|
ແຕ່ກີ້ແຕ່ກ່ອນ,ມີຄົນຜູ່ໜຶ່ງໄດ້ເງິນ300ຕຳລຶງ,ຈຶ່ງດີອົກດີໃຈຈົນຫາອັນປຽບບໍ່ໄດ້.ແຕ່ຍ້ອນວ່າເຂົາບໍ່ເຄີຍມີເງິນຫຼາຍປານນີ້ຈັກເທື່ອ,ຈຶ່ງບໍ່ຮູ້ວ່າຈະເອົາເງິນກ້ອນນີ້ເຊື່ອງໄວ່ໃສຈ່ຶງຈະ ວາງໃຈໄດ້.ເອົາໄວ້ໃນລີ້ນຊັກ,ຮູ້ສຶກບໍ່ປອດໄພ;ເອົາໄວ້ໃນຫີບ,ໃສ່ກະແຈໄວ້,ກໍບໍ່ຮັບປະກັນ;ເອົາໄວ້ກ້ອງໝອນນອນເຕັງ,ກໍຍັງບໍ່ແຈບໃຈ.ຄຶດໄປຄຶດມາ,ໃນທີ່ສຸດຈຶ່ງຄຶດໄດ້ວິທີໜຶ່ງທີ່ເຂົາເຫັນວ່າແມ່ນວິທີ່ທີ່ດີທີ່ສຸດ.ໃນຕອນກາງຄືນມື້ນັ້ນ,ເຂົາໄດ້ຂຸດຂຸມຂຸມໜຶ່ງຢູ່ເດີ່ນຫຼັງບ້ານຂອງຕົນ,ແລ້ວເອົາເງິນຝັງໄວ້ໃນຂຸມ,ຖົມໃຫ້ດີໆ.ແລ້ວຂຽນໂຕໜັງສືໃສ່ເທິງຝາເຮືອນວ່າ:ບ່ອນນີ້ບໍ່ມີເງິນ300ຕຳລຶງ.ເມື່ອຂຽນແລ້ວໆ,ເຂົາກໍຄຶດວ່າ,ບັດນີ້ຮອບຄອບແລ້ວບໍ່ເປັນຫຍັງແລ້ວ,ຈຶ່ງກັບຄືນເມືອເຮືອນ,ນອນຫຼັບຢ່າງແຈບໃຈ.
ຢູ່ຂ້າງເຮືອນຂອງຄົນຜູ່ນີ້ມີຊາຍຜູ່ໜຶ່ງຊື່ວ່າອວງເອີ້,ເປັນຄົນຂີ້ຄ້ານບໍ່ເຮັດຫຍັງມີແຕ່ທ່ຽວ ເຕະຝຸ່ນ.ຕອນຄຳ່ມື້ນັ້ນ,ອວງເອີ້ໄດ້ຍິນສຽງຄົນຂຸດຂຸມຢູ່ຫຼັງບ້ານຂ້າງເຮືອນ,ຮູ້ສຶກປະຫຼາດໃຈທີ່ສຸດ.ເມື່ອຜູ່ຊາຍຂ້າງເຮືອນກັບເມືອນອນແລ້ວ,ອວງເອີ້ກໍແລ່ນໄປຫຼັງບ້ານຂອງຂ້າງເຮືອນທາງລັບໆ,ໃຕ້ແສງເດືອນ,ເຂົາເຫັນຢູ່ເທິງຝາເຮືອນມີໜັງສືຂຽນວ່າ:ບ່ອນນີ້ບໍ່ມີເງິນ 300ຕຳລຶງ.ອວງເອີ້ເຫັນແລ້ວກໍຄຶດດີໃຈຢູ່ຜູ່ດຽວ,ຈຶ່ງໄປຊອກເຄື່ອງມືມາຂຸດເງິນອອກຈາກ ຂຸມ,ແລ້ວຖົມດິນໃສ່ຂຸມນີ້ຄືນ,ກວາດໃຫ້ພຽງໆ.ບັດແລ້ວ,ເຂົາກໍກັບເມືອເຮືອນ,ດີໃຈເອົາແທ້ເອົາວ່າ,ແຕ່ໃນທັນໃດເຂົາຄຶດວ່າ,ມື້ອື່ນຖ້າຂ້າງເຮືອນຮູ້ວ່າເງິນເສຍແລ້ວ,ເຂົາອາດຈະສົງໄສວ່າຕົນແມ່ນຄົນໄປລັກເອົາ.ຄັນເຂົ້າໄປຟ້ອງເຈົ້ານາຍຈະເຮັດແນວໃດ,ຕົນກໍຈະຖືກຈັບເຂົ້າຄຸກ.ແຕ່ຄັນເອົາເງິນຫຼາຍປານນີ້ສົ່ງຄືນໃຫ້,ຕົນເອງກໍບໍ່ຍອມ.ຄຶດໄປຄຶດມາ,ເຂົາຄຶດອອກວິທີໜຶ່ງ.ເລີຍຈັບເອົາສໍຟອຍຂຽນໂຕໜັງສືໃສ່ຂ້າງຄຳທີ່ວ່າ"ບ່ອນນີ້ບໍ່ມີເງິນ300ຕຳ ລຶງ" ວ່າ: "ອວງເອີ້ທີ່ຢູ່ຂ້າງເຮືອນບໍ່ໄດ້ລັກ".
ພາຍຫຼັງມາ,ຄົນຈີນຈຶ່ງເອົາສອງປະໂຫຍກທີ່ຂຽນໄວ້ຢູ່ເທິງຝາເຮືອນທີ່ວ່າ"ບ່ອນນີ້ບໍ່ມີເງິນ 300ຕຳລຶງ,ອວງເອີ້ທີ່ຢູ່ຂ້າງເຮືອນບໍ່ໄດ້ລັກ"ເປັນສຸພາສິດ,ອຸບປະມາຜູ່ທີ່ຢາກປິດບັງເລື່ອງໃດເລື່ອງໜຶ່ງ,ແຕ່ພັດໃຊ້ວິທີທີ່ບໍ່ເໝາະສົມ,ຈຶ່ງໄດ້ຜົນກົງກັນຂ້າມ,ເຜີຍໃຫ້ເຫັນເລື່ອງຈິງໄວກວ່າເກົ່າ.
|
