|
ໃນສະໄໝຊຸນຊິວ,ເຈົ້າຄອງລັດຈິ້ນຢາກຂະຫຍາຍກຳລັງແລະດິນແດນຂອງຕົນໃຫ້ກວ້າງ ອອກ,ກໍເລີຍຫາຂໍອ້າງທີ່ວ່າລັດກົວະ ເຊິ່ງເປັນລັດມໍ່ຄຽງມັກລ່ວງລ້ຳເຂດຊາຍແດນຂອງລັດຈິ້ນເລື່ອຍໆ,ຈຶ່ງຢາກສົ່ງທະຫານໄປດັບສູນລັດກົວະ.ແຕ່ວ່າຢູ່ລະຫວ່າງກາງລັດຈິ້ນ ກັບລັດກົວະພັດຍັງມີລັດຢູລັດໜຶ່ງ,ຢາກສົ່ງທະຫານໄປລັດກົວະຈຳຕ້ອງຜ່ານດິນແດນຂອງລັດຢູ.
ເມ່ືອເປັນແນວນັ້ນ,"ເຮັດແນວໃດຈຶ່ງຈະຜ່ານລັດໄດ້ໂດຍສະດວກ?"ເຈົ້າຄອງລັດຈິ້ນຈຶ່ງ ຖາມເສນາອາມາດເພິ່ນ.ທ່ານຊຸນຊີ່ ມະຫາເສນາບໍດີຂອງລັດຈິ້ນເວົ້າວ່າ: "ເຈົ້າຄອງລັດຢູແມ່ນຄົນສາຍຕາສັ້ນ,ໂລບກິນແຕ່ຜົນປະໂຫຍດແນວນ້ອຍໆ.ຖ້າພວກເຮົາຫາກສົ່ງເພັດນິນຈິນດາແລະມ້າໂຕລ້ຳຄ່າໃຫ້ເພິ່ນ,ເພິ່ນກໍບໍ່ຫ່ອນຈະບໍ່ເຫັນດີໃຫ້ພວກເຮົາຜ່ານດິນແດນຂອງລັດຢູ." ເຈົ້າຄອງລັດຈິ້ນຟັງແລ້ວ,ເຫັນວ່າການສົ່ງຂອງຂວັນອັນລ້ຳຄ່າຫຼາຍ ປານນີ້ເສຍດາຍແທ້ໆໄດ,ຈາກນັ້ນ,ທ່ານຊຸນຊີ່ກໍອ່ານອອກແນວຄິດຂອງເຈົ້າຄອງລັດຈິ້ນ,ຈຶ່ງເລີຍເວົ້າຂຶ້ນວ່າ: "ລັດຢູກັບລັດກົວະແມ່ນລັດໃກ້ຄຽງທີ່ຕ່າງຝ່າຍຕ່າງອີງໃສ່ກັນ, ເມື່ອລັດກົວະຖືກດັບສູນແລ້ວ,ລັດຢູກໍຈະຢູ່ບໍ່ລອດຄືກັນ.ເພັດນິນຈິນດາແລະມ້າໂຕລ້ຳ ຄ່ານັ້ນກໍພຽງແຕ່ເອົາໄປຝາກໄວ້ນຳເຈົ້າຄອງລັດຢູຊົ່ວຄາວທໍ່ນັ້ນ." ເມື່ອເຈົ້າຄອງລັດຈິ້ນຟັງແລ້ວເລີຍຮັບເອົາຍຸດໂທບາຍຂອງທ່ານຊຸນຊີ່.
ເມ່ືອເຈົ້າຄອງລັດຢູຮັບຂອງຂວັນອັນລຳ້ຄ່າກໍດີອົກດີໃຈບັກໃຫຍ່,ເມື່ອຟັງທ່ານຊຸນຊີ່ກ່າວເຖິງເລື່ອງທີ່ລັດຈິ້ນຢາກຜ່ານດິນແດນຂອງລັດຢູໄປບຸກໂຈມຕີລັດກົວະ,ກໍ່ເຫັນດີປຶບປັບໂລດ.ພໍທ່ານກົ່ງຈື່ຊີ ມະຫາເສນາບໍດີຂອງລັດຢູຊາບແລ້ວ,ກໍຟ້າວຂັດຂວາງໂລດວ່າ: "ບໍ່ໄດ້,ບໍ່ໄດ້,ລັດຢູກັບລັດກົວະແມ່ນລັດໃກ້ຄຽງເຊິ່ງຕ່າງຄົນຕ່າງອີງໃສ່ກັນປານສົບກັບແຂ້ວ, ຕາມຄຳບູຮານເພິ່ນເວົ້າວ່າ,ບໍ່ມີສົບແລ້ວ,ແຂ້ວກໍ່ຈະໜາວ.ໝາຍຄວາມວ່າເມື່ອບໍ່ມີສົບແລ້ວ,ແຂ້ວກໍຈະຮັກສາໄວ້ບໍ່ໄດ້.ສອງລັດນ້ອຍໆພວກເຮົາແມ່ນຕ່າງອີງໃສ່ກັນ,ມີຄວາມຫຍຸ້ງຍາກຫຍັງກໍຊ່ອຍເຫຼືອກັນ,ຖ້າວ່າລັດກົວະຖືກດັບສູນ,ລັດຢູເຮົາກໍຮັກສາໄວ້ບໍ່ໄດ້,ສະນັ້ນເຮັດແນວໃດກໍ່ບໍ່ໃຫ້ລັດຈິ້ນຜ່ານດິນແດນຂອງພວກເຮົາໄປບຸກໂຈມຕີລັດກົວະເປັນອັນຂາດ."ເຈົ້າຄອງລັດຢູເວົ້າວ່າ:"ລັດຈິ້ນແມ່ນລັດໃຫຍ່,ເທ່ືອນີ້ສົ່ງເພັດນິນຈິນດາແລະມ້າໂຕລ້ຳຄ່າມາໃຫ້ເປັນພິເສດ,ເພື່ອຢາກແຮກສ່ຽວກັບລັດເຮົາ,ຄັນຊັ້ນພວກເຮົາໃຫ້ລັດຈິ້ນຜ່ານດິນແດນຂອງລັດເຮົາບໍ່ໄດ້ຊັ້ນຫວະ?" ທ່ານກົ່ງຈືຊີຈຶ່ງຈົ່ມໂອະຈົ່ມອ້ວຍວ່າ, ວັນເວລາທ່ີລັດຢູຈະຖືກດັບສູນນັ້ນແມ່ນບໍ່ດົນແລ້ວ,ບັດນັ້ນຈຶ່ງພາຄອບພາຄົວໜີຈາກລັດຢູ.
ມັນກໍຄືກັບຄຳເວົ້າຂອງທ່ານກົ່ງຈືຊີແທ້ໆ,ພາຍຫຼັງກອງທະຫານຂອງລັດຈິ້ນຜ່ານດິນແດນຂອງລັດຢູໄປດັບສູນລັດກົວະແລ້ວ,ກໍຈັບຕົວເຈົ້າຄອງລັດຢູທີ່ພວມອອກໄປຕ້ອນຮັບກອງທະຫານລັດຈິ້ນໂດຍພະອົງເອງ,ແລະດັບສູນລັດຢູ.
ນີ້ກໍ່ແມ່ນເລື່ອງສຸພາສິດ"ຊຸນອວງສືຮານ" -- ສົບບໍ່ມີແລ້ວ,ແຂ້ວກໍຈະໜາວ.ພວກເຮົາມັກໃຊ້ສຸພາສິດຄຳນີ້ມາສົມມຸດສອງຝ່າຍມີການພົວພັນຢ່າງສະໜິດແໜ້ນ,ຕ່າງອີງໃສ່ກັນ.
|
