|
ກອງປະຊຸມຄະນະກຳມະການມໍລະດົກໂລກຄັ້ງທີ28ຂອງອົງການຢູເນັສໂກຈັດຂຶ້ນຢູ່ເມືອງຊູ່ໂຈ່ວ ຕົວເມືອງທ່ອງທ່ຽວທີ່ມີຊື່ສຽງທາງພາກຕາເວັນອອກຂອງຈີນແຕ່ວັນທີ28ມິຖຸນາຮອດວັນທີ7ກໍລະກົດ.ນີ້ແມ່ນຈີນຈັດກອງປະຊຸມສາກົນທີ່ກ່ຽວກັບມໍລະດົກໂລກເປັນຄັ້ງທຳອິດ.ບຸກຄົນທີ່ກ່ຽວຂ້ອງເຫັນວ່າ,ທັງນີ້ໄດ້ສ່ອງແສງໃຫ້ເຫັນຄວາມຮັບຮອງຂອງປະຊາຄົມໂລກທີ່ມີຕໍ່ວຽກງານອະນຸລັກມໍລະດົກໂລກຂອງຈີນ.
(ຕົວໜັງສືຈີນທີ່ແກະສະຫຼັກໃສ່ຜາຂອງພູທ້າຍຊ່ານ)
ປີ1972,ອົງການຢູເນັສໂກໄດ້ຜ່ານຮັບຮອງ《ສົນທິສັນຍາມໍລະດົກໂລກ》.ຈີນເຂົ້າຮ່ວມ ສົນທິສັນຍາສະບັບນີ້ເມື່ອປີ1985.ປະຈຸບັນນີ້,ຈີນໄດ້ມີມໍລະດົກວັດທະນະທຳແລະທຳມະຊາດ29ລາຍຖືກຈັດເຂົ້າໃນບັນຊີລາຍຊື່ມໍລະດົກໂລກ,ຈຳນວນດັ່ງກ່າວເປັນທີສາມໃນໂລກ.ໃນນັ້ນ,ບ່ອນທ່ອງທ່ຽວທີ່ມີຊື່ສຽງ4ແຫ່ງເຊັ່ນພູທ້າຍຊ່ານ ພູຮວງຊ່ານ ພະພຸດທະຮູບໃຫຍ່ເລີ້ຊ່ານຂອງພູເອີເມຊ່ານແລະພູອູອີຊ່ານຖືກຈັດເປັນມໍລະດົກວັດທະນະທຳທັງເປັນມໍລະດົກທຳມະຊາດຂອງໂລກ.ນອກນີ້,ຈີນຍັງມີຮ້ອຍກວ່າໂຄງການພວມຮ້ອງຂໍຈັດເປັນມໍລະດົກໂລກ,ແມ່ນໜ່ຶງໃນບັນດາປະເທດທີ່ມີຈຳນວນໂຄງການທີ່ຮ້ອງຂໍຈັດເປັນມໍລະດົກໂລກຫຼາຍກວ່າໝູ່.ທ່ານຈ່າງຊິ່ນເຊີ້ງ ຫົວໜ້າຄະນະກຳມະການທົ່ວປະເທດອົງການຢູເນັສໂກຂອງຈີນເຫັນວ່າ,ມູນເຫດທີ່ຈີນສາມາດຮັບຜົນສຳເລັດຫຼາຍປານນີ້ໃນເວລາຂ້ອນຂ້າງສັ້ນນັ້ນ,ດ້ານໜຶ່ງແມ່ນຍ້ອນຈີນມີຊັບພະຍາກອນທຳມະຊາດແລະວັດທະນະທຳອັນອຸດົມສົມບູນ,ພ້ອມກັນນັ້ນ,ກໍ່ແມ່ນຍ້ອນລັດຖະບານຈີນເອົາໃຈໃສ່ໃນລະດັບສູງແລະໄດ້ໃຊ້ມາດຕະການຢ່າງແຂງແຮງ. ທ່ານເວົ້າວ່າ: "ກ່ຽວກັບມໍລະດົກວັດທະນະທຳ,ພວກຂ້າພະເຈົ້າໄດ້ກຳນົດຫຼັກການທີ່ຖືການອະນຸລັກເປັນຫຼັກ,ແລະເອົາການກອບກູ້ໄວ້ຢູ່ລຳດັບທີໜ່ຶງ,ຕ້ອງເພີ່ມທະວີການຄຸ້ມຄອງ,ແລະນຳໃຊ້ຢ່າງສົມເຫດສົມຜົນ.ກ່ຽວກັບມໍລະດົກວັດທະນະທຳ,ພວກຂ້າພະເຈົ້າກໍ່ໄດ້ກຳນົດຫຼັກການທີ່ອະນຸລັກຢ່າງເຄ່ັງຄັດແລະຄຸ້ມຄອງຢ່າງເປັນເອກະພາບ,ຕ້ອງໃຊ້ທິດທາງທີ່ນຳໃຊ້ຢ່າງສືບເນື່ອງໄດ້.ພ້ອມກັນນັ້ນ,ຍັງໄດ້ເພີ່ມທະວີການສ້າງກົດໝາຍແລະກົດບັນຍັດ,ອົງການປົກຄອງທ້ອງຖ່ິນແຫ່ງຕ່າງໆກໍ່ໄດ້ສ້າງກົດໝາຍກົດບັນຍັດທີ່ປະກອບເປັນຊຸດ."
(ຕົ້ນສົນຮັບແຂກຂອງພູຮວງຊ່ານ)
(ວັງກູ້ກົ່ງ)
ທ່ານຈ່າງຊິ່ນເຊິ້ງເວົ້າວ່າ,ໃນເກືອບສິບກວ່າປີມານີ້,ຈີນມີຄວາມພາດພັ້ງບາງຢ່າງໃນດ້ານອະນຸລັກມໍລະດົກໂລກ,ມີມໍລະດົກໂລກຈຳນວນໜ້ອຍທີ່ສຸດມີບັນຫາທີ່ພັດທະນາເກີນໄປແລະຖືກຄົນທຳລາຍ.ກ່ຽວກັບບັນຫາເຫຼົ່ານີ້,ລັດຖະບານຈີນເອົາໃຈໃສ່ໃນລະດັບສູງ,ແລະ ພວມໃຊ້ມາດຕະການຕ່າງໆເຊັ່ນເພີ່ມຄວາມແຮງທີ່ສ້າງກົດໝາຍແລະເພີ່ມການລົງທຶນເປັນຕົ້ນມາແກ້ໄຂໃຫ້ຕົກ.ຂໍຍົກເອົາວັງກູ້ກົ່ງມາເປັນຕົວຢ່າງ,ພະລາດຊະວັງທີ່ມີປະຫວັດເກືອບ600ປີແຫ່ງນີ້,ສິ່ງກໍ່ສ້າງສ່ວນຫຼາຍໄດ້ເປ່ເພແລ້ວ,ຫຼາຍປີມານີ້,ຜູ່ທ່ອງທ່ຽວທີ່ມາ ທ່ຽວຊົມວັງກູ້ກົ່ງເພີ່ມຂຶ້ນເປັນເທົ່າໆ,ປະລິມານຜູ່ທ່ອງທ່ຽວຕໍ່ປີມີເກືອບ10ລ້ານເທື່ອຄົນ.ເພື່ອອະນຸລັກວັງກູ້ກົ່ງຍິ່ງດີກວ່າເກົ່າ,ເລີ່ມແຕ່ປີ2003,ລັດຖະບານຈີນໄດ້ປະຕິສັງຂອນວັງກູ້ກົ່ງຢ່າງຮອບດ້ານເທື່ອລະກ້າວ,ກິດຈະການລາຍນີ້ຈະຍືດເຍືອ20ປີ.
(ຮູບແຕ້ມຝາຜະໜັງຕຸ່ນຮວງ)
ນອກຈາກລົງທຶນຫຼາຍກວ່າເກົ່າແລະເພີ່ມທະວີການສ້າງກົດໝາຍ,ພາຫະນະວິທະຍາສາດເຕັກນິກອັນໃໝ່ກໍ່ຖືກນຳໃຊ້ເຂົ້າໃນການອະນຸລັກແລະສ້ອມແປງມໍລະດົກໂລກຍິ່ງຫຼາຍກວ່າເກົ່າ.ພະພຸດທະຮູບເລີ້ຊ່ານທີ່ຕັ້ງຢູ່ແຂວງເຊສວນ,ສູງ71ແມັດ,ຖືກເອີ້ນເປັນພະພຸດທະຮູບໃຫຍ່ທີ່ໜ່ຶງຂອງໂລກ.ເນື່ອງຈາກຕາກແດດຕາມຝົນມາເປັນເວລາຫຼາຍຮ້ອຍປີ,ເຖິງວ່າມໍລະດົກໂລກອັນລ້ຳຄ່າແຫ່ງນີ້ໄດ້ຮັບການສ້ອມແປງຫຼາຍເທື່ອກໍ່ຕາມ, ແຕ່ບໍ່ໄດ້ຮັບຜົນສັກສິດອັນດີ.ຈົນຮອດຊຸມປີ90ສະຕະວັດແລ້ວນີ້,ບັນດາຜູ່ຊ່ຽວຊານນຳໃຊ້ພາຫະນະວິທະຍາສາດເຕັກນິກຊະນິດຕ່າງໆ ເຊັ່ນໃຊ້ອຸນຕຼາໂຊນິກເປັນຕົ້ນມາກວດກາພະພຸດທະຮູບ,ໄດ້ສະໜອງຫຼັກອ້າງອີງໃຫ້ແກ່ການສ້ອມແປງຟື້ນຟູພະພຸດທະຮູບຢ່າງເຖິງຖອງ;ຮູບແຕ້ມຝາຜະໜັງຕຸ່ນຮວງທີ່ມີຊື່ສຽງໃນໂລກກໍ່ໄດ້ນຳໃຊ້ເຕັກນິກຮູບພາບຂອງຄອມພິວເຕີທີ່ກ້າວໜ້າກວ່າໝູ່,ໃຊ້ເຕັກນິກດັ່ງກ່າວ,ຄົນທັງຫຼາຍສາມາດກວດເບິ່ງຮູບສາມມິຕິຂອງຄູຫາຈາກທຸກທິດ,ແລ້ວບັນລຸຈຸດປະສົງທີ່ທັງຄົ້ນຄວ້າແລະທັງອະນຸລັກ;ໃນການອະນຸລັກຮູບປັ້ນທະຫານມ້າເຈົ້າຊີວິດຊິນສືອອງ ເຊິ່ງເປັນມໍລະດົກຂອງໂລກ,ຜູ່ຊ່ຽວຊານໄດ້ວາງແຜນການອະນຸລັກທີ່ສົມຄູ່ກັນໂດຍຜ່ານການວິໄຈທາດຍ້ອມສີຂອງຮູບປັ້ນ,ໄດ້ຮັບຜົນສັກສິດອັນດີງາມ.
(ພະພຸດທະຮູບໃຫຍ່ເລີ້ຊ່ານ)
ຕາມຊາບວ່າ,ໃນກອງປະຊຸມມໍລະດົກໂລກຄັ້ງນີ້,ຕົ້ນຕໍໄດ້ຫາລືຍຸດທະສາດທົ່ວໂລກກ່ຽວກັບມໍລະດົກໂລກ,ປະເມີນການອະນຸລັກແລະການຄຸ້ມຄອງມໍລະດົກໂລກຂອງປະເທດຕ່າງໆ.ໃນໄລຍະປະຊຸມ,ຍັງຈະຈັດງານວາງສະແດງມໍລະດົກໂລກຢ່າງຂະໜາດໃຫຍ່,ວາງສະແດງຜົນສຳເລັດທີ່ຈີນໄດ້ຮັບໃນຂົງເຂດອະນຸລັກມໍລະດົກໂລກ,ພ້ອມດ້ວຍສະພາບມໍລະດົກໃນທົ່ວໂລກ.
|
