|
ວັນທີ 4 ສິງຫາ,ນັກຂ່າວໄດ້ຊາບຈາກເວທີປາໄສອະທິການບໍດີມະຫາວິທະຍາໄລຂອງຈີນແລະຕ່າງປະເທດຄັ້ງທີ 2 ທີ່ຈັດຂຶ້ນຢູ່ປັກກິ່ງວ່າ,ໃນຫຼາຍປີມານີ້,ລະດັບສ້າງໂຮງຮຽນຊັ້ນສູງຂອງຈີນໄດ້ຍົກສູງຂຶ້ນຢ່າງໜັກແໜ້ນ.ເພື່ອສ້າງມະຫາວິທະຍາໄລອັນດັບໜຶ່ງໃນໂລກງວດໜຶ່ງໂດຍໄວ,ຈີນຈະຮຽນເອົາຈຸດດີຂອງປະເທດຕ່າງໆ,ຮັບເອົາແລະຖອດຖອນບົດຮຽນທີ່ສຳເລັດຜົນຂອງມະຫາວິທະຍາໄລຕ່າງປະເທດໂດຍທົ່ວໄປ.
ໃນຫຼາຍປີມານີ້,ການສຶກສາຊັ້ນສູງຂອງຈີນໄດ້ພັດທະນາແບບກ້າວກະໂດດຂັ້ນ.ປະຈຸບັນ,ຈີນມີການສຶກສາຊັ້ນສູງຂະໜາດໃຫຍ່ກວ່າໝູ່ໃນໂລກ,ມີມະຫາວິທະຍາໄລ 2000 ກວ່າຫຼັງ,ຈຳນວນນັກສຶກສາໃນໂຮງຮຽນລື່ນກາຍ 25 ລ້ານຄົນ.ໃນຂະນະທີ່ເປີດກວ້າງຂະໜາດຮັບເອົານັກສຶກສາແລະຕອບສະໜອງຄວາມຕ້ອງການຂອງສາທາລະນະຊົນໃນການຮັບການສຶກສາຊັ້ນສູງ,ມະຫາວິທະຍາໄລຂອງຈີນກໍພວມພະຍາຍາມຍົກລະດັບຂອງໂຮງຮຽນໃຫ້ສູງຂຶ້ນ,ເພື່ອສ້າງມະຫາວິທະຍາໄລຊັ້ນເອກໃນໂລກ.
ມະຫາວິທະຍາໄລປັກກິ່ງແມ່ນມະຫາວິທະຍາໄລທີ່ມີຊື່ສຽງຂອງຈີນ.ທ່ານໝີນເວີຍຟ່າງ ຮອງອະທິການບໍດີມະຫາວິທະຍາໄລດັ່ງກ່າວໄດ້ເຂົ້າຮ່ວມເວທີປາໄສອະທິການບໍດີມະຫາວິທະຍາໄລຂອງຈີນແລະຕ່າງປະເທດຄັ້ງທີ 2 ທີ່ຈັດຂຶ້ນໃນວັນທີ 4 ສິງຫາ,ໃນເວລາທ່ານໃຫ້ສຳພາດຕໍ່ນັກຂ່າວວິທະຍຸພວກເຮົາ,ທ່ານເວົ້າວ່າ,ໃນຫຼາຍປີມານີ້,ມະຫາວິທະຍາໄລປັກກິ່ງນຳໃຊ້ການລົງທຶນຂອງລັດຖະບານ,ອອກແຮງປົວແປງເງື່ອນໄຂສ້າງໂຮງຮຽນຄືເຄື່ອງປະກອບຄົ້ນຄວ້າວິທະຍາສາດເປັນຕົ້ນໃຫ້ດີຂຶ້ນ,ພ້ອມກັນນັ້ນ,ໃນດ້ານການກໍ່ສ້າງຂະແໜງວິຊາ,ກໍໄດ້ທົດລອງຢ່າງກ້າຫານ,ຢ່ວງບາດກ້າວເພື່ອສ້າງມະຫາວິທະຍາໄລຊັ້ນເອກໃນໂລກ.
ການປ່ຽນທິດສ້າງໂຮງຮຽນ,ເປີດກວ້າງຂອບເຂດຂະແໜງວິຊາຂອງມະຫາວິທະຍາໄລ,ເຮັດໃຫ້ໂຮງຮຽນມີຊ່ອງຫວ່າງພັດທະນາກວ້າງຂວາງກວ່າເກົ່ານັ້ນ,ແມ່ນວິທີທີ່ມະຫາວິທະຍາໄລຈຳນວນໜຶ່ງຂອງຈີນໃຊ້ທົ່ວໄປໃນຫຼາຍປີມານີ້.ຕົວຢ່າງຄືມະຫາວິທະຍາໄລທີ່ແຕ່ເດີມມີຂະແໜງວິຊາອ່າວໜ້ອຍເຊັ່ນມະຫາວິທະຍາໄລສ້າງຄູແລະມະຫາວິທະຍາໄລກະສິກຳຈຳນວນໜຶ່ງເປັນຕົ້ນ,ນອກຈາກຮັກສາທ່າແຮງດັ້ງເດີມຂອງຕົນແລ້ວ,ກໍຍິ່ງເອົາໃຈໃສ່ນຳການພັດທະນາຢ່າງຮອບດ້ານ.
ທ່ານຈົ່ງປີງລີນ ອະທິການບໍດີມະຫາວິທະຍາໄລສ້າງຄູປັກກິ່ງທີ່ເຂົ້າຮ່ວມເວທີປາໄສທີ່ຈັດຂຶ້ນໃນວັນທີ 4 ສິງຫາສະເໜີໃຫ້ຮູ້ວ່າ,ປະຈຸບັນ,ທິດພັດທະນາຂອງມະຫາວິທະຍາໄລດັ່ງກ່າວໄດ້ມີການສັບຊ້ອນຂ້ອນຂ້າງຫຼາຍ.ທ່ານເວົ້າວ່າ:
"ພວກເຮົາໄດ້ອີງຕາມທ່ວງທ່າພັດທະນາຂອງເສດຖະກິດສັງຄົມຈີນ,ກຳນົດຖານະແລະເປົ້າໝາຍພັດທະນາໃໝ່ຂອງມະຫາວິທະຍາໄລສ້າງຄູປັກກິ່ງຄືນໃໝ່,ຈາກມະຫາວິທະຍາໄລສ້າງຄູຫັນເປັນມະຫາວິທະຍາໄລຄົ້ນຄວ້າສັບພະວິຊາ."
ເພື່ອຍົກຄຸນນະພາບມະຫາວິທະຍາໄລໃຫ້ສູງຂຶ້ນ,ມະຫາວິທະຍາໄລຕ່າງໆຂອງຈີນຍັງເອົາໃຈໃສ່ທີ່ສຸດນຳການຍົກຄຸນທາດຂອງອາຈານໃຫ້ສູງຂຶ້ນ.ມາດຕະການຂອງພວກເຂົາເຈົ້າກໍຄື:ອຳນວຍໂອກາດຮຽນຕໍ່ໃຫ້ອາຈານຜູ້ໜຸ່ມນ້ອຍໄດ້ໄປຮຽນບຳລຸງ;ຫ້າງຫາເງິນທຶນໃຫ້ຄູອາຈານດຳເນີນການຄົ້ນຄວ້າວິທະຍາສາດລະດັບສູງ,ຍົກລະດັບແລະຄວາມສາມາດຄົ້ນຄວ້າວິທະຍາສາດຂອງພວກເຂົາເຈົ້າໃຫ້ສູງຂຶ້ນ;ໃຊ້ມາດຕະການຕ່າງໆ,ເຊີນຜູ້ມີຄວາມຮູ້ຄວາມສາມາດທີ່ດີເລີດຂອງຈີນແລະຕ່າງປະເທດເຂົ້າມາຢ່າງກວ້າງຂວາງ.
ເຖິງວ່າມະຫາວິທະຍາໄລຕ່າງໆໄດ້ທຳຄວາມພະຍາຍາມ,ລະດັບກວມລວມຂອງການສຶກສາຊັ້ນສູງຂອງຈີນກໍໄດ້ຍົກສູງຂຶ້ນຢ່າງບໍ່ຢຸດຢັ້ງກໍຕາມ,ແຕ່ໃນດ້ານລະດັບການຄຸ້ມຄອງແລະຄວາມສາມາດປະດິດສ້າງວິທະຍາສາດເຕັກນິກ,ເມື່ອທຽບກັບມະຫາວິທະຍາໄລອັນດັບໜຶ່ງຂອງໂລກແລ້ວ,ມະຫາວິທະຍາໄລຂອງຈີນຍັງບໍ່ສາມາດທຽບເທົ່າ.ເພື່ອຖອດຖອນເອົາບົດຮຽນກ້າວໜ້າຂອງມະຫາວິທະຍາໄລຕ່າງປະເທດ,ຫວ່າງກ່ອນນີ້ສອງປີ,ກະຊວງສຶກສາທິການຂອງຈີນໄດ້ຈັດເວທີປາໄສອະທິການບໍດີມະຫາວິທະຍາໄລຂອງຈີນແລະຕ່າງປະເທດຄັ້ງປະຖົມມະເລີກ.ເທິງເວທີປາໄສອະທິການບໍດີມະຫາວິທະຍາໄລຂອງຈີນແລະຕ່າງປະເທດຄັ້ງທີສອງທີ່ຈັດຂຶ້ນໃນວັນທີ 4 ສິງຫາ,ທ່ານນາງເສີນຈື້ລີ້ ທີ່ປຶກສາແຫ່ງລັດຈີນ ອະດີດລັດຖະມົນຕີກະຊວງສຶກສາທິການຈີນຊີ້ອອກວ່າ:
"ຈຸດປະສົງຂອງພວກເຮົາແມ່ນຜ່ານຈາກການແລກປ່ຽນລະຫວ່າງຊາດຢ່າງກວ້າງຂວາງ,ຮຽນເອົາຈຸດດີຈາກປະເທດອື່ນ,ຮັບເອົາແລະຖອດຖອນບົດຮຽນສຳເລັດຜົນຂອງມະຫາວິທະຍາໄລຕ່າງປະເທດຢ່າງກ້າຫານ,ຍົກລະດັບການສຶກສາແລະຄຸນນະພາບອົບຮົມຜູ້ມີຄວາມຮູ້ຄວາມສາມາດຂອງມະຫາວິທະຍາໄລຂອງຈີນໃຫ້ສູງຂຶ້ນ,ສ້າງມະຫາວິທະຍາໄລງວດໜຶ່ງທີ່ລະດັບຊັ້ນເອກໃນໂລກ."
|
