|
|
 |
| (GMT+08:00)
2004-09-17 18:19:16
|
 |
|
ຄະນະນັກກິລາຈີນຍາດແຍ່ງໃຫ້ໄດ້ຮັບຜົນງານດີເດັ່ນໃນງານກິລາໂອລິມປິກຄົນພິການ
cri
Author: cbf
ພາຍຫຼັງງານກິລາໂອລິມປິກລະດູຮ້ອນປີ 2004 ໄດ້ສິ້ນສຸດລົງແລ້ວ,ງານກິລາໂອລິມປິກຄົນພິການຄັ້ງທີ 12 ກໍຈະໄຂຂຶ້ນຢູ່ອາແຕນແຫ່ງເກຼັກອີກ.ດຽວນີ້,ຄະນະນັກກິລາຈີນທີ່ເຂົ້າຮ່ວມງານກິລາໂອລິມປິກຄົນພິການຄັ້ງນີ້ໄດ້ເດີນທາງໄປຮອດອາແຕນທັງໝົດແລ້ວ,ພວກເຂົ້າເຈົ້າຈະຕະລຸມບອນເປົ້າໝາຍທີ່ໄດ້ແນໄວ້ແລ້ວ.
ຕາມຂໍ້ກຳນົດທີ່ກ່ຽວຂ້ອງຂອງຄະນະກຳມະການໂອລິມປິກສາກົນ,ຕົວເມືອງທີ່ຈັດງານກິລາໂອລິມປິກລະດູຮ້ອນຈະຈັດງານກິລາໂອລິມປິກຄົນພິການຫຼັງຈາກນັ້ນ,ງານກິລາໂອລິມປິກຄົນພິການຄັ້ງທີ 12 ຈະຈັດຂຶ້ນຢູ່ອາແຕນແຫ່ງເກຼັກແຕ່ວັນທີ 17 ຮອດວັນທີ 28 ກັນຍາ ເວລາທ້ອງຖິ່ນ.ຕາມໄດ້ຊາບ,ນັກກິລາ 4000 ກວ່າຄົນທີ່ມາຈາກ 140 ກວ່າປະເທດແລະເຂດແຄວ້ນໃນໂລກຈະເຂົ້າຮ່ວມການແຂ່ງຂັນ 19 ລາຍການໃຫຍ່.ຄຳຂວັນຂອງງານກິລາໂອລິມປິກຄົນພິການອາແຕນຄັ້ງນີ້ແມ່ນສະແຫວງຫາ ກຳລັງ ການລະດົມໃຈແລະພິທີສະຫຼອງ.
ໃນງານກິລາໂອລິມປິກລະດູຮ້ອນຄັ້ງທີ 28 ທີ່ຫາກໍ່ສິ້ນສຸດລົງ,ຄະນະນັກກິລາຈີນໄດ້ຫຼຽນຄຳຫຼາຍທີສອງ,ໄດ້ຮັບຜົນສຳເລັດທີ່ປະຈັກຕາຄົນ.ດຽວນີ້,ຄະນະນັກກິລາຈີນພວມຕັ້ງໜ້າກຽມເຂົ້າຮ່ວມການແຂ່ງຂັນ.ທ່ານເຈຍຢົງ ຮອງຫົວໜ້າຄະນະນັກກິລາຈີນ ຮອງປະທານຄະນະກຳມະການໂອລິມປິກຄົນພິການຈີນສະເໜີໃຫ້ຮູ້ວ່າ:
"ຄະນະນັກກິລາຈີນທີ່ເຂົ້າຮ່ວມງານກິລາໂອລິມປິກຄົນພິການຄັ້ງທີ 12 ລວມມີ 287 ຄົນ,ເມື່ອທຽບໃສ່ຄະນະນັກກິລາຈີນທີ່ເຂົ້າຮ່ວມງານກິລາໂອລິມປິກຄົນພິການທຸກຄັ້ງທີ່ຜ່ານມາ,ຄະນະນັກກິລາຈີນຄັ້ງນີ້ມີຈຸດພິເສດເດັ່ນສາມຂໍ້ຄື:ໜຶ່ງແມ່ນມີຄົນເຂົ້າຮ່ວມຫຼາຍ;ສອງ,ລາຍການທີ່ຈະເຂົ້າຮ່ວມແຂ່ງຂັນກໍຫຼາຍ;ສາມແມ່ນມີນັກກິລາໃໝ່ເຂົ້າຮ່ວມຫຼາຍ."
ໃນຫຼາຍປີມານີ້,ໂດຍສະເພາະແມ່ນແຕ່ງານກິລາໂອລິມປິກຄົນພິການຊິດນີທີ່ຈັດຂຶ້ນເມື່ອປີ 2000 ມານີ້,ພາລະກິດກິລາຄົນພິການສາກົນໄດ້ຂະຫຍາຍຕົວໄວຫຼາຍ,ລັດຖະບານແລະອົງການຈັດຕັ້ງຂອງບັນດາປະເທດໄດ້ເອົາໃຈໃສ່ນຳກິລາຄົນພິການຫຼາຍຂຶ້ນ,ງານກິລາໂອລິມປິກຄົນພິການຖືກຖືເປັນງານກິລາຄົນພິການໃຫຍ່ໂຕມະໂຫລານກວ່າໝູ່ໃນໂລກ,ແລະໄດ້ກາຍເປັນຂີດໝາຍໜຶ່ງທີ່ສຳຄັນທີ່ປະເມີນລະດັບກ້າວໜ້າຂອງອາລະຍະທຳສັງຄົມ ການຮັບປະກັນສິດທິມະນຸດແລະລະດັບແຂ່ງຂັນ.ທ່ານເຕິ້ງຜູຝ່າງ ປະທານສະຫະພັນຄົນພິການຂອງຈີນເວົ້າວ່າ:
"ກິລາຄົນພິການທີ່ເປັນຊ່ອງທາງສຳຄັນສຳລັບໃຫ້ຄົນພິການອັນໄພສານເຂົ້າຮ່ວມການເຄື່ອນໄຫວສັງຄົມ,ບໍ່ພຽງແຕ່ສາມາດຫັດກາຍຟື້ນຟູສຸຂະພາບເທົ່ານັ້ນ,ຍັງຊ່ອຍໃຫ້ຄົນພິການສ້າງນິດໄສສູ້ຊົນຢ່າງຄົງທົນໜຽວແໜ້ນ ໃຫ້ມີຄຸນທາດທີ່ກ້າລື່ນກາຍຕົນເອງແລະມີຈິດໃຈຕ້ອນຮົບການທ້າທາຍ,ແລະຊ່ອຍໃຫ້ພວກເຂົາເຈົ້າເຂົ້າຮ່ວມຊີວິດສັງຄົມຢ່າງສະເໝີພາບ.ເຊື່ອວ່າ,ນັກກິລາຄົນພິການຂອງພວກເຮົາຍ່ອມຈະສະແດງໃຫ້ທົ່ວໂລກເຫັນຜົນສຳເລັດພັດທະນາອາລະຍະທຳກ້າວໜ້າຂອງຈີນແລະບຸກຄະລິກຂອງປະຊາຊາດຈີນດ້ວຍຄະແນນອັນດີເດັ່ນໃນງານກິລາໂອລິມປິກຄົນພິການອາແຕນ."
ນັບມາຮອດປະຈຸບັນ,ຈີນໄດ້ເຂົ້າຮ່ວມ 8 ອົງການກິລາຄົນພິການສາກົນແບບສັງລວມແລ້ວລວມທັງຄະນະກຳມະການໂອລິມປິກຄົນພິການສາກົນແລະຫຼາຍອົງການກິລາຄົນພິການສາກົນປະເພດລາຍດຽວຢ່າງເປັນລຳດັບ.ແຕ່ເຂົ້າຮ່ວມງານກິລາໂອລິມປິກຄົນພິການຄັ້ງທຳອິດເມື່ອປີ 1984 ມານີ້,ຜົນງານຂອງຄະນະນັກກິລາຈີນດີຂຶ້ນຢ່າງໜັກແໜ້ນ.ໃນງານກິລາໂອລິມປິກຄົນພິການຊິດນີປີ 2000,ຄະນະນັກກິລາຈີນຊີງໄດ້ຫຼຽນຄຳ 34 ຫຼຽນ,ເປັນທີ 6 ໃນການລຽງລຳດັບຫຼຽນຄຳ.ໃນງານກິລາໂອລິມປິກຄົນພິການຄັ້ງນີ້,ເປົ້າໝາຍຂອງຄະນະນັກກິລາຈີນແມ່ນຮັກສາອັນດັບທີ 6,ຍາດແຍ່ງໃຫ້ໄດ້ລື່ນກາຍເປົ້າໝາຍ,ຝຶກຝົນຫຼໍ່ຫຼອມຖັນແຖວນັກກິລາ,ສ້າງພື້ນຖານອັນດີງາມເພື່ອໃຫ້ໄດ້ຮັບຜົນສຳເລັດດີເດັ່ນໃນງານກິລາໂອລິມປິກຄົນພິການປັກກິ່ງໃນປີ 2008.
ກໍຄືກັບຄຳເວົ້າຂອງນາງຢຽວຈວນ ນັກກິລາຄົນພິການເວົ້ານັ້ນວ່າ:
"ຜົນງານໃນສະໜາມກິລາອາແຕນກ່ຽວພັນເຖິງພວກເຮົາຈະສາມາດໄດ້ຮັບຜົນງານທີ່ດີເດັ່ນໃນງານກິລາໂອລິມປິກຄົນພິການປີ 2008 ຫຼືບໍ່.ພວກເຮົາຍ່ອມຈະຖະໜອມກຽດສັກສີທີ່ປະເທດຊາດແລະປະຊາຊົນມອບໃຫ້ພວກເຮົາ,ຊັກທຸງຊາດ ເສບເພງຊາດໃນສະໜາມກິລາອາແຕນ,ເພື່ອຕອບສະໜອງຄວາມຮັກແພງແລະມິດຕະພາບອັນເລິກເຊິ່ງຂອງປະເທດຊາດແລະປະຊາຊົນທີ່ມີຕໍ່ຄົນພິການ 60 ລ້ານຄົນ."
|
|
|
