|
ລູງແມ່ນຄູອາຈານຜູ່ໜ່ຶງ, ແຕ່ງນິຍາຍເດັກໃນຍາມນອກໂມງການ,ບົດປະພັນຂອງລູງໄດ້ນຳຄວາມມ່ວນຊື່ນຢ່ວງຫຼວງຫຼາຍມາໃຫ້ເດັກນ້ອຍຈີນຫຼາຍຮ້ອຍລ້ານຄົນ, ລູງກໍໄດ້ຮູ້ ສຶກຄຸນຄ່າຂອງຕົນ. ຜູ່ນີ້ກໍແມ່ນລູງຊຸ່ນໂຢ້ຈຸ່ນ ນັກປະພັນນິຍາຍເດັກທີ່ມີຊື່ສຽງທີ່ສຸດຂອງຈີນໃນຍຸກປະຈຸບັນ.
ລູງຊຸ່ນໂຢ້ຈຸ່ນປີນີ້ອາຍຸ71ປີ, ເກີດຢູ່ເມືອງຮ່າເອີປິ່ນແຂວງເຮ່ລົງຈ່ຽງທີ່ພາກຕາເວັນ ອອກສຽງເໜືອຂອງຈີນ. ໃນຍາມຍັງນ້ອຍ, ທ່ານດຳລົງຊີວິດທີ່ພັດເຊພະເນຈອນ. ຊຸມປີ 30 ສະຕະວັດແລ້ວນີ້, ທະຫານຍີ່ປຸ່ນທ່ີຮຸກຮານຈີນດຳເນີນການສຶກສາແບບລ່າເມືອງຂຶ້ນຢູ່ພາກຕາເວັນອອກສຽງເໜືອຂອງຈີນ, ທ່ານຊຸ່ນໂຢ້ຈຸ່ນທີ່ກຳລັງເຂົ້າໂຮງຮຽນປະຖົມຖືກບັງຄັບໃຫ້ຮຽນພາສາຍີ່ປຸ່ນ, ແຕ່ບໍ່ໄດ້ຄິດເລີຍວ່າ, ຫຼາຍສິບປີຜ່ານໄປແລ້ວ, ລູງຊຸ່ນໂຢຈຸ່ນໄດ້ຮຽນຮູ້ພາສາຍີ່ປຸ່ນໂດຍຕົນເອງບົນພື້ນຖານທີ່ໄດ້ຮຽນມາແຕ່ກ່ອນ, ແລະແປນິຍາຍເດັກຍີ່ປຸ່ນຫຼາຍບົດເລ່ືອງເປັນພາສາຈີນ, ປະກອບສ່ວນເຂົ້າໃນມິດຕະພາບລະຫວ່າງຈີນຍີ່ປຸ່ນ.
ລູງຊຸ່ນໂຢ້ຈຸ່ນເວົ້າວ່າ, ຕົນແຕ່ງນິຍາຍເດັກແມ່ນຍ້ອນຖືກຜົນສະທ້ອນຈາກສາມດ້ານ. ໜ່ຶງ,ໃນຍາມຍັງນ້ອຍ, ມັກຟັງນິຍາຍເດັກທີ່ສຸດ, ແມ່ນເຖົ້າຂອງເພິ່ນໄດ້ເລົ່ານິຍາຍເດັກອັນມ່ວນໆຈຳນວນຫຼວງຫຼາຍໃຫ້ເພິ່ນຟັງ; ປັດໄຈທີສອງແມ່ນ, ເພິ່ນເປັນລູກກົດ, ຕ້ອງເບິ່ງແຍງນ້ອງຊາຍນ້ອງສາວ, ເລົ່ານິທານໃຫ້ພວກນ້ອງຟັງກໍແມ່ນວິທີອັນບັງເກີດຜົນທີ່ສຸດທີ່ເຮັດໃຫ້ພວກນ້ອງຢູ່ມິດງຽບ. ນິທານທີ່ເລົ່າໃຫ້ພວກນ້ອງຟັງບາງເລື່ອງແມ່ນທ່ານຊຸ່ນໂຢ້ຈຸ່ນອ່ານຈາກປື້ມໜັງສື, ບາງເລື່ອງແມ່ນແຕ່ງໂດຍທ່ານເອງ. ແຕ່ໃນທີ່ສຸດ, ລູງເລີ່ມແຕ່ງນິຍາຍເດັກຢ່າງແທ້ຈິງນັ້ນແມ່ນຍ້ອນໂລກພະຍາດໜັກເທ່ືອໜ່ຶງ.
ລູງເວົ້າວ່າ, ການເລືອກເອົາການແຕ່ງນິຍາຍເດັກແມ່ນເລື່ອງບັງເອີນ. ລູງຮຽນຈົບຈາກມະຫາວິທະຍາໄລປັກກິ່ງແລ້ວ ກໍໄປເປັນອາຈານຢູ່ມະຫາວິທະຍາໄລການຕ່າງປະເທດ,ຄາວນັ້ນກໍເລີ່ມແຕ່ງນະວະນິນາຍຍາມນອກໂມງການ, ເມ່ືອໄດ້ແຕ່ງເປັນຊົ່ວໄລຍະໜ່ຶງແລ້ວ, ລູງເລີຍເຈັບປ່ວຍໜັກ, ນາຍໝໍຫ້າມບໍ່ໃຫ້ໄປໃສ, ສັ່ງໃຫ້ນອນເທິງຕຽງຕະຫຼອດເວັນຕະຫຼອດຄືນ, ລູງຈຶ່ງສຸມສາຍຕາໃສ່ຕຸ໊ກກາໂຕນ້ອຍໆໂຕໜ່ຶງທີ່ວາງໄວ້ຢູ່ສິ້ນຕຽງ, ແລະຄິດວ່າ, ຖ້າວ່າຕຸ໊ກຕາໂຕນີ້ຍ່າງໄປເປັນຈະພົບເລື່ອງຫຍັງແດ່? ຈັ່ງຊັ້ນ, ລູງກໍໄດ້ແຕ່ງ"ເລື່ອງອັດສະຈັນທີ່ຕຸ໊ກຕາສຽວປູ້ໂທພົບພໍ".
"ເລື່ອງອັນສະຈັນທີ່ຕຸ໊ກຕາສຽວປູ້ໂທພົບພໍ້"ແມ່ນນິຍາຍເດັກເລື່ອງທຳອິດຂອງລູງຊຸ່ນໂຢ້ຈຸ່ນ. ໃນນິຍາຍເດັກເລື່ອງນີ້ລູງຊຸ່ນໂຢ້ຈຸ່ນໄດ້ປະດິດສ້າງຕຸ໊ກຕາທີ່ໃຈດີແລະສະຫຼາດໂຕໜ່ຶງຊື່ວ່າສຽວປູ້ໂທ, ແລະເລົ່າເລື່ອງອັດສະຈັນທີ່ສຽວປູ້ໂທພົບພໍ້ໃນໂລກຕົວຈິງ. ຈົນຮອດປະຈຸບັນ, ເລື່ອງນີ້ຍັງແມ່ນນິຍາຍເດັກທີ່ເດັກນ້ອຍຈີນມັກທີ່ສຸດ. ພາຍຫຼັງມາ, ລູງຊຸ່ນໂຢ້ຈຸ່ນໄດ້ພິມຈຳໜ່າຍຊຸມນຸມນິຍາຍເດັກຫຼາຍເລື່ອງ, ເຊັ່ນ: "ແມງຫິ່ງ ຫ້ອຍຫາເພື່ອນ"ແລະ"ເປັດນ້ອຍຢາກອາບນ້ຳ"ເປັນຕົ້ນ.
ນັບມາຮອດປະຈຸບັນນີ້, ລູງຊຸ່ນໂຢ້ຈຸ່ນໄດ້ແຕ່ງນິຍາຍເດັກ 30 ກວ່າເລື່ອງແລ້ວ, ໃນນັ້ນສ່ວນຫຼາຍແມ່ນທ່ານສຳເລັດຍາມນອກໂມງການຫຼັງຊຸມປ 80 ສະຕະວັດແລ້ວນີ້.
ລູງເວົ້າວ່າ, ລູງຂຽນບົດປະພັນຍັງບໍ່ຫຼາຍປານໃດ, ເພາະວ່າລູງຍັງຕ້ອງສອນພາສາຈີນໃນມະຫາວິທະຍາໄລການຕ່າງປະເທດ, ຕ້ອງແກ້ການບ້ານຫຼາຍ. ແນວໃດກໍຕາມ, ການແຕ່ງນິຍາຍເດັກພຽງແຕ່ແມ່ນຄວາມມັກຂອງຕົນ, ຍ້ອນຄາວຽກຫຼາຍ, ທຳມະດາແລ້ວວ່າ, ລູງແມ່ນແຕ່ງຍາມນອກໂມງການແລະຍາມພັກລະດູຮ້ອນແລະລະດູໜາວ.
ນິຍາຍເດັກທ່ີລູງຊຸ່ນໂຢ້ຈຸ່ນແຕ່ງນັ້ນໄດ້ຮັບການຕີລາຄາສູງຢ່າງກວ້າງຂວາງ. ລູງເຄີຍຮັບ ລາງວັນດີເລີດດ້ານວັນນະຄະດີເດັກນ້ອຍທົ່ວປະເທດຈີນ, ແລະຮັບລາງວັນສະເໜີຊ່ືປື້ມແຫ່ງຊາດຈີນເປັນຕົ້ນ. ປີ1990, ລູງຊຸ່ນໂຢ້ຈຸ່ນຖືກສະເໜີເປັນລາງວັນວັນນະຄະດີອານແດກເຊິນສາກົນ, ໄປຮັບລາງວັນຢູ່ອາເມລິກາ.
ໃນປະຈຸບັນນີ້, ນັບແຕ່ນິຍາຍເດັກຈົນຮອດວັນນະຄະດີເດັກຂອງຈີນບໍ່ຮຸ່ງປານໃດ, ແຕ່ລູງຊຸ່ນໂຢ້ຈຸ່ນຍັງໝັ່ນຂຽນຢູ່ຄືເກົ່າ, ເຖິງວ່າທ່ານໄດ້ອອກກິນເບ້ຍບຳນານແລ້ວກໍຕາມ. ລູງຫວັງສະໜອງອາຫານດ້ານຈິດໃຈໃຫ້ພວກຫຼານນ້ອຍ.
ລູງເວົ້າວ່າ, ພວກຫຼານນ້ອຍຄວນມີວັນນະຄະດີຂອງຕົນ.ນິຍາຍເດັກແມ່ນຮູບການທີ່ພວກຫຼານນ້ອຍ, ມັກອ່ານມັກຟັງ, ດັ່ງນັ້ນ, ລູງເຫັນວ່າ, ຜູ່ໃຫຍ່ຖ້າຢາກສະໜອງວັນນະຄະດີໃຫ້ພວກຫຼານນ້ອຍແລ້ວຕ້ອງໃຫ້ມີຄຸນນະພາບສູງ. ຄວນປະດິດສ້າງບຸກຄົນທີ່ມີບຸກຄະລິກແລະມີນິໄສ, ມີພາບພົດອັນເລິກເຊີງໃຫ້ພວກຫຼານນ້ອຍເຊື້ອໄດ້.
ລູງຊຸ່ນໂຢ້ຈຸ່ນເວົ້າວ່າ, ເຖິງວ່າຕົນໄດ້ຮັບຜົນງານບາງຢ່າງໃນດ້ານແຕ່ງນິຍາຍເດັກ, ແຕ່ລູງເຫັນວ່າການຂຽນບົດປະພັນສຳລັບເດັກນ້ອຍແມ່ນເລ່ືອງຍາກ, ວັນນະຄະດີເດັກນ້ອຍແມ່ນວັນນະຄະດີທີ່ຂຽນໃຫ້ເດັກນ້ອຍອ່ານ, ຫາກບໍ່ແມ່ນເອົາວັນນະຄະດີຜູ່ໃຫຍ່ເດັກນ້ອຍອ່ານ, ສະນັ້ນ, ຕ້ອງຮູ້ຈັກຈຸດພິເສດຈິດໃຈ ນິໄສໃຈແລະການປາກເວົ້າຂອງຫຼານນ້ອຍ. ນີ້ບໍ່ແມ່ນເລື່ອງສຳລັບຜູໃຫຍ່ທີ່ອາຍຸເຖົ້າແກ່ແລ້ວ.
|
