|
|
 |
| (GMT+08:00)
2004-07-21 10:55:19
|
 |
|
ເມືອງລໍ້ຢາງເຈ້ຍແພງ(ສຽງ)
cri
Author: zs
|
 ທ່ານຈໍຊີ່ແມ່ນນັກວັນນະຄະດີທີ່ມີຊື່ສຽງໃນສະໄໝລາດຊະວົງຈີ້ນຂອງຈີນ.ໃນຍາມຍັງນ້ອຍ,ທ້າວຈໍຊ່ີເປັນເດັກທີ່ຂີ້ດື້ຫຼາຍ,ບໍ່ມັກຮຽນໜັງສື,ຈົນຖືກພໍ່ຮ້າຍເລື່ອຍໆ,ແຕ່ຈໍຊີ່ກໍຍັງຂີ້ດື້ຢູ່ພໍປານນັ້ນ,ບໍ່ຕັ້ງໃຈຮຽນຈັກເມັດ.
ມີມື້ໜ່ຶງ,ພໍ່ຂອງທ້າວຈໍຊີ່ລົມກັນກັບໝູ່ເພື່ອນ,ໝູ່ຂອງເພິ່ນໃຜກໍອອນຊອນນຳເພິ່ນທີ່ມີລູກຊາຍທີ່ສະຫຼາດໜ້າຮັກ.ແຕ່ພໍ່ຂອງທ້າວຈໍຊີ່ພັດຖອດຫຸ່ຍແລະເວົ້າວ່າ: "ເຊົາ,ເຊົາ,ຢ່າເວົ້າເຖິງລູກຂ້າພະເຈົ້າເລີຍ.ລູກຈໍຊີ່ຮຽນໜັງສືຍັງບໍ່ທໍ່ຂ້າພະເຈົ້າໃນຍາມນ້ອຍຊ້ຳ,ເບິ່ງຊົງຄົງຈະບໍ່ມີອະນາຄົດໄປໄກພໍປານໃດ."ເວົ້າແລ້ວກໍຍັງມີສີໜ້າທີ່ຜິດຫວັງນຳດ້ວຍ.ທ້າວຈໍຊ່ີໄດ້ຍິນຄຳເວົ້າທັງໝົດຂອງພໍ່,ກໍຮູ້ສຶກເສຍໃຈຫຼາຍ,ເຫັນວ່າ,ແລະຮູ້ສຶກວ່າ,ໂຕເອງບໍ່ຕັ້ງໃຈ ຮຽນໜັງສືຈະບໍ່ມີອະນາຄົດແທ້.ສະນັ້ນ,ທ້າວຈໍຊີ່ຈຶ່ງຄຶດຢູ່ໃນໃຈວ່າ,ແນວໃດຕົນກໍຕ້ອງຮຳ່ ຮຽນຢ່າງດຸໝັ່ນຂະຫຍັນພຽນ.
ເວລາຜ່ານໄປຫຼາຍປີ,ທ້າວຈໍຊີ່ກໍຄ່ອຍໆເຕີບໂຕ,ຍ້ອນໄດ້ຮຳ່ຮຽນຢ່າງຂະຫຍັນໝັ່ນພຽນ, ຈຶ່ງໄດ້ກາຍເປັນຄົນທີ່ມີປັນຍາເຕັມປູມ,ແລະຂຽນບົດແຕ່ງກອນໄດ້ດີທີ່ສຸດ.ທ່ານໃຊ້ເວລາພຽງແຕ່ປີດຽວກໍແຕ່ງ《ກອນທານີເມືອງຊີ》ສຳເລັດ,ສະແດງໃຫ້ເຫັນພອນສະຫວັນໃນດ້ານວັນນະຄະດີຂອງທ່ານ,ໄດ້ສ້າງພື້ນຖານໃຫ້ທ່ານກາຍເປັນນັກວັນນະຄະດີຜູ່ດີເດັ່ນໃນພາຍຫຼັງ.ຕໍ່ຈາກນັ້ນ,ທ່ານໄດ້ວາງແຜນແຕ່ງກອນສາມທານີທີ່ມີເນື້ອໃນບັນຍາຍຮີດຄອງປະເພນີ ວົງສຳພັນແລະຊັບໃນດິນສິນໃນນ້ຳຂອງລາຊະທານີເມືອງເວີ້ຍເມືອງສູແລະເມືອງວູ.ເພື່ອໃຫ້ກອນນີ້ມີລະດັບດີເດັ່ນໃນດ້ານເນື້ອໃນ ການປະກອບເລື່ອງແລະສຳນວນຄວາມເວົ້າເປັນຕົ້ນ,ທ່ານໄດ້ຕັ້ງອົກຕັ້ງໃຈຄົ້ນຄວ້າ,ຈົນລືມກິນລືມນອນ,ໃຊ້ເວລາສິບປີເຕັມໆແຕ່ງ《ກອນສາມທານີ》ສຳເລັດ, ເຊິ່ງເປັນບົດປະພັນວັນນະຄະດີອັນຍິ່ງໃຫຍ່ເຫຼັ້ມໜຶ່ງ.
《ກອນສາມທານີ》ໄດ້ຮັບຄວາມຍ້ອງຍໍສັນລະເສີນຈາກຜູ່ອ່ານທັງຫຼາຍ,ຈົນພາກັນທຽບ ເທ່ົາກັບ《ກອນສອງທານີ》 ເຊິ່ງເປັນບົດປະພັນວັນນະຄະດີອັນຍອດຍິ່ງໃນສະໄໝລາດຊະວົງຮ້ານ.ຍ້ອນວ່າ,ໃນສະໄໝນັ້ນຍັງບໍ່ໄດ້ປະດິດສ້າງວິທີພິມຕົວໜັງສືເທື່ອ,ຄົນທີ່ມັກອ່ານ《ກອນສາມທານີ》ຈຶ່ງຈຳເປັນຕ້ອງໄປຊື້ເຈ້ຍມາກ່າຍເອົາ.ຍ້ອນວ່າຄົນທີ່ກ່າຍເອົາກອນບົດນີ້ຫຼາຍໂພດ,ເຈ້ຍໃນເມືອງລໍ້ຢາງຈຶ່ງຜະລິດອອກຂາຍບໍ່ທັນ,ສະນັ້ນຈຶ່ງເຮັດໃຫ້ລາຄາເຈ້ຍເມືອງລໍ້ຢາງຖີບສູງຂຶ້ນຢ່າງໃຫຍ່.
ໃນຊູ່ມື້ນີ້,ຄົນຈີນມັກໃຊ້ສຸພາສິດຄຳທີ່ວ່າເມືອງລໍ້ຢາງເຈ້ຍແພງເປັນຄວາມຍ້ອງຍໍບົດປະພັນອັນດີເລີດທີ່ໄດ້ຮັບຄວາມນິຍົມຊົມຊອບທີ່ສຸດຈາກຄົນທັງຫຼາຍ.
|
|
|
