍປີມານີ້,ເມືອງຢັ້ງປີ້ໄດ້ຖືການພັດທະນາໝາກມັນຫໍ້ເປັນອຸດສາຫະກຳເສົາຄ້ຳ.ປະຈຸບັນ,ທົ່ວເມືອງມີເນື້ອທີ່ປູກຕົ້ນໝາກມັນຫໍ້2ແສນ8ໝື່ນ4ພັນໄຮ່ຈີນ.ມີຕົ້ນໝາກມັນຫໍ້2ລ້ານ8ແສນ4ໝື່ນຕົ້ນ.ໃນ11ຕາແສງຂອງເມືອງຢັ້ງປີ້,ຄອບຄົວຊາວນາ84,4%ປູກຕົ້ນໝາກມັນຫໍ້.ການປູກຕົ້ນໝາກມັນຫໍ້ໄດ້ຊັກນຳການພັດທະນາອຸດສາຫະກຳປຸງແຕ່ງໝາກມັນຫໍ້ຢັ້ງປີ້,ໄດ້ຈໍ່ຕົວເປັນສະຖານະພາບການພັດທະນາແບບທຳການຜະລິດ,ການປຸງແຕ່ງແລະການຈຳໜ່າຍເປັນເອກະພົບດຽວ.ແຕ່ລະປີໄດ້ປຸງແຕ່ງໝາກມັນຫໍ້7000ກວ່າໂຕນ.ການຈຳໜ່າຍໝາກມັນຫໍ້ຕໍ່ປີໄດ້ກວມ1/4ຂອງທົ່ວປະເທດ.
ທ່ານສາຈົ່ງວ້າງ ເລຂາຄະນະພັກເມືອງຢັ້ງປີ້ເວົ້າຢ່າງພາກພູມໃຈວ່າ:"ປະຈຸບັນ,ຕະຫຼາດນັດໝາກມັນຫໍ້ໃຫຍ່ກວ່າໝູ່ໃນທົ່ວປະເທດຂອງພວກເຮົາກຳລັງກໍ່ສ້າງຢູ່,ຕໍ່ໄປພາຍໜ້າ,ເມືອງຢັ້ງປີ້ຈະກາຍເປັນບ່ອນຊື້ຂາຍໝາກມັນຫໍ້ໃຫຍ່ກວ່າໝູ່ຂອງທົ່ວປະເທດ."
ຄຽງຄູ່ກັບການພັດທະນາອຸດສາຫະກຳໝາກມັນຫໍ້ມີການບຸກທະລຸ,ເນື້ອທີ່ປູກພືດເສດຖະກິດທີ່ມີສີສັນພິເສດແລະມີຄຸນນະພາບດີເຊັ່ນມັນແຊງ,ມັນຝະຣັ່ງແລະພືດອື່ນໆໄດ້ເປີດກວ້າງອອກ,ອັນໄດ້ລາກແກ່ຕ່ອງໂສ້ອຸດສາຫະກຳ,ເພີ່ມມູນຄ່າເພີ່ມໃຫ້ຫຼາຍຂຶ້ນ,ໄດ້ສ້າງແຫຼ່ງໂຄງການຫັນກະສິກຳເປັນອຸສາຫະກຳແລະສ້າງວິສາຫະກິດຫົວມັງກອນທີ່ໃຫຍ່ແລະເຂັ້ມແຂງຈຳນວນຫຼວງຫຼາຍ.
ທ້າຍປີ2003,ຍອດປະລິມານທັນຍາຫານຂອງເມືອງຢັ້ງປີ້ບັນລຸເຖິງ43ລ້ານກວ່າກິໂລ,ລາຍໄດ້ສຸດທິສະເລ່ຍຕໍ່ຫົວຄົນຂອງຊາວນາບັນລຸເຖິງ1366ຢວນ,ບັນລຸGDP300ລ້ານກວ່າຢວນ,ເພີ່ມຂຶ້ນຫຼາຍກວ່າເວລາດຽວກັນໃນປີ2002 12,3%.
ນອກນີ້,ເມືອງຢັ້ງປີ້ຍັງໄດ້ໝູນອ້ອມຈຸດໝາຍທີ່ສ້າງສັງຄົມເຫຼືອຢູ່ເຫຼືອກິນຢ່າງຮອບດ້ານ,ໄດ້ສະເໜີໃຫ້ສ້າງຕັ້ງ5ອຸດສາຫະກຳເສົາຄຳ້ຄື,ອຸສາຫະກຳທີ່ມີສີສັນພິເສດ,ການຜະລິດຢາຊີວະຊາດ,ການລ້ຽງສັດ,ຢາສູບແລະການທ່ອງທ່ຽວ.
ທ່ານສາຈົ່ງວ້າງ ເລຂາຄະນະພັກເມືອງຢັ້ງປີ້ກ່າວວ່າ:"ເປົ້າໝາຍສູ້ຊົນໃນປີ2010ຂອງພວກເຮົາແມ່ນແຈ່ມແຈ້ງທີ່ສຸດຄື,ເຮັດໃຫ້GDPໃນທົ່ວເມືອງເພີ່ມຂຶ້ນຫຼາຍກວ່າປີ2000ໜື່ງເທົ່າ,ເຮັດໃຫ້ການລົງທຶນອະສັງຫາລິມະຊັບໃນທົ່ວສັງຄົມເພີ່ມຂຶ້ນ12%ຂຶ້ນໄປຕໍ່ປີ.ເຮັດໃຫ້ຍອດຈຳນວນລາຍຮັບການເງິນເພີ່ມຂຶ້ນ15%ຂຶ້ນໄປຕໍ່ປີ.ເຮັດໃຫ້ລາຍໄດ້ສຸດທິສະເລ່ຍຕາມຫົວຄົນຕໍ່ປີຂອງຊາວນາເພີ່ມຂຶ້ນ50ຢວນຂຶ້ນໄປ.ອະນາຄົດຂອງເມືອງຢັ້ງປີ້ແມ່ນເຕັມໄປດ້ວຍພະລັງຊີວິດແລະຄວາມຫວັງອັນສະຫວ່າງສະໄຫວ.
|
