|
ໃນສະໄໝຈີນບູຮານ,ມີເຄື່ອງເສບຊະນິດໜຶ່ງເອີ້ນວ່າຢູ,ຢູຄ້າຍຄືກັນກັບແຄນຂອງລາວ, ເວລາເປ່ົາ,ມີສຽງມວນມ່ວນ.
ໃນສະໄໝຍຸດທະຈັກ,ເຈົ້າຊີວິດຊີຊ່ວນຂອງລັດຊີມັກຟັງເຄື່ອງເສບດົນຕີທ່ີສຸດ ໂດຍສະເພາະແມ່ນມັກຟັງເປົ່າຢູຫຼາຍກວ່າເພິ່ນ.ແຕ່ເຈົ້າຊີວິດອົງນີ້ພັດຕ່າງກັບຄົນທົ່ວໄປ,ເພາະເພິ່ນມັກແຕ່ສະພາບມີຄົນເປົ່າຢູເປັນວົງໃຫຍ່.ສະນັ້ນເພິ່ນຈຶ່ງຕັດສັ່ງຮຽກໂຮມຜູ່ທີ່ເປົ່າຢູເປັນໃນແຫ່ງຕ່າງໆມາປະກອບເປັນວົງດົນຕີອັນໃຫຍ່ໂຕທີ່ມີຕັ້ງສາມຮ້ອຍຄົນ.ໃນເວລາເພິ່ນຢາກຟັງເຄື່ອງເສບເປົ່າຢູຫຼືວ່າຈັດງານລ້ຽງອັນຄຶກຄື້ນເທື່ອໃດ,ຈຶ່ງໃຫ້ສາມຮ້ອຍຄົນເຫລົ່ານັ້ນມາເປົ່າຢູໃຫ້ເພິ່ນຟັງ,ເມື່ອເຈົ້າຊີວິດຊີຊ່ວນເຫັນສະພາບອັນໃຫຍ່ໂຕມະໂຫລານດັ່ງກ່າວກໍ່ໍຊົງອະພິລົມຊົມຊື່ນເປັນຢ່າງຍິ່ງ.
ມີຄົນຜູ່ໜ່ຶງຊ່ືວ່ານານກົວະ,ເປັນຄົນຂີ້ຄ້ານມັກງ່າຍ,ເກີດເປັນມື້ມີແຕ່ທ່ຽວເຕະຝຸ່ນຢູ່ກາງບ້ານ,ຮຽນວິຊາຫຍັງກໍບໍ່ເປັນ,ເລື່ອງເປົ່າຢູນັ້ນກໍ່ແຮງບໍ່ຮູ້ຫຍັງເລີຍ.ແຕ່ວ່າຫລັງຈາກທ້າວນານກົວະຮູ້ຂ່າວວ່າເຈົ້າຊີວິດຊີຊວນມັກຟັງສຽງເສບຢູພ້ອມກັນສາມຮ້ອຍຄົນ,ເລີຍຮູ້ສຶກວ່າອັນເລື່ອງແນວນີ້ເປັນໂອກາດທີ່ດີທີ່ສຸດບັດນັ້ນທ້າວນານກົວະຈິ່ງຟ້າວໄປຄຸຍໂມ້ໂອ້ອວດຢູ່ພະລາດຊະວັງວ່າ,ຕົນເປົ່າເກັ່ງແນວນັ້ນແນວນີ້.ຈົນຜູ່ຮັບຜິດຊອບຄອບຄອງວົງດົນຕີເລີຍຖືກຄຳນ້ຳອ້ອຍນ້ຳຕານຫລອກຕົ້ມຈົນຫົວປິ່ນແລ້ວເລີຍຈັດຜູ່ກ່ຽວເຂົາເຂົ້າໄວ້ໃນວົງດົນຕີເປົ່າຢູ,ໃຫ້ເຂົາເປົ່ານຳກັນກັບຫມູ່ໃນວົງດົນຕີນັ້ນສາ.
ເມື່ອທ້າວນານກົວະປົນຢູ່ນຳກັນກັບຫມູ່ໃນຄະນະເສບ, ເພ່ນກໍ່ເຮັດຕາງຕິຄາບຢູ່ໃນສົບ,ເບິ່ງແກ້ມທັງສອງເບື້ອງ,ເຮັດຫົວເວໄປເວມາພໍໃຫ້ມັນຄື,ຈົນຄົນທັງຫຼາຍຫລົງເຊື່ອຖືວ່າລາວເປັນຄົນເປົ່າເກັ່ງໆ,ຈິ່ງພາກັນຍ້ອງລາວເປັນພໍ່ຄູນານກົວະ.ແລະກໍແມ່ນຍ້ອນອີງໃສ່ຮູບຊົງແບບປອມແປງດັ່ງກ່າວນີ້ເອງ,ທ້າວນານກົວະຈິ່ງຫາວຽກໄດ້ພໍຢູ່ມົ້ມມື້ມົ້ມເວັນໃນວົງດົນຕີ,ພ້ອມທັງກໍ່ໄດ້ຮັບຄຳຍ້ອງຍໍແລະລາງວັນຈາກເຈົ້າຊີວິດຊີຊ່ວນ,ອັນເຮັດໃຫ້ເພິ່ນຮູ້ສຶກມີຄວາມປິຕິຍິນດີເປັນຢ່າງຍິ່ງ.
ພາຍລຸນມາ,ເຈົ້າຊີວິດຊີຊ່ວນສະຫວັນລະຄົດ,ເຈົ້າຊີວິດຊີໝີນກໍ່ຊົງສືບພະລາດຊະບັນລັງແທນ.ເຈົ້າຊີ ວິດຊີໝີນກໍມັກຟັງສຽງເປົ່າຢູຄືກັນກັບເຈົ້າຊີວິດຊີຊ່ວນ,ຕ່າງແຕ່ວ່າເພິ່ນບໍ່ມັກໃຫ້ເສບຫລາຍໆຄົນແບບຫລູຫລາຄືເຈົ້າຊີວິດອົງກ່ອນ,ເພິ່ນມີ່ມັກຟັງສຽງເປົ່າຢູໂດຍຜູ່ດຽວ.ພໍຮູ້ຂ່າວນີ້ແລ້ວ,ທ້າວນານກົວະກໍ່ຢ້ານຈົນເຫື່ອແຕກເຫື່ອແຕນ,ນຶກວ່າກົນລວງຂອງຕົນຈະອຳໄວ້ບໍ່ໄດ້ອີກແລ້ວ,ຖ້າເລື່ອງຈິ່ງດັ່ງກ່າວເຜີຍອອກ,ແນ່ອນນຈະຖືກ ຕັດສິນລົງໂທດໃນຖານຫຼອກລວງເຈົ້າຊີວິດ,ສະນັ້ນຈິ່ງຟ້າວລັກໂຕນຫນີໄປໄວໆ...
ເພື່ອນຜູ່ຟັງ,ທີ່ທ່ານຫາກໍຟັງມານັ້ນແມ່ນນິທານສຸພາສິດທີ່ວ່າລ້ານຢູຊ່ົງຊູ້ ແປວ່າເປົ່າບໍ່ເປັນພັດເຮັດຕາງຕິເປັນຄົນເປ່ົາເກັ່ງ.ໃນຊີວິດປະຈຳວັນ,ພວກເຮົາມັກສວຍໃຊ້ສຸພາສິດຄຳນີ້ມາສຽດສີຄົນທີ່ບໍ່ມີສີມືເກັ່ງພັດເຮັດຕາງຕິເປັນຜູ່ມີສີໄມ້ລາຍມືຍອດຢ້ຽມ,ໄປຫຼອກລວງຜູ່ອື່ນທົ່ວທີບ.ບາງທີກໍໃຊ້ສຸພາສິດຄຳນີ້ມາສະແດງຄວາມຖະໜອມຖ່ອມຕົວ,ຫຼືອຸປະມາການໃຊ້ເຄື່ອງຂອງທີ່ຄຸນນະພາບບໍ່ດີເປັນຂອງຄຸນນະພາບດີກໍ່ມີ.
|
