|
ນິທານເລ່ືອງນີ້ເກີດຂຶ້ນຢູ່ຈີນສະໄໝບູຮານ ຄື ຄ.ສ.ປີ 28. ໃນສະໄໝນັ້ນແມ່ນຮ້ອງເຕ້ລິວຊິ້ວເປັນຜູ່ປົກຄອງບ້ານເມືອງ, ມີນາຍພົນຜູ່ໜ່ຶງຊ່ືວ່າເກິງປໍຈາວ ແມ່ນນາຍທະຫານສຳຄັນຜູ່ໜ່ຶງຂອງຮ້ອງເຕ້ລິວຊິ້ວໃນການຕີເອົາບ້ານເມືອງຄອງລາຊະບັນລັງ. ແຕ່ເດີມ ເກິງປໍຈາວແມ່ນປັນຍາຊົນຜູ່ໜ່ຶງ, ພາຍຫຼັງມາຍ້ອນໄດ້ເຫັນພວກທະຫານຝຶກແອບເລື້ອຍໆ ຮູ້ສຶກວ່າສະຫງ່າແທ້ໆ, ເລີຍມີຄວາມສົນໃຈນຳວິຊາການທະຫານ. ພາຍຫຼັງມາ ເກິງປໍຈາວໄດ້ອອກຫົວຄິດໃຫ້ຮ້ອງເຕ້ລິວຊິ້ວ, ເຮັດໃຫ້ຮ້ອງເຕ້ລິວຊິ້ວເອົາຊະນະສັດຕູຫຼາຍຄັ້ງ.
ມີເທ່ືອໜ່ຶງ, ຮ້ອງເຕ້ລິວຊິ້ວແຕ່ງໃຫ້ເກິງປໍຈາວນຳພາທະຫານໄປບຸກໂຈມຕີກອງທະຫານຈາງປູ້.ຈາງປູ້ຄຶດວ່າຕົນເອງມີກຳລັງທະຫານເຂັ້ມແຂງ,ຈ່ຶງມິ່ນປະໝາດເກິງປໍຈາວ.ຈາງປູ້ຈັດວາງທະຫານໄວ້ຫຼາຍແຫ່ງສູ້ລົບກັບເກິງປໍຈາວ. ກອງທະຫານຂອງເກິງປໍຈາວໄດ້ຮັບໄຊຊະນະຢ່າງຕໍ່ເນ່ືອງກັນ,ສ່ວນກອງທະຫານຈາງປູ້ພັດພ່າຍແພ້ປັບໜີ.ຫຼັງຈາກຈາງປູ້ເສຍໄຊແລ້ວ,ຕໍ່ມາເຂົາກໍເຕົ້າໂຮມກຳລັງທະຫານເປັນຈຳນວນຫຼວງຫຼາຍຫວັງຈະກັບຕ່າວຄືນມາສູ້ກັບເກິງປໍຈາວອີກ. ລູກນ້ອງເກິງປໍຈາວເຫັນວ່າກຳລັງທະຫານຂອງສັດຕູຫຼາຍກວ່າຝ່າຍຕົນຫຼາຍ, ເລີຍສະເໜີໃຫ້ເກິງປໍຈາວລໍຖ້າທະຫານກອງໜູນມາແລ້ວຈ່ຶງສູ້ກັບຈາງປູ້ຂັ້ນແຕກຫັກ, ເກິງປໍຈາວເວ້ົາວ່າ: ຮ້ອງເຕ້ມໍ່ຈະສະເດັດມາເຖິງແລ້ວ,ພວກເຮົາຄວນຂ້າງົວຄົວຊິ້ນກຽມເຫຼົ້າໄວ້ຮັບຕ້ອນຮ້ອງເຕ້ຢ່າງຄຶກຄື້ນຈ່ຶງຄ່ອຍແມ່ນ, ຈະປະສັດຕູທ່ີຍັງບໍ່ຖືກດັບສູນໄວ້ໃຫ້ຮ້ອງເຕ້ແນວໃດ? ບັດນັ້ນ ເກິງປໍຈາວເລີຍນຳພາກອງທະຫານສູ້ລົບຕົບຕີກັບສັດຕູຢ່າງດຸເດືອດມື້ໜ່ຶງເຕັມໆ, ໃນທ່ີສຸດໄດ້ຜາບແພ້ຈາງປູ້.
ຕໍ່ມາບໍ່ເທ່ົາໃດມື້, ຮ້ອງເຕ້ລິງຊິ້ວໄດ້ສະເດັດມາຢາມນາຍແລະພົນທະຫານທ່ີໄດ້ຮັບໄຊຊະນະ , ຮ້ອງເຕ້ລິວຊິ້ວໄດ້ຍ້ອງຍໍສໍລະເສີນເກິງປໍຈາວຢູ່ຕໍ່ໜ້າເສນາອາມາດຢ່າງໃຫຍ່ແລະຊົງຕັດວ່າ: "ນີ້ແຫຼະນໍເພ່ິນວ່າຜູ່ມີມານະຈິດຍ່ອມຈະໄດ້ຮັບຜົນສຳເລັດ". ຊ່ິງກໍກົງກັບຄວາມລາວທ່ີວ່າ: "ຄວາມພະຍາຍາມຢູ່ໃສ, ຄວາມສຳເລັດຜົນຢູ່ຫັ້ນ, ຫຼືຄຳພັງເພີຍລາວທ່ີວ່າ, ເກົ້າອົດເກົ້າເຍື້ອນ ຫາກຈະໄດ້ທ່ອນຄຳ.
ຊູ່ມື້ນີ້, ພວກເຮົາກໍມັກໃຊ້ຄຳສຸພາສິດນີ້ມາລະດົມໃຈຕົນເອງເລື້ອຍໆ, ກ່ອນອື່ນຕ້ອງມີອຸດົມຄະຕິອັນຖືກຕ້ອງ, ພ້ອມນັ້ນຍັງຕ້ອງມີຄວາມໝັ້ນໃຈຕໍ່ຕົນເອງເພ່ືອເຮັດໃຫ້ອຸດົມການປະກົດຜົນເປັນຈິງ, ແລະຍັງຕ້ອງເຮັດແທ້ທຳຈິງ ພະຍາຍາມຢ່າງບໍ່ລົດລະ, ເມ່ືອເຮັດຈ່ັງຊັ້ນແລ້ວ, ພວກເຮົາຍ່ອມຈະໄດ້ຮັບຜົນສຳເລັດໃນທ່ີສຸດ. ທ່ານວ່າແມ່ນບໍ?
|
