|
ຖ້າໃຊ້ຄຳສັບໜຶ່ງມາບັນລະຍາຍຄຸນງາມຄວາມດີຂອງທ່ານເຕິ້ງສຽວຜິງ,ທ່ານຈະເລືອກເອົາຄຳສັບໃດ？ທ່ານວາງເຟິ່ງ ທີ່ອາຍຸ 47 ປີຂາຍໜັງສືພິມເມືອງກວາງໂຈວລາວຕອບວ່າ:"ສ້າງປະເທດຊາດໃຫ້ເຂັ້ມແຂງແລະເຮັດໃຫ້ປະຊາຊົນຮັ່ງມີຂຶ້ນ."
ປີນີ້ແມ່ນວັນຄ້າຍວັນກຳເນີດຂອງທ່ານເຕິ້ງສຽວຜິງຄົບຮອບ 100 ປີ, ພາຍຫຼັງຜູ່ນຳຈີນຜູ່ນີ້ໄດ້ລ່ວງລັບໄປ 8 ປີມາຮອດດຽວນີ້, ການຕີລາຄາຂອງທ່ານວາງເຟິ່ງໄດ້ສະແດງໃຫ້ເຫັນຜົນງານດີເລີດທ່ີສຸດຂອງທ່ານເຕິ້ງສຽວຜິງໃນພາບປະທັບໃຈຂອງປະຊາຊົນຈີນ 1 ຕື້ 300 ລ້ານຄົນນັ້ນກໍແມ່ນເຮັດໃຫ້ຈີນພົ້ນອອກຈາກສະພາບເສດຖະກິດມໍ່ຈະພັງທະລາຍ, ແລະໄດ້ກ້າວເຂົ້າສູ່ໄລຍະເສດຖະກິດເຕີບໂຕດ້ວຍຈັງຫວະໄວທີ່ຍາວຕັ້ງ 25 ປີ.
ຕົວເລກຕ່າງໆເປັນສ່ິງຢັ້ງຢືນທີ່ດີກວ່າໝູ່:ເມື່ອປີ 1978,ໃນເວລາທ່ານເຕິ້ງສຽວຜິງເລີ່ມຜັນຂະຫຍາຍນະໂຍບາຍປະຕິຮູບແລະໄຂປະຕູສູ່ພາຍນອກ, GDP ຂອງຈີນມີແຕ່ 362 ຕື້ 410 ລ້ານຢວນ;ແຕ່ເມື່ອມາຮອດປີ 2003, GDP ຂອງຈີນໄດ້ລື່ນກາຍ 11600 ຕື້ຢວນ,ຍອດບໍລິມາດເສດຖະກິດໄດ້ກ້າວກະໂດດຂຶ້ນເປັນທີ 6 ໃນໂລກ.
ທີ່ຈິງແລ້ວ,ເມື່ອ 20 ປີກ່ອນ,ທ່ານເຕິ້ງສຽວຜິງກໍໄດ້ວາງແຜນການທ່ີພັດທະນາຢ່າງວ່ອງໄວແນວນີ້. ໃນຄາວນັ້ນ,ທ່ານເຕິ້ງສຽວຜິງເວົ້າວ່າ, ຈີນຕ້ອງເຮັດໃຫ້ GDP ທີ່ສະເລ່ຍຕາມຫົວຄົນເພີ່ມຂຶ້ນສາມເທົ່າໃນທ້າຍສະຕະວັດທີ 20, ຄື, 1000 ໂດລາສະຫະລັດ, ຕໍ່ໄປອີກບັນລຸ 4000 ໂດລາສະຫະລັດໃນປີ 2050.
ນັກເສດຖະສາດຈີນເວົ້າວ່າ,ແຜນການເພີ່ມຂຶ້ນເປັນເທົ່າໆຂອງທ່ານເຕິ້ງສຽວຜິງແລະການບັນລະຍາຍອະທິບາຍຢ່າງລະອຽດຂອງກອງປະຊຸມໃຫຍ່ຜູ່ແທນພັກກອມມູນິດຈີນທຸກຄັ້ງທີ່ຈັດຂຶ້ນຕໍ່ມາຕໍ່ແຜນການດ່ັງກ່າວ,ເຮັດໃຫ້ຈີນໄດ້ມີເປົ້າໝາຍພັດທະນາເສດຖະກິດທີ່ແຈ່ມແຈ້ງ ລະອຽດແລະຄົບຖ້ວນ, ໄດ້ກຳນົດທິດຢ່າງຈະແຈ້ງໃຫ້ແກ່ການປະຕິຮູບໂຄງປະກອບເສດຖະກິດແລະການປັບປຸງໂຄງປະກອບການເມືອງ.
1 2
|
