|
ວິທະຍຸສາກົນແຫ່ງປະເທດຈີນລາຍງານວ່າ,ວັນທີ27ກໍລະກົດ,ທ່ານຄູໄລ ນາຍົກລັດຖະມົນຕີລັດຖະບານປາເລັສຕິນປົກຄອງຕົນເອງກ່າວວ່າຍິນດີຖອນໃບຮ້ອງຂໍລາອອກຈາກຕຳແໜ່ງທີ່ທີ່ທ່ານຍື່ນໃນ10ມື້ກ່ອນ,ແລ້ວດຳລົງຕຳແໜ່ງນາຍົກລັດຖະມົນຕີຕໍ່,ນີ້ສະແດງໃຫ້ເຫັນວ່າ,ວິກິດການການເມືອງຊັ້ນນຳປາເລັສຕິນໄດ້ຜ່ອນຄາຍລົງຊົ່ວຄາວແລ້ວ.
ວັນທີ17ກໍລະກົດນີ້,ທ່ານຄູໄລອ້າງວ່າທ່ານຄວບຄຸມສະພາບວຸ້ນວາຍຢູ່ແຖບກາຊາບໍ່ໄດ້,ເລີຍຍື່ນໃບຮ້ອງຂໍລາອອກຈາກຕຳແໜ່ງໃຫ້ທ່ານອາລາຟັດ,ແຕ່ຖືກທ່ານອາລາຟັດປະຕິເສດ.ທ່ານຄູໄລກ່າວອີກວ່າຍຶດໝັ້ນຫຼັກໝັ້ນລາອອກຈາກຕຳແໜ່ງ.ແຕ່ຢູ່ໃຕ້ການໄກ່ເກ່ຍຂອງເຈົ້າໜ້າທີ່ປະເລັສຕິນ,ວັນທີ27ກໍລະກົດ,ທ່ານຄູໄລໄປພົບປະກັບທ່ານອາລາຟັດຢູ່ທຳນຽບປະທານາທິບໍດີທີ່ລາມາລາ,ໃນທີ່ສຸດໄດ້ຍິນດີຖອນໃບຮ້ອງຂໍລາອອກຈາກຕຳແໜ່ງຄືນ.
ເຈົ້າໜ້າທີ່ປາເລັສຕິນເຜີຍໃຫ້ຮູ້ວ່າ,ທ່ານອາລາຟັດແລະທ່ານຄູໄລໄດ້ປະນິປະນອມໃນສາມບັນຫາດັ່ງລຸ່ມນີ້:
ໜຶ່ງ,ໃຫ້ທ່ານຄູໄລມີສິດສ່ວນໜຶ່ງຄວບຄຸມກອງທະຫານຮັກສາຄວາມປອດໄພ.ຕາມລັດຖະດຳລັດຂອງທ່ານອາລາຟັດ,ກອງທະຫານຮັກສາຄວາມປອດໄພປາເລັສຕິນໄດ້ຖືກປັບປຸງເປັນສາມພາກສ່ວນ,ທ່ານອາລາຟັດເຫັນດີມອບສິດຄວບຄຸມກຳລັງຮັກສາຄວາມປອດໄພພາຍໃນຂອງປະເລັສຕິນໃຫ້ທ່ານຄູໄລ,ໃນນັ້ນ,ລວມທັງກອງຕຳຫຼວດແລະກອງຮັກສາຄວາມປອດໄພພາຍໃນ.ແຕ່ກຳລັງຮັກສາຄວາມປອດໄພຕົ້ນຕໍຂອງປາເລັສຕິນຄືກອງຮັກສາຄວາມປອດໄພແຫ່ງຊາດແລະກອງທະຫານຂ່າວກອງຍັງຄົງແມ່ນຄະນະກຳມະການຄວາມປອດໄພແຫ່ງຊາດທີ່ນຳໂດຍທ່ານອາລາຟັດນັ້ນເປັນຜູ່ຄຸ້ມຄອງ.
ສອງ, ທ່ານຄູໄລຈະມີສິດອຳນາດຂອງນາຍົກລັດຖະມົນຕີທີ່ຄວນມີຕາມການກຳນົດຂອງກົດໝາຍພື້ນຖານ.ໃນນັ້ນລວມທັງການປັບປຸງຄະນະລັດຖະບານ.
ສາມ,ທ່ານອາລາຟັດເຫັນດີສັ່ງໃຫ້ອະທິໄອຍະການປາເລັສຕິດດຳເນີນການສຳຫຼວດເຈົ້າໜ້າທີ່ຜູ່ຖືກສົງໄສສ້ໍລາດບັງຫຼວງ.
ບຸກຄົນວິເຄາະເຫັນວ່າ,ທ່ານອາລາຟັດກັບທ່ານຄູໄລປະນິປະນອມກັນແມ່ນສອງທ່ານໄດ້ຖືກກຳລັງໜີບຢູ່ພາຍໃນແລະພາຍນອກ.
ກ່ອນອື່ນກຳລັງໜີບແມ່ນມາຈາກພາຍໃນປາເລັສຕິນ.ພາຍຫຼັງສະຖານະການແຖບກາຊາປະກົດມີຄວາມວຸ້ນວາຍແລະທ່ານຄູໄລຮ້ອງຂໍລາອອກຈາກຕຳແໜ່ງໃນວັນທີ17ລະກົດແລ້ວ,ຄວາມຂັດແຍ່ງລະຫວ່າງຝ່າຍຕ່າງໆຢູ່ພາຍໃນປາເລັສຕິນກໍພົ້ນເດັ່ນຂຶ້ນ.ໂດຍສະເພາະແມ່ນອາລົມຈິດທີ່ບໍ່ພໍໃຈຕໍ່ທ່ານອາລາຟັດໄດ້ລະບາຍອອກຢ່າງໄວວາ.ແຕ່ວ່າ,ຢູ່ໃຕ້ສະຖານະການເຄັ່ງຕຶງຂອງຕາເວັນອອກກາງໃນປະຈຸບັນ,ຊາວປາເລັສຕິນໝົດທຸກຄົນລ້ວນແຕ່ບໍ່ຢາກປະກົດມີສະພາບການຕໍ່ສູ້ກັນຢູ່ພາຍໃນປະເທດ.ທັງນີ້ໄດ້ຊຸກຍູ້ໃຫ້ທ່ານອາລາຟັດແລະທ່ານຄູໄລພິຈາລະນາເຖິງພາກສ່ວນລວມ,ເປັນເພື່ອນດີຄືເກົ່າອີກ.
ສອງ,ກຳລັງໜີບແມ່ນມາຈາກປະຊາຄົມໂລກ.ວິກິດການຢູ່ພາຍໃນປາເລັສຕິນທີ່ປະກົດຕົວໃນຫວ່າງມໍ່ໆນີ້ໄດ້ພາໃຫ້ຊາວໂລກມີຄວາມສົນໃຈຢ່າງກວ້າງຂວາງ.ປະຊາຄົມໂລກກໍສວຍໂອກາດນີ້ໃຊ້ກຳລັງໜີບຕໍ່ທ່ານອາລາຟັດ.ຫວັງໃຫ້ທ່ານປ່ອຍສິດ.
ພາຍຫຼັງການພົບປະໃນວັນທີ27ກໍລະກົດສິ້ນສຸດລົງແລ້ວ,ທ່ານອາລາຟັດແລະທ່ານຄູໄລໄດ້ຈັບມືກັນຍ່າງອອກຈາກທຳນຽບ.ທ່ານຄູໄລກ່າວວ່າ,ທ່ານເອງບໍ່ມີເຈດຈຳນົງທ້າທາຍກັບທ່ານອາລາຟັດ,ແລະຈະປະສານງານແລະຮ່ວມມືກັບທ່ານອາລາຟັດ,ພ້ອມກັນກອບກູ້ພາລະກິດແຫ່ງຊາດປາເລັສຕິນ.ທ່ານອາລາຟັດໄດ້ສະແດງຄວາມຂອບອົບຂອບໃຈນຳທ່ານຄູໄລ ເພື່ອນມິດຂອງທ່ານທີ່ເຫັນດີຖອນໃບຮ້ອງຂໍລາອອກຈາກຕຳແໜ່ງ.
ນັບມາຮອດປະຈຸບັນ,ວິກິດການຮອບໜຶ່ງທີ່ມີຂຶ້ນຢູ່ລະຫວ່າງຜູ່ນຳປາເລັສຕິນໄດ້ລະງັບຊົ່ວຄາວແລ້ວ.ສະພາບວຸ້ນວາຍຢູ່ແຖບກາຊາກໍໄດ້ຖືກຄວບຄຸມໄວ້ໂດຍພື້ນຖານ.ທ່ານອາລາຟັດໄດ້ຜ່ານຜ່າວິກິດການທີ່ຮ້າຍແຮງກວ່າໝູ່ແຕ່ອົງການອຳນາດແຫ່ງຊາດປາເລັສຕິນສ້າງຕັ້ງຂຶ້ນເມື່ອປີ1994ມານີ້.ແຕ່ວ່າ,ນີ້ບໍ່ໄດ້ໝາຍຄວາມວ່າ,ຕໍ່ໄປ,ທ່ານອາລາຟັດຈະສາມາດໄວ້ວາງໃຈໄດ້,ກົງກັນຂ້າມ,ວິກິດການເທື່ອນີ້ສະແດງໃຫ້ເຫັນວ່າອົງການອຳນາດແຫ່ງຊາດປາເລັສຕິນແລະອິດທິພົນຂອງທ່ານອາລາຟັດພວມປະເຊີນກັບການທ້າທາຍອັນຂ້ຽວຂາດທີ່ບໍ່ເຄີຍມີມາກ່ອນ.ທ່ານອາລາຟັດມີແຕ່ປັບປຸງນະໂຍບາຍຢ່າງທັນການ,ໃຊ້ການເຄື່ອນໄຫວຊຸກຍູ້ການປະຕິຮູບຢ່າງຕິດແທດຕົວຈິງທໍ່ນັ້ນ,ຈິ່ງສາມາດກຳຈັດແຫຼ່ງກຳເນີດວິກິດການຈາກກົກຮາກນັ້ນໄດ້.
|
