ຕັ້ງ​ແຕ່​ມາ​ເລ​​ເຊຍ​ປະ​ກາດ​ວ່າ ຢູ່​ບ້ານ​ຫນຶ່ງ​ທ່ີ​ລັດ​ຈີ​ລັນ​ດັນ ພາກ​ເຫນືອ​ຂອງ​ມາ​ເລ​ເຊຍ​​ເກີດ​ມີ​ພະ​ຍາດໄຂ້ຫວັດ​ສັດ​ປີກ​​ເມື່ອ​ວັນ​ທີ 18 ສິງ​ຫາ​ເປັນ​ຕົ້ນ​ມາ, ລັດ​ຖະ​ບານ​ມາ​ເລ​ເຊຍ​ໄດ້​ໃຊ້​ມາດ​ຕະ​ການ​ຕ່າງໆ​ຄື ຈັບ​ຂ້າ​ສັດ​ປີກ​ຢູ່​ເຂດ​ເກີດ​ພະ​ຍາດ ຕັ້ງ​ເຂດ​ຄວບ​ຄຸມ ​ເຂດ​ກັກ​ກັ້ນ​ແລະ​ເພີ່ມ​ທະ​ວີ​ການ​ກວດ​ກາ​ພະ​ຍາດ​ເປັນ​ຕົ້ນ, ອັນ​ໄດ້​ຄວບ​ຄຸມ​ສະ​ພາບ​ໄຂ້​ຫວັດ​ສັດ​ປີກ,​ແລະ​ສະກັດ​ກັ້ນ​ພະ​ຍາດ​ໄຂ້​ຫວັດ​ສັດ​ປີກ​ແຜ່​ລະ​ບາດ​ອອກ.

ກາງ​ເດືອນ​ສິງຫາ,​ໄກ່ 40 ​ໂຕ​ໃນ​ບ້ານ​ບາ​ລູປານ​ຊີ​ທ່ີ​ລັດ​ກີ​ລັນ​ດັນ​ຕາຍ​ຢ່າງ​ກະ​ທັນ​ຫັນ.ພາກ​ສ່ວນ​ສັດ​ຕະ​ວັດ​ແພດ​ເມື່ອ​ໄດ້​ວິ​ເຄາະ​​ໄກ່​ບາງ​ໂຕ​ທ່ີ​ຕາຍ​ແລ້ວ​ຕົກ​ລົງ​ວ່າ​ໄກ່​ງວດ​ນີ້​ແມ່ນ​ຕາຍ​ຍ້ອນ​ຕິດ​ແປດ​ເຊື້ອ​​ໄວ​ລັດ H5N1.​ພະ​ຍາດ​ໄຂ້​ຫວັດ​ສັດ​ປີກ​ທ່ີ​ແຜ່​ລະບາດ​ຢູ່​ປະ​ເທດ​ແລະ​ເຂດ​ແຄວ້ນ​ຈຳນວນ​ຫນຶ່ງ​ຢູ່​ອາຊີ​ໃນ​ຫລາຍ​ປີ​ມາ​ນີ້​​ໄດ້ເກີດ​ຂຶ້ນ​ຢູ່​ມາ​ເລ​ເຊຍ​ເປັນ​ຄັ້ງ​ທຳ​ອິດ,​ເຮັດ​ໃຫ້​ລັດຖະບານ​ມີ​ສະຕິ​ລະວັງ​ຕົວ​ສູງ,​ແລະ​ໄດ້​ນຳ​ໃຊ້​ຫລາຍ​ມາດ​ຕະ​ການ​ປ້ອງ​ກັນ​​ໃນ​ທັນທີ.

ບ້ານ​ບາ​ລູປານ​ຊີ​ແມ່ນ​ບ້ານ​ນ້ອຍໆ​ທ່ີ​ມີ​ຊາວບ້ານ​ບໍ່​ຮອດ 100 ຫລັງ​ເຮືອນ,ຫ່າງ​ຈາກ​ພາກ​ໃຕ້​ຂອງ​ໄທ​ທ່ີ​ເຄີຍ​ເກີດ​ພະ​ຍາດ​ໄຂ້​ຫວັດ​ສັດ​ປີກ​ໃນຕົ້ນປີ​ນີ້ປະມານ 100 ກິ​ໂລ​ແມັດ.ພາຍ​ຫລັງ​ບ້ານ​ບາ​ລູປານ​ຊີ​ປະ​ກົດ​ເຫັນ​ພະຍາດໄຂ້ຫວັດ​ສັດ​ປີກ​ແລ້ວ, ກົມ​ສັດຕະວັດ​ແພດ​ມາ​ເລ​ເຊຍ​ໄດ້​ປະກາດ​ແຈ້ງ​ການ​ປ້ອງ​ກັນ​ໂດຍ​ດ່ວນ,ຈັດວາງ​ວົງປ້ອງ​ກັນ​ຫລາຍ​ຂັ້ນ,​​ແລະ​ປະກາດ​ວ່າ​ຢູ່​​ບໍລິ​ເວນອ້ອມ​ເຂດ​ປະ​ກົດ​ມີ​​ພະ​ຍາດ​ໄຂ້​ຫວັດ​ສັດ​ປີກ 1 ກິ​ໂລ​ແມັດ​ເປັນ​ເຂດ​ເກີດ​ພະຍາດ, ສອງ​ກິ​ໂລ​ແມັດ​ເປັນ​ເຂດ​ຄວບ​ຄຸມ, 10 ກິ​ໂລ​ແມັດ​ແມ່ນ​ເຂດ​ກັກ​ກັ້ນ.ວັນ​ທີ 19 ສິງຫາ ພະນັກງານ 80 ກວ່າ​ຄົນ​ຂອງ​ກົມ​ສັດ​ຕະ​ວະ​ແພດ​ມາ​ເລ​ເຊຍ​ໄດ້​ຈັບ​ຂ້າ​ໄກ່ ​ເປັດ​ແລະ​ນົກ​ລ້ຽງ 300 ກວ່າ​ໂຕ​ໃນ​ເຂດ​ເກີດ​ພະຍາດ,​ແລະ​ໄດ້​ດັບ​ເຊື້ອ​ຢ່າງ​ເຖິງ​ຖອງ​ຕໍ່​ຟາມ​ລ້ຽງ​ສັດ​ປີກ.ຍັງ​ມີ​ສັດ​ຕະ​ວະ​ແພດ​ແລະ​ພະ​ນັກ​ງານ​ພາກ​ສ່ວນ​ສາ​ທາ​ລະ​ນະ​ສຸກ 100 ຄົນ​ເຂົ້າ​ປະຈຳ​ຢູ່​ເຂດ​ເກີດ​ພະ​ຍາດ,​ເພື່ອ​ຕິດຕາມ​ພະ​ຍາດ​ໄຂ້​ຫວັດ​ສັດ​ປີກ.ຢູ່​ໃນ​ເຂດ​ຄວບ​ຄຸມ​ທ່ີ​ຢູ່​ອ້ອມ​ແອ້ມ 2 ກິ​ໂລ​ແມັດ, ພະ​ນັກ​ງານ​​ກົມ​ສັດ​ຕະ​ວັດ​ແພດ​ໄດ້​ກວດ​ກາ​ຢ່າງ​ຮອບ​ດ້ານ​ຕໍ່​ບ່ອນ​ລ້ຽງສັດ​ປີກ,​ໃນ​ຫນຶ່ງ​ອາທິດ​ມາ​ນີ້ ​ໄດ້​​ເອົາ​ເລືອດ 3000 ກວ່າ​ເທື່ອ​ຈາກ​ສັດ​ປີກ​ແລະ​ສັດລ້ຽງ​ເພື່ອ​ວິ​ເຄາະ​ກວດ​ກາ,ຈົນ​ຮອດ​ປະຈຸ​ນ ຍັງບໍ່​ໄດ້​ປະກົດ​ເຫັນ​ມີ​ເຊື້ອ​ໄວ​ລັດ​ໄຂ້​ຫວັດ​ສັດ​ປີກ.ຢູ່​ເຂດ​ກັກ​ກັ້ນ​ທ່ີ່ຢູ່​ອ້ອມ​ແອ້ມ 10 ກິ​ໂລ​ແມັດ,ພາກ​ສ່ວນ​ສັດຕະວະ​ແພດ​ໄດ້​ຕັ້ງສະຖານີ​ກວດ​ກາ​ຕະ​ຫລອດ 24 ຊົ່ວ​ໂມງ,ຫ້າມ​​ເອົາ​ສັດ​ປີກ​ອອກ​ຈາກ​ເຂດກັກ​ກັ້ນ.ພ້ອມ​ກັນນັ້ນ ພາກ ສ່ວນ​ທ່ີ​ກ່ຽວ​ຂ້ອງ​ຍັງ​ໄດ້​ກັກ​ກັ້ນໄກ່​ເປັດ 8 ຫມື່ນ​ໂຕ​ຢູ່​ໃນເຂດ​ດ່ັງກ່າວ,​ໄລຍະ​ກັກກັ້ນ​ແມ່ນ 21 ມື້.ນອ​ນີ້ ມາ​ເລ​ເຊຍ​ຍັງ​ໄດ້​​ເລືອກ​ກວດ​ກາ​​ໄກ່​ເປັດບາງ​ໂຕ​ໃນ​ຈຳນວນ 3 ​ແສນ 8 ຫມື່ນ​ໂຕ​ຂອງ​ລັດ​ກີ​ລັນ​ດັນ,ນັບ​ມາ​ຮອດ​ປະຈຸ​ບັນ​ຍັງ​ບໍ່​ທັນ​ເຫັນ​ມ​​ີ​ສະ​ພາບ​ທ່ີ​ຜິດ​ປົກກະຕິ​.

ຍ້ອນ​ວ່າ​​ເຊື້ອ​ໄວ​ລັດ​ພະ​ຍາດ​ໄຂ້​ຫວັດ​ສັດ​ປີກ​ອາດ​ຈະ​ເຮັດ​ໃຫ້​ມະ​ນຸດ​ຄົນ​ເຮົາຕິດ​ແປດ, ສະ​ນັ້ນ ລັດ​ຖະ​ບານ​ມາ​ເລ​ເຊຍ​ກໍ່​ໄດ້​ນຳ​ໃຊ້​ມາດ​ຕະ​ການ​ປ້ອງ​ກັນ​ຢ່າງ​ລະມັດລະວັງ,ອົງການ​ປິ່ນປົວ​ຂອງ​ລັດ​ຈຳ​ນວນ​ຫນຶ່ງຢູ່​​ໃນສະພາ ວະ​ກຽມພ້ອມ​ໃນ​ລະດັບ​ສູງ,​ເພື່ອ​ຮັບ​ມື​ກັບ​ເຫດການ​ສຸກ​ເສີນ.ພາກ​ສ່ວນ​ສາທາລະນະ​ສຸກ​ໄດ້​ກວດກາ​ 1372 ຄົນ​ຂອງ 297 ຄອບຄົວ​ໃນ​ເຂດ​ເກີດ​ພະຍາດ​ແລະ​ເຂດ​ຄວບ​ຄຸ​ມ,​ໄດ້​ປະກົດ​ເຫັນ​ມີຊາວບ້ານ 2 ຄົນ ​ເຈົ້າຫນ້າ​ທ່ີ​ກົມ​ສັດຕະວະ​ແພດ 1 ຄົນ​ແລະ​ນາຍ​ຫມໍຄົນ​ຫນຶ່ງ​ມີ​ອາ​ການ​ໄຂ້​ຫວັດ.​ແຕ່​​ເມື່ອ​ນອນ​ໂຮງຫມໍ​ວິ​ເຄາະ​ກວດກາ​ແລ້ວ,ຄົນ​ເຈັບ 4 ຄົນ​ດ່ັງກ່າວ​ຖືກ​ບົ່ງມະຕິ​ວ່າ​ບໍ່​ໄດ້​ຕິດ​ແປດ​ພະ​ຍາດ​ໄຂ້ຫວັດ​ສັດ​ປີກ,ດຽວ​ນີ້​ໄດ້​ອອກ​ໂຮງຫມໍ​ແລ້ວ.

ພາຍ​ຫລັງ​ເກີດ​ພະ​ຍາດ​ໄຂ້​ຫວັດ​ສັດ​ປີກ​ແລ້ວ,ມາ​ເລ​ເຊຍ​ໄດ້​ແຈ້ງ​ສະພາບ​ພະຍາດ​ໄຂ້​ຫວັດ​ສັດ​ປີກ​ຕໍ່​ອົງ​ການ​ການ​ຄ້າ​ໂລກ​ແລະ​ປະ​ເທດ​ທ່ີ​ກ່ຽວ​ຂ້ອງ​ໃນ​ທັນທີ, ສິງ​ກະ​ໂປ​ແລະ​ຍີ່​ປຸ່ນ​ເປັນ​ຕົ້ນກໍ່​ໄດ້​ອອກ​ຄຳ​ສັ່ງ​ເຊົາ​ນຳ​ເຂົ້າ​ສັດ​ປີກ​ຈາກ​ມາ​ເລ​ເຊຍ.

​ພະ​ຍາດ​ໄຂ້​ຫວັດ​ສັດ​ປີກ​ເຮັດ​ໃຫ້​ຂະ​ແຫນງ​ການ​ລ້ຽງສັດ​ປີກ​ຂອງ​ມາ​ເລ​ເຊຍ​ເສຍ​ຫາຍ 5 ​ແສນ 3 ຫມື່ນ​ໂດ​ລາ​ຕໍ່​ມື້.ລາ​ຄາ​ໃບ​ຫຸ້ນ​ຂອງ​ວິ​ສາ​ຫະ​ກິດ​ລ້ຽງ​ສັດປີກ​ໃນ​ໂຮງ​ຊື້ຂາຍ​ໃບ​ຫຸ້ນ​ມາ​ເລ​ເຊຍ​ຕົກ​ຕຳ່​ລົງ​ຢ່າງ​ຫລວງ​ຫລາຍ.​ເພື່ອ​ຜ່ອນ​ຄາຍ​ສະ​ພາບ​ການ​ຫຍຸ້ງຍາກ​ຂອງ​ຜູ່​ລ້ຽງ​ສັດ​ປີກ, ລັດ​ຖະ​ບານ​ມາ​ເລ​ເຊຍ​ໄດ້​​ຕົກ​ລົງ​ໃຫ​​້ຄ່າ​ທົດ​ແທນ,​ໄກ່​ທ່ີ​ຖືກ​ຂ້າ​ແຕ່​ລະ​ໂຕ​ຈະ​ໃຫ້​ຄ່າ​ທົດ​ແທນ 5 ລິນ​ກິດ ​ເປັດ​​ແລະ​ຫ່ານ​ແຕ່​ລະ​ໂຕ 10 ລິນ​ກິດ.

ຫວ່າງ​ມໍ່​ໆ​ນີ້ ອົງ​ການ​ອະນາ​ໄມ​ໂລກ​ໄດ້​ຍ້ອງ​ຍໍ​ລັດ​ຖະ​ບານ​ມາ​ເລ​ເຊຍ​​ໄດ້ນຳ​ໃຊ້​ມາດ​ຕະການ​ຢ່າງ​ທັນ​ການ​ແລະ​ກັ້ນກາງ​ພະຍາດ້​ໄຂ້ຫວັດ​ສັດ​ປີກ​ແຜ່​ລະ​ບາດ​ອອກ.ພ້ອມ​ກັນນັ້ນ ກໍ່​ເຕືອນ​ໃຫ້​ບັນ​ດາ​ປະ​ເທດ​ໃນ​ອາ​ຊີ​ວ່າ, ການ​ດັບ​ສູນ​ພະ​ຍາດ​ໄຂ້​ຫວັດ​ສັດ​ປີກ​ແມ່ນ​ວຽກ​ງານ​ໄລຍະ​ຍາວ,ບັນດາ​ປະ​ເທດ​ຍັງ​ຕ້ອງການ​ຮ່ວມ​ມກັນຢ່າງ​ບໍ່​ລົດ​ລະ.