|
ທ່ີນີ້ວິທະຍຸສາກົນແຫ່ງປະເທດຈີນ, ສະບາຍດີທ່ານຜູ່ຟັງທ່ີໂຄລົບ, ຊົມເຊີຍທ່ານເຂົ້າສູ່ລາຍການນັດພົບໃນວັນອາທິດ. ຫວ່າງກ່ອນນີ້ບໍ່ດົນ ຄະນະດົນຕີຊົນຊາດເຫີງທົງເມືອງໄທ້ຊາງແຂວງຈຽງຊູພາກໃຕ້ຂອງຈີນໄດ້ຈັດງານດົນຕີຊືຈູພາກໃຕ້ແມ່ນ້ຳຢາງເຊໂດຍຈຳເພາະຢູ່ປັກກ່ິງ, ໃນລາຍການພາກນີ້ ຂ້າພະເຈົ້າຈະສະເໜີລາຍການດົນຕີຂອງຄະນະດ່ັງກ່າວສູ່ທ່ານຟັງ.
ທ່ີທ່ານພວມຟັງຢູ່ນີ້ແມ່ນດົນຕີທ່ີໃຫ້ຊ່ືວ່າ "ແຈແຈກາວ" ແປວ່າ "ສູງຂຶ້ນແຕ່ລະຂ້ໍ" ເຊ່ິງບັນເລງໂດຍຄະນະດົນຕີຊົນຊາດເຫີງທົງໄທ້ຊາງແຂວງຈຽງຊູ, ດົນຕີນີ້ມີເອກະລັກຂອງທ້ອງຖ່ິນຢ່າງຈະແຈ້ງ ແລະປ່ຽມລົ້ນໄປດ້ວຍກ່ິນອາຍຊີວິດຢ່າງເຂັ້ມຂຸ້ນ, ສະແດງອອກເຖິງຊີວິດການເປັນຢູ່ນັບມື້ນັບດີຂຶ້ນຄືກັບຕົ້ນໝາກງາທ່ີສູງຂຶ້ນເທ່ືອລະຂ້ໍ.
ດົນຕີຊືຈູພາກໃຕ້ແມ່ນ້ຳຢາງເຊແມ່ນດົນຕີບັນເລງດ້ວຍເຄ່ືອງເສບດີດສີຕີເປ່ົາເຊ່ັນ ຊໍ ກະຈັບປ່ີ ຂິມແລະຂຸ່ຍເປັນຕົ້ນ ນິຍົມກັນຫຼາຍຢູ່ພາກໃຕ້ແມ່ນ້ຳຢາງເຊ ຄືແຂວງຈຽງຊູ ແຂວງເຈີຈຽງແລະນະຄອນຊຽງໄຮ້ເປັນຕົ້ນ, ແຕ່ເດີມແມ່ນດົນຕີທ່ີເສບໃນຍາມບຸນປະເພນີແລະບຸນວັດ, ມີເອກະລັກນິ້ມນວນ ອ້ອຍອ່ິນແລະອ່ອນໂຍນ.
ຕາມການສຳຫຼວດ, ດົນຕີຊືຈູພາກໃຕ້ແມ່ນ້ຳຢາງເຊແມ່ນມີຂຶ້ນກ່ອນໝູ່ຢູ່ເມືອງໄທ້ຊາງ ທາງພາກຕາເວັນອອກຂອງແຂວງຈຽງຊູ. ມີປະຫວັດ 400 ກວ່າປີແລ້ວ ກໍຍັງສືບທອດກັນມາຢ່າງບໍ່ຂາດໄລຍະ, ເພ່ິນຈ່ຶງເອີ້ນເມືອງໄທ້ຊາງເປັນບ້ານເກີດຂອງດົນຕີຊືຈູພາກໃຕ້ແມ່ນຳຢາງເຊ.
ໃນຫຼາຍປີມໍ່ໆມານີ້ ທ່ານຈາງສຽວຟົງ ນັກດົນຕີທ່ີມີຊ່ືສຽງຂອງຈີນໄດ້ສັບຊ້ອນຮຽບຮຽງດົນຕີຊືຈູພາກໃຕ້ແມ່ນຳຢາງເຊທ່ີສືບທອດກັນມາ ເສີມອັນດີດັດແປງອັນບໍ່ມ່ວນ, ດົນຕີທ່ີທ່ານຮຽບຮຽງໃໝ່ຈ່ຶງຕ່າງກັບຮູບການເສບຮວມໝູ່ດັ້ງເດີມ, ແລ້ວໄດ້ຮັບໝາກຜົນທາງສິລະປະອັນໃໝ່ອ່ຽມ. ຜູ່ຊ່ຽວຊານຍ້ອງຍໍວ່າ ມັນໄດ້ສືບທອດແລະສ່ົງເສີມມູນເຊື້ອ ທັງມີບັນຍາກາດຂອງຍຸກໃໝ່.
ຕໍ່ໄປເຊີນຟັງດົນຕີ "ລ້ິວຮວາລິ້ວແຈ" ເຊ່ິງເປັນດົນຕີທ່ີຮຽບຮຽງຕາມເພງພື້ນເມືອງ, ທຳນອງດົນຕີນີ້ມ່ວນແຕ່ບໍ່ເອ້ອວດ ທັງລ່ຽນໄຫຼແບບທຳມະຊາດອີກດ້ວຍ.
ຄະນະດົນຕີຊົນຊາດເຫີງທົງໄທ້ຊາງແມ່ນຄະນະສິລະປະພື້ນເມືອງສະໝັກຫຼິ້ນ, ຕັ້ງຂຶ້ນເມ່ືອປີ 1994, ສະມາຊິກແມ່ນມາຈາກຂະແໜງການຕ່າງໆ ມີທັງລັດຖະກອນ ຄູອາຈານ ນັກທຸລະກິດແລະອື່ນໆ, ຄະນະດົນຕີນີ້ມີວັດຖຸປະສົງສ່ົງເສີມວັດທະນະທຳຊົນເຜ່ົາ ເຮັດໃຫ້ຊີວິດວັດທະນະທຳຂອງມວນຊົນມີຫຼາຍສີຫຼາຍສັນ. ພວກເພ່ິນຊຳນານຮ້ອງເພງພື້ນເມືອງພາກໃຕ້ແມ່ນ້ຳຢາງເຊ ຊ່າງຫຼິ້ນເຄ່ືອງເສບດີດສີຕີເປ່ົາຂອງທ້ອງຖ່ິນ. ປີ 2003, ຄະນະດ່ັງກ່າວໄດ້ໄປສະແດງຢູ່ສິງກະໂປໂດຍສະເພາະແລະໄດ້ຮັບຜົນສຳເລັດຢ່າງມະຫາສານ. ດົນຕີຊືຈູທ່ີພວກເພ່ິນເສບນັ້ນສົດໄສໄຫຼຫຼ່ຽນ, ສະແດງເຖິງຄວາມງາມຢ່າງທຳມະຊາດແລະກົມກຽວກ້ຽວພັນກັນຂອງດົນຕີພື້ນເມືອງ, ເໝືອນດ່ັງສາຍລົມເຢັນທ່ີພັດໂຊຍມາພາໃຫ້ຄົນຊ່ືນໃຈຫາຍຮ້ອນເບົາມະໂນ. ຕໍ່ໄປເຊີນຟັງດົນຕີ "ປ່າຕ້ວນຈິນ" ທ່ີເສບໂດຍຄະນະດົນຕີເຫີງທົງ.
ໃນມ້ວນທ້າຍລາຍການມື້ນີ້, ເຊີນຟັງດົນຕີ "ຄ້ານຮວາເຕິ່ງ" "ຊົມໂຄມໄຟ" ເສບໂດຍຄະນະດົນຕີເຫີງທົງໄທ້ຊາງ. ດົນຕີນີ້້ວາດພາບຄວາມຟົດຟື້ນໃນບຸນໂຄມໄຟຕອນຄ່ຳມື້ເພັງເດືອນຈຽງ, ໃນຍາມບຸນ ເຮືອນຫຼັງໃດກໍຕ້ອງແຂວນໂຄມໄຟຢູ່ປະຕູເຮືອນເພ່ືອສະຫຼອງບຸນ.
ທ່ານຜູ່ຟັງທ່ີໂຄລົບ ລາຍການບັນເທີງນັດພົບໃນວັນອາທິດພາກນີ້ຂໍສ້ຽງສຸດລົງພຽງທໍ່ນີ້, ຂອບໃຈທ່ີທ່ານຮັບຟັງ, ພົບກັນໃໝ່ໃນວັນອາທິດໜ້າ, ສະບາຍດີ.
|
