|
ຢູ່ຈີນມີສຸພາສິດບູຮານເວົ້າວ່າ:ພະຍາດ 7 ສ່ວນ,ການບຳລຸງຮັກສາ 3 ສ່ວນຄືໝາຍຄວາມວ່າ,ເມື່ອຄົນເຮົາເຈັບໄຂ້ໄດ້ພະຍາດ,ໂດຍສະເພາະແມ່ນເປັນພະຍາດຊຳເຮື້ອແລ້ວ,ບໍ່ຕ້ອງຢ້ານ,ນອກຈາກໄປຫາໝໍປົວໃຫ້ແລ້ວ,ໃນຊີວິດປະຈຳວັນ ກໍຍັງຕ້ອງເອົາໃຈໃສ່ນຳຈິດໃຈຂອງຕົນແລະຜົນສະທ້ອນຂອງອາຫານ.
ນັກວິທະຍາສາດຍີ່ປຸ່ນເຄີຍໃຊ້ນ້ຳຊາຊາແດງທີ່ຈືດກວ່າຊາແດງທຳມະດາຖອກໃສ່ບ່ອນມີເຊື້ອໂລກ,ແຊ່ໄວ້ 5 ວິນາທີ,ເຊື້ອໂລກກໍໝົດລິດຕິດແປດຂອງມັນ. ດ້ວຍເຫດນີ້ ຜູ້ຄົ້ນຄວ້າສະເໜີອອກມາວ່າ,ໃນລະດູການທີ່ໄຂ້ຫວັດໃຫຍ່ລະບາດນັ້ນ,ຄັນເຮົາກິນາແດງເລື້ອຍໆຫຼືເອົານ້ຳຊາແດງມາບ້ວນປາກບ້ວນຄໍເລື້ອຍໆ ກໍປ້ອງກັນໄຂ້ຫວັດໄດ້.
ຝຣັ່ງ,ອີຕາລີແລະຍີ່ປຸ່ນລ້ວນແຕ່ເຄີຍແຈ້ງຂ່າວວ່າ,ຜູ້ເປັນໂລກເບົາຫວານທີ່ມັກຂາດວິຕາມິນເບ 6 ນັ້ນ ຖ້າກິນວິຕາມິນເບ 6 100 ມີລີກຼາມຊູ່ມື້,ຫຼັງຈາກນັ້ນ 6 ອາທິດ,ອາການຕ່າງໆເຊັ່ນແຂນຂາມືນຊາແລະເຈັບປວດເປັນຕົ້ນກໍຈະເບົາລົງຫຼືຫາຍໄປ. ໃນຍາມທຳມະດາ ໃຫ້ກິນອາຫານທີ່ມີວີຕາມິນເບ 6 ຫຼາຍ ຄື ເຂົ້າກ້ອງ,ແປ້ງໝີ່,ໄຂ່,ຜັກກາດຂາວແລະອື່ນໆ ກໍມີຜົນດີຕໍ່ການປ້ອງກັນປິ່ນປົວໂລກເບົາຫວານເຊັ່ນດຽວກັນ.
ຈາກສະຖິຕິການສຳຫຼວດລາຍໜຶ່ງຫວ່າງມໍ່ໆນີ້,ນັກປາດອາເມລິກາໄດ້ປະກົດເຫັນວ່າ,ໃນໝູ່ຄົນທີ່ສູບຢາແລະເປັນຫຼອດລົມອັກເສບຊຳເຮື້ອນັ້ນ ມີ 31,7% ບໍ່ກິນນ້ຳນົມຈັກເທື່ອ,ແຕ່ໃນຜູ້ສູບຢາທີ່ກິນນ້ຳນົມຊູ່ມື້ນັ້ນ ຜູ້ເປັນຫຼອດລົມອັກເສບ ພັດ ຕ່ຳກວ່າ 20%. ນີ້ແມ່ນຍ້ອນວ່າໃນນົມງົວມີວິຕາມິນອາຫຼາຍ,ກິນນົມງົວສາມາດປ້ອງກັນຫຼອດລົມບໍ່ອັກເສບງ່າຍ.
ເມື່ອນັກວິທະຍາສາດອັງກິດຄົ້ນຄວ້າຜູ້ເປັນພະຍາດຄໍ່ອັກເສບ 200 ຄົນແລ້ວໄດ້ຂໍ້ສະຫຼຸບໃໝ່ວ່າ:ຜູ້ເປັນຄໍ່ອັກເສບ ຖ້າກິນນ້ຳຍອດປ້ອນນາງເຜິ້ງມື້ລະເທື່ອ, ຄວາມເຈັບປວດກໍຈະທຸເລົາລົງເຄິ່ງໜຶ່ງ,ຄໍ່ກະດູກກໍຈະມ່ອນຂຶ້ນ 17%.
ທ່ານນາງ ມາລີ ໝໍພະດຸງຄັນອາເມລິກາຄົ້ນຄວ້າແລ້ວເຫັນວ່າ,ຜູ່ທີ່ທໍ່ປັດສາວະອັກເສບ ຖ້າກິນນ້ຳໝາກກ້ຽງມື້ລະ 300 cc ຈະຊ່ອຍປ້ອງກັນພະຍາດທໍ່ປັດສາວະອັກເສບ,ດີກວ່າກິນນ້ຳລ້າໆ. ເພາະວ່າ,ນ້ຳໝາກກ້ຽງບໍ່ພຽງແຕ່ຊ່ອຍລະບາຍແມ່ພະຍາດອອກຈາກຮ່າງກາຍ,ຫາກຍັງສາມາດປ້ອງກັນບໍ່ໃຫ້ແມ່ພະຍາດຕິດຢູ່ຕາມທໍ່ປັດສາວະ.
ວິທະຍານິພົນບົດໜຶ່ງທີ່ນັກຄົ້ນຄວ້າອາເມລິກາປະກາດໃນຫວ່າງມໍ່ໆນີ້ຊີ້ອອກວ່າ,ຖ້າກິນແກ່ນໝາກອຶມື້ລະກຳປະມານ 50 ກຼາມ ສາມາດປິ່ນປົວຕ່ອມໝາກອັນຖະບວມ,ແລະເຮັດໃຫ້ອາການໄລຍະທີສອງດີຄືນມາໄລຍະຕົ້ນ,ແລະປົວ ອາການໄລຍະທີສາມໃຫ້ດີຂຶ້ນຢ່າງເດັ່ນຊັດ. ເພາະວ່າທາດອິນຊີໃນແກ່ນໝາກອຶສາມາດແກ້ຕ່ອມໝາກອັນຖະບວມໃນໄລຍະຕົ້ນ,ພ້ອມທັງມີບົດບາດປ້ອງກັນມະເຮັງຕ່ອມໝາກອັນຖະ.
ການຄົ້ນຄວ້າຂອງມະຫາວິທະຍາໄລແຄມບຼິດອັງກິດສະແດງໃຫ້ເຫັນວ່າ,ອັດຕາເປັນມະເຮັງໄສ້ໃຫຍ່ຂອງຊາວອົສຕຼາລີແມ່ນ 4 ເທົ່າຂອງຊາວຈີນ,ມູນເຫດຕົ້ນຕໍອັນໜຶ່ງກໍແມ່ນຊາວອົສຕຼາລີກິນອາຫານທາດແປ້ງໜ້ອຍ(ຕ່ຳກວ່າ 100 ກຼາມຕໍ່ມື້),ແຕ່ຊາວຈີນກິນອາຫານທາດແປ້ງຫຼາຍ(ຄືສູງກວ່າ 370 ກຼາມຕໍ່ມື້). ບັນດາຜູ້ຊ່ຽວຊານເຫັນວ່າ,ທາດບູຕີເລດອັນອຸດົມສົມບູນໃນອາຫານທາດແປ້ງ ເຊັ່ນໃນໝາກກ້ວຍ,ມັນຝຣັ່ງແລະຖົ່ວລັນເຕົາເປັນຕົ້ນສາມາດລະງັບແມ່ພະຍາດໃນໄສ້ໃຫຍ່ແຜ່ເຊື້ອ,ແລະລະງັບຈຸລັງມະເຮັງເຕີບໂຕ.
ການຄົ້ນຄວ້າລາຍໜຶ່ງຂອງມະຫາວິທະຍາໄລຮາເວິດອາເມລິກາໃນມໍ່ໆນີ້ສະແດງໃຫ້ເຫັນວ່າ,ແຕ່ລະອາທິດກິນຜັກຕີນເປັດ 2 ເທື່ອຮອດ 4 ເທື່ອ ສາມາດ ຫຼຸດຜ່ອນຄວາມອັນຕະລາຍທີ່ເຍື່ອຮັບພາບໃນແກ້ວຕາເສື່ອມໂຊມ. ຕາມເວົ້າວ່າ, ຜັກຕີນເປັດຮັກສາຕາໄດ້ແມ່ນຍ້ອນວ່າໃນຜັກຕີນເປັດມີວັດຖຸຄ້າຍກາໂລຕິນ,ວັດຖຸ ຊະນິດນີ້ມີຢູ່ໃນຜັກໃບຂຽວ,ສາມາດປ້ອງກັນບໍ່ໃຫ້ແສງແດດທຳລາຍເຍື່ອຮັບພາບໃນແກ້ວຕາ.
|
