|
CRIລາຍງານວ່າ:ວັນທີ27ກໍລະກົດ,ຢູ່ແບກແດດ,ທ່ານມາຊຸມ ປະທານຄະນະກຳມະການກະກຽມກອງປະຊຸມການເມືອງແຫ່ງຊາດອີຣັກປະກາດວ່າ,ກອງປະຊຸມການເມືອງແຫ່ງຊາດຄັ້ງປະຖົມມະເລີກຈະຈັດຂຶ້ນໃນວັນທີ31ກໍລະກົດ,ຜູ່ແທນພັນກວ່າຄົນທີ່ຮ່ວມປະຊຸມຈະເລືອກຕັ້ງສະພາແຫ່ງຊາດຊົ່ວຄາວທີ່ປະກອບດ້ວຍຮ້ອຍຄົນ.ກອງປະຊຸມຄັ້ງນີ້ຖືກຖືໂດຍທົ່ວໄປວ່າເປັນການທົດລອງປະຊາທິປະໄຕຢູ່ອີຣັກຄັ້ງທຳອິດໃນຫຼາຍສິບປີມານີ້,ກໍ ແມ່ນການສະແດງລ່ວງໜ້າກ່ອນຈັດການເລືອກຕັ້ງສະພາແຫ່ງຊາດອີຣັກຢ່າງເປັນທາງການໃນຕົ້ນປີ2005.ບຸກຄົນວິເຄາະເຫັນວ່າ,ກອງປະຊຸມຄັ້ງນີ້ຈະເກີດມີຜົນສະທ້ອນອັນໃຫຍ່ຫຼວງຕໍ່ຂະບວນການສ້າງສາການເມືອງອີຣັກຄືນໃໝ່,ກອງປະຊຸມຈະສຳເລັດຜົນຫຼືບໍ່ຈະເປັນການທົດສອບອັນຂ້ຽວຂາດເທື່ອໜຶ່ງຕໍ່ລັດຖະບານຊົ່ວຄາວອີຣັກ.
ລັດຖະທຳມະນູນຊົ່ວຄາວອີຣັກກຳນົດວ່າ,ກຳລັງການເມືອງຝ່າຍຕ່າງໆຂອງອີຣັກຄວນຈັດກອງປະຊຸມການເມືອງແຫ່ງຊາດພາຍໃນເດືອນກໍລະກົດ,ເລືອກຕັ້ງສະພາແຫ່ງຊາດຊົ່ວຄາວ.ສະພາແຫ່ງຊາດຊົ່ວຄາວຈະໝູນເດີນຈົນຮອດສະພາແຫ່ງຊາດທາງການຮັບການເລືອກຕັ້ງໃນຕົ້ນອປີໜ້າ.ສະພາແຫ່ງຊາດຊົ່ວຄາວມີອຳນາດທີ່ຕິດຕາມກວດກາການປົກຄອງຂອງລັດຖະບານ,ໃນນັ້ນລວມທັງສຳຫຼວດພິຈາລະນາແລະຜ່ານຮັບຮອງງົບປະມານການເງິນປີ2005, ຢັບຢັ້ງການຕົກລົງຂອງລັດຖະບານ ທວງຖາມລັດຖະມົນຕີລັດຖະບານແລະຮັບຜິດຊອບສະເໜີປະທານາທິບໍດີຜູ່ໃໝ່ຫຼືຮອງປະທານາທິບໍດີຜູ່ໃໝ່ໃນກໍລະນີທີ່ປະທານາທິບໍດີຫຼືຮອງປະທານາທິບໍດີເສຍສະຫຼະໃນໄລຍະດຳລົງຕຳແໜ່ງ.
ຜູ່ແທນທີ່ເຂົ້າຮ່ວມກອງປະຊຸມການເມືອງແຫ່ງຊາດຕ້ອງມີເງື່ອນໄຂພື້ນຖານສາມຂ້ໍ ເຊັ່ນ ມີຊື່ສຽງສ່ວນຕົວດີງາມ ບໍ່ແມ່ນສະມາຊິກຂອງອົງການຄວາມປອດໄພຂອງອະດີດອຳນາດ ການປົກຄອງຊັດດາມແລະບໍ່ແມ່ນສະມາຊິກພັກບາອາສ.ອີງຕາມມາດຖານແບ່ງປັນບ່ອນນັ່ງທີ່ກຳນົດໂດຍຄະນະກຳມະການກະກຽມ,ຜູ່ແທນພັນຄົນກຳເນີດຈາກແຂວງຕ່າງໆ ພັກຝ່າຍການເມືອງຕ່າງໆ ເຊັ່ນພັກການເມືອງ ກົກເຫຼົ່າ ປັນຍາຊົນ ຜູ່ຊົງຄຸນວຸດທິສັງຄົມແລະອົງການມະຫາຊົນ.
ບຸກຄົນວິເຄາະເຫັນວ່າ,ລັດຖະບານຊົ່ວຄາວອີຣັກຫວັງຜ່ານກອງປະຊຸມການເມືອງແຫ່ງຊາດຄັ້ງນີ້,ປັບປຸງຖານະຂອງລັດຖະບານຊົ່ວຄາວອີຣັກໃຫ້ໝັ້ນຄົງຕື່ມອີກ,ເຮັດໃຫ້ບັນດາອິດທິກຳລັງຕໍ່ຕ້ານແຕກສະຫຼາຍ,ບັນລຸການປອງດອງຊາດ,ຟື້ນຟູສະຖຽນລະພາບຂອງສັງຄົມ.ແຕ່ປະຈຸບັນນີ້, ການຮຽກໄຂຂອງກອງປະຊຸມການເມືອງແຫ່ງຊາດອີຣັກຍັງປະເຊີນກັບຫຼາຍບັນຫາ.
ກ່ອນອື່ນ,ວຽກງານກະກຽມກອງປະຊຸມຄັ້ງນີ້ບໍ່ເຕັມສ່ວນ,ການໂຄສະນາບໍ່ແຮງປານໃດ, ມວນຊົນເຂົ້າຮ່ວມຂ້ອນຂ້າງໜ້ອຍ,ທ້ອງຖ່ິນຈຳນວນຫຼວງຫຼາຍໄດ້ເກີດສະພາບການວຸ້ນວາຍຍ້ອນການເລືອກຕັ້ງຜູ່ແທນທີ່ຈະເຂົ້າຮ່ວມກອງປະຊຸມ.
ສອງ,ນັບມາຮອດປະຈຸບັນນີ້,ຄະນະກຳມະການກະກຽມຍັງບໍ່ທັນໄດ້ຕົກລົງສະພາແຫ່ງຊາດຮ້ອຍຄົນຈະກຳເນີດດ້ວຍວິທີໃດ,ອັນໄດ້ເຮັດໃຫ້ຄົນທັງຫຼາຍເປັນຫ່ວງວ່າກອງປະຊຸມຄັ້ງນີ້ອາດຈະບໍ່ໄດ້ຜົນຫຍັງຍ້ອນບັນດາຝ່າຍທີ່ຮ່ວມປະຊຸມມີຄວາມເຫັນຂັດກັນອັນໜັກໜ່ວງ.
ສາມ,ບາງອິດທິກຳລັງການເມືອງທີ່ມີຜົນສະທ້ອນຫຼາຍອາດຈະບໍ່ເຂົ້າຮ່ວມກອງປະຊຸມ, ທັງນີ້ຈະປ່ັນທອນພື້ນຖານມວນຊົນແລະລັກສະນະຕົວແທນຂອງກອງປະຊຸມຄັ້ງນີ້.ທ່ານຊາດ ຜູ່ນຳໜຸ່ມນິກາຍຊີອິດຂອງອີຣັກທີ່ຕ້ານອາເມລິກາແລະບາງອົງການຈັດຕັ້ງທີ່ເຄີຍເຫັນອົກເຫັນໃຈຫຼືເຂົ້າຮ່ວມການເຄື່ອນໄຫວຕໍ່ຕ້ານອາເມລິການັ້ນກ່າວວ່າຈະຂວຳ້ບາດກອງປະຊຸມຄັ້ງນີ້.ປະຈຸບັນນີ້,ລັດຖະບານຊົ່ວຄາວອີຣັກແລະຝ່າຍອາເມລິກາພວມຕັ້ງໜ້າຊັກຊວນ,ອົງການຕໍ່ຕ້ານທີ່ເຄີຍເຂົ້າຮ່ວມການເຄື່ອນໄຫວຕໍ່ຕ້ານແຕ່ບໍ່ໄດ້ຕິດໜີ້ເລືອດຈົ່ງປ່ຽນແປງຫຼັກໝັ້ນທີ່ຂວ້ຳບາດກອງປະຊຸມ,ແລ້ວບັນລຸຈຸດປະສົງທີ່ເຮັດໃຫ້ຄ້າຍຕໍ່ຕ້ານແຕກສະຫຼາຍໃນລະດັບໃຫຍ່ເທົ່າທີ່ຈະໃຫຍ່ໄດ້.
ສຸດທ້າຍ,ປະຈຸບັນນີ້,ສະຖານະການຄວາມປອດໄພຂອງອີຣັກຍັງຄົງເຄັ່ງຕຶງທີ່ສຸດ,ເຫດການກຳລັງຮຸນແຮງຕ່າງໆເກີດຂຶ້ນຢ່າງເນື່ອງນິດ,ລັດຖະບານຊົ່ວຄາວແລະຝ່າຍທະຫານອາເມລິກາກໍຂາດພາຫະນະອັນບັງເກີດຜົນທີ່ສະກັດກັ້ນການເຄື່ອນໄຫວດ້ວຍກຳລັງຮຸນແຮງ.ມີຄົນເປັນຫ່ວງວ່າ,ກອງປະຊຸມພັນຄົນອາດຈະເປັນເປົ້າໝາຍຫຼອນໂຈມຕີຂອງພວກຫົວຮຸນແຮງ.ກໍຍ້ອນມູນເຫດນີ້,ໃນເວລາປະກາດກອງປະຊຸມຈະຈັດຂຶ້ນໃນໄວໆນີ້,ທ່ານມາຊຸມຈົນບໍ່ໄດ້ເປີດເຜີຍສະຖານທີ່ກອງປະຊຸມ.
|
