|
ເພື່ອນຜູ່ຟັງ,ຄຽງຄູ່ກັບການພັດທະນາຂອງເສດຖະກິດແລະຂະບວນການຫັນເປັນທັນສະໄໝເລັ່ງໄວເຂົ້າ,ວົງການງິ້ວຂອງຈີນປະເຊີນບັນຫາໜຶ່ງໂດຍທົ່ວໄປ,ນັ້ນກໍຄື,ຈະເຮັດໃຫ້ສິ ລະປະງິ້ວດັ້ງເດີມໄດ້ຮັບການອະນຸລັກ ສືບທອດແລະເສີມຂະຫຍາຍແນວໃດ.ງິ້ວປັກກ່ິງ ເຊ່ິງເປັນງິ້ວແຫ່ງຊາດຈີນໄດ້ນຳໜ້າຢ່ວງບາດກ້າວທີ່ປະຕິຮູບແລະບຸກເບີກຄົ້ນຄ້ວາໃນດ້ານນີ້.ຕໍ່ໄປເຊີນຟັງບົດແຈ້ງຂ່າວອັນລະອຽດ.
ງິ້ວປັກກິ່ງປະສານກັບດົນຕີຊິມໂຟນີເລື່ອງ《ທ່ານເມລັນຟ່າງ》ໄດ້ສະແດງຢູ່ປັກກິ່ງໃນຫວ່າງກ່ອນນີ້ບໍ່ດົນ.ເລື່ອງນີ້ໄດ້ເອົາດົນຕີຊິມໂຟນີກັບງິ້ວປັກກິ່ງດັ້ງເດີມເຊື່ອມໂຍງເຂົ້າກັນເປັນຄັ້ງທຳອິດ,ມ່ວນອອກຊອນດັ່ງກະວີ,ໄດ້ສ່ອງແສງໃຫ້ເຫັນບຸກຄະລິກແລະຄຸນລັກສະນະໃນສັກສີຂອງທ່ານເມລັນຟ່າງ ມະຫາອາຈານງິ້ວປັກກິ່ງທີ່ມີຊື່ສຽງດົ່ງດັງໃນໂລກ,ອັນໄດ້ຮັບຄວາມນິຍົມຊົມຊອບຈາກຜູ່ຊົມທັງຫຼາຍ.
ທ່ານນາງວາງຢູ້ເຈິ່ນ ຫົວໜ້າຄະນະງິ້ວປັກກິ່ງຂອງປັກກິ່ງກ່າວວ່າ,ເອົາດົນຕີຊິມໂຟນີເຂົ້າໃນງິ້ວປັກກິ່ງ,ແມ່ນການບຸກເບີກຄົ້ນຄ້ວາແລະຫົວຄິດປະດິດສ້າງອັນໜຶ່ງຂອງງິ້ວປັກກິ່ງ.ເພິ່ນເວົ້າວ່າ: "ເວົ້າສຳລັບສິລະປະງິ້ວປັກກິ່ງແລ້ວ,ມັນຄວນກ້າວໄປໜ້າພ້ອມກັບຍຸກສະໄໝ. ຄະນະງິ້ວປັກກິ່ງຂອງປັກກິ່ງພວກເຮົາພິລາລະນາຈຶ່ງເຮັດແນວໃດຈຶ່ງເຮັດໃຫ້ງິ້ວປັກກິ່ງ ເຊິ່ງເປັນສິລະປະດັ້ງເດີມອັນເກົ່າແກ່ສາມາດໄປທັນຈັງຫວະຍຸກປະຈຸບັນ.ນີ້ແມ່ນຫົວຂໍ້ອັນສຳຄັນທີ່ຜູ່ເຮັດວຽກງິ້ວປັກກິ່ງພວມບຸກເບີກຄົ້ນຄວ້າ.ງິ້ວປັກກິ່ງຄວນຕັ້ງໜ້າສືບທອດກັນໄປຢ່າງບໍ່ຢຸດຢັ້ງ,ກໍ່ຄວນມີຫົວຄິດປະດິດສ້າງຢ່າງບໍ່ຢຸດຢັ້ງເຊັ່ນດຽວກັນ,ເພາະວ່າ,ຫົວຄິດປະດິດສ້າງຈຶ່ງແມ່ນວິນຍານແຫ່ງຄວາມກ້າວໜ້າຂອງປະຊາຊາດຈີນ.ສະນັ້ນ,ການສືບທອດກັບການອອກຫົວຄິດປະດິດສ້າງຄວນຕ່າງຊ່ອຍຊູກັນ."
ງິ້ວປັກກິ່ງແມ່ນງິ້ວຊະນິດໜຶ່ງທີ່ມີຜົນສະທ້ອນແຮງກວ່າໝູ່ແລະມີສີສັນພິເສດເດັ່ນກວ່າໝູ່ໃນບັນດາງິ້ວຂອງຈີນ,ນັບມາຮອດປະຈຸບັນມັນໄດ້ມີປະຫວັດມາ200ກວ່າປີແລ້ວ.ໃນຂະບວນວິວັດແຫ່ງການຈໍ່ຕົວຂຶ້ນແລະຂະຫຍາຍຕົວ,ງິ້ວປັກກິ່ງໄດ້ດຶງດູດສິ່ງຍອດຢ້ຽມຂອງສິລະປະປະເພດອື່ນໆຢ່າງບໍ່ຢຸດຢັ້ງ,ເຜີຍແຜ່ຢູ່ທົ່ວປະເທດ,ສະນັ້ນຈຶ່ງຖືກເອີ້ນເປັນງິ້ວແຫ່ງຊາດຈີນ.ຊູ່ມື້ນີ້,ສິລະປະງິ້ວດັ້ງເດີມຂອງຈີນປະເຊີນກັບບັນຫາທີ່ມີຜູ່ຊົມໜ້ອຍ,ແລະຂາດຜູ່ສະແດງລຸ້ນສືບທອດ,ງິ້ວປັກກິ່ງກໍປະສົບສິ່ງທາທ້າຍອັນຂ້ຽວຂາດຄືກັນ.
ເພື່ອເຮັດໃຫ້ງິ້ວປັກກິ່ງມີຄວາມມີຊີວິດຊີວາຢູ່ເທິງເວທີສະແດງ, ບຸກຄົນວົງການງິ້ວປັກກິ່ງໄດ້ບຸກເບີກຄົ້ນຄວ້າຢ່າງບໍ່ລົດລະ.ກ່ອນອື່ນ,ການແຕ່ງບົດງິ້ວປັກກິ່ງມີເນື້ອໃນອຸດົມສົມບູນ ກວ່າເກົ່າ,ສອງສະແດງຢູ່ວິທີການປະດັບເອ້ເວທີີ,ວາດຟ້ອນ ແສງໄຟ ທຳນອງຮ້ອງ ການຂະຫຍາຍສຽງແລະຈັງຫວະການສະແດງລ້ວນແຕ່ໄດ້ຕື່ມແຖມປັດໄຈອັນໃໝ່ອ່ຽມຫຼາຍຢ່າງ,ເຮັດໃຫ້ງິ້ວປັກກິ່ງມີລັກສະນະຍຸກສະໄຫມອັນເຂັ້ມຂຸ້ນ,ຍິ່ງທັນສະໄຫມແລະແຟເຊິນກວ່າເກົ່າ.
ວົງການງິ້ວປັກກິ່ງຍັງໄດ້ທັບມ້າງຮີດຄອງຂອງວົງການງິ້ວປັກກິ່ງທີ່ໄດ້ສືບກັນມາຮ້ອຍປີ,ດຳເນີນການຮ່ວມມືທີ່ຂ້າມທ້ອງຖິ່ນແລະຂ້າມຄະນະການສະແດງ. ຕົວຢ່າງຄືງິ້ວປັກກິ່ງປະສານກັບດົນຕີຊິມໂຟນີຂະຫນາດໃຫຍ່ເລື່ອງ《ທ່ານເມລັນຟ່າງ》ທ່ີຄະນະງິ້ວປັກກິ່ງເປັນຜູ່ຈັດຕົ້ນຕໍນັ້ນກໍ່ໄດ້ໂຮມສູນຜູ່ເກັ່ງກວ່າໝູ່ໃນວົງການງິ້ວປັກກິ່ງຂອງຈີນ,ນັກສະແດງຕົ້ນຕໍໃຜໆກໍແມ່ນດາລາງິ້ວທ່ີມີຊື່ສຽງ.
ໃນຍຸກໃໝ່ນີ້,ການບຳລຸງສ້າງຜູ່ຊົມແລະຜູ່ສືບທອດງິ້ວປັກກິ່ງແມ່ນຈຸດໜັກທ່ີວົງການງິ້ວ ປັກກິ່ງເອົາໃຈໃສ່ເປັນພິເສດ.ຕົວຢ່າງຄື ຄະນະງິ້ວປັກກິ່ງແຂວງເຫີໄປໄດ້ປະດິດຄິດແຕ່ງ ງິ້ວປັກກິ່ງເດັກເລື່ອງ《ຫ່ານຟ້າປ່າ》ເຊິ່ງຖືນິທານເດັກຂອງທ່ານອັນແດກເຊິນເປັນພື້ນຖານແລະຖືພວກຫຼານນ້ອຍເປັນກຸ່ມຜູ່ຊົມ.ຄະນະງິ້ວປັກກິ່ງຄະນະອື່ນໆກໍ່ຕັ້ງໜ້າຈັດການຕະເວນສະແດງຢູ່ແຫ່ງຕ່າງໆທ່ົວປະເທດຈີນ.ຫວ່າງກ່ອນນີ້ບໍ່ດົນ,ຄະນະງິ້ວປັກກິ່ງຈີນໄດ້ຈັດວາງນັກສະແດງຜູ່ເກັ່ງຈຳນວນຫຼວງຫຼາຍໄປສະແດງງິ້ວປັກກິ່ງດັ້ງເດີມຢູ່ມະຫາວິທະຍາໄລ,ຈັດກອງປະຊຸມທີປາໄສງິ້ວປັກກິ່ງສຳລັບນັກສຶກສາມະຫາວິທະຍາໄລ,ເພື່ອດຶງດູດນັກສຶກສາໃຫ້ສົນໃຈນຳງິ້ວປັກກິ່ງ,ຮູ້ຈັກນັກງິ້ວປັກກິ່ງຫຼາຍກວ່າເກົ່າ.ທ່ານຢູຄຸຍຈື້ ຫົວຫນ້າສາຂາທີສອງຂອງຄະນະງິ້ວປັກກິ່ງຈີນເວົ້າວ່າ:"ສິລະປະຖ້າຢາກມີການຂະຫຍາຍຕົວ,ສືບທອດກັນໄປ,ການບຳລຸງສ້າງຜູ່ສະແດງລຸ້ນສືບທອດແມ່ນສຳຄັນທ່ີສຸດ,ບໍ່ພຽງແຕ່ທໍ່ນັ້ນ,ການບຳ ລຸງສ້າງຜູ່ຊົມລຸ້ນສືບທອດກໍຍິ່ງສຳຄັນ.ຈະໄປໂຄສະນາແນວໃດ,ຈະໄປເຜີຍແຜ່ແນວໃດ, ຈະໄປເປີດກວ້າງຜົນສະທ້ອນຂອງງິ້ວປັກກິ່ງໃນໝູ່ຊາວໜຸ່ມຍິງຊາຍແນວໃດ,ນີ້ແຫຼະກໍແມ່ນວຽກງານຂອງນັກສະແດງງິ້ວປັກກິ່ງລຸ້ນພວກເຮົາຄວນເຮັດ."
|
