|
ວັນທີ11ສິງຫາ,ຢູ່ປັກກິ່ງ,ທ່ານຊຸນໄລຢ້ຽນ ຫົວໜ້າກົມການບິນອະວະກາດແຫ່ງຊາດຈີນເວົ້າຕໍ່ສື່ມວນຊົນວ່າ,ປະຈຸບັນ,ດາວທຽມສຳຫຼວດຢ່ັງແທກເລກ2ໃນແຜນການສຳຫຼວດຢັ່ງແທກອະວະກາດໜ່ວຍໂລກດ້ວຍດາວທຽມສອງໜ່ວຍຂອງຈີນທີ່ຍິງສ່ົງຂຶ້ນສູ່ອະວະກາດໃນທ້າຍເດືອນກໍລະກົດນັ້ນໄດ້ເຂົ້າສູ່ໄລຍະຢັ່ງແທກຕາມໂຄຈອນແລ້ວ.ປະມານອີກເດືອນປາຍ,ດາວທຽມດ່ັງກ່າວຈະເລີ່ມໄດ້ຂໍ້ມູນຢັ່ງແທກ.ເມື່ອຮອດເວລານັ້ນ,ດາວທຽວໜ່ວຍນີ້ຈະພ້ອມກັບດາວທຽມສຳຫຼວດຢັ່ງແທກເລກ1ທີ່ຍິງສ່ົງຂຶ້ນໃນທ້າຍປີກາຍນີ້ແລະດາວທຽມ4ໜ່ວຍທ່ີກົມອະວະກາດເອີລົບຍິງສົ່ງຂຶ້ນນັ້ນກາຍເປັນການສຳຫຼວດຢັ່ງແທກແບບ3ມິຕິຈາກ6ຈຸດຕໍ່ສິ່ງແວດລ້ອມອະວະກາດໜ່ວຍໂລກທີ່ມະນຸດດຳເນີນເປັນຄັ້ງທຳອິດໃນປະຫວັດສາດ.ທັງນີ້ຈະເຮັດໃຫ້ມະນຸດເພີ່ມຄວາມຮັບຮູ້ຕໍ່ສິ່ງແວດລ້ອມອະວະກາດໜ່ວຍໂລກຕື່ມອີກຢ່າງຫຼວງຫຼາຍ.
ແຜນການດາວທຽມສອງໜ່ວຍແມ່ນນັກວິທະຍາສາດຈີນສະເໜີອອກມາເມື່ອປີ1997.ເມື່ອແຜນການດ່ັງກ່າວໄດ້ສະເໜີອອກມາແລ້ວເຮັດໃຫ້ກົມອະວະກາດເອີລົບເກີດມີຄວາມສົນໃຈຫຼາຍ.ປີ2001,ກົມການບິນອະວະກາດແຫ່ງຊາດຈີນແລະກົມອະວະກາດເອີລົບໄດ້ເຊັນສັນຍາຮ່ວມມືແຜນການດາວທຽມສອງໜ່ວຍ.ຕາມສັນຍາດ່ັງກ່າວ,ຈີນຈະຄົ້ນຄວ້າຜະລິດແລະຍິງສ່ົງດາວທຽມສອງໜ່ວຍເອົາເອງ,ສ່ວນກົມອະວະກາດເອີລົບຈະສະໜອງເຄື່ອງປະກອບສຳຫຼວດຢັ່ງແທກສ່ວນໜຶ່ງ.ດາວທຽມສອງໜ່ວຍນີ້ຈະພ້ອມກັບດາວທຽມ4ໜ່ວຍທີ່ກົມອະວະກາດເອີລົບຍິງສ່ົງຂຶ້ນແລ້ວນັ້ນດຳເນີນການສຳຫຼວດຢັ່ງແທກປະສົມຕໍ່ສິ່ງແວດລ້ອມອະວະກາດໜ່ວຍໂລກ.ສອງຝ່າຍຊົມໃຊ້ຂໍ້ມູນຢັ່ງແທກນຳກັນ.
ທ້າຍປີ2003,ຈີນໄດ້ຍິງສົ່ງດາວທຽມສຳຫຼວດຢ່ັງແທກເລກ1ເຂົ້າສູ່ໂຄຈອນທີ່ກຳນົດໄວ້ລ່ວງໜ້າ,ວັນທີ25ກໍລະກົດປີນີ້,ດາວທຽມຢັ່ງແທກເລກ2ຖືກຍິງສົ່ງຂຶ້ນສູ່ອະວະກາດຢ່າງສະດວກ.ປະຈຸບັນໄດ້ເຂົ້າສູ່ໄລຍະຢັ່ງແທກທົດລອງຕາມໂຄຈອນ.ທ່ານສືຈ້ຽນຄຸຍ ຫົວໜ້າສູນຂໍ້ມູນວິທະຍາສາດແຜນການດາວທຽມສອງໜ່ວຍສະເໜີໃຫ້ຮູ້ວ່າ:"ເມື່ອຍິງສົ່ງດາວທຽມຂຶ້ນສູ່ອະວະກາດຢ່າງສຳເລັດຜົນແລ້ວ,ກ່ອນອື່ນຕ້ອງທົດລອງຢັ່ງແທກຕາມໂຄຈອນ,ຈະກິນເວລາປະມານສອງເດືອນ,ເມື່ອທົດລອງຢັ່ງແທກຕາມໂຄຈອນແລ້ວໆ,ເຄື່ອງຢັ່ງແທກຢູ່ດາວທຽມສຳຫຼວດຢັ່ງແທກເລກສອງຈະຮັບຂໍ້ມູນຢັ່ງແທກຢ່າງເປັນທາງການ."
ຕາມໄດຊາບ,ປະຈຸບັນ,ເຄື່ອງຢັ່ງແທກ8ເຄື່ອງໃນດາວທຽມສຳຫຼວດຢັ່ງແທກເລກ1ໄດ້ເລີ່ມເຮັດວຽກໝົດແລ້ວ,ແລະໄດ້ຮັບຂໍ້ມູນຢັ່ງແທກຈຳນວນຫຼວງຫຼາຍ,ພະນັກງານຄົ້ນຄວ້າວິທະຍາສາດພວມວິເຄາະຂໍ້ມູນເຫຼົ່ານີ້,ແລະໄດປະກົດເຫັນປະກົດການອະວະກາດຈຳນວນໜຶ່ງທີ່ໜ້າສົນໃຈທີ່ສຸດ.
ທ່ານອູຈີ້ ຜູ່ບັນຊາການໃຫຍ່ທັງເປັນນາຍຊ່າງໃຫຍ່ອອກແບບລະບົບນຳໃຊ້ແຜນການດາວທຽມສອງໜ່ວຍຊີ້ອອກວ່າ,ຂໍ້ມູນທີ່ດາວທຽມສຳຫຼວດຢັ່ງແທກເລກ1ສ່ົງຄືນແລະການເຄື່ອນໄຫວສຳຫຼວດຢັ່ງແທກໃນອະນາຄົດຂອງດາວທຽມສຳຫຼວດຢັ່ງແທກເລກ2ມີຄວາມໝາຍສຳຄັນ.ທ່ານກ່າວວ່າ,ຄວາມຮັບຮູ້ຕໍ່ອະວະກາດໜ່ວຍໂລກຂອງມະມຸດເຮົາຍັງບໍ່ເລິກປານໃດ.ທັງບໍ່ມີວິທີຄາດຄະເນລ່ວງໜ້າ.ຜ່ານການຄົ້ນຄວ້າວິທະຍາສາດແລະການວິເຄາະຂໍ້ມູນຂອງນັກວິທະຍາສາດຈະສະໜອງຄວາມຮູ້ໃໝ່ຈຳນວນໜຶ່ງ,ບົນພື້ນຖານຄວາມຮູ້ໃໝ່ເຫຼົ່ານີ້,ພວກເຮົາຈະສະໜອງສິ່ງຮັບປະກັນຍິ່ງຫຼາຍກວ່າເກ່ົາໃຫ້ແກ່ມະນຸດນຳໃຊ້ອະວະກາດຕື່ມອີກ.
ແຜນການດາວທຽມສອງໜ່ວຍແມ່ນຈີນຮ່ວມມືສະເໝີພາບກັນກັບປະເທດພັດທະນາໃນລະດັບສູງແລະມີລັກສະນະທາດແທ້ເປັນຄັ້ງທຳອິດໃນໂຄງການສຳຫຼວດຢັ່ງແທກອະວະກາດອັນກ້າວໜ້າ.ຜູ່ຊ່ຽວຊານທີ່ກ່ຽວຂ້ອງຊີ້ອອກວ່າ,ການຮ່ວມມືດ່ັງກ່າວຈະເຮັດໃຫ້ນັກວິທະຍາສາດສອງຝ່າຍຈີນເອີລົບສາມາດຊົມໃຊ້ຂໍ້ມູນຢັ່ງແທກທີ່ກ້າວໜ້າຮອບດ້ານນຳກັນ,ແລ້ວຊຸກຍູ້ການພັດທະນາວິທະຍາສາດອະວະກາດສາກົນຢ່າງແຂງແຮງ.
|
