|
|
(GMT+08:00)
2004-09-09 15:08:21
|
|
ເສດຖະກິດອາຊຽນຫັນເປັນເອກະພົບດຽວໄດ້ມີຄວາມຄືບໜ້າໃໝ່
cri
Author: huang
10 ປະເທດອາຊຽນໄດ້ຕົກລົງຈຸດໝາຍອັນໃຫຍ່ໂຕມະໂຫລານທີ່ເຮັດໃຫ້ເຂດແຄ້ວນຫັນເປັນເອກະພົບດຽວໃນປີ 2020, ຈະຜັນຂະຫຍາຍແລະປະຕິບັດແຜນການດຳເນິນງານສ້າງປະຊາຄົມອາຊຽນແນວໃດ, ໄດ້ກາຍເປັນບັນຫາທີ່ພາກພື້ນອາຊີກໍຄືທົ່ວໂລກສົນໃຈນຳທີ່ສຸດ. ກອງປະຊຸມລັດຖະມົນຕີກະຊວງເສດຖະກິດອາຊຽນຄັ້ງທີ 36 ທີ່ພວມຈັດຂຶ້ນຢູ່ຢາກາກຕາໄດ້ປະກາດເປັນທາງການວ່າ, ອາຊຽນໄດ້ກ້າວເຖິງຂັ້ນມີຄວາມຮັບຮູ້ຄືກັນກ່ຽວກັບບາດກ້າວໄຂປະຕູ 10 ຂົງເຂດບູລິດມະສິດແລະຍົກເລີກພາສີອາກອນ, ແລະໄດ້ເຊັນສັນຍາໂຄງຮ່າງສະບັບໜຶ່ງ, ນີ້ໝາຍຄວາມວ່າ, ອາຊຽນໄດ້ຂຶ້ນຂັ້ນໃດຂັ້ນໃໝ່ໃນດ້ານຊຸກຍູ້ການຮ່ວມມືແລະຫັນການຄ້າຂອງພາກພື້ນເປັນແບບເສລີ.
ກອງປະຊຸມລັດຖະມົນຕີກະຊວງເສດຖະກິດອາຊຽນເທື່ອນີ້ໄດ້ເຈາະຈົງຄົ້ນຄວ້າບາດກ້າວໄຂປະຕູ 11 ຂົງເຂດບູລິດມະສິດແລະຍົກເລີກພາສີອາກອນ. 11 ຂົງເຂດບູລິດມະສິດນີ້ແມ່ນກະສິກຳ, ການປະມົງ, ເຄື່ອງຈັກລົດຍົນ, ຜະລິດຕະພັນໄມ້, ຜະລິດຕະພັນຢາງພາລາ, ສິ່ງປັ່ນທໍແລະເສື້ອຜ້າສຳເລັດຮູບ, ຜະລິດຕະພັນເອເລັກໂຕຼນິກ, ການຂົນສ່ົງທາງການບິນ, ການທ່ອງທ່ຽວ, ການຄ້າເອເລັກໂຕຼນິກ, ສາທາລະນະສຸກແລະສຸຂາພິບານ, ຜະລິດຕະພັນທີ່ກວມທັງນັ້ນມີໝື່ນກວ່າຊະນິດ. ໃນກອງປະຊຸມເຈົ້າໜ້າທີ່ຊັ້ນສູງຂອງ 10 ປະເທດທີ່ຈັດຂຶ້ນກ່ອນໜ້ານີ້, ຝ່າຍຕ່າງໆເຄີຍມີຄວາມເຫັນຂັດກັນຕໍ່ 4 ຂົງເຂດໃນ 11 ຂົງເຂດດັ່ງກ່າວຄືກະສິກຳ ການປະມົງ ຜະລິດຕະພັນໄມ້ແລະການຂົນສ່ົງທາງການບິນຈະກວມຢູ່ໃນບັນຊີລາຍຊື່ໄຂປະຕູຫລືບໍ່. ແຕ່ຜ່ານຄວາມພະຍາຍາມຂອງຝ່າຍຕ່າງໆ, ໃນທີ່ສຸດ, ກອງປະຊຸມລັດຖະມົນຕີເສດຖະກິດອາຊຽນໄດ້ກ້າວເຖິງຂັ້ນມີຄວາມຮັບຮູ້ຄືກັນໃຫ້ໄຂ 10 ຂົງເຂດອື່ນນອກຈາກຂົງເຂດການຂົນສ່ົງທາງການບິນ, ບັນຫາຂົນສ່ົງທາງການບິນຈະມອບໃຫ້ກອງປະຊຸມລັດຖະມົນຕີຄົມມະນາຄົມແລະການຂົນສ່ົງທີ່ຈະຈັດຂຶ້ນໃນເວລາຫລ້າແດ່ໃນປີນີ້ນຳໄປຫາລືກັນຕື່ມອີກ.
ອິງຕາມສັນຍາໂຄງຮ່າງທີ່ເຊັນໃນກອງປະຊຸມ, 6 ປະເທດລິເລີ່ມໃນ 10 ປະເທດອາຊຽນຄືບຼູໄນ ອິນດູເນເຊຍ, ມາເລເຊຍ, ຟີລິບປີນ ສິງກະໂປແລະໄທຈະໄຂຕະຫລາດຢ່າງເສລີໃນ 10 ຂົງເຂດດັ່ງກ່າວໃນປີ 2007, ຫວຽດນາມ ກຳປູເຈຍ ລາວ ແລະມຽນມາທີ່ເຂົ້າຮ່ວມອາຊຽນໃນພາຍຫລັງຈະໄຂຕະຫລາດໃນປີ 2012, ເຮັດໃຫ້ຂະບວນວິວັດຫັນເສດຖະກິດເປັນເອກະພົບດຽວກັນຢູ່ພາກພື້ນອາຊຽນບັນລຸຜົນເປັນຈິງ. ປີ 2003, ໃນກອງປະຊຸມສຸດຍອດອາຊຽນຄັ້ງທີ 9 ທີ່ຈັດຂຶ້ນຢູ່ເກາະບາຫຼີແຫ່ງອິນດູເນເຊຍ, ປະເທດອາຊຽນເປັນເອກະສັນກັນເຫັນດີນຳແຜນການອັນໃຫຍ່ໂຕມະໂຫລານທີ່ສ້າງຕັ້ງປະຊາຄົມອາຊຽນໃນປີ 2020. ຮອດເວລານັ້ນ, ອາຊຽນຈະກາຍເປັນຕະຫລາດໃຫຍ່ທີ່ເປັນເອກະພາບກັນເຊິ່ງມີຜູ່ບໍລິໂພກ 520 ລ້ານຄົນທີ່ປະກອບດ້ວຍສາມເສົາຄ້ຳໃຫຍ່ຄືປະຊາຄົມເສດຖະກິດ ປະຊາຄົມຄວາມປອດໄພ ແລະປະຊາຄົມສັງຄົມແລະວັດທະນະທຳ,. ເພື່ອບັນລຸເປົ້າໝາຍດັ່ງກ່າວ, ປະເທດອາຊຽນໄດ້ຮັບເອົາຫລັກການປຶກສາຫາລືເປັນເອກະກັນກັນ, ຫລຸດທຳນຽມແລະລະບຽບການທີ່ມະຍິບມະຍ່ອຍໃນດ້ານການຄ້າແລະການລົງທຶນໃຫ້ໜ້ອຍລົງ, ເພື່ອໃຫ້ການຈໍລະຈອນສິນຄ້າແລະການລົງທຶນໃນເຂດແຄ້ວນບໍ່ມີສິ່ງກີດຂວາງ. ກອງປະຊຸມລັດຖະມົນຕີກະຊວງເສດຖະກິດເທື່ອນີ້ໄດ້ປະກອບສ່ວນອັນພົ້ນເດັ່ນຕໍ່ເລື່ອງນີ້.
ປະເທດອາຊຽນກໍໄດ້ຮັບຜົນດີໃນດ້ານຊຸກຍູ້ການຄ້າເສລີໃນເຂດແຄ້ວນ. ແຕ່ປີ 2003 ເປັນຕົ້ນມາ, ປະເທດອາຊຽນໄດ້ຫລຸດພາສີຂອງສິນຄ້າສ່ວນຫລາຍລົງຮອດ 5% ລົງລຸ່ມ. ບໍລິມາດຂາອອກລະຫວ່າງປະເທດອາຊຽນໃນປີ 2003 ບັນລຸເຖິງ 94 ຕື້ 700 ລ້ານໂດລາສະຫະລັດ, ເພີ່ມຂຶ້ນຫລາຍກວ່າປີກ່ອນ 15,4%. ໃນໄລຍະນີ້, ຍອດບໍລິມາດຂາອອກຂອງປະເທດອາຊຽນໄດ້ບັນລຸເຖິງ 430 ຕື້ 390 ລ້ານໂດລາສະຫະລັດ, ເພີ່ມຂຶ້ນຫລາຍກວ່າປີກ່ອນ 12%. ໃນພິທີໄຂກອງປະຊຸມດັ່ງກ່າວ, ທ່ານນາງເມກາວາຕີ ປະທານາທິບໍດີອິນໂດເນເຊຍກ່າວວ່າ, ເພື່ອຊຸກຍູ້ໃຫ້ເສດຖະກິດເປັນເອກະພົບດຽວແລະການຄ້າຢ່າງເສລີຢູ່ປະເທດອາຊຽນ, ອາຊຽນບໍ່ຄວນປິດປະຕູ, ຕ້ອງປະຕິບັດການໄຂປະຕູສູ່ພາຍນອກ, ຍັງຕ້ອງສືບຕໍ່ປົວແປງການພົວພັນການຄ້າແລະເສດຖະກິດກັບອິນເດຍ ຈີນ ຍີ່ປຸ່ນ ສ.ເກົາຫລີ ອົສຕຼາລີແລະນູແວນເຊລັງເປັນຕົ້ນເຊິ່ງເປັນໝູ່ຄູ່ການຄ້າຕົ້ນຕໍຂອງອາຊຽນ.
|
|
|